Ngikutken Kata Tuhan

Teks       : Matius 1: 18-25

Matius 1: 18 – 25

Kelahiran Yesus Kristus

1:18 Kelahiran Yesus Kristus adalah seperti berikut: Pada waktu Maria, ibu-Nya, bertunangan dengan Yusuf, ternyata ia mengandung dari Roh Kudus, sebelum mereka hidup sebagai suami isteri.
1:19 Karena Yusuf suaminya, seorang yang tulus hati dan tidak mau mencemarkan nama isterinya di muka umum, ia bermaksud menceraikannya dengan diam-diam.
1:20 Tetapi ketika ia mempertimbangkan maksud itu, malaikat Tuhan nampak kepadanya dalam mimpi dan berkata: “Yusuf, anak Daud, janganlah engkau takut mengambil Maria sebagai isterimu, sebab anak yang di dalam kandungannya adalah dari Roh Kudus.
1:21 Ia akan melahirkan anak laki-laki dan engkau akan menamakan Dia Yesus, karena Dialah yang akan menyelamatkan umat-Nya dari dosa mereka.”
1:22 Hal itu terjadi supaya genaplah yang difirmankan Tuhan oleh nabi:
1:23 “Sesungguhnya, anak dara itu akan mengandung dan melahirkan seorang anak laki-laki, dan mereka akan menamakan Dia Imanuel” yang berarti: Allah menyertai kita.
1:24 Sesudah bangun dari tidurnya, Yusuf berbuat seperti yang diperintahkan malaikat Tuhan itu kepadanya. Ia mengambil Maria sebagai isterinya,
1:25 tetapi tidak bersetubuh dengan dia sampai ia melahirkan anaknya laki-laki dan Yusuf menamakan Dia Yesus.

Ketubuhen Jesus Kristus

1:18 Kerna ketubuhen Jesus Kristus, bagenda me: Maria nande Jesus ertunangen ras Jusup. Tapi ope denga erjabu Maria enggo mehuli kulana arah Kuasa Kesah Si Badia. 
1:19 Jusup tunangen Maria e kalak bujur. Labo lit sura-surana ngaduken Maria gelah ola mela iakap Maria. Saja ngenca ersura-sura ia nirangken Maria alu sinik-sinik.
1:20 Tapi asum ia rukur-rukur kerna si e, teridah man bana malekat Dibata arah nipina. Nina malekat e man bana, “O Jusup, kesusuren Daud, ola kam mbiar muat Maria jadi ndeharandu. Sabap anak si lit i bas bertinna e jadi erkiteken kuasa Kesah Dibata.
1:21 Ipupusna pagi sekalak anak dilaki janah arus ibahanndu gelarna Jesus – sabap IA me pagi si nebusi bangsaNa i bas dosa-dosa nari.” 

1:22 Kerina si enda jadi gelah seh kai si ikataken Tuhan arah nabi nina,
1:23 ‘Singuda-nguda e pagi mehuli kulana, jenari ipupusna sekalak anak dilaki. Anak e pagi igelari Immanuel’ (ertina: “Dibata ras kita”). 

1:24 E maka kenca keke Jusup, ikutkenna kata malekat Tuhan e. Ialokenna Maria jadi ndeharana.
1:25 Tapi Jusup ras Maria langa erjabu, ipupusna anak dilaki. Kenca tubuh anak e ibahanna gelarna Jesus. 

Tema     : Ngikutken Kata Tuhan

Tujuan  : Gelah Mamre:

• Muat si positip ibas kerina si jadi, bali ras Jusup si bujur la ngit menggugat Maria ibas mehuli kulana.
• Ngikutken Kata Tuhan anem gia mesera ngantusisa.

I. KATA PENARUH

Natal eme perayan simbelin siiperingeti, irayaken gereja (kalak sitek) tep-tep tahun. Seakatan ersikap guna acara, perayaan, perlu ibahan persikapen pusuh. Bahan PA Mamre minggu enda mabai kita erlajar kerna uga Jusup sierbebe ibas pusuhna guna ngaloken sura-sura Dibata erdandanken ketubuhen Tuhan Jesus Kristus arah tunangenna Maria. Sabab tunangenna denga (langa erjabu) tentu adi mehuli kula Maria lit akibatna (hubungenna) nandangi Jusup. Emaka arah PA minggu enda kita iajuk guna ngangkai erti Natal si lit hubungenna ras dirinta, segelah reh paguhna kinitekenta, tambah gegehta ndalanken kaa Tuhan bas geluhta.

