Perbulangen Mujiken Ndeharana

(Bapa Romantis)

Ogen   : Kuan-kuanen 31: 28b – 29

Amsal 31: 28 – 29

31:28 Anak-anaknya bangun, dan menyebutnya berbahagia, pula suaminya memuji dia:
31:29 Banyak wanita telah berbuat baik, tetapi kau melebihi mereka semua.

31:28 Kerina anakna ngataken bujur man bana, dingen perbulangenna pe mujiken ia.

31:29 “Nterem diberu si mehuli,” nina perbulangenna, “tapi i babo si e kerina kam si mehulina.”

Tema   : Perbulangen Mujiken Ndeharana

Tujun   : Gelah Mamre:

• Meteh kerna bapa si romantic
• Ngelumbaken jadi bapa si mujiken ndeharana ras anakna

Metode            : Sharing praktek memuji alu kata ras perbahanen

I. KATA PENARUH

Sekali jadi i bas sada perpulungen jabu-jabu nungkun me si nehken kata Dibata man perpulungen nina: pernah nge ipujikenndu ndeharandu mamre? lit sekalak mamre ngaloi: pernah. Uga nindu mujikenca? nina mamre ndai: kau lah bulanku kau lah bintangku. Tawa kerina si pulung e, rempet ngerana ndehara mamre ndai, labo pernah pujikenna aku nina. Ertambahna tawa kerina si pulung e. Lit mamre nggo dingen megati mujiken ndeharana, lit ka sung-sung erkiteken lit perluna, lit ka mungkin la nggo mujiken ndeharana. PA-ta wari enda mabai kita erlajar jadi bapa si romantis man ndeharana alu tema Perbulangen Mujiken Ndeharana.

II. URAIAN TEKS

Kitab Kuan-kuanen pasal 31, eme kata si ibelasken nande Raja Lemuel man anakna: Ola buang-buangndu gegeh ras duit man diberu-diberu. la patut minem anggur. Raja ngkapiti

kalak si la ngasup nampati dirina ras ngkawali hak kalak musil. Kata ajar enda melala nuriken kerna orat geluh si mehuli gelah ola ndabuh ku bas hal-hal si la payo. Banci jadi kecibal selaku Raja erkiteken lit kuasa mesukah ndeheri diberu-diberu, banci ka pe ideheri diberu diberu erkiteken lit jabaten, erta ras mehaga.

Jenari iterusi kerna ndehara si cerdik. “Andiko seh kal serana muat ndehara si cerdik! sabab ndauh kal ia ergan asangken permata si erdilap”. La si eteh pastina kata ajar enda itujuken man ndehara Raja Lemuel ntah kata enda ncidahken isi pusuh nande Raja Lemuel singarapken anakna gelah erjabu ndatken ndehara si cerdik. Ndehara si cerdik ngelakoken simehuli man perbulangen ras anakna. Subuk i bas ngelai jabu, ndukung dahin perbulangen, ndukung perbeliten jabu. la jadi penalemen perbulangen, erbintuas dingen tutus erdahin, melumbar tanna mere man kalak musil. Ndehara si cerdik manjar-anjar ngerana dem alu kepentaren. Adi bagenda perbahanen ndehara si cerdik tentu malem ate perbulangen ras anak-anakna, mahanca dame ras mehuli perdalanen jabu.

Arah perbahanen ndehara si cerdik anakna ngataken bujur man bana dingen perbulangenna mujiken ia. Anak ngataken bujur e me sada ungkapan (apresiasi) man nandena si erkeleng ate. Nggejabken maka nandena si mupus ia, si pebelin-belin ia mulai tubuh. Perbulangen mujiken ndehara perbulangen ncidahken keriahen ukurna ngidah kai si ibahan ndeharana man dirina bage pe man anak-anakna. Muji ndehara salah sada tanda ncidahken keleng ate, ngergai ndehara i bas kelatihen ras dukungenna guna keluarga. Mujiken ndehara pe banci peturah hubungen reh harmonisna (harum dan manis) bas jabu. Mujiken ndehara pe nambahi semangat man bana, mereken dukungen simehuli nandangi kai si ilakoken ndehara. Mujiken ndehara pe jadi cara ngidah perbahanen ndehara banci i usih guna kiniulin ras kemajun jabu. Bagi nina kuan-kuan: “Di balik kesuksesan suami ada istri yang luar biasa mendukung”.

Rupa-rupa pujin banci ipeseh perbulangen nandangi ndeharana arah kata-kata tulus kerna penampilenna, kebeluhenna, kiniulinna. Arah perbahanen si nyata alu nampati dahinna, mpetetap ukurna, la erbahan latih ras gulut ukurna. Arah mereken apresiasi alu mereken hadiah, erbahan “surprise”, arah mereken dukungan ras si debanna.

III. PENGKENAINA

Mujiken ndehara melala gunana nandangi kiniulin jabu. Perbulangen si nggit mujiken ndeharana man dirina jine nambahi keriahen, tergejab kepuasan emosianal sabap payo akapna perbahanen ndeharana. Bangga ia kerna ndeharana dingen meriah akapna rusur ngidah perbahanen ndeharana. Alu bage Mamre pe tetap ngkelengi ras ngergaken ndeharana dingen setia man bana. I inget dingen iergaina kiniulin Tuhan si nggo mereken teman geluh seh Dibata nirangkenca alu kematen. Man ndehara, adi ipuji mahan bana meriah ukurna, reh semangatna ia pekena-kena jabuna, reh mbuena turah ide-ide ras cara uga erbahanca meriah iakap perbulangenna ras anakna. “Satu pujian dapat menimbulkan banyak kebaikan”.

Pujin man ndehara bage pe man anak alu tulus e nehken pengergan, tanda mediate kerna perbahanen ndehara ras anak. Mabai sehat perukuren ras kula (tubuh dan jiwa). Tapi kune kai pe ilakoken ndehara labo enggo ipujiken banci la iangkana payo ntah lang si ilakokenna, cocok ntah lang si ibahanna.

Mujiken ndehara banci jadi salah sada cara komunikasi si mehuli, peturah siangkan si ergan dingen sikeleng-kelengen. Adi komunikasi mehuli man ndehara ras anak, emosi ras la siangkan labo mesukah jadi dingen banci iuraki. Jabu pedame malem me ate.

IV. DISKUSI

1. Rikutken teks PA enda engkai maka perbulangen mujiken ndeharana?
2. Turiken dingen “sharing”ken perbahanen Mamre mujiken ndeharana alu tulus?

V. USULEN LAGU-LAGU:

• KEE GBKP No. 317: 1-2 Sipuji Tuhan arah geluhta
• KEE GBKP No. 248: 1 Si Njabuken Bana
• KEE GBKP No. 124: 1 – 3 Ipasu-pasu Tuhan Dibatandu
• KEE GBKP No. 272: 1 (Persembahen) Ise kin kami enda o, Bapa

Pdt. Karvintaria Br. Ginting, S.Th., M.M.
HP/WA: 0812.6359.640