BIMBINGEN PA MAMRE
TANGGAL, 28 JUNI-4 JULI 2026
(Investasi Bodong)
Ogen : Kuan-Kuanen 28: 18-22
Tema : Jadi Kalak Bujur
Tujun : Gelah Mamre
1) Ngasup nuriken bujur i bas ngaturken perbeliten ras pendahin
2) Metenget nandangi investasi bodong
Metode: Sharing pengalaman
28:18 Siapa berlaku tidak bercela akan diselamatkan, tetapi siapa berliku-liku jalannya akan jatuh ke dalam lobang. 28:19 Siapa mengerjakan tanahnya akan kenyang dengan makanan, tetapi siapa mengejar barang yang sia-sia akan kenyang dengan kemiskinan. 28:20 Orang yang dapat dipercaya mendapat banyak berkat, tetapi orang yang ingin cepat menjadi kaya, tidak akan luput dari hukuman. 28:21 Memandang bulu tidaklah baik, tetapi untuk sekerat roti orang membuat pelanggaran. 28:22 Orang yang kikir tergesa-gesa mengejar harta, dan tidak mengetahui bahwa ia akan mengalami kekurangan.
I. KATA PENARUH
I bas kegeluhenta si tep-tep wari selaku Mamre, kepala keluarga, pemimpin i bas perpulungen bagepe masyarakat, pasti kita pernah ngalaken perbeben si mbelin kerna perduiten (perbeliten). I bas zaman enda si megati erbage-bage perubahen erdalan alu pedas, lit rusur peluang-peluang si menarik tapi pe dem alu risiko. I bas sada sisi, si idah kemajun teknologi si erbahanca reh sunahna akses informasi ras transaksi keuangen. Tapi i bas sisi si deban, kemajun enda pe mbuka celah man kalak si la bertanggung jawab guna nebu-nebu alu modus-modus si mbaru, khususna si terkait ras investasi si menjanjiken keuntungen si mbelin i bas waktu si kentisik, si igelari: investasi bodong.
Megati kita tergoda alu tawaren-tawaren si bage rupana. Tekanan ekonomi, sura-sura gelah pedas ras lampas bayak, ntah pe sekedar ikut-ikuten (trend) banci mabai kita ku bas keputusen-keputusen finansial si salah. Enda erbahanca megati sibegi turi-turin kerna keluarga si hancur erkiteken tertaban Pinjaman Online (Pinjol) si ncekak kerahung alu suku bunga si la masuk akal, ntah pe kerna kalak si bene kerina ertana erkiteken Judi Online (Judol) ntah pe tertipu investasi bodong si njanjiken keuntungen si entebeh megisa tapi rugi nge i bas kinatana. Enda lanai bo persoalen pribadi, tapi enggo jadi penyakit sosial si banci ncedai kiniersadanta ras masa depan generasi penerusta.
Tema PA-nta sekali enda “Jadi Kalak Bujur” ngajuk kita gelah mulihi rukur kai kin ertina jadi sekalak Mamre si bujur, labo saja i bas kata ras pengakunta, tapi pe i bas caranta ngaturken perduiten ras sumber daya si enggo ipercayaken Dibata man banta gelah geluhta jadi pasu-pasu man keluarga, perpulungen, ras masyarakat.
II. URAIAN TEKS
Kitab Kuan-Kuanen enda risiken pengajaren-pengajaren si mereken petunjuk praktis guna nggeluh alu payo ras bujur i adep-adepen Dibata ras teman manusia. Kata Dibata si niorati kita wari enda secara khusus ngerana kerna perbedaan karakter ras ulih si idat kalak si bujur ras kalak si la bujur, khususna i bas konteks usaha ras pengaturen perduiten. Mari si siksiki ayat per ayat:
1. Ayat 18: “Adi kam bujur, malem atendu. Adi la kam bujur, rempet kam guling.”
Ayat enda mabai kita ku bas inti tema: pentingna integritas (bujur). Bujur labo ertina sempurna tanpa dosa, tapi lit lalap perjuangen gelah banci terulin asangken si enggona ibas ngayaki si ngena ate Dibata. Kalak si bage labo la lit persoalenna, tapi melala pe persoalenna, Dibata si tetap nemani ras ngkawali ia.
