TEMAN SADA DAHIN
Galatia 2:6-10
(Sasaran Pelayanan GBKP tahun 2025 poin V: Tidak ada Jemaat dan Pelayan Yang Bertikai Sehingga Harus Memekarkan PJJ ataupun Pindah Gereja)
2:6 Dan mengenai mereka yang dianggap terpandang itu–bagaimana kedudukan mereka dahulu, itu tidak penting bagiku, sebab Allah tidak memandang muka–bagaimanapun juga, mereka yang terpandang itu tidak memaksakan sesuatu yang lain kepadaku. 2:7 Tetapi sebaliknya, setelah mereka melihat bahwa kepadaku telah dipercayakan pemberitaan Injil untuk orang-orang tak bersunat, sama seperti kepada Petrus untuk orang-orang bersunat 2:8 –karena Ia yang telah memberikan kekuatan kepada Petrus untuk menjadi rasul bagi orang-orang bersunat, Ia juga yang telah memberikan kekuatan kepadaku untuk orang-orang yang tidak bersunat. 2:9 Dan setelah melihat kasih karunia yang dianugerahkan kepadaku, maka Yakobus, Kefas dan Yohanes, yang dipandang sebagai sokoguru jemaat, berjabat tangan dengan aku dan dengan Barnabas sebagai tanda persekutuan, supaya kami pergi kepada orang-orang yang tidak bersunat dan mereka kepada orang-orang yang bersunat; 2:10 hanya kami harus tetap mengingat orang-orang miskin dan memang itulah yang sungguh-sungguh kuusahakan melakukannya.
MODEL PJJ: PARTISIPATIF
KATA PERLEBE :
Lit sada kata pribahasa Karo nina: banci rubat tapi ula ieteh kalak. Erti kata-kata enda e me: rubat e biasa jadi. Tapi si la biasa e me perubaten e mbelang beritana. Enterem jelma metehsa e maka enggo jadi percakapen jelma si enterem. E maka megati labo dame pusuh si ialoken kalak si rubat sabab labo lit si ndamekenca tapi melas cuping erkiteken rusur icakapken kalak. Di kune lit kin pe si ndamekenca, si rubat e lit si la nggit ntah pe duana la nggit.
I tengah-tengah kegeluhen perpulungen GBKP banci saja lit perubaten antar ngawan perpulungen bagepe antar serayan Tuhan i bas sektor ntah runggun. Bagepe antar ngawan perpulungen ras serayan Tuhan i bas sektor. Rikutken kata bijak i bas kita kalak Karo ndai ras ipegegehi alu Kata Dibata i bas perpulungen jabu-jabu enda maka rubat e biasa tapi ula tereteh kempak jelma si enterem terlebih pasti min erdame. Ertina perubaten e ula maba perpecahen sektor ntah pindah runggun ntah pindah gereja.
ISI :
Kenca 14 tahun Paulus jadi kalak Kristen, Paulus reh mulihken ku Jerusalem ras sekali enda ia itemani Barnabas bagepe Titus (Perb. 11:27-30). Kerehenna e labo alu tujun gelah ndatken legitimasi arah rasul-rasul (si langsung murid Jesus) sabab ia enggo tek tuhu-tuhu nandangi berita Injil si iberitakenna. Alu kata sideban maka Paulus reh alu posisi si sejajar ras ajar-ajar Jesus sideban guna nuriken kai si enggo ilakokenna i bas pelayanenna man kalak si labo Jahudi. Paulus kepeken ersura-sura mpersada pengangkan ras rasul-rasul sideban kerna Injil gelah ula lit Injil man kalak Jahudi saja bagepe lit Injil man kalak si labo Jahudi saja.
I bas perjumpan enda kalak Kristen Jahudi maksa Paulus guna nunatken Titus sekalak Junani si enggo iperidiken. Kepe kalak Jahudi si enggo Kristen ncikep nteguh denga tradisi Jahudi ope ia jadi kalak Kristen. Ijenda me Paulus erpenulak janah rasul-rasul sideban ndukung pengangkan Paulus. Ia kerina ersada arih maka Injil si iberitaken Paulus enggo kuh, janah tambahen-tambahen arah warisen tradisi Jahudi lanai iperluken (ay. 3-6).
I bas ayat 6 enda Paulus nehken ringkasan perukurenna kerna Berita Si Meriah si ipesehna ntah pe surat kerasulenna. Iturikenna maka nina kerina si ituliskenna e labo erkiteken pengaruh ise pe, Paulus erberita e labo ngenen pangkat ntah pe posisi ise pe. I bas jaman Paulus tentu lit tokoh-tokoh Kristen si reputasina erbanca ia itandai, tapi epe la ngasup mpengaruhi ntah pe mengintimidasi pemberitaan Paulus sabab nina Paulus i bas Dibata la erndobahen kerina pangkat manusia. Paulus la sekali dua kali jumpa ras kalak si berpengaruh ras terkenal asum sie tapi labo bas kalak enda nari rehna berita Injil si iberitaken Paulus. Bagepe Paulus jumpa ras pemimpin-pemimpin Jahudi i Jerusalem janah kalak enda pe labo lit nambahken kai pe kubas Injil si ipeseh Paulus. Paulus la nimai ise pe guna erbanca ia jadi kalak Kristen si hebat. Ieteh Paulus tuhu-tuhu maka sie kerina rehna i bas hubungen pribadi si ndeher antara dirina ras Jesus. Labo atena mpersilahang kai si pernah ibahan kalak man bana tapi atena ngataken maka kegeluhen kekristenen si ibangunna labo erkiteken kai si enggo ibahan manusia man bana.
