Kuasa Jesus si Mbebasken

Teks       : Matius 12: 22 – 32

Matius 12: 22 – 32

Yesus dan Beelzebul

12:22 Kemudian dibawalah kepada Yesus seorang yang kerasukan setan. Orang itu buta dan bisu, lalu Yesus menyembuhkannya, sehingga si bisu itu berkata-kata dan melihat.
12:23 Maka takjublah sekalian orang banyak itu, katanya: “Ia ini agaknya Anak Daud.”
12:24 Tetapi ketika orang Farisi mendengarnya, mereka berkata: “Dengan Beelzebul, penghulu setan, Ia mengusir setan.”
12:25 Tetapi Yesus mengetahui pikiran mereka lalu berkata kepada mereka: “Setiap kerajaan yang terpecah-pecah pasti binasa dan setiap kota atau rumah tangga yang terpecah-pecah tidak dapat bertahan.
12:26 Demikianlah juga kalau Iblis mengusir Iblis, iapun terbagi-bagi dan melawan dirinya sendiri; bagaimanakah kerajaannya dapat bertahan?
12:27 Jadi jika Aku mengusir setan dengan kuasa Beelzebul, dengan kuasa siapakah pengikut-pengikutmu mengusirnya? Sebab itu merekalah yang akan menjadi hakimmu.
12:28 Tetapi jika Aku mengusir setan dengan kuasa Roh Allah, maka sesungguhnya Kerajaan Allah sudah datang kepadamu.
12:29 Atau bagaimanakah orang dapat memasuki rumah seorang yang kuat dan merampas harta bendanya apabila tidak diikatnya dahulu orang kuat itu? Sesudah diikatnya barulah dapat ia merampok rumah itu.
12:30 Siapa tidak bersama Aku, ia melawan Aku dan siapa tidak mengumpulkan bersama Aku, ia mencerai-beraikan.
12:31 Sebab itu Aku berkata kepadamu: Segala dosa dan hujat manusia akan diampuni, tetapi hujat terhadap Roh Kudus tidak akan diampuni.
12:32 Apabila seorang mengucapkan sesuatu menentang Anak Manusia, ia akan diampuni, tetapi jika ia menentang Roh Kudus, ia tidak akan diampuni, di dunia ini tidak, dan di dunia yang akan datangpun tidak.

Jesus ras Balsebul

12:22 Jenari itaruhken kalak man Jesus sekalak pentang dingen lanai beluh ngerana perbahan iseluki setan. Kenca Jesus mpelawes setan e, beluh ia ngerana dingen erpengidah.
12:23 Mamang ate kalak si nterem nina sapih-sapih ia, “Banci jadi IA nge Anak Daud si ipadanken e.”

12:24 Asum ibegi kalak Parisi kata enda ngaloi ia nina, “Balsebul pengulu setan nge mereken kuasa man baNa mpelawes setan e.” 

12:25 Ieteh Jesus perukuren kalak Parisi enda e maka nina, “Kerajan si erbelah-belah kugapa pe sontar nge. Janah kuta ntah rumah tangga si erbelah-belah kugapa pe sontar nge.
12:26 Bage pe adi Iblis pelawes Iblis, erbelah-belah kap ia. Adi bage ma sontar kerajanna?
12:27 Dage, adi Balsebul kin mereken kuasa man bangKu, ise dage mereken kuasa man teman-temanndu mpelawes setan-setan e? Teman-temanndu e lah ertimbang kerna cakapndu e.
12:28 Erkiteken Kupelawes setan-setan alu kuasa Kesah Dibata, e tandana maka Kinirajan Dibata enggo reh man bandu.

12:29 Ise pe labo banci bengket ku rumah si mbisa ngerampasi erta-ertana, pala iketna lebe kalak si mbisa e. Kenca bage maka banci irampasina erta-erta si lit i bas rumah e.

12:30 Ise si la mihak Aku ngelawan Aku kap; ise la ras Aku pepulungken, ia engkerapi kap. 
12:31 E maka Kukataken man bandu: Kerina dosa ras cakap si encekuraki Dibata banci ialemi; tapi kalak si encekuraki Kesah Si Badia la ialemi Dibata ndigan pe. 

12:32 Kalak si encekuraki Anak Manusia si isuruh Dibata banci ialemi Dibata; tapi kalak si encekuraki Kesah Si Badia asa ndigan pe la ialemi Dibata, subuk i bas kegeluhen si gundari, bage pe ibas kegeluhen si pagin.”

