KATA DIBATA TETAP RASA LALAP
Matius 24:32-35
(GBP GBKP: Tim Pembacaan Alkitab)
- PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden pop rohani.
- Janah kerina perdalanen PJJ enda banci iubah (imodifikasi) rikutken perluna.
- Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata
24:32 Tariklah pelajaran dari perumpamaan tentang pohon ara: Apabila ranting-rantingnya melembut dan mulai bertunas, kamu tahu, bahwa musim panas sudah dekat. 24:33 Demikian juga, jika kamu melihat semuanya ini, ketahuilah, bahwa waktunya sudah dekat, sudah di ambang pintu. 24:34 Aku berkata kepadamu: Sesungguhnya angkatan ini tidak akan berlalu, sebelum semuanya ini terjadi. 24:35 Langit dan bumi akan berlalu, tetapi perkataan-Ku tidak akan berlalu.
- PERPULUNGEN JABU-JABU/ PERPULUNGEN JABU
- RENDE KEE No. 204:1,4 (Ibabai simada jabu/Bapa)
Kata ni Dibata, Seh kal e perluna. Bas geluh enda
Ogelah Pustaka Je Ia ngerana, Man banta k’rina.
Gegeh ibas geluhku, KataNdu situhu-tuhu,
Ras pasu-pasuNdu.
Nguda ras metua, Perlu ngalokenca, Kata Dibata.
Tah i japa gia Ola lupa kita, Em ban temanta.
Sampatlah min o, Tuhan, Gelah kuteh kai kubahan,
- ERTOTO (Ibabai si mada jabu/ nande)
- RENUNGEN
Teks : Matius 24:32-35 (Ibabai nande)
Tema : Kata Dibata Tetap Rasa Lalap
Tetep jelma mentasi proses kegeluhen si erbahanca ia banci berubah. Umpamana, sekalak jelma persinik kal erkiteken anak-anak nari rusur kena rawa orang tuana si erbahanca la ia pang erkai pe bage pe melasken kai pe, kegeluhenna tempa la lit rumatna. Seh sada paksa ia erlajar arah buku-buku si iogena si nuriken kerna luka batin si la terpepalem erbahanca kegeluhen manusia la lit rumatna. Kenca mbages iukurina janah tedeh kal atena mpekena kegeluhenna e maka robah me ia, mulai turah rumatna. Enda encidahken maka teptep manusia banci ngenanami perubahen.
Teks renungenta nuriken kerna kerehen Anak Manusia si isuruh Dibata si maba perubahen. Ituriken “kune batang ara dahanna meratah janah erbulung nguda ia maka musim perlego enggo ndeher, janah adi idahndu pagi kai si ituriken man bandu jadi kerina maka enggo ndeher kedungen doni enda. Langit ras doni masap kap pagi, tapi katangKu tetap rasa lalap”. Enda encidahken litna pepagi perubahen i bas doni enda tupung anak Manusia si isuruh Dibata e reh, langit ras doni enda pe pagi masap. Tapi lit si tetap rasa lalap e me kata Dibata. Alu bage teptep kalak si tek perlu kal nggeluh i bas kata Dibata si tetap rasa lalap.
Kata Dibata tetap rasa lalap, kai si ipesehNa la banci la jadi. Kata Dibata enggo ipesehNa man banta arah Pustaka Si Badia. lje banci si eteh kai ndube si enggo ipadankenNa arah Padan Si Ndekah tuhu-tuhu isehken Na i bas Padan Si Mbaru. Arah Pustaka Si Badia pe kita erlajar kerna sura-sura Dibata, tersurat i bas 2 Timotius 3:16: “Kerina si tersurat i bas Pustaka Si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pdah-pedah gelah nggeluh alu mehuli”. Erkiteken si e, penting kal teptep kalak si tek ngoge ras ngangka kerna kata Dibata.
Amin pe i bas kinatana, banci jadi melala tantangen guna tutus ras setia nggeluh i bas kata Dibata, umpamana i bas ngoge Pustaka Si Badia, banci jadi ninta, erkiteken kesibuken lanai lit waktu ngogesa. Atau lit nge waktu ngogesa, tapi magati turah kebosanen ras munduk-undukta, erkiteken la siangka kai maksud ayat si ioge kita. Bage pe piga-piga tantangen si debanna.
