Saitun Jadi Usihen Ibas Kiniulin

HUT Moria

Ogen : Pilipi 4: 4-8

Indonesia:

[4] “Bersukacitalah senantiasa dalam Tuhan! Sekali lagi kukatakan: Bersukacitalah!

[5] Hendaklah kebaikan hatimu diketahui semua orang. Tuhan sudah dekat!

[6] Janganlah hendaknya kamu kuatir tentang apa pun juga, tetapi nyatakanlah dalam segala hal keinginanmu kepada Allah dalam doa dan permohonan dengan ucapan syukur.

[7] Damai sejahtera Allah, yang melampaui segala akal, akan memelihara hati dan pikiranmu dalam Kristus Yesus.

[8] Jadi akhirnya, saudara-saudara, semua yang benar, semua yang mulia, semua yang adil, semua yang suci, semua yang manis, semua yang sedap didengar, semua yang disebut kebajikan dan patut dipuji, pikirkanlah semuanya itu.”

Karo:

[4] “Meriahlah min akapndu katawari pe erkiteken persadanndu ras Tuhan. Sekali nari kukataken: Meriahlah!”

[5] “Cidahkenlah perbahanenndu si mehuli man ise pe. Tuhan pedas me reh.”

[6] “Ola aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man baNa alu pusuh si dem pengataken bujur.”

[7] “Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erkiteken persadanndu ras Kristus Jesus.”

[8] “Kedungenna o senina-seninangku, ukurilah kerna si mehuli, e me kerna si bujur, mulia, benar, bersih, mejile ras kerna kerina si patut ipuji.”

Tema: Saitun Jadi Usihen Ibas Kiniulin

Tujunna:

Gelah Saitun:

• Meteh erti pengajuk Rasul Paulus man perpulungen Pilipi.
• Jadi sahabat man Moria ibas ngukurken ras ndalanken kerna si mehuli

Metode: Diskusi ras Meditasi

I. BENA KATA

Jadi usihen ibas kiniulin tentu labo mesunah, perlu perjuangen. Ibas sada jabu lit telu anakna, biasa nge ipujiken orangtuana anak sintua, sebab mehuli perbahanenna ras keleng kal atena man agi-agina. Emaka nuri-nuri me nandena man teman-temanna, nina “anakta sintua e jadi usihen kal bas jabu kami, la megogo, la pertewas, mejingkat, nggit nampati agi-agina, mbera berhasil pagi sekolahnya bagepe pendahinna”. Malem kal ateta simegi-megi.

Wari enda Saitun me jadi usihen i bas kiniulin, kenca sipebagesi kinitekenta arah Kata Dibata. Terlebih kita mperingeti HUT pe-68-ken, MORIA GBKP. Enggo sidalani piga-piga tahap inganta mpeteguhi kinitekenta bas gerejanta, mulai nai jadi KAKR, PERMATA, MORIA, MAMRE janah sendah SAITUN. SAITUN me si dewasana bas kiniulin ndai. Enggo banci jadi usihen, bagi anak sintua ndai, lanai lit man pandangen. Amin bage gia perlu kal terus sipegegehi kinitekenta sitingkatken kiniulinta erpalasken Kata Dibata wari enda, gelah tetap dewasa bas kiniulin.

II. MPEGESI OGEN

Bageme si jadi bas perpulungen Pilipi, iarapken Paulus ia enggo jadi usihen bas kiniulin, tapi kepeken idat Paulus berita maka turah perubaten i Pilipi. Subuk sapih perpulungen, teman Paulus nai melayani. Duana ia enggo latih kal meritaken berita si meriah ras Paulus, bagepe teman-temanna si deban bagi si Klemen (1-3). Perpulungen e lanai jadi usihen.

Emaka isehken Paulus pedah ras persinget, gelah kerina perpulungen mpeteguhi persadanna ras Jesus Kristus. Paulus la nuduhken salah sekalak jelma, la bo ka ioratina terdauhen kai si erbahansa ia rubat, tapi pelin-pelin ipersingetina gelah inget maka persadan ras Kristus me jawaben bas kerina perbeben nggeluh.

• Palas persadan labo doni enda tapi Jesus Kristus Pergegeh siibereken Paulus man perpulungen Pilipi eme: Tetap min pergeluhna bagi kalak Kristen, Jesus jadi palas kegeluhen (1-3). Gelah Eiodia ras Sinthike perberita si meriah e, mulihi erdame ras ersada. Ermeriah ukur katawari pe erkiteken persadan ras Tuhan (4-5), janah cidahken alu perbahanen si mehuli, (5). Bagi nina bas Kitab Kuan-kuanen, hati yang gembira adalah obat. Ola aru ate kerna kai pe, arah pertoton, pindo man Dibata kai pe siiperluken perpulungen, pusuh si dem pengataken bujur (6,) la jungut-jungut.