Sebalikna, kalak si “la bujur” ibas paksana pasti nge guling sebab si la ngena ate Dibata nge si idalankenna. Alu bage ngelawan Dibata nge situhuna ia. Guling i jenda enda banci iertiken secara kiasan eme terperangkap masalah hukum, kehancuren finansial, reputasi si jadi mejin, kegeluhen si la tenang, rsd.
I bas konteks perduiten, ayat enda ngingetken maka kebujuren ras integritas i bas usaha ras transaksi eme kunci keamanen jangka panjang. Kalak si nipu, korupsi, ntah pe ngelakoken bisnis alu cara si la etis mungkin dat keuntungen kentisik, tapi pasti kebilangen i bas jangka panjang. Umpamana, sekalak perbinaga si bujur timbangenna ras kualitas barangna mungkin untungna la langsung mbelin, tapi sie erbahanca ia jadi kalak si terteki emaka enterem pelangganna seh maka langgeng usahana. Sebalikna, perbinaga si la bujur mungkin pedas ndatken untung si mbelin, tapi kenca ieteh kalak taki pacikna, bene kepercayan kalak man bana ras usahana banci bangkrut.
2. Ayat 19: “Perjuma si erbintuas bias kap nakanna. Kalak si la make wari-wari, musil me ia.”
Ayat enda mbandingken 2 cara ncukupi keperlun geluh:
1. “Perjuma si erbintuas”: Enda ngelambangken kerja keras, megenggeng, ras usaha si produktif. Juma eme ingan erdahin utama i bas masyarakat agraris. Ndahiken juma perlu kesabaren, perencanaan, ras usaha si konsisten. Hasilna eme “bias kap nakanna” (cukup ras makmur). Enda me prinsip dasar si jadi persinget Dibata: kalak si mejingkat jadi bayak, kalakperkisat jadi musil (bdk. Kuan 10:4).
2. “La make wari-wari”: Enda ngerana kerna kalak si la ngaturken waktuna alu mehuli tapi sikap atena geluhna. La gia tutus erdahin tapi bayak ka min. Ulih mentalitas si bagenda rupana emekap kemusilen.
3. Ayat 20: “Kalak bujur malem atena nggeluh, tapi kalak si meter atena bayak, la ia banci pulah i bas ukumen nari.”
Ayat enda pe tole mbandingken lagu langkah kalak bujur ras si la bujur.
1) “Kalak bujur” emekap kalak si terteki jelma si enterem emaka sikap relasina ras kerina kalak amin gia mungkin ka nge lit kalak si la senang man bana. Tapi si jelas, malem atena ndalani kegeluhen enda ibas kebujurenna, simper pasu-pasu Dibata ras teman manusia seh man bana. Pasu-pasu enda tentu la saja kerna materi, tapi pe ketenangen ate, keluarga si harmonis, ras reputasi si mehuli.
2) Kontrasna eme kalak “meter atena bayak”. Enda gambaren kalak si la sabar, la ndalani proses, atena kerina min banci instan. Ia la peduli uga carana, si penting meter bayak. Sikap geluh si bagenda rupana bahaya kal. Ayat enda mpersingeti alu tegas kerna ulihna: “la banci lang iukum ia.” Ukumen enda banci reh i bas Dibata nari secara langsung, tapi pe banci ka konsekuensi alami i bas perbahanen si salah, umpamana: kena tipu, ndatken masalah hukum, kehancuren relasi, rsd.
4. Ayat 21: “Rayo-ayo la kap mehuli; tapi lit kang kalak ngkapiti si salah erkiteken sepenggel roti.”
Ayat enda ncidahken 2 biak kalak si la bujur eme:
1) “Rayo-ayo”: Enda ngerana kerna sikap pilih kasih (diskriminatif), si la adil, si erpihak erkiteken hubungan, pribadi ntah pe potensi keuntungen si la obyektif. I bas bisnis ntah pe pengelolaan keuangen (termasuk i Gereja), sikap geluh si bagenda rupana arus isilahi. Keputusen arus ibahan erpalasken kebenaran ras keadilan, labo perbahan kedekatan ntah potensi suap.
2) “Ngkapiti si salah erkiteken sepenggel roti”: Enda ningetken realita kerna kelemahen manusia. Hal si kitik, kebutuhan dasar (“sepenggel roti”), ntah pe tawaren keuntungen si labo piga beliganna, banci erbahan sekalak jelma ngelakoken kesalahen si mbelin ntah pe ngorbanken integritasna.
