GegehNdu Kap Gegehku
( Johanes 14 : 26 – 27 )

26 tetapi Penghibur, yaitu Roh Kudus, yang akan diutus oleh Bapa dalam nama-Ku, Dialah yang akan mengajarkan segala sesuatu kepadamu dan akan mengingatkan kamu akan semua yang telah Kukatakan kepadamu.

27 Damai sejahtera Kutinggalkan bagimu. Damai sejahtera-Ku Kuberikan kepadamu, dan apa yang Kuberikan tidak seperti yang diberikan oleh dunia kepadamu. Janganlah gelisah dan gentar hatimu.
“Malem atendu Ku tadingken; kemalemen ateKu Kubereken man bandu”

Sope Jesus nangkih ku Surga, erpadan IA kerna kerehen Kesah Si Badia si jadi penampat man doni enda. Jesus make kata allos ertina: ‘sideban.’ Maksud Jesus: ‘Ku bereken man bandu penampat si deban si kedudukenNa seri ras Aku.’ Jadi Kesah Si Badia e labo teruken asa Jesus, labo ka ganjangen asa Jesus. IA seri, apai pe e Dibata si telu sada. Lit dua hal si ituriken Jesus kerna Kesah Si Badia, eme :

1. Kesah Si Badia ngajari kita kerna kebenaren Dibata. Kebenaren Dibata e lit i bas diri Jesus Kristus. niNa Jesus; ‘”Aku kap dalan nandai Dibata, dingen ndatken kegeluhen. Ise pe la banci ndahi Bapa adi la arah Aku. Uga banci kalak reh ndahi Jesus ? alu erlajar arah Pustaka Si Badia (Kitab Suci), sebab ije isaksiken kerna Tuhan Jesus. Uga carana siangka si tertulis bas Pustaka Si Badia? Kesah Si Badia si peangkakenca man banta, seh maka siangka kai isi Pustaka Si Badia. Alu bage Kesah Si Badia si mabai kita guna reh ku Tuhan Jesus. Arah Tuhan Jesus sitandai me Dibata.
2. Kesah Si Badia nampati kita nggeluh i bas kebenaren. Ngasup kita ngenen ras nandai dirinta, meteh kelemahen-kelemahenta ilebe-lebe Jesus. Kesah Si Badia mabai caranta rukur seh maka si eteh apai si payo guna idalanken ras apai si man tadingenken. Kesah Si Badia e nge erbahansa perukurenta terkelin. Kesah Si Badai mereken gegeh man banta ngelakoken si mehuli. Tupung lit rencananta si jahat, janah ateta ngelakoken rencanata e, isingetken Kesah Si Badia i bas pusuhta kata-kata Tuhan Jesus, sierbahansa si tadingken rencana si jahat ndai. Eme tandana Kesah Si Badia erdahin.

Pendahin Kesah Si badia eme maba kemalemen ate (“damai sejahtera”) . Malem ate labo ngatakensa lait perbeben, persoalen, sakit-pinakit, kesuliten ras sidebanna. Kemalemnen ate naluken kerina persoalen si lit. Gegeh guna naluken persoalen e eme Kesah Si Badia. IA ringan i bas setiap pusuh kalak si tek lako nampatisa maba persoalen ras perbeben si mberat. Kesah Si Badia e gegehen asa kerina persoalenta, IA la teriket alu ruang ras waktu, alu erbage cara Kesah Si Badia nampati kita gelah ngasup naluken kerina keguluten –keguluten doni enda. Kesah Si badia e seumpama sekalak pengacara si mpeseh kerina persoalenta man hakim. Sekalak pengacara meteh kerna hukum, ietehna aturen-aturen si payo (sistem yang legal), ras lit kengasupenna guna nehken pendapat alu payo. Banci saja labo sieteh nehken nuriken persoalenta alu kata-kata si payo man Dibata, kai pe sibelasken, uga siakap payo melaskenca, ije me Kesah Si Badia erdahin i bas pusuhta mpekena kata-katanta gelah payo i lebe-lebe Dibata. Bage pe IA erdahin nampati kita i bas kelemahen-kelemahenta.

Tuhu Kesah Si Badia e ergegehkal nampati kita i doni enda, tapi labo terjeng je ngenca, kerina pagi kalak si tek e ipekeke Dibata alu gegeh kuasa Kesah Si Badia, bali ras IA empekeke Jesus Kristus ras empekundul IA i bas kemuhenNa. I bas kekeken ras kenangkihen Tuhan Jesus ku Surga banci si idah uga gegehna kuasa Kesah Si Badia e, labo terturiken alu kata-kata. Kesah Si Badia eme gegeh Dibata si bergerak (aktif) naluken kematen ras si mpekeke kita bas si mate nari seh maka kita pe pagi nangkih ku surga. Gegeh Dibata e kange si iberekenNa man banta guna ngelakoken sura-suraNa i bas kegeluhenta i doni enda. Emaka ninta, gegehNdu kap gegehku.

EVALUASI :
Uga kerna aksita PJJta silewat ?

DISKUSI :
1. Turiken pengangkanndu kerna Kesah Si Badia e me gegeh Dibata!
2. Kai-kai saja pendahin Kesah Si Badia i bas kegeluhenta si teptep wari?
3. Kai kira-kira si jadi “penghambat” maka megati la teridah pendahin Kesah Si Badia e i bas kita?

AKSI :
I bas sada minggu enda situduhken arah perbahanennta, mulai bas jabu, bas ingan erdahin, ras bas perpulungen maka pusuhta iingani Kesah Si Badia!

USULEN LAGU :
1. KEE GBKP NO: 118:1,2
2. KEE GBKP NO: 245:1-3
3. KEE GBKP NO: 197:3,4 4. KEE GBKP NO: 187:1,3

PERTOTON SYAFAAT :
1. Gelah perpulungen nandai Dibata arah pendahin Kesah Si Badia.
2. Gelah perpulungen nikapken pusuhna tetap iingani Kesah Si Badia.
3. Si turah bas perpulungen.

Pdt. Nurbety Br Ginting, M.Th