ERPENGARAPEN MAKA IKELINI

Roma 8: 18 – 25

Roma 8: 18 – 25

Pengharapan anak-anak Allah

8:18 Sebab aku yakin, bahwa penderitaan zaman sekarang ini tidak dapat dibandingkan dengan kemuliaan yang akan dinyatakan kepada kita.
8:19 Sebab dengan sangat rindu seluruh makhluk menantikan saat anak-anak Allah dinyatakan.
8:20 Karena seluruh makhluk telah ditaklukkan kepada kesia-siaan, bukan oleh kehendaknya sendiri, tetapi oleh kehendak Dia, yang telah menaklukkannya,
8:21 tetapi dalam pengharapan, karena makhluk itu sendiri juga akan dimerdekakan dari perbudakan kebinasaan dan masuk ke dalam kemerdekaan kemuliaan anak-anak Allah.
8:22 Sebab kita tahu, bahwa sampai sekarang segala makhluk sama-sama mengeluh dan sama-sama merasa sakit bersalin.
8:23 Dan bukan hanya mereka saja, tetapi kita yang telah menerima karunia sulung Roh, kita juga mengeluh dalam hati kita sambil menantikan pengangkatan sebagai anak, yaitu pembebasan tubuh kita.
8:24 Sebab kita diselamatkan dalam pengharapan. Tetapi pengharapan yang dilihat, bukan pengharapan lagi; sebab bagaimana orang masih mengharapkan apa yang dilihatnya?
8:25 Tetapi jika kita mengharapkan apa yang tidak kita lihat, kita menantikannya dengan tekun.

Pengarapen anak-anak Dibata

 

8:18 Rikutken perkiranku maka kiniseran si inanami kita genduari labo kai kal pe e adi ibandingken ras kemalemen ate si pagin ipetangkas Dibata man banta.
8:19 Kerina si enggo ijadiken Dibata tertima-tima alu ate metedeh ndigan Dibata mpetangkas kemulian anak-anakna.
8:20 Sabap kerina si ijadiken Dibata e enggo lanai erguna, labo erkiteken sura-surana jine, tapi erkiteken bage me sura-sura Dibata. Amin bage gia lit arapen. 
8:21 Sabap i bas sada wari pagi ibebasken Dibata me kerina si enggo ijadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata.
8:22 Sabap ieteh maka seh paksa si genduari enda kerina si enggo ijadiken Dibata kelsehen ras-ras dingen seh kal akapna suina desken sekalak pernanden si nandangi mupus.
8:23 Janah labo e saja, tapi kita pe si enggo ngaloken Kesah selaku jaminen i bas pemere-pemere Dibata si nandangi iberekenNa man banta, kelsehen nge nimai Dibata ndungi pengangkatenta jadi anak-anakNa, e me nebusi badanta. 
8:24 Sabap alu erpengarapen nge maka kita enggo ikelini; tapi adi enggo iidah kai si iarapken lanai bo e pengarapen. Sabap ise kin ngarapken kai si enggo idahna?
8:25 Tapi adi erpengarapen kita nandangi kai si langa idah, sitimai e alu saber.

(Mengenal Tuhan “Ulih Erpengarapen”)

MODEL PJJ : KESAKSIN

KATA PERLEBE

Pengarapen eme inti kinitekenta selaku kalak Kristen. Erkiteken pengarapenta e situhuna erpalasken penggejapenta kerna kinikeken Jesus Kristus si enggo mate nebusi kerina dosa manusia. Arah karya keselamaten e kita ipengasupNa guna ermengkah, labo saja terkelin i bas kiniseran-kineseran biasa i bas doni enda, tapi lebihen asangken si e kita terkelin i bas dosa- dosa nari janah ngaloken keselamaten situhu-tuhu, iperdameken ras Dibata.

Pengarapenta e labo saja mpeturah sikap optimisme, kata- kata motivasi arah motivator, bagi si biasa itonton kita bas Media Sosial. Labo bage maksud pengarapen bas Pustaka Si Badia enda. Pengarapenta e arus tuhu-tuhu berakar arah Kristus Jesus, labo sekedar cakap manis motivasi arah logika doni enda tapi sitandai Jesus arah perbahanenNa (pengalamen rohani si enggo pernah sialoken kita) janah tuhu-tuhu erpengendes man baNa segelah kerina jadi i bas geluhta enda sue ras sura-sura Tuhan.

ISI

Kota Roma eme kap ibu kota Kerajan Romawi Raya. Sada kota metropolis si nomor sadana i bas doni enda i bas paksa e. Filsafat, Ilmu pengetahuan ras teknologi mengalami puncakna, kebudayaan ercampur baur, rehen arah kerina bangsa-bangsa si enggo ikuasai Romawi. Tapi danci sigejapken, lit si kurang pasna situasi i Roma i bas pakse sie. Secara ekonomi kesejahteraan masyarakat, secara ilmu ras tekonologi sinipake kalak Roma seh kal majuna. Tapi i bas kinata moralitas, kiniteken ras kebiasan umum kalak Roma seh kel murdena. Mungkin enda terjadi erkiteken pemerentah Roma la ngasup ngkuasai (mengendalikan) kebudayan si enggo ercampur baur e.

