Ersada ibas Kepatuhen man Tuhan

Teks       : Keluaren 4: 27-31

Keluaran 4:27-31

4:27 Berfirmanlah TUHAN kepada Harun: “Pergilah ke padang gurun menjumpai Musa.” Ia pergi dan bertemu dengan dia di gunung Allah, lalu menciumnya.
4:28 Kemudian Musa memberitahukan kepada Harun segala firman TUHAN yang disuruhkan-Nya kepadanya untuk disampaikan dan segala tanda mujizat yang diperintahkan-Nya kepadanya untuk dibuat.
4:29 Lalu pergilah Musa beserta Harun dan mereka mengumpulkan semua tua-tua Israel.
4:30 Harun mengucapkan segala firman yang telah diucapkan TUHAN kepada Musa, serta membuat di depan bangsa itu tanda-tanda mujizat itu.
4:31 Lalu percayalah bangsa itu, dan ketika mereka mendengar, bahwa TUHAN telah mengindahkan orang Israel dan telah melihat kesengsaraan mereka, maka berlututlah mereka dan sujud menyembah.

4:27 Tupung si e enggo ikataken TUHAN man Harun nina, “Laweslah ku gurun pasir njumpai Musa.” E maka lawes ia njumpai deleng si badia; jenari kenca ia jumpa minter iemana Musa.
4:28 Ituriken Musa man Harun kerina si enggo ikataken TUHAN asum isuruhna ia mulih ku Mesir, kerna tanda kuasa sinisuruh TUHAN ia erbahanca pe iturikenna man bana.
4:29 Kenca e lawes me Musa ras Harun ku Mesir janah ipepulungna kerina peminpin-peminpin bangsa Israel.
4:30 Ituriken Harun man bana kerina si enggo ikataken TUHAN man Musa, janah kenca bage ibahan Musa kerina tanda kuasa i lebe-lebe bangsa e.
4:31 Tek ia minter kerina janah kenca ibegina maka TUHAN enggo ndahi ia ras enggo ngidah pe kuga kiniseran bangsa e, minter mungkuk ia kerina ersembah.

Tema     : Ersada ibas Kepatuhen man Tuhan

Tujuan  : Gelah Mamre:

• Nuriken uga kiniersadaan Harun ras Musa guna ndalanken Kata Dibata
• Ngakui keleng Ate Dibata man seisi jabu dingen ersada arih patuh nandangi Kata Dibata

KATA PENARUH

Anak situbuh kembar, amin melala pe si bali ibas geluhna, pasti lit perbedan ibas ia, umpamana ibas kulana, biakna, pengeranana, ras sidebanna. Sendalanen ras sie, teridah maka Dibata si sada e nge si nepa doni enda tapi pelain-lain nge tinepaNa e, subuk ibas tempas bage pe biakna. Tapi ibas sie kerina, tep-tep tinepa e lit “persamaanna”, janah sada ras sidebanna saling ketergantungen, sabab sada pe tinepa e la lit sibanci dingen ngasup sisada. Emaka tep-tep tinepa arus siergan ras sisampat-sampaten, sitangaren, sikelengen. Sipelain-lain e ibahan jadi gegeh guna njadiken kegeluhen enda jadi mehuli dingen rasil (sukses).

Sendalanen ras kai siituriken i datas mari kita erlajar arah pengalamen Musa ras Harun ibas kiniersadaan ukurna mabai bangsa enda guna ersembah man TUHAN.

URAIAN TEKS

Kitik-kitikna nari Musa ras tading i Mesir, erdandanken ia kiam i Mesir nari, itandingkenna kerina keluarga ras sima-simana. Enggo ndekah ia tading ras mamana Jetero. Emaka turah atena metedeh guna jumpa ras keluargana i Mesir.

Bahan ogenta wari enda ngerana kerna TUHAN si nuruh Harun guna jumpai Musa. Sebab ieteh Dibata maka Musa perlu itemani guna mimpin bangsa Israel ndarat i Mesir nari. Erdandanken sie maka Harun isuruh guna nemani Musa mimpin bangsa Israel.

