Mbelasken Kata Si Mbaba Kiniulin
(Bijak Bermedia Sosial)
Ogen : Epesus 4:29
Efesus 4: 29
4:29 Janganlah ada perkataan kotor keluar dari mulutmu, tetapi pakailah perkataan yang baik untuk membangun, di mana perlu, supaya mereka yang mendengarnya, beroleh kasih karunia.
4:29 Adi kam ngerana ola sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa.
Tema : Mbelasken Kata Si Mbaba Kiniulin
Tujun : Gelah Mamre:
- Meteh uga mbelasken kata si mehuli
- Makeken Media Sosial nehken kata si mehuli
Metode : Diskusi
I. KATA PENARUH
Kata-kata tuhu-tuhu penting kel ibas kegeluhenta. Tep-tep wari, katawari pe dingen ijapa pe kita berurusen ras kata-kata. Paul Davitt Trip ibas Bukuna Perang dengan Kata-kata ngataken maka dunianta enda eme doni si banjir kata-kata, la hanya banjir bahkan tsunami komentar, kadang pokokna asal ngerana, la pe lit isina pokokna gelah nggo ngerana, pepuasken ukur amin la bermutu, melalasa basa basi tanpa isi, media sosial pe idemi kata-kata, subuk si jelas faktana tah lang. Dibata nepa doni enda alu kata-kata, alu Firman/ Kata Dibata, janah manusia pe ndabuh kubas dosa erkiteken megiken kata-kata, eme pengerana nipe. Jabu banci megegeh ras sontar banci ban pengerana/ kata-kata, janah kiniulin pe banci jadi erkiteken kata-kata/ pengerana. Emaka ibas minggu enda erlajar kita gelah kita banci mbelasken kata si mbaba kiniulin.
II. URAIAN TEKS
Epesus eme kuta si jadi “markas” Paulus ras teman-temanna ibas meritaken BSM ibas perdalanen misi si peteluken (Kis. 18:23-21:17). Paulus nulisken surat man perpulungen i Epesus sangana ia ipenjara i Roma. Epesus eme kuta si mbelin, pusat bisnis ras keagamaan. Ibas jaman Johanes si nulisken surat Ketangkasen, kuta Epesus eme ihuni 250 ribu penduduk, kota terbesar kedua di dunia paksa si e. Janah serayan si melayani i Epesus pe labo main-main. Perpulungen enda pernah ielai Paulus selama 3 tahun, bagepe iterusken Akwila ras Priskila bagepe Timotius.
Tantangen kegeluhen selaku anak Dibata i kota Efesus luar biasa sulit. Mayoritas penduduk kota e nembah dewi Artemis, dewi perburuan si ianggap njaga kota e, kuilna bahkan jadi salah sada 7 keajaiban dunia. Gedang kuil e 140m, belangna 70m, janah gedangna kudas 20m, pilarna 120. Ibas komplek kuil e lit nterem imam-imam diberu si jadi pelacur si erlua-lua.
Komplek kuil e lit kekebalen hukum bas pemerintah nari, pemerintah la erkuasa bas kuil e. Penjahat si kiam ku kuil artemis la banci itangkap “polisi”, emaka banci ibayangken uga lalana penjahat si pulung i sekitar kuil e ras kota Epesus. Ekonomi masyarakat Epesus melala kel bergantung ibas keberadaan kuil dewi Artemis, khususna perbinaga barang-barang kerajinen perak. Emaka sanga Paulus meritaken kebenaren BSM alu erbage tanda sengget i Epesus, ekonomi kalak enda terganggu seh maka guntar kuta Epesus ibahan Demetrius si ber-“unjuk rasa” menolak Paulus ras BSM (Perb. Rasul 19:21-41). Enda me tantangen kegeluhen perp Kristen i Epesus, menghadapi ajaren bagepe pengaruh kalak si melket lagu langkah ras pengeranana janah terikat ilmu gaib, sihir, tabas-tabas, janah kalak Jahudi garis keras si cian ukurna, rsd.
Paulus ningetken mulai ay. 17-32 maka pusuh perukuren perpulungen Epesus arus ipelimbarui. Perpulungen e arus makeken karakter kegeluhen si mbaru, si berbeda ras lingkungen sekitarna i Kuta Epesus. Emaka kerina si isingetken Paulus ibas ay. 17-32 eme gambaren perubahen karakter si reh ibas penandaita kerna Kristus ras penjemba Kesah Si Badia. kebiasaan ngerana si melket, isak-isak, numpahi, iganti alu pengerana si mehuli: eme pengerana si membangun/ mendidik man kalak si megikenca. Biak-biak si dekah (cian, perampus, pernembeh, si isak-isaken, sicekurak-cekuraken, relem-elem) arus itadingken, gantina bangunlah kebiasaan melias dingen mesayang, dingen sialem-alemen harus nggeluh ibas perpulungen.
