Benaken Ibas Gelar Tuhan
( Yakobus 4 : 13 – 17 )

4:13 Jadi sekarang, hai kamu yang berkata: “Hari ini atau besok kami berangkat ke kota anu, dan di sana kami akan tinggal setahun dan berdagang serta mendapat untung”,
4:14 sedang kamu tidak tahu apa yang akan terjadi besok. Apakah arti hidupmu? Hidupmu itu sama seperti uap yang sebentar saja kelihatan lalu lenyap.
4:15 Sebenarnya kamu harus berkata: “Jika Tuhan menghendakinya, kami akan hidup dan berbuat ini dan itu.”
4:16 Tetapi sekarang kamu memegahkan diri dalam congkakmu, dan semua kemegahan yang demikian adalah salah.
4:17 Jadi jika seorang tahu bagaimana ia harus berbuat baik, tetapi ia tidak melakukannya, ia berdosa.

Lit istilah ibas kalak Karo..” Salah benana, lepak pendungina “. Ibas kalak Karo, menaken (“memulai”) sada-sada dahin tah si man bahanen, merupaken sada hal si cukup penting ( mungkin pe ibas suku-suku sideban ). Umpamana : menaken mbangun rumah, neka sabah, menaken merdang, nuan-nuan, erbahan usaha ras sidebanna. La terjeng ibas menaken sada dahin saja, perlangkah pe menentuken ulih. Umpamana : lawes engkawil, erburu ku kerangen, ndarami bulung-bulung ku kerangen man tambar ras sidebanna, lit kerina turi-turinna, ertina ula kel sempat salah langkah, banci lalit ulihna.

Peran “orang-orang tertentu” cukup penting ibas menaken sadasada dahin ibas paksa si adi. Umpamana : ibas menaken merdang megati kel isuruh kalimbubu ngenahken benih si pemena. Mbelin kel pengarapen toto ras pasu-pasu ibas kalimbubu nari erbahanca mbuah page si ni suanken e. Ibas mengeket rumah, kalimbubu si erkimbang…berperan engkimbangken amak man anak beru ( simada jabu), bage pe kalimbubu si majekken dalikan berperan si pemena pegara api ibas dapur anak beruna. Toto kalimbubu, gelah ibas rumah si mbaru enda tetap lit cimber api (la pajek gara api), ertina lit lalap si man tanggeren. Adi lit si man tanggeren, ertina terbuat nakan ras adumna.

Surat Rasul Jakup ipeseh man kalak Kristen si lit ibas perantauan (kuta kalak), si kemungkinen erbahan usaha guna ndatken ulih. Ibas menaken sada pendahin entah usaha, persinget Jakub arus tetap nginget kuasa Dibata. Memang si erbahan usaha e kita nge, modal pe ibas kita nari. Tapi ibabo kerina si terpikirken kita, lit nge si lebih erkuasa ema Bapata si i Surga. La kel ate Jakub kalak Kristen terjebak kubas perukuren-perukuren kerna keberhasilen saja..” erbinaga ndatken untung si mbelin “ (ayat 13). Tapi ipersingeti gelah mengandalken Tuhan….arus min ikatakenndu “ adi ibere Tuhan…” (ayat 15) . Engkai maka lit pengendesen alu ngataken: adi ibere Tuhan? Perlu lit kesadaren ibas kita, maka si mada geluhta enda (kesahta) eme Dibata. Ise pe labo ngasup ertahan adi kin Dibata enggo erdilo nandangi kita, alu bage ma sia-sia kerina rencana si enggo si bahan. Tole ikataken Rasul Jakup, ibas kita ngerencanaken sada-sada hal ula kel sempat meganjang ukurta. Banci saja persiapenta enggo cukup, adi merdang ndai kin..juma enggo sikap ingan nuan page, adi usaha ndai kin, modal enggo lit, ingan enggo sikap. Emaka tempa lanai lit siakap rongketna guna menakenca, emaka si hagaken me perencanaan si enggo sikap e. Tapi nina Jakub..“Tapi gundari meganjang ukurndu dingen meganjang kam ngerana. Kerina pengeranandu si meganjang e salah”(ayat 16).

Arah perpudi enda, cukup mehuli kel maka enggo lit lit perkembangen si terjadi ibas ngawan perpulungen. Enggo me lit piga-piga anggota perpulungen ibas menaken usahana ibenaken alu kebaktian. Tapi perlu ipersingeti man banta, maka ibenaken alu kebaktin ras pertoton e labo guna jile-jile saja. Tuhu-tuhu min pengendesenta secara total nandangi “Si Mada Kuasa”, maka kerina perdalinen usaha silakoken kita erpalasken keleng ate Tuhan. Adi perdalinen usaha ta e ibenaken ibas gelar Tuhan, maka ibas “ndahikenca” pe teridah min nilai-nilai Kristiani, subuk ibas erga bagepe pelayanenna.

Bagepe tentuna ibas kita nuan-nuan, sanga sibenaken alu pertoton..tetaplah lit pengendesenta man Tuhan ibas kerinana. Adi gagal sinuan-sinuanta e, la erbahanca urak kinitekenta. Adi lit ulihna, tentu la kita lupa nehken persembahenta man Tuhan sebagai bentuk pengataken bujurta. Jadi ula lupa menaken kai pe ersukuten kita man Dibata.

EVALUASI :
Uga pendalankenta kerna aksi bahan PJJ ta minggu si lewat ?

DISKUSI :
1. Nina Jakup…” adi ibere Tuhan…”. Si diskusiken, adi kita erbahan usaha entah nuan-nuan, terjeng ja nge bagin sikerajangenta ras bagin sikerajangen Dibata?
2. Turiken pengalamenta (si enggo lit pengalamenna)…kai nge bedana adi dahinta si benaken ibas gelar Tuhan (umpamana alu pertoton) ras lang. Uga nge ulihna ?

AKSI :
Mari si sosialisasiken ibas PJJ ta bagepe ibas Runggunta, maka ibas tep-tep menaken sada usaha entah pe nuan-nuan, si benaken alu kebaktin, si langlangna alu pertoton. Labo sada kearusen lit snack tah makan bersama, simehulina ikut min serayan Tuhan
Pertua,Diaken, Pandita.

USULEN LAGU :
1. KEE GBKP NO 262:1,2,4
2. KEE GBKP NO 306:1,4
3. KEE GBKP NO 354:1,2
4. KEE GBKP NO 185:1,2

TOPIK PERTOTON SYAFAAT :
1. Notoken gelah ngawan perpulungen i belang-belang GBKP tetap erpengendes man Tuhan ibas tiap memulai nuan-nuan tah er usaha.
2. Notoken ngawan ni perpulungen, gelah sangap kita ibas erdahin, mereken ulih si mehuli man banta.
3. Siturah ibas perpulungen

Pdt. Dormanis Pandia, S.Th