KERINA PAGI IA NANDAI TUHAN

Heber 8: 7 – 13

Ibrani 8: 7 – 13

8:7 Sebab, sekiranya perjanjian yang pertama itu tidak bercacat, tidak akan dicari lagi tempat untuk yang kedua.
8:8 Sebab Ia menegor mereka ketika Ia berkata: “Sesungguhnya, akan datang waktunya,” demikianlah firman Tuhan, “Aku akan mengadakan perjanjian baru dengan kaum Israel dan dengan kaum Yehuda,
8:9 bukan seperti perjanjian yang telah Kuadakan dengan nenek moyang mereka, pada waktu Aku memegang tangan mereka untuk membawa mereka keluar dari tanah Mesir. Sebab mereka tidak setia kepada perjanjian-Ku, dan Aku menolak mereka,” demikian firman Tuhan.
8:10 “Maka inilah perjanjian yang Kuadakan dengan kaum Israel sesudah waktu itu,” demikianlah firman Tuhan. “Aku akan menaruh hukum-Ku dalam akal budi mereka dan menuliskannya dalam hati mereka, maka Aku akan menjadi Allah mereka dan mereka akan menjadi umat-Ku.
8:11 Dan mereka tidak akan mengajar lagi sesama warganya, atau sesama saudaranya dengan mengatakan: Kenallah Tuhan! Sebab mereka semua, besar kecil, akan mengenal Aku.
8:12 Sebab Aku akan menaruh belas kasihan terhadap kesalahan mereka dan tidak lagi mengingat dosa-dosa mereka.”
8:13 Oleh karena Ia berkata-kata tentang perjanjian yang baru, Ia menyatakan yang pertama sebagai perjanjian yang telah menjadi tua. Dan apa yang telah menjadi tua dan usang, telah dekat kepada kemusnahannya.

8:7 Bicara la lit lepakna i bas padan si pemena, labo min ndai perlu padan si peduaken.
8:8 Tapi Dibata ndatken salah i bas bangsaNa, bagi si ikatakenNa i bas Pustaka Si Badia, “Nina Tuhan, ‘Reh me warina Kubahan sada iketen padan si mbaru man bangsa Israel, bage pe man suku Juda.’ 

8:9 Padan e labo pagi bali ras iketen padan si enggo Kubahan man nini-ninina nai asum Kubabai ia ndarat i taneh Mesir nari. Nini-ninina e la patuh nandangi padan si Kubahan man bana, e me sabapna maka la ia Kuperdiateken nina Tuhan.

8:10 Genduari, enda me padan si Kubahan man kalak Israel i bas wari-wari si reh nina Tuhan: Kutamaken me Undang-undangKu ku bas ukurna, janah Kusuratken i bas pusuhna. Aku me jadi Dibatana janah ia me jadi bangsangKu.

8:11 Lanai bo pagi sekalak pe perlu ngajari temanna sada bangsa ntah ngataken man temanna sada kuta, ‘Tandai min Tuhan.’ Sabap kerina pagi ia nandai Aku, i bas si kitikna nari seh ku si mbelinna.

8:12 Kualemi pagi kerina salahna, janah Kulupaken dosa-dosana.”

8:13 Alu ngerana kerna padan si mbaru e, icap Dibata maka padan si pemena enggo male; janah kerina si enggo male dingen la erguna e minter me masap.

(Mengenal Tuhan Melalui Pemuritan ‘Gerak dan Pelaksanaan’)

MODEL PJJ: KESAKSIN KATA PERLEBE

Adi lit kalak nungkun, tandaindu nge presiden Prabowo? Tentu jawabenta, kutandai. Rusur ia kuidah i bas tv, bage pe i bas media sosial. Pidato-pidatona pe rusur ku begi. Tapi pernah nge kam si salamen ras Prabowo? Banci saja buen kita ngatakenca lenga pernah. Pernah nge kam nuri-nuri man bana pedempak ayo kerna perbeben geluhndu? Jabapenta banci saja lenga pernah. Tandaindu nge Prabowo bagi anak-anakna nandai ia? Pasti ninta lang. Jadi lit tingkatenna i bas kita nandai sekalak jelma. Bage ka pe i bas nandai Dibata, lit tingkatenna.

