DIBATA KECION DINGEN GEGEHTA
Masmur 46:1-6
(Teologi Bencana Alam)
Allah, kota benteng kita
1 Untuk pemimpin biduan. Dari bani Korah. Dengan lagu: Alamot. Nyanyian.
2 Allah itu bagi kita tempat perlindungan dan kekuatan,sebagai penolong dalam kesesakan sangat terbukti.
3 Sebab itu kita tidak akan takut, sekalipun bumi berubah,sekalipun gunung-gunung goncang di dalam laut;
4 sekalipun ribut dan berbuih airnya,sekalipun gunung-gunung goyang oleh geloranya.Sela
5 Kota Allah, kediaman Yang Mahatinggi,disukakan oleh aliran-aliran sebuah sungai.
6 Allah ada di dalamnya, kota itu tidak akan goncang;Allah akan menolongnya menjelang pagi.
A. PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden KAKR
- Janah kerina perdalanen PJJ enda banci iubah (imodifikasi rikutken perluna).
B. PERPULUNGEN JABU-JABU/ PERPULUNGEN JABU
Rende: KEE No. 470 : 1 “Anem Gia Deleng Mundu-Undu
(Ibabai Moria/Nande)
Anem gia deleng mundu-undu, ‘tah udan abu mehantu
Tetaplah ukurta ula mbiar, lit kap Tuhan si nemani
Keleng ateNa labo erleka, man kita k’rina anakNa
Anem mbue perbeben ngupuh, ‘tah geluh la bagi ukur
Pindo gegeh arah pertotonta, man Tuhan si mada geluh
PadanNa jine tetap man banta, labo kita tadingkenNa
Pengasup kami dage o Bapa, ngalaken ras ngalokenca
Kerina kecibal geluh enda, perban liasNdu o Bapa
ERTOTO (IBABAI BAPA)
RENDE: KEE No. 468: 2 “TUHAN DEMI AKU SALU KATANDU”
(IBABAI MORIA/NANDE)
Tuhan demi aku salu KataNdu 2X
Pusuhku bagi tambe ku baba ku pancurNdu
Tuhan demi aku salu KataNdu
NGOGE KATA DIBATA : Masmur 46:1-6 (IBABAI ANAK)
RENUNGEN
Tema : Dibata Kecion Dingen Gegehta (Teologi Bencana Alam)
Kebiaren ngerimrim kegeluhen kalak Karo menaken tahun 2010 erupsi pemena deleng Sinabung. Kelang telu tahun, kebiaren reh sangatna erkiteken ngolihi erupsi tahun 2013 seh genduari seh makana piga-piga kuta iteruh deleng e arus ngongsi, nadingken kuta inganna tading. Lenga erkedungen sada, reh ka virus corona tahun 2020. Masa suram, masa si ikeleweti kegelapan. Kegeluhen i teruh awih-awih kematen. Kematen enda kerina ngkuasai perukuren manusia tupung bencana alam lokal ras doni nderpa kegeluhenna. Iluh mambur, ceda ate, getem pusuh, lolah, labuh, bene ukur, lanai eteh kai nari si man bahanen, pengidah gelap kerina, gendek ukur, bene erti kegeluhen erkiteken kematen i bas sektor kesehaten, ekonomi, sosial, budaya bage pe ibadah. Erbage-bage dalan pemberontaken, dalan la ngasup ngaloken kinata kegeluhen, dalan-dalan si meneken kegeluhen si ilakoken
manusia. Perukuren si la erlayas, pusuh si la erturih, perngandungen si la rujung, kematen jadi pilihen ndungi kebiaren. Uga ninta kalak si erkiniteken man Tuhan ngidah, natap cibal bencana alam si reh nderpa kegeluhenta enda?
