Lawanlah Iblis
( I Petrus 5 : 8 – 11 )

5:8 Sadarlah dan berjaga-jagalah! Lawanmu, si Iblis, berjalan keliling sama seperti singa yang mengaum-aum dan mencari orang yang dapat ditelannya.
5:9 Lawanlah dia dengan iman yang teguh, sebab kamu tahu, bahwa semua saudaramu di seluruh dunia menanggung penderitaan yang sama.
5:10 Dan Allah, sumber segala kasih karunia, yang telah memanggil kamu dalam Kristus kepada kemuliaan-Nya yang kekal, akan melengkapi, meneguhkan, menguatkan dan mengokohkan kamu, sesudah kamu menderita seketika lamanya.
5:11 Ialah yang empunya kuasa sampai selama-lamanya! Amin.

Kinata kerna litna (“keberadaan”) “roh-roh jahat ntah pe setan” la banci isilahi/ ipersilahang kalak Kristen. Ngataken “Labo lit setan/roh-roh jahat!” pe, labo banci ngolangi roh-roh jahat e ngganggu kegeluhen kalak Kristen. Emaka, adi lit kalak si erpengakap maka adi jadi kalak Kristen lanai i derpa persoalen sabab kerina masalah nggo idungi Jesus i kayu persilang, pengakap sibage anggapen enda “salah besar”. Situhuna, jadi kalak Kristen, arus erperang ngelawan setan. Emaka labo ateta mamang, turahen me kesuliten-kesuliten, kiniseran-kiniseran si banci jadi la pernah si ukurken pe, kenca kita jadi Kristen ntah pe tutus ngikutken Tuhan Yesus. Erkiteken sie, adi kita ngalaken “serangen” si mekelek ibas setan nari, situhuna lit sada pengapul sierbahanca malem ateta, eme nuduhken maka kita lit I bas dalan si benar. Si bahaya eme, ibas geluhta aman-aman saja, labo lit serangen setan, banci jadi e nuduhken maka kita nggo ibas dalan si lepak sabab kita ianggap setan e temanna, emaka la iserangna; ula kari anakna pe akapna. Asal kata Okultisme eme “occultus” (bahasa Latin) si ertina terbuni, rahasia, gaib, misterius, gelap ntah pe kegelapen; ras “isme” si ertina paham/ pengikut. Alu bage, okultisme ertina paham si ngikutken ras mpraktekken kuasa ras gegeh ibas doni kegelapen ntah doni “roh-roh jahat.” Ibas dunia okultisme, kengasupen ‘adikodrati’ (la semal jadi ) banci ilakoken manusia si ernalem man kuasa iblis. Kiniteken nandangi gegeh “supranatural’ ntah pe “dunia gaib” ibas erbage-bage rupa ras bentuk nggo mbue ‘mpengaruhi ‘ kebudayaan i doni enda, seh ku jaman modern enda pe. Terlebih i bas situasi global paksa enda, teridah/ tergejab kel “krisis ibas kerina bidang” : subuk ibas bidang ekonomi, sosialkebudayaan, moral-etika-prilaku, pendidikan, sumber daya alam bagepe sumber daya manusia. Krisis e erbanca praktek okultisme reh buena, bagi : “penujuman, ramalan, kekuatan batin, bantuan arwah, guna-guna, pelet, pesugihan,” ras sidebanna; sabab krisiskrisis e njadiken melala manusia “stress” seh pe ku “depressi”, kalak sibage (“Melayah tendi”). Enda me si mesunah akap setan nuanken pengaruh/kuasana.