5. Ayat 22: “Kalak merangap pedas atena bayak, la ietehna lanai ndekah reh kemusilen nindih ia.”
Ayat terakhir bas oratenta enda mpertegas mulihi persinget bas ayat 20.
1) “Kalak merangap” (Ibrani: ra ayin – mata jahat/iri hati/kikir/tamak) eme gambaren kalak si serkah, la pernah puas, si ngidah erta kalak sideban alu cian ate, janah fokus kal ia ku dirina sendiri alu menghalalken em segala cara. Cara rukur si bagenda rupana si erbahanca pedas atena bayak.
2) Amin bage gia, ulih cara rukur si ndai eme: “la ietehna lanai ndekah reh kemusilen nindiah ia.” Kerangapen ras la sabar erbahanca ia pentang nandangi risiko. Potensi untung ngenca idahna, la idahna potensi rugi ntah pe kehancuren si ngintip i balikna. Enda me ambahayana cara rukur instan.
Arah Kata Dibata si niorati kita i bas wari enda teridah 2 gambaren si jelas kal kerna 2 dalan kegeluhen finansial: dalan kebujuren (integritas, kerja keras, kesabaren, kesetian) si maba ku dalan pasu-pasu, ras dalan si la bujur (perkisat, meter ate bayak alu menghalalkan segala cara) si maba ku kehancuren ras kemusilen. Pilihenna gundari lit i bas kita sekalak-sekalak: nggit tuhu-tuhu erjuang ndalanken kebujuren ntah lang?
III. PENGKENAINA
Kata Dibata arah Kitab Kuan-kuanen si niorati kita ibas wari enda sue kal secara prinsip bagepe secara praktis ras kegeluhenta selaku Mamre i tengah-tengah jaman si dem tantangen enda. Uga kita banci ndalankensa?
1. Jadi kita Mamre si bujur i bas ngaturken Keuangen Keluarga ras Pribadinta:
1) Nggeluh alu Integritas: Si pemena ras utama, jadilah kepala keluarga si bujur ras ertanggung jawab i bas kerina urusen perbeliten. Lit keterbukan man ndehara ras anak-anakta kerna pengalon ras pengeluarenta. Biasaken erbahan keputusen finansial keluarga alu runggu ras terbuka ibas jabu.
2) Prinsip “Ula Lebih Besar Pasak dari Tiang”: Aturken anggaren belanja alu cermat. Bedaken antara keperlun ras sura-sura. Prioritasken keperlun si mendasar (pangan, pendidikan anak, kesehatan). Ula tersiding utang konsumtif si la perlu, khususna Pinjol ilegal si bungana la masuk akal. Erlajarlah nggeluh alu sederhana (keugaharian) sue ras kemampunta.
3) Tutus Erdahin ras Nabung/ Investasi si Benar: Dahiken dahin si enggo ibereken Dibata alu tutus ras setia. Ula malas! Ulih erdahin/pengalon e aturken alu mehuli. Sisihken bagin guna persembahen, tabungen, ras investasi si jelas, legal, ras masuk akal. Investasi si benar perlu proses, pemeteh ras kesabaren, labo alu cara instan.
4) Metenget nandangi Investasi Bodong ras Judi Online: Enda me musuh utama si arus sisilahi ibas jaman enda. Ciri-cirina si arus si inget:
a. Janji keuntungen si meganjangsa ras la wajar (misalna puluhan persen sebulan).
b. Cara kerja si la jelas ras rumit, ntah pe hanya focus ngerekrut anggota baru (Skema Piramida/Ponzi).
c. La terdaftar/la lit izin resmi i bas Otoritas Jasa Keuangan (OJK) ntah pe lembaga pengawas terkait.
d. Make testimoni palsu ntah pe tokoh terkenal/agama gelah tek kalak.
e. Lit tekanan gelah minter gabung. Adi jumpa tawaren si bage rupana, minterlah curiga ras tolak tegas! Bagepe alu Judi Online, la pernah lit kalak bayak arah judi, si lit eme kehancuren. Ajari anak-anakta pe kerna bahayana.
