Engkelengi Ndehara

(HUT Moria)

Ogen   : Epesus 5: 21-33

Efesus 5: 21 – 33

5:21 dan rendahkanlah dirimu seorang kepada yang lain di dalam takut akan Kristus.

Kasih Kristus adalah dasar hidup suami isteri

5:22 Hai isteri, tunduklah kepada suamimu seperti kepada Tuhan,
5:23 karena suami adalah kepala isteri sama seperti Kristus adalah kepala jemaat. Dialah yang menyelamatkan tubuh.
5:24 Karena itu sebagaimana jemaat tunduk kepada Kristus, demikian jugalah isteri kepada suami dalam segala sesuatu.
5:25 Hai suami, kasihilah isterimu sebagaimana Kristus telah mengasihi jemaat dan telah menyerahkan diri-Nya baginya
5:26 untuk menguduskannya, sesudah Ia menyucikannya dengan memandikannya dengan air dan firman,
5:27 supaya dengan demikian Ia menempatkan jemaat di hadapan diri-Nya dengan cemerlang tanpa cacat atau kerut atau yang serupa itu, tetapi supaya jemaat kudus dan tidak bercela.
5:28 Demikian juga suami harus mengasihi isterinya sama seperti tubuhnya sendiri: Siapa yang mengasihi isterinya mengasihi dirinya sendiri.
5:29 Sebab tidak pernah orang membenci tubuhnya sendiri, tetapi mengasuhnya dan merawatinya, sama seperti Kristus terhadap jemaat,
5:30 karena kita adalah anggota tubuh-Nya.
5:31 Sebab itu laki-laki akan meninggalkan ayahnya dan ibunya dan bersatu dengan isterinya, sehingga keduanya itu menjadi satu daging.
5:32 Rahasia ini besar, tetapi yang aku maksudkan ialah hubungan Kristus dan jemaat.
5:33 Bagaimanapun juga, bagi kamu masing-masing berlaku: kasihilah isterimu seperti dirimu sendiri dan isteri hendaklah menghormati suaminya.

Kerna ndehara ras perbulangen

5:21 Patuhlah sekalak nandangi si debanna, erkiteken kam mehamat man Kristus.

5:22 O kam ndehara, patuhlah man perbulangenndu bagi patuh man Tuhan.
5:23 Sabap perbulangen nge takal ndeharana, bali ras Kristus takal perpulungen, janah Kristus nge si Engkelini perpulungen si jadi kulaNa e.
5:24 Erkiteken si e ndehara arus patuh kal man perbulangenna i bas kai-kai pe, bali ras perpulungen patuh man Kristus.

5:25 Kam perbulangen, kelengilah ndeharandu, bagi Kristus engkelengi perpulungen, dingen ngendesken kesahNa guna perpulungen e.
5:26 Kristus erbahan bage guna mpersembahken perpulungen e man Dibata, alu kataNa, kenca ibersihkenNa e alu mbasuhsa alu lau.
5:27 Tole pe gelah iendeskenNa perpulungen e man DiriNa alu dem kinijilen desken sekalak penganten diberu bersih dingen la ersalah, la lit cungikna ntah ringutna, bage pe la lit si man pandangen.
5:28 Perbulangen arus engkelengi ndeharana bagi ia engkelengi kulana. Kalak si engkelengi ndeharana, engkelengi dirina kap.
5:29 Labo pernah lit kalak elem-elem nandangi kulana. Tapi ipekena-kenana dingen ikawalina kulana e bagi Kristus mpekena-kena dingen engkawali perpulungen.
5:30 Sabap kita me ringring kula Kristus.
5:31 Bagi lit tersurat i bas Pustaka Si Badia, “Erkiteken si e, sekalak dilaki nadingken nande bapana, jenari ersada ia ras ndeharana, janah si dua e jadi sada kula me.”
5:32 Si enda ncidahken rahasia si mbelin kal ertina. Janah aku jine ngidah, maka si enda nuduhken persadan Kristus ras perpulungen.
5:33 Tapi pe kerna kam: Tep-tep perbulangen arus engkelengi ndeharana bagi ia engkelengi dirina, janah tep-tep ndehara arus mehamat man perbulangenna.