Ibas Epesus 4:29, Paulus secara khusus nuriken kerna aturen nggeluh selaku manusia si mbaru si idemi alu penjemba Kuasa Kesah Si Badia. Aturen e eme kerna ngerana. Paulus pemena mereken sada perintah negatif “Adi kam ngerana, ola sitik pe belasken cakap si la erturi-turin (Perkataan kotor). Cakap si la erturi-turin enda ibas bahasa Junanina eme “Sapros” si ertina buah si macem ntah pe macik, si lalit ergana/ nilaina Ertina, labo hanya mengutuk ntah ngisak-ngisak ntah cakap si mereha tapi pe kerina pengerana si la erguna/ bermanfaat guna kiniulin kalak si deban, la erbahan kalak si deban turah ibas kiniteken ras pengangkan si mehuli.
Emaka kenca nuriken kerna perintah negatif, Paulus mereken pedah gelah perpulungen e mbelasken kata-kata si erguna, si banci nampati kalak si deban rikutken perluna. Kata-kata si erguna enda ertina eme kata-kata kebenaren ras kekelengen, mengoreksi tanpa menghakimi, mendorong tanpa memaksa, mengarahken tanpa mengguri. Kata-kata si bage si nibelasken ibas paksana menjawab kebutuhen guna mbangun Kula ni Kristus, mbaba kiniulin man si megisa. Jadi la asal ibelasi, tapi isi pengerana bagepe waktu (timing) kata-kata e ibelasken pas, tepat. Kuan-Kuanen 10:19 ngataken “Reh lalana ngerana, reh belinna dalan erdosa, adi pentar kin kam tentu kam la pet ngerana”. Jakobus 3:8-9 ngataken “Tapi ise
pe la ngasup dilah. Dilah e jahat dingen la terkuasai, dem racun si maba kematen. Dilah e sipake guna ngataken bujur man Tuhan ras Bapanta, tapi sipake ka pe guna numpahi temanta manusia si enggo ijadiken Dibata rikutken tempasNa.” Emaka uga kita ngasup mbelasken kata-kata si mehuli, eme kune kita tetap nggeluh ibas Kristus dingen rasa lalap mindo penampat guna ngkuasai pusuh perukuren ras sura-suranta (ngasup mengendalikan diri)
III. PENGKENAINA
Ibas tahun 2025 periode Januari-September 2025, Kementrian Komunikasi dan Digital (Komdigi) menangani 1.324.712 konten negatif si berisi ujaran, kebencian, ras hoax. Data enda ncidahken uga lalana pengerana ras konten kata-kata si banci mbaba hal-hal si la mehuli ibas geluhta. Payo tuhu ngerana, nuriken pendapat, ide ntah pe saran/ komentar eme bagin ibas hak nuriken pendapat si ilindungi Undang-Undang, tapi tentuna kerina lit aturen ras batasen-batasen si wajar.
Selaku Mamre tentuna kita idilo guna bijak ibas mbelasken kata-kata bagepe pentar ibas makeken media sosial guna kiniulin jabu, gereja, ras masyarakat. Melala kel persoalen-
persoalen si situhuna la perlu jadi persoalen (banci icegah) adi kita pentar ncibalken kata-kata alu tepat. Melala perpulungen rubat, lanai siangkan,pecah ibenaken alu masalah i media sosial. Bagekape melala ka nge hal-hal si tuhuna labo perlu ituriken i media sosial, misalna persoalen jabu, persoalen gereja bagepe info-info si lenga jelas faktana, sebab e banci mempengaruhi persepsi jelma si enterem janah jelma si enterem la kita ngasup guna mengendaliken pendapat/komentarna. Emaka asa bancina ibas kita bermedia sosial, pakelah kesempaten e guna nuriken kerna si mehuli, si membangun, memotivasi, bagepe mabai jelma si enterem nandai Yesus selaku juruselamat. Jenari tentuna selaku bapa i tengah jabu marilah si awasi penggunaan media sosial ibas anak jabunta, gelah ibas ia bermedia sosial pe ipakennalah alu kata-kata sim baba kiniulin man kalak si deban. Kerina enda banci jadi adi kita pe tetap nggeluh ibas Kristus jenari kita pe mabai jabunta tetap nggeluh erkemalangen man Dibata.
IV. DISKUSI
- Kai nge erbahanca maka Paulus ngajuk perpulungen Epesus guna mbelasken kata-kata si erguna, si banci nampati kalak si deban rikutken perluna?
- Ibas kita ras jabunta makeken media social enggo nge kita mbelasken kata-kata si mehuli si erguna man kiniulin kalak si deban? Adi enggo kai ulihna? Adi lenga, kai dampakna man banta ras man kalak si deban?
USULEN ENDE-ENDEN
- KEE GBKP No. 204: 1-2 Kata Ni Dibata
- KEE GBKP No. 249: 1-2 Ajar Aku O Tuhanku
- KEE GBKP No. 233: 1-3 Si Bas Dosa Kin Ercebah
- KEE GBKP No. 471: 1 (Persembahen) Ermengkah ukurku
Pdt Ebenezer Karo Sekali, S.Si,. MM
HP/WA: 0812 2371 8778