Ibas perjumpaan Musa ras Harun, turah aru ate sabab enggo ndekah ia la jumpa. Emaka ipeseh Musa kata Dibata man Harun ras tanda sengget (mujizat) siiperentahken Tuhan man bana. Emaka tupung Musa ras Harun radu ras kerina pemimpin (bhs. Indonesia tua-tua) Israel, ipeseh Harun kerina kata Dibata si ipeseh Musa man bana kerina. Emaka kenca Harun ngerana, Musa erbahan tanda kuasa i lebe-lebe bangsa e. kerina enda erbahanca maka bangsa enda tek. Kenca ibegina maka TUHAN enggo ndahi ia ras enggo ngidah uga kiniseran bangsa e, minter mungkuk ia kerina ersembah.

Arah kejadin enda teridah uga kiniersadan ibas Musa ras Harun, ersada ibas megiken kata Dibata, ersada guna ndalakenca emaka turah kemalemen ate, seh bagi kai sinisuraken e me kerina bangsa enda tek nandangi Dibata dingen isembahna pe Dibata. Sabab enggo iangka bangsa enda maka Dibata enggo ndahi ras ngidah kiniseranna. Ibas Dibata ndahi ras ngidah kiniseranna ncidahken maka Dibata tuhu-tuhu erkeleng ate dingen nggit mbebasken Bangsa enda ibas kiniseranna nari.

Harun jadi penampat man Musa ibas nehken kata Dibata, emaka kedungenna bangsa Israel tek man Dibata kenca megiken kesaksin Harun.

PENGKENAINA

Kiniulin sijadi ibas kegeluhen Musa ras Harun erdandanken sada penggurunna, sada palasna eme kap kata Dibata. Kata e, sijadi gelemen ras ikutenna.

Ibas ndalani kegeluhenta sitep-tep wari, dem alu persoalen ras tantangen, persoalen e pergancih-gancih reh, tentu labo mesunah ndalanisa. Ibas si e Dibata mereken teman e me keluarga (ndehara, perbulangen, orangtua, anak-anak) ras teman-teman man banta terlebih-lebih Tuhan Jesus pe jadi temanta situhu-tuhu dingen setia.

Bagi Musa isuruh Dibata guna nampati Harun, lebihen asa si e penampat Dibata si isehkenNa man banta. Si perlu silakoken eme ngendesken geluhta ibas kiniteken si paguh ibas pengarak-ngarak ras penegu-negu Dibata. Tuhan Jesus selaku teman si tetap, nggit megiken dingen mpegegehi kita. IA ras kita ibas kerina situasi geluhta. Ibas sienda sijadi perkakas siiberekenNa, si pemena e me kap keluarga. Gelah keluarga megegeh, maka kerina jabu, sada ras sidebanna ersada alu paguh guna tutus megiken ras ndalanken kata Dibata. Kata Dibata e me kata sierkuasa mpersadaken, mperdameken, mpeturah keriahen ras kemalemen ate, kata e maba kegeluhen jabu megegeh guna ngalaken kerina perbeben.

Gegeh jabu kalak si tek e me ngakui kerna keleng ate Dibata. Jabu siersada arih ibas nggejabken keleng ate Dibata nggit patuh nandangi kataNa. Melala kata singerana ibas geluh enda, tapi kata Dibata ngenca ngasup mabai kita ku kegeluhen si teneng, dame ras ernalem ate. Patuh nandangi Dibata ngenca erbahanca kita pentar sabab KATA E KAP DIBATA sijadi ulu kepentaren.

Ingetlah maka Dibata e me temanta singangkai dinegn ngasup nggejabken kerina perbeben geluhta. Emaka jadikenlah jabunta jadi jabu situtus megiken kata Dibata ras ndalankenca, kiniulin jadi sikerajangenta.

DISKUSI

1. Rikutken bahan ogen, turikenlah kai sierbahanca maka banci ersada kal arih Musa ras Harun.
2. Rikutken pengalamenndu, kai kendalana ibas mabai isi jabu guna ersada arih megiken ras ndalanken Kata Dibata? Ras kai-kai saja usaha sibanci ibahan Mamre gelah anak ras kempu tutus megiken kata Dibata ras nggit ngataken bujur man Dibata?

Usulen Lagu

• KEE GBKP No. 424: 1-2
• KEE GBKP No. 71: 1,3
• KEE GBKP No. 281: 1-3
• KEE GBKP No. 59: 1- (persembahen)

Pdt. Jenni E. br Keliat.
HP: 0813 7552 3001