Tema   : Engkelengi Ndehara.

Tujun   : Gelah Mamre:

• Meteh kerna engkelengi ndehara sue ras teks
• Meteh tujun dingen pentingna engkelengi ndehara

I. KATA PENARUH

Kitab Epesus isuratken Paulus tupung ia i bas penjara i Roma. Itujuken man perpulungen-perpulungen si ringan i Epesus ras perpulungen si deban i daerah Asia kitik. Sura-sura Paulus nulisken surat enda gelah perpulungen paguh i bas kiniteken, dem i bas kekelengen janah tetap erdalan i bas kepentaren Dibata. Alu tangkas ituriken Paulus uga kekelengen Dibata e teridah nandangi perpulungen, nggit la mereken anakNa si tonggal Jesus Kristus guna nebusi dosa doni enda. Penebusen Jesus Kristus e mpersadakan perpulungen gelah tetap sikeleng-kelengen.

Adi si siksiki erbage pengertin kalak kerna kekelengen. Lit konsep keleng ate tupung “aku perlu kam”, jadi di kune aku lanai perlu lanai ateku keleng. Konsep si deban perbahan “kam mejile i bas mataku.” maka kam ku kelengi. Di kune si mejile ndai enggo luntur, urak ate keleng. Ras lit denga konsep si deban. Konsep Kristen uga? Enda me si man gargarennta arah bahan PA nta wari enda.

II. URAIAN TEKS

Teks si jadi oratenta enda e me bagin pengajaren Paulus kerna cara nggeluh kalak si enggo itebus Kristus si igelari perpulungen entah pe gereja. Cara geluh perpulungen la banci lang ngusih perbahanen Jesus si nggit mereken kula ras kesahNa guna perpulungenNa. Kekelengen si ituduhkenna e me pengorbanen si la lit syaratna. Iberekenna diriNa gelah perpulungen e kerina banci ersada ras IA. Perbahanen Jesus e iandingken ku bas perjabun. Jesus selaku perbulangen engkelengi perpulungen selaku ndehara. Selaku perbulangen, Jesus lebe mereken dirina, dareh ras kesahNa, e maka perpulungen nggejapken kekelengen e, dungna ia pe nggeluh si keleng-kelengen. Keleng ate i bas perjabun kalak Kristen situhuna erpalas ku bas keleng ate Kristus. Keleng ate si dem pengorbanen, la ngarapken balasen. Leben erbahan mehuli man pasangenna.

E maka ibereken Paulus pengajaren man keluarga Kristen kususna man perbulangen ras ndahara:

