AGAMA SI TUHU-TUHU DINGEN SI MEHULI

Jakup 1:26-27

(Unit-unit Bidang Diakonia)

Yakobus 1: 26 – 27

1:26 Jikalau ada seorang menganggap dirinya beribadah, tetapi tidak mengekang lidahnya, ia menipu dirinya sendiri, maka sia-sialah ibadahnya.
1:27 Ibadah yang murni dan yang tak bercacat di hadapan Allah, Bapa kita, ialah mengunjungi yatim piatu dan janda-janda dalam kesusahan mereka, dan menjaga supaya dirinya sendiri tidak dicemarkan oleh dunia.

1:26 Ise kin erpengakap maka ia kalak si eragama? Adi la ijagana dilahna sia-sia me ia eragama e, janah itipuna dirina.
1:27 Agama si tuhu-tuhu dingen si mehuli rikutken pengakap Dibata Bapanta e me: pekena-kena anak-anak melumang ras kalak si enggo mbalu si lit i bas kiniseran, bage pe njaga diri gelah ola icedaken doni enda.

MODEL PJJ: KESAKSIAN

KATA PERLEBE

Surat Jakup ngerana kerna hal-hal praktis selaku kalak Kristen. Salah sada penekanenna e me ersembah alu payo man Dibata. Sue ras tema Perpulungen Jabu-Jabunta wari enda kerna agama si tuhu-tuhu dingen si mehuli teridah arah uga cara ersembah si payo man Dibata. I bas Padan Si Mbaru, lit telu istilah si ipakeken guna nuriken erti kata ersembah (Ind= Ibadah), e me: 1) leitourgeo si ertina ersembah man Dibata (Bnd. Perb. 13:2); 2) latreia si ertina ngendesken kula nandangi Dibata selaku persembahen si nggeluh (Bnd. Roma 12:1); 3) threskeia si ertina e me ersembah, ersembah labo terjeng ku bas upacara keagaman tapi teridah arah orat nggeluh si teptep wari (bnd. Jakup 1:26-27). Istilah (threskeia) enda me si ipake Jakup guna nuriken pengertin ersembah man Dibata. Ersembah man Dibata arus icidahken arah kegeluhen si teptep wari si teridah arah 3 dampar, e me: 1). ngasup njagai dilah, 2). mpekena-kena anak-anak melumang ras kalak si enggo mbalu si lit i bas kiniseran, 3). njagai diri gelahna ula icedai doni enda.

ISI

• Ngasup njagai dilah (Ay. 26)

Njagai i bas bahasa Junani bena katana e me khalinagogon si ertina nguasai, njagai, muniken bagepe mpekena-kena. Kalak si ersembah man Dibata arusna ngasup nguasai, njagai bagepe mpekena-kena dilahna gelah kata si ndarat arah babahna banci mpeturah kegeluhen man kalak si deban, labo nuriken kata-kata si sea-sea si erbahanca turah kearun ate bagepe kekoten nandangi kalak si deban.

• Pekena-kena anak melumang ras kalak si enggo mbalu si lit i bas kiniseran (Ay. 27)

Mpekena-kena (Ind=Mengunjungi) i bas cakap Junani e me episkeptestai si ertina perbahanen si ncidahken keleng ate janah kepate nandangi kalak si lit i bas kiniseran. Perbahanen si encidahken keleng ate janah kepate nandangi kalak si deban si lit i bas kiniseran erpalasken alu ngumban biak Jesus si nggit pekena-kena janah ndahi kalak si ngenanami kiniseran bagepe si ngenanami perbeben. Pekena-kena anak melumang ras kalak si mbalu la terjeng ndahi ia saja ras nehken penampat. Terdauhen asa si e, ndahi anak melumang ras kalak si mbalu mabai kita gelah ngasup ngangkai, ngukurken bagepe nggejapken perbeben ras kiniseran si inanamina (ber-empati). Orat nggeluh si bagenda me si enggo leben ilakoken Jesus, janah enda me si jadi usihenta guna ncidahken agama si tuhu-tuhu dingen mehuli.

• Njaga diri gelah ula icedaken doni (Ay. 27)

Kata njagai  si ipake i bas cakap Junani e me tereo. Njagai diri ertina,  la ikut muat bagin i bas biak-biak doni bagepe ngasup nimbak sura-sura daging segelah kalak si erkiniteken lanai seri ras doni enda selaku tanda kinihamatenta nandangi Dibata. Seh makana, si enda me jadi perayaken janah jadi orat nggeluh kalak si erkiniteken man Dibata.

PENGKENAINA

Agama si tuhu-tuhu dingen si mehuli e me ersembah alu payo man Dibata teridah arah totalitas kegeluhen. Ibenaken arah ngasup njagai dilah, umpamana ngasup kita la nuriken berita HOAX entah pe berita si sea-sea, ras sidebanna si banci mpeturah perubaten nandangi kalak si deban. Bage ka pe kita arus ngasup njagai, engkuasai dirinta ras nimbak sura-sura daging. Terlebih i bas zaman genduari melala tantangen si banci mabai kita ndabuh ku bas biak-biak konsumerisme (boros), hedonisme (bersenang-senang) ras materialisme (mengedepankan materi) si erbahanca kita lanai nggeluh i bas kesederhanaan (keugaharian). Selaku kalak Kristen perlu si jagai dirinta segelah la ndabuh ku bas kesenangen doni, tapi tetap ngasup ngataken bujur man Dibata janah teridah arah kita kepate nandangi kalak si deban. Salah sada bentuk kita kepate man kalak si deban e me alu pekena-kena anak melumang ras kalak si mbalu si lit i bas kiniseran. I bas GBKP enda lit unit-unit bidang diakonia e me : YKPD Alpha Omega, PPOS Suka Makmur, PAK Gelora Kasih Suka Makmur, Komisi HIV/AIDS, Credit Union Modifikasi (CUM), Yayasan Ate Keleng (YAK), Komisi Penanggulangan Bencana (KPB). Tentuna praktik kegeluhen ersembah si payo perlu si cidahken ku unit-unit pelayanen enda. Umpamana, i bas kita ngarihken perayaan natalta si inget guna nehken tanda keleng atenta ras kepatenta  man unit-unit pelayanen diakonia GBKP enda subuk secara pribadi, keluarga bagepe kepanitiaan.  Sekaligus la terjeng ndahi ras mereken aksi tapi ngasup nggejapken, ngangkai ras ngukurken kiniseran si inanamina. Segelah perayaan natal labo terjeng perayan tapi lit aksinta si mabai perayaan natalta e ernanam man kalak si deban bagi Jesus si tubuh ernanam kempak doni enda, labo terjeng megi kata Dibata, tapi jadi “pelaku“ kata Dibata i bas nehken kekelengen.

DISKUSI

1. Turiken pengertinndu kerna agama si payo erpalasken ayat 27!
2. Seh i ja nge pengangkanta kerna mereken dukungen nandangi unit-unit bidang diakoni GBKP!
3. Turiken aksi si banci ilakoken guna mendukung unit-unit bidang diakonia GBKP!

USULEN ENDE-ENDEN

1. KEE GBKP No 254 : 1,3
2. KEE GBKP No. 348 : 1,7
3. KEE GBKP No. 281 : 1,3
4. KEE GBKP No. 471 : 1

DAFTAR BACAAN

Pdt. Rosmery br Pinem. S.Th
HP/WA: 082272678020