Kitab I Petrus 5 : 8 – 11 , nampati kita ngalaken praktek okultisme enda :
1. Tenanglah kam (indonesia; Sadarlah/waraslah). Ertina, sada dampar : ula peturut kai pe ‘nagangi awakndu’ ntah pe ngkuasai kam. Ibas dampar sideban, Sedarilah kelemahen/ kinilangasupen ngalaken serangen setan. Tapi metengetlah! (Indonesia : berjaga-jagalah). Ertina, tetap njagai persadaan ras teman sada kiniteken. Dage, perlu kal si pergermetken maka Iblis la pernah ngadi! Ia terus erdahin ndarami siman jerngemenna. Emaka, kita arus tetap sedar ras terus erjagajaga. Ula sempat kita kote, apaika seh medem. ‘Sedar ras erjaga-jaga’ ertina terus ertoto. Iblis musuhta e pasti kiam adi silawan ibas gelar Tuhan Yesus (Bdk. Jakup 4:7) ; tapi adi sinik saja kita iperangina me kita alu bebas. ‘Teneng dingen metenget” pe she pentingna, sabab arah e si eteh ‘cara kerja’/strategi setan si ersura-sura ncedai kinitekenta. Silanglangna lit 3 strategi setan siperlu si eteh ras sitengeti : Pemena, ipebiar-biar. Mbue anak Tuhan “jatuh bangun” ibas dosa erkiteken ipebiar-biar iblis. Nggejabken ia la mungkin banci pulah ibas dosa si ngerim-rim ia. Erpengakap maka Tuhan lanai ngalemi ia nari. Situhuna Tuhan nggit ngalemi kerina kesalahen manusia, tapi kalak si ipebiar-biar iblis la ngasup ngalemi dirina jine. Peduaken, iblis Nami-nami kita ngelakoken perbahanen si entabeh ndalankensa, umpamana sura-sura daging. Emaka la ateta mamang kalak “hedonis” (kalak si ndarami kesenangen doni) mengayak ras nehken peraten daging. Dosa tuhu entabeh, bagi racun ibalut gula si ntebu.
Peteluken, Arus si inget! ‘Taktik’ Iblis bali ras ‘perang gerilya’ eme nerang paksa musuhna/ kita ‘lengah’. ipelajarina lebe ija titik lemahta, kenca sie iserangna. Emaka sedarilah kelemahenta. Adi Judas Iskariot kelemahena eme duit, Daud kelemahenna eme diberu ntah seks, Ananias ras Safira adi kelemahenna ‘gila hormat’. Kain kelemahenna eme la ngasup ngkuasai diri. Adi Kita kai kelemahenta? Kenca sieteh kai kelemahennta tetaplah teneng tapi metenget, ula bere kesempaten man iblis naluken kita.

2. “Tetaplah paguh kinitekenndu…” (ayat 9) kemenangen ibas peperangen ras setan labo ientuken otot ntah perlengkapen senjata si ipake kita, tapi itentuken paguh/ tetapna kinitekenta. (Bdk. Efesus 6:16 : “Bahanlah kinitekenndu jadi ampangampangndu katawari pe. Alu e banci inimpetindu kerina anak panah sigara si ipanahken si jahat”. Guna mpetetap/ mpeteguhi kinitekenta, tutus kita arus tetap megiken Kata Dibata. ( bdk Roma 10:17). Alu ngoge ras ndalanken Kata Dibata tentuna kinitekenta reh paguhna ras reh mbelinna. Bage pe ibas Efesus 6:17 , ikataken maka salah sada senjata si arus lit ibas kita eme pedang si ibereken Kesah Dibata, eme Kata Dibata. Alu kata sideban, Kata Dibata si oge, ibegi , irenungken, ras ilakoken ibas kegeluhenta, e jadi ampang-ampang ras pedang si “aktif “ nerang ras ngelawan iblis.

3. “…Erkiteken persadaanndu ras Kristus; ipetetapNa, ipegegehiNa ras ibereNa palas sinteguh” (10)
Janji Tuhan tetap mpegegehi kita, amin pe arus ngenanami kiniseraan kentisik erkiteken serangen setan e. Tapi perlu siinget, erkuasa seh rasa lalap (11). “Sabab Kesah si ibereken Dibata man banta labo erbanca gelah kita percik-cik; Tapi KesahNa e ndemi kita alu kuasa, kekelengen, bagepe gelah ngasup kita ngkuasai dirinta” (2 Timotius 1:7).

DISKUSI :
1. Kai saja nge si idah bentuk okultisme ibas zaman enda?
2. Ersada ras Tuhan alu tutus ertina memulai erperang ras Iblis, sebab iblis la senang adi kita ersada ras Tuhan. Tapi adi sirang ras Tuhan jadi teman Iblis, emaka la iperangina. Apai nge pilihenndu : nggeluh ersada ras Tuhan ntah sirang ras Tuhan? (Ukuri lebe maka jabab)
3. Uga nge caranta ngelawan kuasa Iblis ? Kai nge asamta erperang ras kuasa Iblis e?
Saran : Evaluasi ketetapen ukurta ras ketutusenta ngikutken Tuhan, ibas PJJ nta minggu sireh.

AKSI :
Sitadingken sada perbahanenta si la ngena ate Dibata sada minggu enda.

USULEN LAGU :
1) KEE No 187: 1,-3
2) KEE No 275: 1-3
3) KEE No 168: 1,2,3
4) KEE No 346: 1,3,5

TOPIK PERTOTON SAFAAT :
1. Gelah kerina ngawan perpulungen GBKP pang ngelawan kuasa Iblis alu kiniteken si paguh.
2. Pemimpin Gerejanta ibas kerina tingkaten ( Moderamen, Klasis ras Runggun) banci tetap erjuang mperlengkapi perpulungen gelah erkiniteken sipaguh, alu ketutusenna ngoge Kata Dibata.
3. Siturah ibas perpulungen.

Pdt. Mestika N. Ginting, S.Th M.Psi