II. URAIAN TEKS

Kerna sura-sura Jusup nirangken Maria tunangenna alu buni-buni situhuna manusiawi sue ras kesemalen paksa si e. Mehuli kula Maria, alasen logisna pastilah Maria erlagu la mehuli (perzinahen). Status pertunangen paksa si e eme, arah sidilaki mereken kontrak-tertulis entah kata man keluarga sidiberu, janah adi si e ialoken arah keluarga sidiberu maka sidilaki ras sidiberu enggo resmi ertunangen. Ibas status pertunangen enda lit istilah ketubbah ertina pengantin si dilaki nggalar adi sirang (dana santunan janda) man pengantin si diberu adi perjabun e bubar (la surung). Emaka hubungen pertunangen enda tuhu resmi (formal) ras ngiket. Emaka adi la surung (bubar) iban pagi surat cerai. Emaka ibas pertunangen e tempa-tempa calon dilaki ras si diberu enggo erjabu.

Rikutken pengakap Jusup, Maria la setia, erlua-lua, janah semalna adi diberu e erlua-lua maka sidilaki banci nirangken sidiberu e guna njaga kehamaten keluargana. Ibas si e, banci ilakoken sidilaki eme ngaduken sidiberu. Ibas ngaduken e, sidilaki nirangken alu tuntuten arah sidiberu nggalari dua kali lipat arah tukur si enggo ibereken. Bage pe sidiberu e banci irajam ntah ibuangken ibas kuta nari. Janah banci ka isirangken alu erbuni-buni, carana sidilaki mindo surat cerai alu isaksiken piga-piga kalak saksi tapi la imomoken i lebe jelma sinterem. Emaka ibas ukur Jusup nirangken Maria alu erbuni-buni sabab Jusup kalak bujur janah keleng dingen ngena kal atena Maria.

Tapi kenca melekat mpetangkas maka mehuli kula Maria erkiteken Kesah Si Badia maka kedungenna Jusup ngaloken Maria jadi ndeharana. Jusup ngantusi kai sinikataken malekat tentuna erkiteken ia jine pe ngantusi kai si tersurat ibas kitab Musa ras surat nabi-nabi. Emaka lit piga-piga hal sinipeseh malekat guna iantusi: Anak si lit ibas bertin Maria e jadi erkiteken Kesah Si Badia.

Kesah eme erdahin maka Kata Dibata (Logos-Sang Firman Yang Kekal) jadi daging, nuriken sisi keilahian Anak si lit bas bertin e. Bage pe Anak ibas bertin e tubuh arah sekalak singuda-nguda nuriken kemanusianNa si sejati. Jadi arah ayat enda teridah dua dampar lit ibas diri Jesus eme keilahian si sempurna ras kemanusian si sempurna. Anak e la erdosa, sebab IA (KATA DIBATA) jadi manusia alu kuasa Kesah Si Badia.

Bage pe kerna pendilo Malekat man Jusup “… O Jusup kesusuren Daud”. Istilah siipake malekat eme kesusuren Daud, nuriken kerna penggenapen padan Dibata man Daud, ija arah sinursurna ipekeke Dibata sekalak si ngerajai Israel si kinirajanna tetap rasa lalap (bd. 2 Samuel 7:12-16). Erkiteken si e Matius 1 nuratken trombo Jesus arah Maria nandeNa. Ertina subuk arah Jusup rikutken pandangen hukum bage pe Maria secara dareh-biologis, Pustaka Sibadia ngataken maka Jesus eme sinursur Daud. Malekat mpersingeti ras mereken pengangkan man Jusup kerna sijadi e eme sejarah keselamaten si enggo itetapken Dibata nai-nai nari.

