Pengurus si Mehuli ibas Pemere Dibata

(Memaknai Persekutuan I Konteks Modern)

Ogen   : 1 Petrus 4: 7-11

1 Petrus 4: 7 – 11

Hidup orang Kristen

4:7 Kesudahan segala sesuatu sudah dekat. Karena itu kuasailah dirimu dan jadilah tenang, supaya kamu dapat berdoa.
4:8 Tetapi yang terutama: kasihilah sungguh-sungguh seorang akan yang lain, sebab kasih menutupi banyak sekali dosa.
4:9 Berilah tumpangan seorang akan yang lain dengan tidak bersungut-sungut.
4:10 Layanilah seorang akan yang lain, sesuai dengan karunia yang telah diperoleh tiap-tiap orang sebagai pengurus yang baik dari kasih karunia Allah.
4:11 Jika ada orang yang berbicara, baiklah ia berbicara sebagai orang yang menyampaikan firman Allah; jika ada orang yang melayani, baiklah ia melakukannya dengan kekuatan yang dianugerahkan Allah, supaya Allah dimuliakan dalam segala sesuatu karena Yesus Kristus. Ialah yang empunya kemuliaan dan kuasa sampai selama-lamanya! Amin.

Pengurus si mehuli kerna pemere Dibata

4:7 Kerina si nasa lit enggo ndeher kedungenna. Dage kuasailah dirindu janah petenenglah ukurndu gelah ngasup kam ertoto.
4:8 I babo si e kerina, sikeleng-kelengenlah kam alu tutus, sabap keleng ate namburi melala dosa.
4:9 Metemue lah kam alu la jungut-jungut.
4:10 Sekalak-sekalak, selaku pengurus si mehuli i bas pemere Dibata si pelain-lain e, si iberekenNa erpalasken lias ateNa, arus nggunaken pemere e guna kiniulin kalak si deban.
4:11 Kalak si ngerana, ngeranalah alu kata-kata si tempa-tempa rehna i bas Dibata nari. Kalak si nampati, isampatinalah kalak alu gegeh si ibereken Dibata man bana, gelah i bas kai pe ipuji kalak Dibata arah Jesus Kristus. IA me si mada kemulian kuasa seh rasa lalap. Amin!

Tema   : Pengurus si Mehuli ibas Pemere Dibata

Tujun   : Gelah Mamre:

• Meteh maka kalak si tek arus jadi pengurus si mehuli ibas pemere Dibata.
• Njadiken dirinya sebagai sebage pengurus si mehuli ibas pemere Dibata.

I. KATA PENARUH

Semal ibas kita, dahin pengurus eme singaturken kerina kegiaten ras pelayanen itengah-tengah gerejata. Pengurus eme sada bagin si penting kal itengah-tengah wilayah pelayanen Mamre, subuk ibas Mamre pusat, klasis, runggun seh ku sektor. Sabab adi lalit kepengurusen maka dahin pelayanen e pe lalit singaturkenca, tentuna dahin pelayanen e banci murde. Emaka pengurus e arus jadi teladan ibas pelayanen bage pe kegeluhenna tep-tep wari. Bahan PA Mamrenta wari enda ngerana kerna uga kin biak ras tanggung jabab sekalak pengurus ibas perdalanen kegeluhenna.

II. URAIAN TEKS

Nas PA Mamre enda eme surat si i suratken rasul Petrus man Perpulungen i Asia kitik (gundari Turki) si sangana ngenanami kiniseran erkiteken mempertahenken kinitekenna man Tuhan Jesus. Kiniseran-kiniseran si nanami perpulungen e ipandangi/ipekitik ibas masyarakat ras ibas romawi nari, erkiteken cara nggeluh kalak Kristen la ngikuti kesemalen kegeluhen jelma sinterem si ngeluh alu bentuk erkiniteken Paganisme. Ibas tekanen si mberat e Petrus memperlengkapi perpulungen, nggeluh alu make pikiren Kristus, eme; kesedian ndalani kiniseran daging guna ngadi nggeluh ibas kuasa dosa ras nggeluh sue ras sura-sura Dibata, si sangana perpulungen ibas transisi nadingken kegeluhen sidekah bengket ku kegeluhen simbaru. Bage pe kesadaren kerna kerehen Yesus mulihken ku doni, guna penjemba gelah nggeluh bijaksana, tutus ertoto, ras ngkelengi turang senina alu pemera-pemere si ibereken Dibata.