I bas ayat 7-10 ituriken maka pemimpin-pemimpin perpulungen/gereja i Jerusalem ngaloken Injil si ipeseh Paulus. Jakub senina Jesus, Kepas si igelari pe Petrus bagepe Johanes ngaloken Paulus ras pelayanenna man kalak si labo Jahudi. Ngaloken ijenda alu pengertin kalak si labo Jahudi e lanai perlu ndalanken undang-undang Taurat guna ndatken perkuah ate Dibata. Kenca si enda me itegasken bena-benana maka pelayanen utama Paulus e me nehken Berita Si Meriah man kalak si labo Jahudi janah sebalikna pelayanen utama Petrus e me nehken Berita Si Meriah man kalak Jahudi, gia hal enda labo absolut alu pengertin adi lit kesempaten masing-masing rasul enda, banci denga nge ia ngelai sebalikna. Enda banci si idah gia Petrus nekanken pelayanenna man kalak Jahudi tapi seh asa gundari kalak Katolik Roma si labo Jahudi tetap ngakui maka Paus-paus gereja Katolik e me pengganti/penerus Petrus.
Seterusna ipeseh Paulus sada pesan pemimpin perpulungen i Jerusalem e man bana ras Barnabas e me gelah ia tetap nginget perpulungen Kristen Jerusalem si musil janah enda nuate Paulus idalankenna alu mehuli. Pesan enda ipeseh man bana sabab enterem kalak si tek nggeluh i bas kiniseran/kemiskinen i Jerusalem ras arapen kalak enda maka kalak si labo Jahudi si enggo erkiniteken nehken penampatna man kalak Kristen i Jerusalem. Janah enda iakui Paulus e maka i bas pelayanenna pesan enda tetap iingetna janah idaramina penampat arah perpulungen Kristen sideban guna nampati kalak Kristen i Jerusalem (Perb. 11:30).
PENGKENAINA :
Bahan Perpulungen Jabu Jabunta enda ersura-sura nuriken man banta maka lit paksa-paksana kita berbeda pendapat ras temanta sada dahin bas pelayanen. Tapi kidekah sura-suranta si mehuli, perbedaan pendapat enda labo perlu idungi alu perjengilen apai ka seh sirang sada perpulungen/sektor. Perbedaan e me kebayaken janah keputusen guna sirang labo solusi i bas perbedaan pendapat. Petrus ras Paulus nuduhken maka ia pantas jadi usihen i bas perbedaan pandangen, Petrus mpertahanken denga corak kiniJahudinna e maka ia mengayak ngelai ku kelompok Jahudi Kristen. Jenari Paulus ngidah maka Kata Dibata arus ipeseh man kalak si labo Jahudi pe sabab man bana pe seh kap keselamaten e, e maka Paulus mengayak ngelai man kalak si labo Jahudi. Perbedaan arus ialoken alu kedewasaan, jiwa besar ras penggejapen maka perbedaan e me hakiki (la banci lang) lit bas kerina perpulungen.
Perbedan pendapat ras perbahanen Paulus ras Petrus la maba perpecahen tapi maba kiniulin perdalinen Berita Si Meriah. Bagem oratna min jadi i bas perpulungen GBKP. Lit perbedan pendapat ntah seh pe si gangen sora la maba perpecahen umpamana pecah sektor. Tapi min maba kiniulin sabab minter erdame. Ulihna sektor banci reh ulina labo sebalikna pecah.
DISKUSI :
- Turiken kai nge sinimaksudken maka perbedaan (biak si pelain-lain i bas karakter, cara pandang ras pengangkan) e me sada kebayaken i bas perpulungen?
- Payo nge perbedaan pendapat ntah pe perjengilen i bas pemimpin perpulungen arus isikapi alu keputusen sirang sektor ntah pe pindah keanggotaan gereja? Kai dampakna enda kubas pelayanen pebelangken Berita Si Meriah?
USULEN ENDE-ENDEN: :
- KEE GBKP No. 424:1-2= https://www.youtube.com/watch?v=LyHdP4iCMQs&list=RDLyHdP4iCMQs
- KEE GBKP No. 209:4,5= https://www.youtube.com/watch?v=CW_YNHCWKR0&list=RDCW_YNHCWKR0
- KEE GBKP No. 296 : 1-= https://www.youtube.com/watch?v=VtzUvAqgdYY&list=RDVtzUvAqgdYY
- KEE GBKP No. 161:1=
Pdt. Sinar R Barus, M.Th
HP/WA: 085270078361