
Rangap Nandangi Duit Sumbul Kejahaten
Teks : 1 Timotius 6: 6-10
6:6 Tuhu, agama erbahanca kalak bayak, adi puas iakapna erkiteken kai si lit i bas ia.
6:7 Lit kin tah kai gia sibaba ku doni enda? Lang! Banci ntah kai gia sibaba ndarat i doni enda nari? Lang!
6:8 E maka cukup min siakap adi lit nakanta ras uista.
6:9 Kalak si ersura-sura bayak ndabuh me ku bas percuban janah bene me ibahan erbage-bage sura-sura si bodoh dingen jahat, si erbahanca kalak gedap dingen kernep.
6:10 Sabap merangap nandangi duit e me sumbul kerina kejahaten. Enggo lit piga-piga kalak si merangap nandangi duit lanai tetap i bas kiniteken janah gulut ukurna ibahan erbage-bage kecedan ate.
Tema : Rangap nandangi duit sumbul kejahaten
Tujuan : Gelah Mamre:
- Meteh erti bayak (puas) erkiteken kai si lit
- Ndarami duit alu benar
KATA PENARUH
Salah kin jadi kalak bayak? Tentu lang! Pustaka Sibadia pe labo melarang kalak bayak. Sabab Abraham pe ikataken sekalak si bayak namura (Kej. 13:2). Job ope reh kiniseran ras kenca kiniseran ikataken kalak bayak (Job 1:1-3; 42:12-13), rsd. Sabab di mbue duit ta banc imbue ibahan simehuli: jadi donatur Pembangunan gereja, muat bagin er-PI (Pekabaran Injil) arah donatur tenaga detaser, menopang pendanaan program-program gereja, nampati keluarga ras ise saja si perlu man sampaten, rsd. Emaka kalak Kristen arusna kerina rajin erdahin gelah la saja tercukupi keperlun tapi pe gelah banci jadi pasu-pasu. Saja ngenca Pustaka Sibadia pe mpersingeti kita segelah ula salah ncibalken duit ras cara muatca duit e, sabab duit e arah dampar sideban banci ka jadi alat maba jelma reh dauhna ras Dibata.
URAIAN TEKS
1 Timotius 6:6-10 eme bagin surat Paulus si pemena si nialamatken man Timotius. Judul perikop si ibahan LAI 1 Timotius 6 eme “Pengajaren si la tuhu ras kinibayaken si tuhu-tuhu”. Penekanenna eme gelah Timotius metenget kerna pengajaren si la tuhu bagepe kerna kebayaken si tuhu-tuhu.
Kepeken lit turah pengajaren si la payo i Tengah perpulungen eme pemahamen agama dalan ncari kebayaken. Akibatna turah perubaten, cian ate, cekurak, sangka-sangkan si la mehuli (ay. 4). Eme sababna arah suratna, Paulus mpersingeti Timotius sekaligus mereken pengajaren kerna sikap ras ndarami duit. Ibas ayat 6 Paulus ngueken maka agama erbahanca kalak bayak, (tapi) adi puas iakapna erkiteken kai si lit ibas ia (disertai rasa cukup). Kai ertina enda? Sipemena, agama arah ibadah arusna gambaren pengataken bujurta man Tuhan; sipeduaken, eragama labo guna nehken tuntuten-tuntuten man Dibata gelah geluhna sikap; sipeteluken, eragama labo guna membanding-bandingken dirinta ras ngawan perpulungen sideban; sipempatken, eragama e arus bagi siu sur isingetken “ora et labora” (ertoto ras erdahin). Ertina labo saja asik bersekutu, diskusi, ertoto ibas ruangen ibadah tapi pe arus beribadah e arah pendahinta, arah kerina dampar geluhta. Adi bage tentuna eragama labo nari soal kuantitas kai sinialoken kita ntah kai sidat kita arah pendahinta, tapi pe secara kualitas eme sitik gia adi pasu-pasu Tuhan cukup ras mereken keriahen ras kemalemen ate ibas geluhta, ibas jabunta. Sebalikna, mbue gia ulihna tapi la lit keriahen ras dame. Tole pebagesi pemahamen e, Paulus pe ngingeti realitas kehadiren setiap jelma ku doni enda (ay. 7-8). Kai pe labo babana waktu tubuh ku doni enda bagepe ndarat i doni enda nari (mate). Adi bage maka setiap jelma arusna mensyukuri si lit ibas ia. Ertina mbue ulih sidat arah pendahin ras usaha sinilakoken: Puji Tuhan! Adi langa pe bagi siniarapken: Haleluya ka! Jadi mbue ulih ntah pe sitik tetap ngataken bujur man Tuhan.