ISI

Penulis kitab Heber erbahan sada perbandingen uga bangsa Israel nandai Dibata erpalasken kitab Keluaren 24:1-8 ras Jeremia 31:31-34. Iturikenna maka Dibata dua kali erbahan perpadanen man bangsaNa, si igelari padan si pemena ras padan si peduaken. Tentu duana perpadanen e lit perbedanna labo terjeng waktuna si la seri tapi kualitas perpadanen e. Padan sipemena ikuhi i bas padan sipeduaken. I bas tabel i teruh enda isuratken kerna perbedan perpadanen e :

No.	Padan Si pemena : Keluaren 24:1-8	Padan Si peduaken: Jeremia 31:31-34
1.	Musa nuriken perentah ras peraturen i bas Tuhan nari guna kiniraturen bangsa e, e maka  nina  bangsa  Israel ngaloi: nggit kami ngaloken ras matuhi kerina perentah ras peraturen Tuhan e.	Tuhan namaken undang- undang i bas ukur bangsaNa. IsuratkenNa Undang-undang e i bas pusuhna. Tuhan           jadi Dibata man Israel, ras Bangsa Israel e jadi bangsaNa.
2.	Bangsa Israel la patuh, amin pe icikep Tuhan tanna, nilah ukurna man si deban. La ia setia man Tuhan. Hubungen manusia ras Tuhan terjeng ndalanken undang-undang.	Tuhan mereken pengalemi dosa man bangsaNa ras ngelupaken kejahatenna. Amin bangsa Isarel la setia, Tuhan e tetap setia.
3.	Padan sipemena e la sempurna. La lit dalanna selamat erkiteken ndalanken undang-undang. Sabab labo lit  bangsa  Israel  situhu- tuhu ndalankensa.	Keselamaten e perkuah ate, labo arah usaha manusia ndalanken undang-undang. Dibata jine simereken keselamaten   e   man Manusia.
4.	Terbatas man bangsa Israel, ras bangsa Juda si enggo terpecah.	Mpersadaken                                                ras ndameken siterpecah, berlaku man kerina jelma.
5.	Lit terpuk-terpuk entah golongen si la seri. Lit kalak Farisi sipatuhkal ndalanken Hukum Taurat. Bas kepatuhenna                        enggo ibahanna pembatasen, la banci jumpa ras kalak sitading i kuta-kuta/dusun si la melala pengangkanna kerna            Undang-undang. Anakna la banci erjabu ras anak sitading i kuta-kuta. Si mekelekna, nukur barang kalak si i kuta nari pe la banci, ndayaken barangna man kalak si i kuta pe la banci.	Lanai lit pemisahen, lanai lit terpuk-terpuk entah golongen. Kerina seri i lebe-lebe Dibata, kalak sikitik ras kalak simbelin kerina                                    ngaloken keselamaten i bas Tuhan nari. Pintu-pintu Sinai tertutup man kalak hina, gundari enggo ibukaken kerina. Tuhan la mbedaken golongen, suku, agama, erpemeteh entah la erpemeteh,  bayak  entah musil. Kerina keleng ateNa.
6	Patuh ndalanken undang- undang gelah ula kena ukumen	Patuh ndalaken undang- undang erkiteken keleng ate man Tuhan.

 

Bagenda me penulis kitab Heber nuratken perbedan e, gelah tangkas man singogesa maka Dibata mpelimbarui perpadanen man bangsaNa. Arah perpadanen sipeduaken e itandai bangsa Israel me pagi Tuhan si dem keleng ate. Si ngalemi salah dosa bangsaNa dingen sitetap setia man bangsaNa.