1. O ndehara Patuhlah man perbulangen bagi patuh man Tuhan. Pengajaren Paulus enda nginget struktur keluarga i bas kalak Jahudi e me: Dibata –perbulangen–ndehara– anak-anak. Dibata uruten pertama, e maka bapa si peduaken, nande uruten peteluken ras anak-anak uruten si pe empatken. Ertina pengajaren Dibata langsung isehken man Bapa. E maka situhuna bapa nge si berkat ku rumah pertoton megiken pengajaren Dibata. Pengajaren Dibata e ka isehken bapa man nande, e maka nande ngajarkensa ka man anak-anak i bas jabu. Adi pengajaren Dibatalah ituriken perbulangen selaku bapa man ndeharana, bujur kal ndehara e patuh man perbulangenna? Patuh ije, alu meriah ukur (rela hati) ndehara ndalanken kata perbulangenna. La alu mejungut entah alu terpaksa.
2. Kam perbulangen kelengilah ndeharandu, bagi Kristus erkeleng ate man perpulungen. KesahNa pe iberekenNa man perpulungenNa. Situasi Masyarakat i Epesus, perbulangen e ikataken tuan (Sarah pe ndilo tuan man Abraham). Konsep tuan banci rate-ate man ndeharana. Seumpama kekerasen pe ibahanna la lit si merawa. Bage kin sistem masyarakat i je. Tapi nina Paulus adi perbulangen kalak Kristen la bage. Si jadi tuan man perbulangen e me Kristus, si mereken diri engkelengi perpulungenna. E me si arus jadi usihen man perbulangen. Arusna leben perbulangen e engkelengi ndeharana alu la ngarapken imbalen. Tanda atena ngena ndeharana, leben icidahkenna si mehuli, labo kekerasen si erbahan ate mesui. Bage ibahanna erkiteken Jesus usihenna. Terdauhen nina Paulus kelengi ndeharandu bagi kam engkelengi dirindu jine. Labo lit jelma nembeh atena dirina adi normal denga perukurenna. Biasana kerina nge merawat diri, umpamana; olahraga gelah daging bugar, pangan si sehat gelah la murah pinakiten, istirahat ratur, rukur positif ras sidebanna. Kerina enda ilakoken i bas erti ngerawat diri. Bagi sibahan perbulangen merawat dirina bage ka lah bahanna nandangi ndeharana. Tambahana ka, lit ken sekalak jelma erelem-elem man dirina? Jadi, sekalak perbulangen di kune pe la bagi ukuma sekali ndeharana, la ia erelem-elem kempaksa, lit rusur maaf man ndehara. Sabab Kristus pe labo erelem-elem man perpulungenna. Tuhu seh kal ulina, adi ndehara patuh man perbulangen ras perbulangen engkelengi ndehara bagi Kristus engkelengi perpulungenNa. Paguhlah rumah tangga kristen si dem kekelengen, Adi rumah nari enggo dem kekelengen e uga pa pe ngasup engkelengi perpulungen si deban ras masyarakat sekelewet. Keluarga sibage me si bersih ilebe-lebe Tuhan

III. PENGKENAINA

Keleng ate la terjeng uga tapi uga gelah ndeharangku nggejapken kekelengenku. E maka bereken waktu ras kesempaten man ndehara ngenanami kekelengen perbulangenna. I bas nehken kekelengen e perlu lit penyesuaian ras pengorbanen. Banci saja perbulangen ras ndehara i bas jabu la seri umur, la seri latar belakang pendidiken ras keluarga, la ka seri sifat ras karakter. I bas lalana si la seri, perlu waktu bersabar, erlajar nandai pasangen. Keluarga e labo hubungen si kentisik tapi hubungen se umur geluh. Adi sitik cekcok e dalanna sitandan ras sikelengen.

Uga perbulangen engkelengi ndeharana? Alu ngenehen sisi positif i bas kekurangen ndeharana. Sekalak dilaki dewasa erjabu ras singuda-nguda mejile tapi la lit nahena sembelah. Idah meriah kal ukur pasangen enda i bas ndalani perjabunna. Tupung isungkuni si ndehara, iturikenna maka perbulangenna e dem ate keleng, ialokenna kecibalku bagi aku litna, la kurang atena keleng amin aku lit i bas kekurangen. E maka isungkun perbulangenna, nina la lit diberu si sempurna. Ndeharangku e lit ciri-ciri khususna si la lit i bas kalak sideban. Jadi, aku lalap natap kelebihenna i bas litna kekurangenna. Duana ia siergan ras sikelengen.

Labo sada pe jabu sempurna tapi Kristus enggo encidahken perbahanen si mehuli si maba keriahen ras kemalemen atei bas jabu. Jadilah mamre si dem ate keleng, Kristus jadi usihenna.

IV. DISKUSI

1. Turiken pengangkanndu kerna engkelengi ndehara bagi Kristus engkelengi perpulungen
2. Turiken pengalamenndu, kai ndia si jadi rungga-rungga i bas engkelengi ndehara bagi Kristus engkelengi perpulungen.

V. USULEN ENDE-ENDEN:

• KEE GBKP 57 Nggo Kita Pulung I Lebe
• KEE GBKP 175: 1, 3 Bage Pedah Dibata
• KEE GBKP 442: 3 Sendah kam duana jadi sada
• KEE GBKP 316: 1 (Persembahen) Seh kal simparna

Pdt. Nurbety Br. Ginting, M. Th
“HP/WA: 082168696383