Bahan PA Mamre 1-7 Februari 2026

February 2, 2026 Writer-1 Mamre 0

BIMBINGEN PA MAMRE

TANGGAL, 01 FEBRUARI – 07 FEBRUARI 2026

(Evaluasi Sasaren Pelayanan 2025)

 

Ogen     : Kolose 3:13-15

Tema     : Keleng Ate Mpersadaken Kerinana Alu Serta

Tujun    : Gelah Mamre:

  • Ngasup nuriken cara njaga kiniersadaan sipelain-lain sue ras teks.
  • Nuriken pengalamenna njaga kiniersadaan ibas erbage-bage biak si lit isekelewetta.

Metode: Sharing Pengalamen

3:13 Sabarlah kamu seorang terhadap yang lain, dan ampunilah seorang akan yang lain apabila yang seorang menaruh dendam terhadap yang lain, sama seperti Tuhan telah mengampuni kamu, kamu perbuat jugalah demikian. 3:14 Dan di atas semuanya itu: kenakanlah kasih, sebagai pengikat yang mempersatukan dan menyempurnakan. 3:15 Hendaklah damai sejahtera Kristus memerintah dalam hatimu, karena untuk itulah kamu telah dipanggil menjadi satu tubuh. Dan bersyukurlah.

 

1) KATA PENARUH

Enggo sibentasi pelayanenta tahun si lepas alu sasaren: dewasa menerima perbedaan. Nggo mbue kita iajari kerna sasaren enda, gelah kerina ngawan ni perpulungen khususna Mamre ngasup min ngaloken kalak sideban aminna pe la bagi ukurna. Sijadi penungkunen, enggo nge kita ngasup ngaloken kinierbagen kalak si lit isekelewetta? Adi ikawitken ras temanta Minggu enda tentu banci sibuat hubungenna maka kekelengen nge ngenca banci mpersadaken kerinana alu serta. Labo kita ngasup ngaloken kalak si la bagi ukurta adi la kin erpalasken keleng ate, janah keleng ate ngasup Namburi melala kesalahen kalak sideban man banta.

 

2) URAIAN TEKS

Bahan PA-nta Minggu enda nuriken kerna biak kegeluhen si male ras kegeluhen si mbaru si arusna lit ibas kalak si tek. Biak enda ikawitken ras kearusen nggeluh kalak si tek sierkawiten ras kiniersadanna sapih-sapih kalak si erkiniteken. Janah khusus bahan PA-nta eme nuriken biak nggeluh si mbaru janah biak sienda me si banci erbahanca kalak si tek dewasa ngaloken kerina perbedaan. Piga-piga biak siimaksudken eme: ate perkuah, mehuli, rukur meteruk, lemah lembut dingen sabar, la pergelut dingen sialem-alemen salah, dingen sikeleng-kelengen. Adi ipake kerina biak enda tentu lanai bo turah perjengilen ibas kiniersadan perpulungen.

Adi sipelajari biak siituriken Paulus enda dat kita 3 nilai diri adi ateta ngasup ngaloken kerina perbedaan:

  1. Sabar; adi lit kesabarenta, ugapape perbahanen bagepe pengerana kalak sideban nandangi kita la kita murah merawa. Lit kepentaren ngajari pusuhta seh maka teralokenca kerina perbahanen kalak man banta. Uga banci lit kesabaren e ibas dirinta; tentu turah min ateta mekuah erkteken sieteh maka la ia ngasup erbahan mehuli man banta, la iangkana uga erbahan si payo, tentu mekuah ateta.
  2. Sialem-alemen; memang lit filosofi ngataken maka “sabar itu ada batasnya” erkiteken sie banci jadi turah perjengilen. Adi enggo sempat turah sikitiken ukur ibas kiniersadan lit ibas kalak si nggeluh bas kegeluhen si mbaru eme sialem-alemen salah. Alu bage la turah kesirangen entah pe perpecahen ibas kiniersadaan e, sabab labo ndekah isusun ate nembeh e.
  3. Sikeleng-kelengen; adi enggo lit sialem-alemen salah tentu turah kedamen. Ibas kedamen eme turah keleng ate bagepe sikeleng-kelengen sada ras sidebanna. Enda me nilai si meganjangna ibas kalak sitek, ija kita enggo ngasup encidahken kekelengen e ibas kegeluhenta. Adi enggo turah ate keleng, tentu kai pe lanai lit masalah ibas kiniersadaan. Keleng ate me singerakut kiniersadan gelah enteguh. Keleng ate lanai erbahan ukur kalak mesui, kecewa, merawa, putus asa, ras sidebanna. Tapi keleng ate ngeranaken uga maka sideban banci kalak ermeriah ukur, erpengarapen, erkiniteken dingen erguna ibas geluhna. Janah kegeluhen sibagenda me si isuraken Tuhan arah kegeluhen kalak si tek man baNa.

 

3) PENGKENAINA

Adi siperdiateken kiniersadaan ibas Mamrenta, uga nge siakap gambaren kiningasupen Mamre ngaloken sada ras sidebanna. Adi sinilai banta antara 0 – 10, nilai piga nge kedewasanta ngaloken perbedaan? Arah bahan PA nta Minggu enda kita iajuk mengevaluasi diri gelah lit min perkembangen ras kemajunta ibas kita ngikuti dahin-dahin gerejanta. Adi siperdiateken kegeluhenta sitep-tep wari, mbue kal siidah perjengilen, perpecahen, subuk ibas jabu bagepe ibas gerejanta. Sienda kerina tentu erkiteken kurangna kedewasanta ngaloken perbedaan si lit; egonta, sura-suranta, identa, mekatep kal sipelebeken. Erkiteken sie, lanai meriah iakap kalak ras kita, entah pe sebalikna lit kalak si dominan  kal ibas kai pe, emaka lanai mejile kiniersadan.

Memang kesabaren e rusur kal iuji; arah buena si la bagi ukur, arah respon kalak man banta, ras sidebanna. Ibas sie mekatep kal kita talu seh maka emosi kita dingen si pendam rawa e ibas pusuhta, turah elem-elem. Adi enggo bagenda tentu lanai bo lit kekelengen e ibas pusuhta, piah mehuli pe kalak banta siakap nokoh. Keadaan sibagenda tuhu – tuhu memicu perpecahen, lanai bo si la bagi ukurta ngenca la teraloken kita, si bagi ukurta pe adi enggo sempat ngilas siidah lanai teraloken kita. Erkiteken sie, arah bahanta enda kita iajuk gelah min erlajar mulihi kerna sura-sura Tuhan man banta ras kiniersadanta. Isuruh Tuhan kita ngasup ngaloken kerina sipelain-lain dingen banci sikeleng-kelengen sada ras sidebanna. Kristus pe engkelengi kita labo ban bagi sura-suraNa kita, tapi ban kekelengen si mbelin man banta. Kristuslah si man usihenta gelah dewasa ngaloken kalak si deban.

4) DISKUSI

  1. Arah bahan PA-nta ibas wari enda; kai nge cara siarus ilakoken guna mpersadaken kerina sipelain-lain alu serta?
  2. Mari sievaluasi kerna: kesabarenta, kerna sialem-alemen dingen sikeleng-kelengen. Turiken pengalamenta sekalak-sekalak sierkawiten ras si enda! Kai tekadta ku wari si reh enda guna meningkatken kedewasanta ngaloken kinierbagen si lit i sekelewetta!

 

USULAN ENDE-ENDEN:

 

Pdt. Liza Selvina Br. Tarigan, S.Th.

HP/WA: 0813 7044 2166

 

Post Views: 1,185