Ibas situasi perpulungen singenanami kiniseran erkiteken erkiniteken man Yesus, Petrus mereken piga-piga pengertin ras panduan praktis ibas ndalani kegeluhen. Ibas ayat. 7, Petrus ngerana kerna kerehen Yesus mulihken ku doni enda, njemba perpulungen gelah ngasup ngkuasai diri, alu cara peteneng ukur ras gelah ngasup ngasup ertoto. Ukur si la tenang me sierbahanca la sikap ertoto. Petrus mpegegehi perpulungen gelah amina kai gia jadi kiniseraan ibas ertoto lit gegeh ibereken Dibata gegeh guna ndalanisa. Ayat 8, 9 ibas persadan perpulungen e Petrus nekanken, gelahna ngeluh sikeleng-kelengen e biak ibas tengah-tengah perpulungen, sabab kelenga ate e namburi dosa. Enda maksudna labo keleng ate e ngapusken dosa, tapi ibas nehken ngkeleng ate man senina turangta, si arusna nda jadi dosa dungna erkiteken lit kekelengen lanai jadi dosa. Keleng ate enda i petangkas Petrus ibas metemue ras ngaloken tumpangen/kesilang. Erkiteken ibas paksa e megati kalak Kristen i ayak-ayak erkiteken erbahan persekutun, pelayanen ras meritaken Berita Simeriah, emaka harus megati tading piga-piga wari i rumah teman sada kiniteken seh asa situasi enggo aman. Bage pe ibas ayat 10,11, Petrus nuriken man perpulungen kerna pengurus si mehuli ibas pemere Dibata si pelain-lain, si iberekenNa erpalasken lias ateNa, arus mpergunaken pemere e guna kiniulin kalak sideban. Adi pemere Dibata ngerana, ngeranalah ia, adi pemere Dibata nampati, isampatinalah kalak sideban. Gelah arah pemere Dibata e ipuji kalak Dibata arah Jesus Kristus. Petrus ngidahuga pengurus simehuli ibas pemere Dibata nari, sue ras kai siterjadi ibas paksa e sulit kal ngaturken perpulungen, erkiteken mbelina tangtangen ibas eksternal nari, eme kalak sierkiteken man dewa-dewi, masyarakat ras pemerintah romawi. Jadi perpulungen arus iaturken bage pe idarami ntah ija deba enggo marpar -merap erkiteken ipesega-sega ras iayak-ayak. Tentuna nai lenga bagi gundari lit group WA banci i share informasi tapi pengurus merikataken pergantian jadwal kebaktian ras pelayanan tapi harus idahi ku rumah-rumah si ngeri kal resikona. Ibas situasi bagenda nge pemere Dibata kerna ngerana ras nampati eme pemere si seh kal pentingan ibas paksa sie, emaka Dibata mereken pemereNa sue ras konteks keadaannta. Ibas paksa si e ibere Dibata pemere ngerana guna mpegegehi perpulugnen gelah tetap paguh erkiniteken ibas Yesus. Ras pemere napati emkap ibas paksa si kalak kristen megati pindah-pindah tadih si erbahanca harus tading ibas rumah kalak Kristen erwari-wari tentuna simada jabu ibere Dibata pemere guna nampati sada kiniteken.

III. PENGKENAINA

Arah bahan PA Mamre ibas minggu enda sialoken sada pengertin maka Pengurus si Mehuli ibas Pemere Dibata i tengah-tengah gerejata GBKP secara khusus si jadi pengurus Mamre, harus ipahami maka pengurus simehuli e pemere Dibata si erdahin ngaturken gelah Mamre tetap paguh kinitekenna man Tuhan Yesus aminna melala tangtangen ibas kegeluhenna. Sekalak sijadi pengurus enda labo erkiteken terpilih ia jadi pengurus ibas pemilihen Mamre Pusat, Klasis, Runggun ntah sektor tapi erkiteken Dibata mereken pemereNa (karunia) man bana guna ngelai Tuhan, emkap ngaturken pelayanen alu mehuli gelahna kiniteken perpulungen tetap paguh aminna gia melala tangtangen perbeben ibas dampar kegeluhen si erbahanca banci monce kiniteken Mamre.

Perlu sipahami Pemere/Karunia eme sada keterampilen ntah kebeluhen si labo ipelajari tapi rehna ibas Dibata nari guna ipakeken guna ngaturken pelayanen bage mpetetap kiniteken bage pe meritaken Berita Simeriah. Alu bage pengurus si mehuli la ngenca ngangkai maka kengasupenna ngaturken pelayenen e pemere Dibata tapi bage pe ngidah pemere-pemere Dibata si lit ibas tengah-tengah perpulungen Mamre, gelahna Mamre pe ibas pemere-pemere Dibata si alokenna banci muat bagin ibas mpeteguhi kiniteken ras nampati perbeben kegeluhen temanna Mamre.

IV. DISKUSI

1. Uga nge sedekah enda pengertinndu ras pengidahndu kerna pengurus itengah-tengah gerejata? Ras sikap kai nge si perlu ikembangken ibas pengurus ibas ngaturken dahin pelayanen?
2. Biak-biak kai nge si arusna lit ibas Pengurus simehuli ibas pemere Dibata, gelahna ngasup ngaturken pelayanen alu mehuli segelah reh paguhna kiniteken Mamre GBKP?

V. USULEN ENDE-ENDEN:

• KEE GBKP No. 102: 1, 4 Kekekenlah O Kam Si Tutus
• KEE GBKP No. 255: 1-2 Talenta
• KEE GBKP No. 209: 4, 5 Perpulungen Ersadalah
• KEE GBKP No. 455: 1 (Persembahen) Tatap page si megersing

Pdt. Insan Sinurat, M.Th.
HP/WA. 0812 8881 31248