Gerejanta ngidah pentingna teptep anggota perpulungen nggeluh i bas kata Dibata, seh maka i GBKP enggo ilitken Unit Kelas Baca Alkitab (KBA) bage pe unit Baca Gali Alkitab (BGA) bage pe lit kerjasama ras Langham Indonesia. Nuate unit-unit banci nampati gelah ngoge ras ngangka kata Dibata jadi gaya hidup ngawan GBKP
Tujun KBA e me gelah ngawan perpulungen setia ngoge Pustaka Si Badia mulai kitab Kejadin-Ketangkasen alu disiplin ras teratur, subuk anak-anak bage pe kalak dewasa, subuk secara kelompok bage pe pribadi. Intina gelah kerina ngawan GBKP semal ngoge Pustaka. BGA e me salah sada metode guna ngangkai Pustaka Si Badia, gelah la terjeng ioge, tapi pe idat makna/pesanna janah banci pe erbuah arah kegeluhen si teridah. Arah BGA kita ibabai ngoge Pustaka Si Badia alu cara si berbeda rikutken genre/jenis sastrana, je nari arah pengogen e si dat me pesan Dibata man banta secara pribadi subuk e pelajaren si mbaru, perentah, persinget, janji Tuhan man banta ntah pe teladan si man usihenta (i bas BGA isingkat P3JT). Kenca kita ndatken pesan arah kata Dibata si ioge kita, kita i babai guna meresponsa i bas geluhta si teptep wari, subuk arah pengataken bujurta/syukur, arah perotonta/Doa, arah pengakun dosanta/Dosa bage pe arah tekadta (i bas BGA isingkat SDDT). Jenari arah Langham, serayan Tuhan ras pelayan KAKR iajari nehken Kata Dibata alu setia ku teks, jelas dingen relevan ku perpulungen. Ertina KBA, BGA ras Langham me salah sada dalan si iban gerejanta gelah teptep ngawan perpulungen reh ngasupna nggeluh i bas kata Dibata si tahan rasa lalap e.
Alu bage iarapken teptep ngawan perpulungen reh tutusna min ngoge ras nggargari kata Dibata i bas kegeluhen si teptep warina, janah asa bancina ngelitken kegiaten KBA ras BGA I tengah gerejanta subuk i bas sektor bage pe kategorial gelah reh bagesna penandaita kerna kata Dibata. Semangat er-KBA ras er-BGA. Amin
NURIKEN PENGGEJAPEN: Nande, anak, bapa
SHARING/AKSI
1) Teptep kalak nuriken pengalamenna i bas ngoge Pustaka si Badia sedekah enda (banci ituriken kerna tantangen i bas ngogesa bage pe ulih si idat arah ngoge Pustaka Si Badia)
2) Litkenlah kelas baca Alkitab (KBA), Baca Gali Alkitab (BGA) ras pelatihen kotbah metode Langham i bas runggun/sektor/kategorialta (banci koordinasi ras unit KBA, BGA ras Langham GBKP)
PERSEMBAHEN RENDE: KEE No. 420:1-2 (Ibabai Pengurus PJJ/anak)
Asa gegeh ras kengasupen, kami nehken persembahen
Endesken kami baNdu Tuhan, alu dem keriahen
Reff: Ajari kami ngergaken, talenta ras kiniliten
Arah ukur ras perbahanen, Tuhan ipermuliaken
Mbue tuhu kami aloken, pasu-pasuNdu o Tuhan
KelengNdu igejapken kami, Kam kap si negu kami
Reff: …
PERTOTON SAPAAT
1) Notoken si mada jabu
2) Notoken gelah ngawan GBKP nggit ngoge ras nggargari isi Pustaka Si Badia
3) Notoken pembinaan bas GBKP gelah reh sikapna.
RENDE: KEE No. 374: 1 (iendeken 2X) (Ibabai Anak)
Jesus ulu kegeluhenku, Kam me ngenca pengendesenku
Lalap tedeh ate pusuhku, ku pehaga Kam bas geluhku
Reff: O Tuhan pernehen pusuhku,
Si ertedeh ate man baNdu
Kugelem pedah ras padanNdu
Kusembah Kam i bas geluhku
- Pertoton Tuhan (Ibabai serayan/nande/bapa)
- MOMO
- JEDA RAS PENUTUP
Pdt. Oktoria br Surbakti, M.Th.
HP/WA: 081376206662