Tema     : Kuasa Jesus si Mbebasken

Tujuan  : Gelah Mamre:

• Gelah Mamre GBKP Ngidah ibas Jesus ngenca lit kuasa situhu tuhu ngasup mbebasken manusia ibas kegelapen nari.
• Gelah Mamre GBKP Ola terlibat ibas praktek kuasa gelap, tapi ernalemlah man Jesus ulu kuasa.

I. KATA PENARUH

Kinata bas kegeluhen enda, sada perbeben simegati ngerim-rim kula emkap pinakit. Adi enggo reh pinakit, iusahaken me uga maka malem, ertambar ku rumah sakit si ndeher bage pe seh ku luar negeri, dokter si mejile ras peralaten na pe enggo canggih, gelah kula e sehat mulihi. Bagem perluna kesehaten enda, kai pe ilakoken aminna mpedarat mbue biaya guna njaga kesehaten. Si jadi persoalen emkap, adi rumah sakit pe lenga malem, megati enggo pe jadi kalak Kristen lit ka si mindo penampat man guru ntah dukun-dukun. Lit pengangkan maka guru ntah dukun adi ertambar labo kap salah, tujunna eme gelah malem, tapi megati lanai seh ku mpertimbangen kuasa kai si pake guru ntah dukun-dukun si nambarisa, labo kuasa Tuhan Yesus si pakena tapi kuasa setan. Situhuna uga ngenda, apakah kuasa setan banci pepalem pinakit ntah kuasa setan e nge sumber pinakit e? Guna mpebagesi pengangkanta mari erlajar kita arah teks Matius 12:12-32.

II. URAIAN TEKS

Ibas teks enda ituriken makan Jesus mpelawes setan ibas sekalak si kerasuken nari, mamang ras takjib ate jelma sinterem ngidah kalak si ibahan Jesus e, tapi nina kalak Farisi man jelma sienterem maka kuasa si ipake Jesus mpelawes setan e, emkap arah beelzebul nari, beelzebul eme pengulu setan ntah pe kepala setan. Jadi kalak Farisi erpengakap maka Jesus mpelawes setan arah pengulu setan si pangkatna ganjangen ras setan si ngerasuki sekalak jelmana nda. Tapi nina Jesus man kalak Farisi e, adi lit kerajaan la ersada maka terpecah, adi bage pe adi lit kota ntah jabu la ersada maka pasti la banci ertahan, enda sebagai penjelasen ibas Jesus nari maka labo pengulu setan mpelawes setan. Erkiteken setan labo erpecah-pecah tapi ersada nge arihna guna nakiti ras menghancurken manusia, si tujunna eme gelahna ndauh ras Dibata. Jesus nuriken maka ibas Ia mpelawes setan alu Kesah Dibata, ras eme tanda Kerajan Surga enggo seh man manusia. Adi siperdiateken ibas pelayanen Jesus ibas sanga Ia i doni, maka megati Jesus mpelawes setan ras tandana maka kuasana simbelin emkap lalit sijumpai maka Setan ertahan ntah pe nimbak perintah Jesus tapi kerina setan tunduk nandangi kai si i perintahken Jesus.

Dung kenca setan e i pelawes Jesus ibas kula si kerasuken e, maka enggo banci ia ngerana ras erpengidah. Arah si e maka sieteh maka pinakitna si la erpengidah (buta) ras la banci ngerana (bisu) labo erkiteken pinakit Baban tubuhna ku doni enda tapi erkiteken lit setan ngkuasai kulana. Keberadan setan ibas kula kepeken banci meganggu fungsi organ tubuh, erbahan fungsi indra pengidah la erfungsi, bage pe fungsi pita suara terganggu erbahanca lanai banci ngerana. Tapi enggo kenca setan e ipelawes Jesus, fungsi mata mulihi mejile bage pe fungsi pita suara pe enggo mejile, buktina enggo banci ia erpengidah ras enggo banci ngerana.

