Keleng Ate Tuhan La Erkerin – Kerin
( Perngandungen 3 : 22 – 24 )
3:22 Tak berkesudahan kasih setia TUHAN, tak habis-habisnya rahmat-Nya,
3:23 selalu baru tiap pagi; besar kesetiaan-Mu!
3:24 “TUHAN adalah bagianku,” kata jiwaku, oleh sebab itu aku berharap kepada-Nya.
“ O Dibata, begikenlah pertotonku, ula tundalken pemindonku “ ( Masmur 55:2 ).
Adi si pepayo ku sekelewetta, maka perpudi wari enda cukup mbue kel erbahanca turah ateta ceda ras terganggu kel siakap kegeluhenta. Salah sada si so niarap kita banci jadi eme rehna bencana alam, si la kin ter elakken kita. Kejadin taneh longsor, banjir, angin puting beliung, banjir bandang, kepesengen, linur ras sidebanna. I sekitar Taneh Karo, labo kuakap tertutup mata ta… maka erupsi Gunung Sinabun seh asa genduari langa bo ngadi, ras langa bo ieteh seh asa ndigan maka ngadi. Menaken kin tahun 2010 (40 wari dekahna), emaka tahun 2013 seh paksa enda aktivitas Sinabung tetap denga “bergejolak”.
Mbue dampar si terganggu, masyarakat piga-piga kuta i sekitar Sinabung arus nadingken kuta ras jumana, lit deba enggo relokasi, lit deba tading denga bas “huntara (“hunian sementara”), deba ngontrak rumah, deba lawes merantau ku ingan sideban, ras sidebanna. Keadan ekonomi semakin sulit, juma-juma i sekitar Sinabung paksa enda langa banci ipergunaken alu maksimal, erpilihen sinuan-sinuan si banci isuanken, deba nggo nandangi rani, reh abu vulkanik, mis mate sinuan-sinuan e. Masa depan anak-anak pe cukup memprihatinken,
erkiteken cukup ndekah tading ibas posko-posko pengungsin, tentu erlajar pe labo banci bagi irumahna ndube.
Ngidah situasi enda, erbage-bage tanggapen, pendapat ibas masyarakat ras la terlepas pe ibas ngawan perpulungen kerna meletusna Sinabung enda. Deba ngatakenca, enda erkiteken enggo mbue dosanta i Taneh Karo enda. Bahkan pernah pe lit pengkotbah si ngatakenca,
maka enda kerina jadi erkiteken mbuesa dosa kalak Karo i Taneh Karo. Si paling ironis, lit si ngataken maka enggo nembeh nini pengian Gunung Sinabun, murkas ia, emaka lit ka nge si nehken cabal-cibalen, erbahan upacara-upacara “ritual” man nini pengian Sinabun ( banci saja lit ka nge kalak Kristen pe ikut ije ). Adi bagenda me pengakapta, la kinlah kari nambahi “bencana” si mbaru man banta ? Erkiteken ibas kita pe lanai siangkan, turah perpecahen. Banci saja pengakap sibagenda jadi erkiteken lit pengakap maka Tuhan lanai erkeleng ate nandangi kita, Tuhan enggo nadingken kita, emaka idarami me gegeh sideban siakap banci mulahi kita ibas persoalen enda nari.