Surat Roma enda, itulis Paulus enem tahun sope denga jadi kiniseran mbelin kalak kristen i Roma. Tahun 64 kota Roma itutung alu perentah Kaisar Nero, alu maksud segelah Nero dorek mbangun kota Roma si mehuli sue ras sura-surana. Enem wari dekahna kota Roma e itutung, kerina bangunen keri ras ribuan kalak mate. Kalak kristen ituduh pemerentah Romawi jadi pelaku si nutung kota Roma. E maka pemerentah ras rakyat Romawi ersada arihna guna nangkapi kerina kalak kristen, segelah isiksa, ibunuhi, itutung ras kerina budak bage pe rumahna. Secara peradaben kalak Roma engggo maju, tapi menukah iprovokasi guna ngelakoken perbahanen si jahat ras sipat sadistis. Enda me permulan penganiayaan kalak kristen i belang-belang doni erkiteken Romawi ngkuasai kerina bangsa paksa si e.

Tentuna potensi negatif enda enggo iidah Paulus i bas biak- biak kalak Roma. E maka ipesikapna kalak kristen i Roma segelah ngasup tetap erpengarapen adi pagi entah pe genduari ngadapi kiniseran si mesangat.

Aspek si pemena si perlu jadi fokus kegeluhen kalak kristen eme kap pentingna pemahamen kerna kemalemen ate si ipetangkas Dibata pagin man banta, si menurut Paulus, lebihen nilaina asangken kineseran-kiniseran sinitanggung kita genduari. Kita perlu berfokus ku masa depan, labo terikat i bas persoalen si genduari. Kita tertima-tima alu metedeh ate nandangi penampat arah Tuhan nari. Tek kita, lit paksana pagin, Tuhan membebasken kita arah kerina kiniseran sinitanggung kita. Arah mata rohaninta, Dibata si membebasken e pentingen asangken kiniseran-kiniseran e.

Sipeduaken, kiniseran-kiniseran sinitanggung kita e situhuna biasa. Lit ka perserina ras kiniseran sinitanggung tinepa Dibata si debanna. Kerina tinepa e kelsehen ngenanami kiniseran, nimai pembebasen arah Tuhan, bali ras kiniseran sinitanggung pernanden nandangi mupus. Kita kelsehen erkiteken mberatna kiniseran e, tapi sieteh, kiniseran e sada proses menuju si mbaru, sada transisi, si arus ibentasi kerina kalak kristen. Kiniseran e erbahan kita megenggeng nimai paksa pembebasen Tuhan!

Sipeteluken, Dibata enggo erpadan man banta maka i bas paksana kita iangkatna jadi anak-anak Dibata. Guna si e kita ngaloken Kesah selaku jaminen simpengasup kita guna mbentasi paksa transisi e, seh ku jaman kerehen Tuhan Jesus sipeduakaliken. Kesah e simpengasup kita jadi anak-anak Dibata, amin pe i bas situasi e situhuna mbue denga keterbatasenta.

Sipeempatken, Arah pembabai Kesah Dibata kita ngasup erpengarapen, ermengkah, i bas ngadapi erbage-bage kiniseran. Pengarapen e tentuna erbahan kita ikelini. Pengarapen e mpengasup kita tetap sedar, lit nge ujung paksa transisi e ija Tuhan membebasken kita i bas kiniseranta nari bagi Ia enggo membebasken kita i bas dosa nari.

PENGKENAINA

Bas kegeluhenta usur kita lupa maka sumbul pengarapenta em kap Kristus Jesus. Sieteh maka Jesus me pusat keselamatenta, tapi usuren kita lebih tertarik ndarami erbage-bage kata-kata motivasi siniarapken kita ngasup mpeturah optimisme geluhta. Spiritualitasta kerah, erkiteken sumbul pengarapenta eme logika manusia, janah logika manusia e usur la bersumber arah kepentaren i bas Dibata nari si ujungna ku arah pemuasan emosi ras sipat egoista.

Adi sumbul pengarapenta erpusat ku Jesus Kristus, e maka pergumulenta nandangi kiniseran e pe arus ngala ku Jesus Kristus ka. La banci sumbul pengarapenta e ku Jesus, tapi tujun ras motivasita ngadapi kiniseran e guna ngelai sura-surata entah pe sipat egoista. Poin enda arus jelas bas kita.

Adi pengarapenta tuhu-tuhu enggo terpusat ku Jesus Kristus, janah tujunna guna Tuhan saja, e maka pasti kita ikeliniNa i bas kerina masalah geluhta. Tuhan nampati kita janah engkelini kita labo guna kita nggeluh meganjang ukur, tapi segelah kita empermuliaken IA.

DISKUSI :

1. Uga caranta sedekah enda ngadapi erbage-bage perbeben bage pe kiniseran i bas geluhta? Enggo nge sipake Jesus Kristus e jadi sumbul pengarapenta, entah lalap denga kita ndarami motivasi si deban si erpalasken kepentaren manusia ngenca?
2. Pernah nge inanamindu kiniseran erkiteken mpertahanken kiniteken entah pe mbegi kesaksin temanndu kerna korban intoleran? Misalna, pelarangen kebaktin entah pe ilarang ndiriken gereja? Selaku anak-anak Dibata uga caranta ngadapi persoalen enda?

USULEN ENDE-ENDEN:

1. KEE GBKP 96: 1-3
2. KEE GBKP 270: 1-3
3. KEE GBKP 227: 1
4. KEE GBKP 334: 1-2

DAFTAR BACAAN :

1. Jürgen Moltmann, Theology of Hope. SCM Press:
2. Seth D Gurley, Total Glory And Radical Hope: Reading Romans 8:18-25 with An Anthropological-Soteriological Emphasis Without Diminishing Cosmic Redemption. Reformed Thelogical Seminary: 2018.

Pdt. Andohar Purba, M.Th
HP/WA 08116246333