Tuhan Mulahi BangsaNa
( Matius 9 : 35 – 38 )
Belas kasihan Yesus terhadap orang banyak
9:35 Demikianlah Yesus berkeliling ke semua kota dan desa; Ia mengajar dalam rumah-rumah ibadat dan memberitakan Injil Kerajaan Sorga serta melenyapkan segala penyakit dan kelemahan. 9:36 Melihat orang banyak itu, tergeraklah hati Yesus oleh belas kasihan kepada mereka, karena mereka lelah dan terlantar seperti domba yang tidak bergembala.
9:37 Maka kata-Nya kepada murid-murid-Nya: “Tuaian memang banyak, tetapi pekerja sedikit.
9:38 Karena itu mintalah kepada tuan yang empunya tuaian, supaya Ia mengirimkan pekerja-pekerja untuk tuaian itu.”
Dibata tuhu-tuhu ngkelengi BangsaNa. Ia ateNa manusia tinepaNa e “iperbudak”, sabab erbudaken bertentangen ras biak Dibata si dem Kelengate. Paksa manusia itaban kuasa dosa, Dibata reh kudoni enda ibas diri Tuhan Jesus Kristus guna mbebasken bangsa-Na e, subuk ibas tabanen dosa, pinakit, kiniseraan, politik ras sidebanna nari (Pembebasen Holistik, biakna). Jesus nggo mereken geluhNa jadi ‘korban’ penebusen i kayu persilang, nggantiken ukumen si arusna kita ngalokenca/ ngenanamisa. Bageme, ibas Matius 9:35-38 enda isaksiken, Ibas niar-niar kutakuta, Jesus ngajar, meritaken Berita Si Meriah ras mpepalem erbage-bage pinakit. Ije turah me ateNa mekuah (Indonesia : tergeraklah hatiNya oleh belas kasihan) ngidah buena kalak si sakit/kote ibas dalan, si la lit pengarapenna, si muas melihe nangdangi Kata Dibata, narus mate pe erkiteken kejahaten; tapi lanai lit singepkepsa, bagi biri-biri si la ipermakani. Jesus tuhu-tuhu nggejabken kiniseraan si ialami kalak e, sebage kiniseranNa sendiri si arus ibabaNa i kayu persilang guna mereken keselamaten ibas Tuhan nari.
Jesus pe ngidah ateNa mekuah man kalak e sebage bentuk “dahin peranin.” Tapi, ngidah buena peranin e, kurang (kap) si ranisa. Guna sie, Jesus nggo ndilo 12 kalak ajar-ajarNa si pemena selaku ‘si rani’ tapi mbue denga si kurang si erdahin guna dahin peranin e. Emaka nina : “pindolah man si mada juma e, gelah isuruhna sierdahin guna peranin e.” Kita singgo ngaloken Jesus selaku Tuhan ras juru selamatta, ipindoNa gelah kita muat bagin selaku sierdahin ibas peranin e. Ertina, pendahin peranin mulahi bangsaNa e genduari nggo ipercayakenNa man banta. Eme kita si nggo ngalami pendahin Dibata mulahi kita erpalasken perkuah-ateNa e.
Dibata nggo ndilo ras ‘mengutus’ bangsa-Na (kalak Kristen) jadi sierdahin ibas peranin e alu erasamken (“bermodalkan”) Ate mekuah. Ateta mekuah eme perkakas si ipake kita guna dahin peranin e. Alu ate mekuah, kita ngidah kalak sideban eme bagin ibas dirinta jine. Erkiteken sie, jadi ajar-ajar Jesus kita la banci ngukurken dirinta saja alu la mperdiateken kalak sideban.
Ate mekuah (“belas kasihan”) si icidahken Tuhan Jesus ibas teks enda, la ngadi ibas penggejaben (“rasa”) tapi teridah pe ibas perbahanen. Penggejaben ate mekuah njemba Jesus ngelakoken tanda sengget (“Mujizat”), mereken pengajaren ras meritaken Berita Si Meriah, gendekna : rikutken kai siibutuhken kalak si perlu man pulahen e. Rupa Pembebasen bagi si ilakoken Jesus enda arus jadi usihen man banta, kalak Kristen. Bahkan bagi Jesus, kita pe arus nggit berkorban erkiteken kelengateta simbelin man doni enda. Emaka, perlu sisungkun dirinta : “Kai nge sibanci sibereken/ sikorbanken tanda ateta mekuah – silabo ngadi ibas penggejaben saja, tapi teridah pe min ibas bentuk perbahanenta si nyata? Sabab, uga banci sabi-sabi (indo: sabit) ikatakaken alat peranin adi labo isabiken? tentu labo lit bedana ras besi tua si la erguna. Ertina, uga banci kita ikataken kalak Kristen sidem kelengate adi labo inanami kalak sideban kelengateta e arah perbahanenta? Bilangen kalak Kristen I doni enda paksa enda liti sekitar sepertelu penduduk doni enda, “banci jadi” Jesus tetap denga ngerana seh paksa enda : “Mbelang man peranin, tapi kurang si ranisa”. Ertina, Jesus perlu denga pekerja-pekerja si tuhu-tuhu nggit erdahin , labo pekerja si perkisat si mementingken dirina jine.
EVALUASI :
Uga kerna aksi PJJ si lewat !
DISKUSI :
1. Kai saja nge si idah bentuk kiniseraan manusia, simenggerakken ate mekuah (belas kasihan) Jesus ibas ogenta, Injil Matius 9:35-38 ?
2. Ibas konteks masyarakat ija kita tading enda, kai ka si idah bentuk ketertabanen manusia simenggerakken turah ateta mekuah? (sensifitas nggejabken kiniseran manusia sekelewetta)?
3. Kai tekadta guna silakoken ibas muat bagin mbebasken ketertabanen kalak sideban? Arihken ras dalankenlah! Saran : Evaluasi tekadta enda, ibas PJJ nta minggu sireh.
AKSI :
Lakoken kegiaten simulahi kalak sideban ibas pinakit, ekonomi, ukur gulut ras sidebanna.
USULEN LAGU :
1. KEE GBKP NO: 68 : 1, 3
2. KEE GBKP NO: 191: 1 ,3, 4
3. KEE GBKP NO: 305: 1 , 2
4. KEE GBKP NO: 257: 1-5
TOPIK PERTOTON SYAFAAT :
1. Gelah kerina ngawan perpulungen GBKP ngasup nggejabken kiniseraan manusia ras nggit mereken dirina guna mulahi teman manusia sitertaban kiniseran.
2. Pemimpin Gerejanta ibas kerina tingkaten (Moderamen, Klasis ras Runggun) banci tetap konsisten mabai perpulungen nggeluh ermekuahate ras teridah arah ngkelengi.
3. Kerina teman manusia si tertaban kiniseran : ‘musil’ pergeluhna, si sakit, terpenjara, panti-panti asuhen, kalak cacat, korban Napza ras HIV/AIDS, rsd gelah ngidah kiniulin Tuhan arah perbahanen Dibata si mbebasken arah perbahanen kalak Kristen.
4. Siturah ibas perpulungen.
Pdt. Mestika N.Ginting, S.Th M. Psi