2. Jadi Mamre si Bujur i bas Ngaturken Keuangen Kategorial Mamre GBKP:
1) Transparansi ras Akuntabilitas: Adi kita ipercayaken jadi pengurus Mamre (Ketua, Sekretaris, Bendahara, ntah si debanna) i lingkup Runggun-Klasis-Sinode, ingetlah maka duit e labo sikerajangenta tapi sikerajangen perpulungen guna kemulian Dibata. Kelola alu jujur, transparan, ras akuntabel. Catat kerina pemasuken ras pengeluaren alu mejile, bahan laporen berkala sue ras aturen, janah gunaken sue ras keputusen persidamgem/rapatta. Ula pernah ikutken pengajuk Iblis guna make duit perpulungen man keperlun pribadi, amin pe “kentisik saja” ntah pe “pinjam lebe.” Enda me bena-bena kehancuren.
2) Ndalanken Prinsip Keuangen GBKP: Keuangen GBKP eme sikerajangen Dibata si ipakeken guna ndukung dahin pelayanen (Koinonia, Diakonia, Marturia). I bas sistem Presbiterial Sinodal lit pertanggungjawaban si berjenjang ras saling mengawasi. Selaku Mamre, kita pe ikut ertanggungjawab njaga ras ngawasi pengelolaan keuangen gerejanta i kerina wilayah pelayanen. Dukung program-program si enggo iputusken, janah ula ragu nungkun adi lit si la transparan.
3) Ula Salah-Gunaken Jabaten: Jabaten i bas Mamre ntah pe GBKP eme kepercayan si ibereken Dibata lewat perpulungenNa man banta. Ula salah-gunaken kepercayan e guna kepentingen pribadi, misalna mempromosiken bisnis pribadi si la jelas ntah pe nawarken investasi si la jelas asal-usulna ku anggota sideban. Bisnis/usaha si enggo tuhu-tuhu terbukti mehuli ibas jangka panjanglah si banci sitawarken.
3. Jadi Mamre si Bujur i bas Masyarakat:
1) Jadi Usihen (Role Model): Kita perlu jadi Mamre si pentar ngaturken keuangen, tutus erdahin, ras la tergiur cara-cara instan, seh maka geluhta banci jadi usihen ras kesaksin si nggeluh i tengah-tengah masyarakat.
2) Mperingeti Kalak Sideban: Adi si eteh lit tawaren investasi bodong ntah pe bahaya pinjol/judi online si mulai mbar i lingkungenta, ula kita sinik saja. Alu mehuli, persingeti temanta, keluarga, ntah pe anggota perpulungen sideban kerna risikona.
3) Ndukung Usaha si Bujur: Mari si dukung usaha-usaha si bujur ras mehuli i bas lingkungenta. Asa bancina, usahakenlah ikut i bas program pemberdayaan ekonomi si ibahan Gereja ntah pe pemerintah si tujunna mehuli.
Alu bage pendilo guna “Jadi Kalak Bujur” i bas aspek keuangen eme pendilo si konkrit man kerina Mamre GBKP. Enda labo saja soal teknis ngaturken duit, tapi soal karakter, integritas, ras kinitekenta man Dibata si masu-masu usaha si benar. Alu nggeluh makeken prinsip-prinsip Kata Dibata si niorati kita enda, kita la saja lepas i bas siding investasi bodong
ras kehancuren finansial, tapi pe jadi usihen si mehuli ras alat kemulian Dibata i japa pe kita ringan.
IV. DISKUSI
1. Turiken pengalamen pribadi ntah kalak sideban si itandaindu si pernah tergiur ntah pe jadi korban “investasi bodong,” pinjol ilegal, ntah judi online. Kai nge si erbahanca ia banci tersiding, janah kai pelajaren si meherga si banci si buat i bas kejadian e nari?
2. I bas konteks pengelolaan keuangen Mamre (I Runggun, Klasis, Sinode), kai saja nge langkah-langkah konkrit si banci sibahan gelah prinsip transparansi ras akuntabilitas ibas pengelolaan keuangan Mamre banci bns erdalan alu mehuli janah la ndabuh ku bas potensi penyalahgunaan?
USULEN ENDE-ENDEN:
1) KEE GBKP No. 5:1-2
2) KEE GBKP No. 19:1, 4
3) KEE GBKP No. 309:1, 3
4) KEE GBKP No. 315:1, 3 (Persembahen)
Pdt. Bumaman Teodeki Tarigan, S.Si., SIP., MM.
HP/WA: 0812 6207 5000