Pinakit si hamper seri banci ka pe siidah ibas Matius 13, sekalak nande 18 tahun i ulahi setan kulana, dungna ia jdi mbekung (bungkuk). Ibas sada kebaktin i Rumah Pertoton jumpa nande enda ras Jesus, janah i idah Jesus maka lit setan ibas kula nande nda sierbanca nande enda mbengkung, i pelawes Jesus, setan e. Dung kenca setan nda ndarat ibas kula nande nda mis pinter awakna ras enggo banci tedis lanai mbengkung. Setan e ka pe erbahanca selama enda maka awak nande enda jadi mbengkung. Arah si enda banci si eteh maka adi lit setan ibas kula manusia maka banci ipengaruhi ntah igangguna fungsi tubuh erbanca turah sada pinakit.

Dikune min nda la jumpa kalak si kerasuken ras nande si 18 tahun mbengkung nda la jumpa ras Jesus, pinakitna la min nda malem-malem. Tapi kerehen Jesus tuhu-tuhu mbebasken kalak si tertaban setan, si kerasuken nda ibebasken-Na, pulih mulihi, lanai kerasuken ras malem ibas buta ras bisu nari. Bage pe Jesus mbebasken sekalak nande si enggo 18 tahun mbengkung erkiteken setan e pe ibebasken-Na, malem nande nda, enggo banci tedis alu pajek, lanai mbengkung. Jesus tuhu-tuhu mbebasken manusia ibas kuasa setan nari, ras lalit kuasa terbelinen asangken kuasa Jesus si ngasup mpelawes setan-setan.

III. PENGKENAINA

Arah penjelasen teks i datas, kepeken lit pinakit labo pinakit medis ntah pe psikis tapi pinakit si ibahan kuasa setan. Enda perlu kal iperdiateken ngidah sakit pinakit gelah ula siakap kai pe pinakit medis ntah pe psikis, ula ka siakap kai pe pinakit rehna ibas setan nari. Gelahna ula salah carata ngidah pinakit minimal si idah pinakit arah 3 sumber, Sipemena pinakit medis, eme pinakit si sumberna arah; virus, gangguan fungsi organ tubuh, kecelakaan, rsd. Sipeduaken, pinakit psikis, eme pinakit si sumberna arah; gangguan pemikiren, luka batin, trauma, rsd. Sipeteluken eme pinakit erkiteken rehna ibas setan nari.

Sijadi penungkunen eme, uga nge maka banci masuk setan ku bas kula manusia ras dungna erbahan pinakit? Setan banci masuk ku kula erkiteken lit dalanna masuk. Dalan setan masuk maksudna emkap erkiteken lit pernah kita terlibat praktek-praktek okultisme, misalna; ibas bertin nandena pe enggo itabasi guru/dukun, enggo kenca tubuh i pangiri, itabasi, sangana sakit i tambari guru/dukun, ibas perlajangen mindo jimat, mindo penjaga daging, penergang, gelah jumpa rejeki erbahan pelaris, erbahan penjaga rumah ntah juma. Lit ka jenis na isusurken; nini bulangna lit roh pendamping, isusurken man, anakna ntah kempuna i generasiken ku keturunen biasana lit acara ritual i tampeken.

Adi lit dalanna setan bengket ku bas kula manusia, maka lit nge carana mpelawessa ibas kula manusia nari. Enda me tuntunen ertoto mpelawes setan, eme:

• Ibenaken alu pengakun kerna praktek-praktek kuasa gelap si pernah si lakoken bagepe benda-benda okult si pernah i aloken.
• Ngakuken maka kerina e dosa praktek kuasa gelap/benda-benda okult man Dibata, belasken sada persada kerina si enggo pernah ilakoken ras mindo pengampunen bas Dibata nari.
• Adi lit jimat ntah barang-barang okult i tutung ntah ibenterken.
• Ertoto pemutusan hubungen ras setan alu kuasa Jesus (Kesah Sibadia) guna mbebasken ibas iketten kuasa setan.
• Ertoto guna penjagan ntah pembentengen gelah ulanai bengket kuasa setan mulihi.

IV. DISKUSI

1. Uga nge mbedakensa pinakit medis ntah psikis ras pinakit si ibahan setan erpalasken ogenta?
2. Cuba gargari ibas dirinta masing-masing ntah lit pernah si lakoken praktek-praktek kuasa gelap. Adi lit, aturkenlah gelah ibahan doa pemutusen nandangi iketten kuasa gelap.

Usulen Lagu

• KEE GBKP No. 187: 1-2
• KEE GBKP No. 183: 1-2
• KEE GBKP No. 323: 1-3
• KEE GBKP No. 463: 1- (persembahen)

Pdt. Insan Sinurat, M.Th.
HP: 0812 8813 1248