NGAJARKEN KEARUSEN NGGELUH
Moria mempersiapkan anak dalam budaya.
TUJUN: Gelah Moria:
- Meteh kerna kearusen nggeluh eme pentar, tek man Tuhan, mehuli ras benar.
- Ngajarken man anak kearusen nggeluh erpalas budaya Karo
METODE PA: Diskusi ras Nulisken terombo.
Kata Penaruh.
Nina Koentjaraningrat sekalak tokoh antropologi Indonesia maka lit telu dampar budaya Cipta, Kars Karya. Cipta eme kerina si lit i perukurenta subuk e ‘ide, gagasen,’ caranta rukur. Karsa eme kerina si encidahkеn hubungenta sada ras si debanna “orat nggeluh” (sistim kekerabaten) bage pe caranta ersembah man Dibata si tandai kita (sistim religi). Karya eme kerina ulih pendahin manusia umpamana rumah, alat kesenian, transportasi ras sidebanna. Alu bage maka kerina manusia la pulah i bas sada budaya, i ja ia nggeluh ras katawari ia nggeluh. Sada bagin budaya ndai eme kerna orat nggeluh si ertina meteh uga kearusen nggeluh erpalasken budaya.
Kitab Kuan-kuanen eme kitap Kepentaren Kalak Jahudi. Lit telu inti si ajarken i bas kitab enda eme kerna jabu, kerna hubungen (relasi) ras kerna kebayaken. Tujun penulis kitab enda gelah si nggit mpelajarisa geluhna sikap (sukses) janah erpalas kegeluhen si payo eme “erkemalangen man Tuhan.” Jadi, erkemalangen me palas kepentaren ras kesuksesen nggeluh. Si jadi bahan PA enda eme pengajaren nggeluh i bas jabu.
Mpebagesi Pengangkan Kerna Ogen.
I bas ayat 6 maka lit sada perentah man orangtua eme uga ngajarken man anak kerna kearusen nggeluh. Kata kearusen nggeluh (jalan yang patut) eme dalan si ipalasi erkemalangen man Dibata. Ertina kearusen nggeluh eme nggeluh sue ras dalan si ituduhken Dibata. Entah pe dalan si ngena ate Dibata. Ertina i bas kegeluhen manusia lit dua dalan si man pilihen, sada dalan Dibata, sada nari dalan kegelapen. Maka perlu pengajaren i bas orangtua nari gelah anak ndai ula salah milih dalan kegeluhen. Sekali ia salah milih dalan kegeluhen banci erkadiola segedang kegeluhenna. Tapi bagi isingetken i bas ayat 6 maka adi payo dalan kegeluhenna banci e ikutkenna asa umur geluhna. Uga maka banci asa umur geluhna? Sada pengajaren sekali ibelasken orangtua banci lenga iantusi ras idalanken sekalak anak. Sada pengajaren si iulih-ulihi seh dungna idalanken anak, dungna jadi kebiasanna, si e me jadi biakna (karakterna) alu bage lanai bene asa ia metua. Emaka ibenaken alu ngajarkenca, ndalankenca rulin- ulih, jadi kebiasan ras jadi biakna. “Karakter adalah kumpulan semua kebiasaan.”
Ayat 17-18, nuriken maka pengajaren si isehken eme perkatan kalak pentar. Pentar i jenda eme perkatan si sentudu ras sura-sura Dibata. Kalak si mperdiatekenca maka meriah ukurna sabap enggo ingetna pedah e janah dalankenna i bas kegeluhenna. Kepentaren e nampati kalak si mperdiatekenca tupung ia muat keputusen nggeluh bage pe i bas ia ndahiken dahinna.
Ayat 19-21, nuriken maka sura-sura pengajaren si isehken eme gelah erkiniteken man TUHAN. Erkiniteken man TUHAN ertina eme maka kai pe si ilakokenna sungkunna lebe sura-sura TUHAN. Labo perukurenna ipelebena tapi kai peraten TUHAN. Guna seh ku bas kegeluhen si bage rupa maka perlu melala pertenget. I bas cakap Karo turikenna pe bilangenna eme telu puluh pertenget. Isi pertenget (nasihat) enda kerina kepentaren ras si mehuli. Kepentaren banci ertina kerna kebeluhen (skill) si mehuli banci ka si ertiken bagi si sentudu ras peraten Dibata. Duana enda iperluken teptep kalak si erdalan arah dalan Dibata. Erdadanken si e maka kai pe persoalen si man jababen ietehsa njababsa alu payo.
Pengkenaina.
Kearusen nggeluh erpalasken Kitab Kuan-kuanen eme nggeluh sentudu ras si ngena ate Dibata. Maka banci si ngena ate Dibata jadi sikerajangen anak-anakta, la banci lang si ajarken man bana. Pengajaren si banci jadi kegeluhenna anem gia arus iulih-ulihi. Adi enggo alokenna maka erlajar ia ndalankenca. Adi enggo idalankenna maka dungna jadi kebiasanna. Kerina kebiasan si mehuli si dalankenna e eme dungna jadi biakna. Jadi, biak (karakter) si mehuli turah arah kebiasan si idalanken. Kebiasan e reh arah perbahanen si mulih-ulih idalanken.
Bage pe tentu lit ka kearusen nggeluh i bas kita kalak Karo. Kearusen nggeluh ndube eme si dat arah ajar orangtuanta si arah lebe. Kai si ndube iajarkenna jadi sada tanggungjabapta ka mpesehsa man anak-anakta genduari gelah ia pe meteh uga kearusen nggeluh i bas kita kalak Karo. Janah kearusen geluh e enggo isempurnaken alu kearusen nggeluh si erpalas ku bas erkemalangen man Tuhan. Carana guna ngajarken kearusen nggeluh e man anakta banci alu ercakap-cakap ras ia, jenari si turiken uga turi-turin kegeluhen orangtuanta ndube. Alu bage banci idahna orat nggeluh (nilai-nilai) kegeluhen si mehuli, umpamana perjuangen orangtua i bas masa-masa ngalaken erbage kiniseran. Enterem genduari anakta lanai ietehna uga perjuangen orangtuanta si arah lebe. Tole pe mehuli ietehna terombo keluarganta gelah la bene orat sangkep geluh i bas ia. Banci kap teman-temanna nari ngenca akapna kade-kadena. Alu ngajarken si enda kerina maka banci dungna ietehna uga orat nggeluh kalak Karo si erpalas kiniteken ras erkemalangen man Dibata.
Diskusi:
- Kai akapndu si patut si pelajari kerna kearusen nggeluh erpalasken bahan PA-nta enda?
- Cuba dage si tulisken terombonta asa si inget kita saja i bas paksa enda. Mulih PA nari ertekad kita gelah si litken waktunta ercakap-cakap ras anakta kerna turi-turin ras terombo jabunta.
Pdt. Yunus Bangun M.Th