Adi ilakokenna persinget e, maka ialokenna me pasu-pasu Dibata, bagepe kemalemen ate Dibata si la terukuri manusia (7). Adi enggo bage, perpecahen perpulungen enggo banci iatasi, perpulungen mulihken nggeluh bagi singena ate Dibata, janah enggo banci jadi usihen.

• Jadi usihen ibas perbahanen simehuli

Kedungenna, Rasul Paulus ngajuk perpulungen Pilipi gelah menaken cara rukur simbaru, gelah tetap ersada arih. Cara rukur simbaru eme: positif thinking, berpikir positif, rukur alu mehuli.

Lanai perlu menonjolken pribadi, meganjang rukur, saling menyalahkan tapi kerina erjuang ndatken damai sejahtra engkelengi perpulungen, eme sababna perpulungen pe ras kemerdekaan bas Dibata nari, Erkiteken Dibata enggo sikeleng-kelengen. Bagi nina bas 1 Yohanes 4: 16b, Dibata kekelengen kap, janah ise si erkeleng ate ia ringan i bas Dibata janah Dibata ringan Ibas ia. Alu kata si deban, ija lit Dibata, ije lit kekelengen, ija lit keleng ate, ije kap Dibata.

Emaka nina Paulus bas ayat 8, gelah perpulungen fokus netapken ukurna nandangi hal-hal simehuli saja, eme : si bujur, mulia, adil, bersih, mejile ras kerna kerina si patut ipuji. Lanai lit cian, nembeh, merawa, ras perubaten. Perpulungen sibage perlu kal si usih bas kiniulinna. Bagi Jesus enggo jadi usihen man manusia, meteruk ukurNa, ialemiNa dosanta. IangkatNa manusia perdosa jadi anakNa.

III. PENGKENAINA

Saitun jadi usihen ibas kiniulin. Alu penjelasen Kata Dibata i datas, me nggit nge kita Saitun ipelimbarui? Sabab kita me si ndekahna enggo MEGIKEN Kata Dibata, erpalasken umurta. Enggo sitaruhken Moria seh 68 tahun. Bage gia, adi lit denga kin biak-biak si la dewasa, la man usihen, enggo banci sitadingken, kita pe mulai erlajar rukur ras ertindak positip, kelenglah min ateta kerina teman.

Memang labo salah adi sipejile dirinta secara daging kula, tapi si penting kal eme kinijilen, kiniulin bas pusuh, si rehna bas Dibata nari. Siterusken ajar enda man kerina Moria GBKP. Jadi usihen ras jadi teladan kita Ibas kata ras perbahanen, ibas rukur terlebih ibas kiniteken. Erpengayak kita ibas dahin simehuli, mpenahangi baban teman, mpepalem pusuh teman terlebih isi jabunta. Ubah cara rukur mulai wari enda, ukurilah ras dalankenlah simehuli, eme si bujur, mulia, benar, bersih ras mejile. Ras kerna kerina sipatut ipuji.

IV. DISKUSI & MEDITASI

Adi enterem si pulung asa bancina Saitun ras Moria sihadir ibagi ibas piga-piga kelompok, tapi adi labo enteremsa, jadi sada kelompok saja. Teptep kelompok ndahiken dahin enda:

1. Sikapken sada lilin tiap kelompok, janah ipegara ope diskusi ras meditasi. Adi enggo ipegara, usahakeun fokus kerina ku bas lilin si sada e.
2. Sekalak tah dua kalak nuriken penggejapenna, kerna :

• Kata ajar ras nasihat Paulus sue oratenta sendah, jenari ngasup kita jadi usihen ibas kiniulin
• Ayat si pe-8 ken, ‘Kedungenna o senina-seninangku, ukurilah kerna si mehuli, eme kerna si bujur, mulia, benar, bersih, mejile ras kerna kerina si patut ipuji’.

Kai tantangan ras perbeben guna ndalanken janah kai ka kiniulin ras pasu-pasu Adi enda sidalanken?!

Ialoi alu ngendeken: KEE 68: 1 (iulihi 2 x) DahinNdu Si Mbelin Tuhan

Dahindu si mbelin Tuhan Kerajang kami pe Ban Kam si mada kerajan La masap lalap e Tapina bagi page me Gelah ersuli turah pe E mate kap benih lebe Bage pe kami k’rina nge Nggit mate pe Lah turah page nge

Meditasi:                           

-paksa teneng-

P: Senina ras Turang kerina. Bujur kal ninta, enggo 68 tahun dekahna pernanden GBKP erdahin ras ngelai, melala kal simehuli si enggo ibahan Dibata erkelangken Moria GBKP nandangi kerina pernanden si nguda denga seh ku si metua….. Malem kal ate kami Tuhan……..