Tole ibas ayat 9-10 maka jelas penekanenna labo kepe duit si jadi masalah tapi “cinta uang” (merangap nandangi duit). Duit bersifat non-moral janah duit e sarana nehken sura-sura. Emaka duit labo erbahan kejahaten, tapi sikap jelma nandangi duit e nge pereh kejahaten. Nina Paulus “merangap” nandangi duit e nge sumbul kerina kejahaten.
Selain turahna mbue kejahaten, si paling fatal ternyata akibat merangap nandangi duit e (ay. 10b), eme (1) Lanai tetap ibas kiniteken, (2) Gulut ukurna ibahan erbage-bage kecedan ate. Ikataken fatal erkiteken ibas perspektif Kristen lit 2 (dua) hal paling penting ibas kegeluhen enda eme kemalemen ate (kebahagiaan) ras keselamaten. Kebahagian berarti kebalikan kecedan ate, keselamaten hanya banci ialoken arah kita tetap ibas kiniteken man Jesus Kristus. Alu bage mbue duit labo jaminen lit kebahagian ntah kemalemen ate, apai ka keselamaten.
PENGKENAINA
Secara umum rangap nandangi duit/cinta akan uang erbahanca sekalak jelma lanai peduli uga cara ndatken duit e, sipenting dat duit ntah pe alu kata sideban menghalalkan kerina cara gelah dat duit. Adi enggo bage la akapna masalah ceda pe perkade-kaden, bahkan bene pe kalak. La akapna masalah lawes ku kalak beluh (dukun/paranormal) ntah ku ingan-ingan kramat gelah banci mbue dat duit aminna gia ia kalak Kristen, bagepe jadi agen ntah ngedarken obat-obat terlarang, rsd. Sipenting dat duit. Termasuk judi online si genduari mbue jerumusken kalak kubas mbue masalah: percekcokan ibas rumah tangga, lit deba musuh pasangenna erkiteken la nggit nebusi utang erkiteken judi online, nangko/korupsi, ngerampok, rsd.
Piga-piga ciri nuduhken kalak “Cinta akan uang” (merangap nandangi duit):
- Katawari pe belas-belasna duit
- Ibas berinteraksim siipikirkenna untung ras rugi
- La pernah lit kata cukup/ la erpuas-puas ibas geluhna. Padahal penatap jelma sienterem kai pe lanai lit sikurang ibas ia.
- Ngenehen ras memposisiken kalak sideban sue ras statusna.
- Adi langa erjabu ndarami pasangen arus bayak. Rsd
Payo kerina jelma perlu duit. Tapi arus icibalken maka duit e labo tujun tapi hanya alat. Emaka selaku Mamre arus jelas tujunta nggeluh eme keselamaten (1 Pet.1:9). Enggo isingetken maka duit e labo jahat, tapi rangap nandangi duit e nge. Emaka arah PA Mamre enda, selaku Mamre kita ipersingeti gelah ibas erdahin ndarami duit la arah cara si la ngena ate Dibata. Mbue dahin sibanci idahiken sue ras kecibal kita tading, terlebih ibas jaman genduari bagi mbuka channel Youtube/Youtuber, bisnis e-commerce (jual beli lewat media elektronik-internet), ija alu litna internet simemadai, kita banci ngelakoken transaksi ntah jual beli i rumah nari eme ndayaken daya-dayanta arah internet. Adi la lit barang siman dayanta banci jadi dropshipper eme kita memasarkan produk ibas pihak supplier man calon kunsumen, hidroponik, rsd.
DISKUSI
- Oge tole ayat 10 jenari diskusiken engkai maka “merangap nandangi duit eme sumbul kejahaten”? Jenari bereken contohna.
- Kai nge penyebabna maka judi bagepe judi online mbue peminatna ras lalap denga la terpengadi? Jenari kai saranndu gelah Mamre la ikut-ikuten erjudi bagepe judi online?
Usulen Lagu
- KEE GBKP No. 270: 1,3
- KEE GBKP No. 309: 1-2
- KEE GBKP No. 249: 1,5
- KEE GBKP No. 354: 1- (persembahen)
Pdt. Sabar S Brahmana, S.Th., M.A.
HP: 0813 2266 2242