Ayat 22, ikutip Matius arah Kitab Jesaya 7:14 ngataken man Jusup maka mehuli kula Maria e tuhu-tuhu perbahanen Dibata si enggo leben ipadankenNa sehubungen ras kerehen Mesias. Aminna pe pengangkan Masyarakat Jahudi ngarapken Mesias guna mbebasken Jahudi secara politis saja. Malekat nuriken maka Jesus nehken pembebasen ibas dosa nari. Perlu siantusi maka dosa me si ngerehken kerina bentuk penjajahen bas doni enda subuk politik, ekonomi, idiologi bege pe kerina bentuk penjajahen ras kiniseran. Jadi simbebasken bangsaNa arah dosa eme mereken dame Sejahtera, bebas ibas kerina sibiakna keterjajahen. Erkiteken sie maka gereja me sinerusken pelayanen ras perjuangen Jesus guna nehken pelayanenNa ras membebasken kerina manusia.

Arah penjelasen Malekat maka enggo tangkas terang iangka Jusup kerna kai sijadi. Iantusina maka singuda-nguda sinimaksudken ibas nubuaten nabi eme Maria. Sinimaksudken Mesias e tubuh arah kesusuren Daud eme arah dirina jine ras Maria tunangenna. Iantusi Jusup kata e, janah patuh ia man malekat e, ibuatna Maria jadi ndeharana, janah kenca Anak e tubuh ibahanna gelarNa Jesus.

Arah kerina siituriken e maka labo kal terantusi Jusup kai si jadi bas hubungen pertunangenna ras Maria. Tentu ibas kemanusianna Jusup kecewa dingen mela. Iakapna Maria enggo erlagu la mehuli. Emaka Dibata mere pengangkan man Jusup seh maka la surung isirangkenna Maria, janah ialokenna Anak bas bertin e sebage anakna. Adi la kin ituriken malekat, tentu Jusup nirangken Maria sabab bage kin kesemalen paksa si e. Tapi Dibata la mpediat rencanaNa gagal erkiteken manusia.

Ijenda teridah maka kerina si jadi bagi ukurta ntah la bagi ukur lit rencana Dibata. Emaka sipenting labo kerna kai sijadi, tapi uga kita ngidah rencana ras campur tan Dibata ibas sie. Emaka ngasup kita rukur alu mehuli.

III. PENGKENAINA

Ibas ndalani kegeluhen, perlu kal kita make kompas kegeluhen eme kata Dibata segelah ula papak cara rukur dingen lepak perbahenennta. Bagi Jusup, Tuhan mereken pengangkan sipayo, dungna tetap ukurna.

Mekatep jadi ibas geluhta si la terantusi, Kata Dibata, eme simpetangkassa. Bagi Jusup siidayaken seninna erbage kiniseran ngkenai ia, megenggeng ia, tetap ia erbahan si mehuli seh kedungenna iantusina kai sura-sura Dibata, maka kedungenna malem atena, dahin simbelin ibereken Dibata man bana simereken kegeluhen (Kej 50:20).

Ibas ndalani Minggu Advent janah nimai Natal, sirenungken uga ulina perbahanen ras sura-sura Dibata nandangi doni enda alu mereken sekalak Penebus. Si e oratna mereken ketetapen ukur man bantam aka Dibata tetap nge erbahan si mehuli man doni enda ras kerina isina bage pe man manusia sebab kita tinepaNa emaka kita pe IA empuna. Emaka adi Dibata tetap mereken si mehuli. Maka tanggungjababta tetap ndalanken kataNa aminna gia melala perbeben ras kiniseran si man alanken. Malem ate kalak siipake Dibata guna nehken sura-suraNa, aminna pe arus ngenanami kiniseran.

IV. DISKUSI

1. Rikutken ogenta, kai dasarna Jusup patuh ngikutken kata Dibata aminna mberat perbeben siialakenna?
2. Tep-tep kalak nuriken sada persoalen entah situasi kritis si erbahanca tuhu-tuhu erbebe, tapi erdandanken tetap ernalem man Tuhan dingen ndalanken kataNa, dungna iantusi sura-sura Dibata, emaka ialoken alu meriah ukur?

Usulen Lagu

• KEE GBKP No. 338: 1,2
• KEE GBKP No. 366: 1,2
• KEE GBKP No. 350: 1,2
• KEE GBKP No. 203: 1- (persembahen)

Pdt. Juda Dipa N. Sebayang, S.Th.
HP: 0813 7438 7220