Kerina: Rende KEE 201: 1 Malem Ate Tuhu-tuhu

Malem ate tuhu-tuhu Siernalem man baNdu Kam Dibata si ‘njadiken langit ras doni enda Sal-saliNdu pusuh kami Maka t’rangNdu tergejap Kalak si tek la kap bene ‘Ban kelengNdu e tetap

P: Banci jadi bas kita pe genduari lit sikitiken ukur, lit perjengilen, bagi Eiodia ras Sintikhe i Pilipi ndai. Ceda ras nembeh kal ateta, surut kinitekenta, la siakap bujur temanta. Mari sisungkunlah PUSUHTA, sisehken isi PUSUHTA e man Dibata saja, turikenndu man Dibata, ise kin akapndu si la payo, pindo man Dibata gelah isampatiNa kita ngalemi salah teman, kita pe terapul. Jesus Kristus si la erdosa e, nggit nggengken kiniseran i kayu persilang, guna ngalemi dosanta. Ngalemi salah teman labo mesukah, tapi Ibas Dibata la lit simetahat. Bereken pusuhndu ibabai ras iajari Kesah Si Badia…..

-paksa teneng-

P: Adi enggo ibereken Dibata wari enda kengasupen man bandu guna ngalemi, terpuji Tuhan. Tapi adi pusuhndu erpenulak denga, ula kam ngadi ngerembakken dirindu man Dibata, ulih-ulihi ku Dibata gelah seh bas sada paksa ngasup kam ngalemi. Sabab ngena kal ate Dibata kalak si megiken ras ndalanken KataNa……

Rende: KEE 462: 1 (iulihi 4 x) Yesus Tuhanku

Jesus Tuhanku penalemenku Lalit gegehku sampatilah aku Sampat aku Tuhan Sampat aku Tuhan Sampat aku Tuhan Sampat o Bapa Sampat aku Tuhan Sampat aku Tuhan Sampat aku Tuhan Sampat o Bapa

P: Wari enda, sitotoken kerina Moria Se- GBKP gelah tetap ipasu-pasu Dibata ibas umur 68 tahun. Amin kuga pe kecibalna, sehat, sakit, meriah ukur, ndele ate, ceda ate, la ia lupa tetap ngataken bujur man Dibata, ngkelengi isi jabu ras tetap rembak ras Dibata. Sabab adi kin la ia rembak ras Dibata, labo ngasup erbahan kai pe.

Wari enda pe sitotoken kerina Saitun gelah tetap ncidahken biak simehuli man isepe, sitotoken gelah Saitun jadi usihen ibas simehuli. Selaku Saitun, ngaku kita maka enggo sibegiken Kata Dibata, ajar orangtua mulai kin kitiik-kitik nari bas KAKR, PERMATA, MORIA, MAMRE janah sendah me paksana, Saitun hadir jadi teman, jadi sahabat man si terngudan asa kita. Jadi usihen ibas perukurenta, pengerananta, bagepe perbahanennta… (Tep-tep kelompok erbahan pertoton kerna Pernanden GBKP si terus berjuang bas geluhna, ertoto pe kerna Saitun gelah tetap ermeriah ukur, jadi usihen ibas kiniulin)!

…….paksa teneng…….

P: Dage, “Kedungenna o senina-seninangku, Pukurilah kerna si mehuli, eme kerna si bujur, mulia, benar, bersih, mejile ras kerna kerina si patut ipuji “(8). Dibata si nampati kita, ngasup jadi usihen, ngasup jadi sahabat man Moria, tutus ate Moria nerusken dahin Dibata, sabab mbelang kal kap si man peranin, tapi kurang siperanisa”.

Perpulungen: Erpadan kami Tuhan, maka ipelimbarui me geluh kami, erlajar ras erjuang gelah rukur positif, ndauh ukur serap-serap, gelarNdu ermulia arah kegeluhen kami. Erpadan kami ngukurken terlebih ndalanken kerina si mehuli eme si bujur, mulia, benar, bersih, mejile ras kerna kerina sipatut ipuji. SampatiNdulah kami o Dibata Bapa, Anak ras Kesah si Badia.

Rende: KEE 62: 1, 5 Min Lalap Kam Inganku Tuhan

Min lalap Kam inganku Tuhan Kam Jesus batang anggur nge GegehNdu maler min ku dahan ‘Di lang bene kap aku pe KesahNdu bengket aku min Gelah erbuah aku kin La kal ateku sirang Tuhan K’rajangNdu aku lalap me Keleng ateNdu me kunanam GegehNdu min geluhku pe GegehNdu terbeliden min Bas aku lah erguna kin

Ertoto: dua telu kalak simabai pertoton, iujungi alu pertoton Tuhan