I bas Pustaka si Badia lit perpadanen sepihak. E me perpadanen si ilakoken Dibata man bangsaNa. Dibata jine sierpadan man diriNa lako engkelengi bangsaNa. La lit i je arih- arih entah kesepakaten. I bas Padan sindekah umpamana perpadanen Dibata lanai erbahan kelenglengen doni enda kenca kejadin banjir simbelin. KatakenNa man Nuh lanai ndigan pe kubahan bagi sienggo enda. Bukti perpadanenna ibahanNa benteha. I bas padan simbaru, padanNa nelamatken doni enda arah AnakNa sitonggal Jesus Kristus. Labo man ise pe Ia erjanji seakatan man diriNa jine. IkorbankenNa AnakNa gelah kerina bangsa doni enda terkelin. I bas bahasa Junani perpadanan sepihak e igelari diatheke: ertina sierbahan perpadanen e Dibata/prakarsa Dibata, la lit campur tangan manusia janah persyaraten perpadanen e itanggungNa sekalak. Manusia terjeng ngaloken perpadanen e.

PENGKENAINA

I bas Padan sipeduaken e tangkas sitandai Tuhan, karakterNa raspendahinNa. Ia setia, ingetna lalap padanNa ras dalankenNa kai sienggo ipadankenNa. Tuhan e dem alu keleng ate, nggit ngalemi salahta amin megati kita nilah i bas sura- suraNa nari. I bas diri Jesus Kristus itebusiNa kita kerina. Keleng ateNa la mbeda-bedaken kita ras si debanna. Tuhan e erngena ate ku bas perdamen, erngena ate ku bas persadan.

Payo nge sitandai Tuhan adi enggo sieteh karakter ras pendahinNa man banta ras man doni enda? Kerina pagi nandai Tuhan, enda sijadi perayaken kalak Kristen. Nandai Tuhan e lit tingkatena:

Pemena: nandai Tuhan e alu meteh uga biakNa/karakterNa, ras kai si idahikenNa. Peduaken: lit hubungen ras IA. Desken sekalak kandu-kandu, nggit kita nuri-nuri man baNa, kerna kecibal geluh ras perbebenta. Peteluken: lebih asa kandu-kandu, ertina  lit  hubungen  si  intim  (desken  hubungen  sekalak perbulangen ras ndehara) lanai lit jarak, la lit nari si terbuni. Situhuna ndauh kal nge bagesen penandai Tuhan kita asangken penandaita Tuhan e, tapi arah hubungen ta sitep-tep wari ras IA subuk arah ngoge, ngukuri, dingen nggeluh i bas kataNa, erbahanca tambah lalap penandaita kerna IA. Kalak sinandai Tuhan lanai ia mbiar nuri-nuri, ercakap-cakap dingen megiken sora Tuhan arah pertoton. Kenca sitandai Tuhan e lit lalap ukur ersuruh ndahiken dahin-dahin perpulungen, aktif i bas kegiaten gereja dingen lalap ndarami ras ndalanken sura-sura Tuhan segedang geluh. Enda me igelari proses pemuritan. Ulihna perpulungen nggeluh sikeleng-kelengen, mediate sada ras si debanna, dingen nggit ngelai temanna.

DISKUSI :

1. Uga kira-kira tanggapenndu, tupung ipelimbarui Tuhan padanNa sipemena ku bas padanNa sipeduaken?
2. Uga nge sedekah enda hubungen pribadindu ras Tuhan? Saksikenlah!

USULEN ENDE-ENDEN:

1. Nyanyian Rohani: Kami berkumpul memujiMu menyembahMu yang kudus
2. KEE GBKP 333: 1, 3 Tuhan e tuhu melias
3. KEE GBKP 333: 4, 5 Tuhan e tuhu melias
4. KEE GBKP 432: 1 – 3 KataNdu Tuhan

DAFTAR BACAAN :

1. Pemahaman Alkitab setiap hari Ibrani, william Barclay, BPK Gunung Mulia, 2000
2. Kekristenan Sejati, Paul Caram, Ph.D, Voice of Hope, 2016
3. Called to be Faithful, Arman Barus, Scripture Union Indonesia, 2019.

Pdt. Nurbety br Ginting, M.Th
HP/WA: 082168696383