Paksa bangsa Israel i buang ku Babil, perukuren sibagena pe mbue kel turah. Lit pengakap maka Tuhan enggo nadingken bangsaNa, lanai ate Tuhan keleng nandangi bangsa pilihenNa ndube. Turahna perukuren sib agenda ibas kalak Israel erkiteken beratna persoalen si man alanken. Emaka reh me Jeremia nuriangi pusuh ras perukuren bangsa Israel, gelah ula turah bencana baru. Kai kin bencana baru e..? Ibas kita ngalaken perbeben e, ndabuh ka kita ku bas dosa. Enda me bencana si mberatna kel, ija kita “ sirang ras Dibata “. Emaka nina Jeremia ibas ayat 22 “langa bo keri keleng ate Tuhan “..ras la kin pernah keri keleng ateNa man manusia. Ate Jeremia ngataken, kai si terjadi enda kerina arus iantusi alu “kacamata” kiniteken. Maka lit nge si terulin ibereken Tuhan arah erbage-bage kejadin si turah ibas kegeluhenta enda. Mari kita natap kubas dampar sideban…la pernah Tuhan lupa mereken matawari teptep erpagi-pagi, je nari sundut ibas ben wari. Guna ngantusi alu mbages kerna sienda, emaka ibas ayat 24 …man Tuhanlah ngenca kita erpengarapen, ula ka lit dibata-dibata sideban inganta erpengendes. Alu tegas ikataken Jeremia : “ Tuhan kap baginku, emaka man baNa ngenca aku erpengarapen”. Tentu endape banci jadi sada pergegeh man banta, ibas kita ngalaken erbage-bage bencana si lit i sekelewetta. Arah bencana enda pe banci kita nguji kinitekenta, ngasup tah lang kita guna ngalakenca. KEE GBKP No 36….” Saberlah tendingku, Tuhanndu reh…..kenca kelegon, Udan reh me kap “. Arah syair ende-enden enda banci sidat makna si mbages…labo lalap kita ibas kelegon, udan reh me.
Mberat kel siakap ngalaken akibat erupsi Sinabung, tapi arus lit pengarapenta maka ulihna pagi turah nge si mehuli. Taneh uga pe reh mehumurna, terjadi perubahan alam seh maka sinuan-sinuanta pagi reh jilena asa si enggona. Secara spiritual…adi si mberatna pe enggo ngasup kita ngalakenca, uga pa pe kecibal perbeben si bakal si man alanken kulebe wari enda, pasti enggo ngasup kita ngalakenca. Saja…ula kita pulah ibas tan Tuhan si perkeleng nari. Nina Rasul Paulus…” Sebab aku nggo tek maka lalit kai pe si ngasup nirangken kita ras keleng ate Kristus, subuk kematen tah kegeluhen, subuk malekat-malekat, tah penguasa-penguasa ras kuasa-kuasa i langit, subuk kai
si jadi genduari, bage pe kai si jadi pagin “ (Roma 8:38).
EVALUASI :
Enggo me sitingkatken kualitas persembahenta sada minggu enda? Uga kesaksinta ?
DISKUSI :
1. Uga nge kita “menanggapi” adi lit kenca bencana si terjadi sekelewetta ?
2. Khusus bencana Sinabun..Lit nge si idah kiniulin si bakal terjadi kulebe wari
enda ? Turiken kai saja nge ndia?
AKSI :
Ibas GBKP enggo lit ASIGANA (Anak Singuda Siaga Bencana) , ibas piga-piga Klasis enggo lit koordinatorna. Man si langa lit, gelah usulken ku Runggun seh ku Klasis gelah ibentuk min ASIGANA enda, guna nampati ngawan perpulungen di kune lit kenca bencana ibas sekitarta. Adi enggo terbentuk, melalui Runggun/Klasis, usulken man KPB (Komisi Penanggulangan Bencana) gelah ibahan pelatihen man anak-anak ta enda.
TOPIK PERTOTON SYAFAAT :
1. Gelah kerina ngawan GBKP ngasup ngidah si mehuli amin gia lit bencana nderpa kegeluhen.
2. Khusus notoken Taneh Karo simalem ibas ngalaken bencana Sinabun, gelah tetap ipegegehi Tuhan, pemerintah pe ngasup ngaturken kerina masyarakat ku si mehuli.
3. Si turah ibas perpulungen
USULEN LAGU :
1. KEE GBKP NO: 376:1,5
2. KEE GBKP NO: 36:1,2
3. KEE GBKP NO: 287:1,2
4. KEE GBKP NO: 306:1,4
Pdt. Dormanis Pandia, S.Th