Bencana Alam si jadi, ncidahken manusia la ergegeh, terbatas kap desken awih tupung karaben, melus desken dukut. Manusia la ngasup njamini keselamaten kegeluhen manusia alu serta. I bas si enda me maka Anak Korah arah ende-enden si isuratkenna enda mpersingeti si lupanta, si mungkin la terukurken kita kerna Tuhan kecion dingen gegehta, i ja lit kap lau mbelin si mereken keriahen man kuta Dibata, kuta ingan tading Dibata si meganjangna. I je kap Dibata ringan, e maka labo ndigan pe kernep kuta e, sabap iberekenNa penampat tupung
matawari pultak (ay.5-6). Sada perukuren si luar biasa i bas mata kiniteken nari. Umumna kita rukur kerna bencana alam si nderpa kegeluhenta enda nuduhken maka Dibata e kejam, jahat, la lit kekelengen. Perukuren enda, bene arah ende-enden Anak Korah dingen mbangun perukuren si mbaru si nuduhken maka Dibata e mehuli janah dem alu kekelengen. Rehna bencana alam ncidahken maka Dibata si nepa dingen si mada doni ras kerina isina, erkuasa tetap njagai, ngkawali dingen mpehuliken kegeluhen anak-anakNa. Kesangapen man banta ngawan GBKP. Anak Korah mereken perukuren si mbaru salu mata kiniteken. Aminna pe doni mundu-undu, janah delengdeleng gedap ku teruh lawit; Aminna pe lawit ergalumbang dingen rugup-ugup, dingen deleng-deleng pe kumetter itendengna (ay.3b-4), Tuhan kecion dingen gegeh nandangi kalak si erkiniteken man baNa, si lalap nampati katawari pe tupung kesusahen (ay.2). Mata kiniteken enda me sierbahanca perukuren jadi erlayas, pusuh jadi erturih, perngandungen jadi erujung, nggeluh erpenalem. Erpengendes dingen erpengarapen man Tuhan jadi pilihen ndungi kebiaren. Ulihna, turah semangat, ngasup guna terus erdalan, amin pe tertatihtatih, mberat man bentasen. Alu ernalem, erpengendes dingen erpengarapen man Dibata maka Ia mpegegehi kita dingen nuduhken dalan si payo man banta. Kedungenna, kita jadi megegeh dingen sidalanken si payo si ngena ate Tuhan.
Ende-enden anak Korah enda mabai sada perenungen man banta kerna Dibata i tengah-tengah bencana alam si terjadi i doni enda. Labo perban buena pinakit maka kita lanai ndatken kejuah-juahen. Labo perban litna ambaten i bas ekonomi maka kita la ndatken kecukupen i bas pasu-pasuNa. Labo perban lanai kita banci sidahi-dahin maka kita la banci ngaloken penampatNa. Labo perban kita lanai ngelakoken adat-istiadat selaku kalak karo bagi semalna maka kita lanai ialokenNa. Labo perban lanai ku gereja maka kita la banci eribadah man baNa.
Tapi, nggo nge waktuna guna erpenungkunen, uga kinitekennta man Dibata i bas paksa bencana alam reh nderpa
kegeluhennta? Anak Korah nampati kita guna mpelimbarui dingen mpepaguhi kinitekennta alu ngataken Dibata Kecion Dingen Gegehta.
NURIKEN PENGGEJAPEN
- Bapa
- Nande
- Anak
- Irakut Serayan Tuhan (Pt/Dk/Em/Pdt/Vic/Det)
SHARING (IBABAI ANAK)
- Uga pengertinnta sedekah enda kerna bencana alam, bali nge bagi pengertin anak Korah? Turiken penggejapenndu sekalak-sekalak!
- Cuba siksiki jenari turiken pengalamenta sekalak-sekalak! Uga sikapta tupung kita iderpa bencana alam (Pandemi Covid 19)?
PERSEMBAHEN
RENDE KEE No. 450: 1 “ENDESKEN KAMI MAN BANDU”
(IBABAI NANDE)
Endesken kami man baNdu, sada bagin pemereNdu
Persembahen kami baNdu, gelah ialokenNdu
Reff : Pasu-pasuNdu min gelah, sitading i bas kami
AjariNdu dage kami, m’re persembahen baNdu
PERTOTON PERSEMBAHEN + SAPAAT ITUTUP PERTOTON TUHAN
(IBABAI BAPA)
- Kerna persembahen
- Kerna kalak si nderpa bencana alam
- Gelah runggun gereja ngasup ngepkep ngawan perpulungen si kena bencana alam
- Jabu kundulen ras si turah i bas perpulungen
MOMO
C. ERCAKAP-CAKAP JANAH ERJEDA-adi lit
Pdt. Rio Berseba Bangun, M.Th.
HP/WA : 0822 7466 6654