
PETERUK UKUR NANDANGI KALAK SI DEBAN
Filipi 2: 1 – 4
Nasihat supaya bersatu dan merendahkan diri seperti Kristus2:1 Jadi karena dalam Kristus ada nasihat, ada penghiburan kasih, ada persekutuan Roh, ada kasih mesra dan belas kasihan,
2:2 karena itu sempurnakanlah sukacitaku dengan ini: hendaklah kamu sehati sepikir, dalam satu kasih, satu jiwa, satu tujuan,
2:3 dengan tidak mencari kepentingan sendiri atau puji-pujian yang sia-sia. Sebaliknya hendaklah dengan rendah hati yang seorang menganggap yang lain lebih utama dari pada dirinya sendiri;
2:4 dan janganlah tiap-tiap orang hanya memperhatikan kepentingannya sendiri, tetapi kepentingan orang lain juga.Jesus Kristus jadi usihen2:1 Kegeluhenndu i bas Kristus erbahanca kam megegeh. Ma kin keleng ateNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna?
2:2 Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu.
2:3 Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban.
2:4 Ola keperlunndu saja ngenca iperdiatekenndu tapi perdiateken pe keperlun kalak si deban.(Evaluasi Sasaran Pelayanan GBKP Tahun 2025, Dewasa Menerima Perbedaan)
MODEL PJJ: KESAKSIAN
KATA PERLEBE
Ngaloken kalak si deban si la seri ras kita labo perkara si mesunah. Megati jadi i bas kegeluhen melala kinierbagen e jadi ulu masalah si ncedai i bas sada persadan. I bas suratna nandangi perpulungen i Pilipi, Paulus mereken sada pengangkan kerna kai si arus ilakoken gelah kinierbagen e ula min sempat ncedai perpulungen, iajukna perpulungen gelah min ngasup ngusih Jesus i bas kiniteruken ukurna. I bas Perpulungen Jabu-Jabu enda erlajar kita guna mpebagesi pengangkan kerna kiniteruken sikuga kin si perlu silakoken gelah banci kegeluhen perpulungen tetap jadi pasu-pasu i bas kegeluhen.
ISI
Perpulungen Pilipi e me perpulungen pemena si ipanteki Paulus i Eropa. Lit 3 kalak si jadi palas pantekna perpulungen i Pilipi. Pemena, e me Lidia ras keluargana sada jabu, peduaken, budak diberu si i bas ia ipedarat Paulus setan nari, peteluken e me kepala penjara ras keluargana. Paulus nulisken suratna man perpulungen Pilipi i bas penjara nari guna ngataken bujur nandangi kekelengen ras penampat perpulungen e tupung Paulus i penjara. Erkiteken litna dukungen ras penampat i bas perpulungen Pilipi, Paulus tetap megegeh ras ermeriah ukur amin gia ia lit i bas penjara. E maka bahasa i bas surat enda labo bahasa kearun, kecedan ate, tapi bahasa sukacita, ngataken bujur, pujin rikut motivasi si itulisken Paulus guna mpeteguhi kiniteken perpulungen.
I bas Pilipi 2:1-4, Paulus mpersingeti perpulungen Pilipi kerna situasi perpecahen si jadi i bas perpulungen Pilipi. Perpecahen enda labo bagi si jadi i bas perpulungen Korinti ija nterem perpulungen erpihak-pihak erkiteken ngikutken pemimpin si ngena atena, tapi perpecahen i Pilipi jadi erkiteken perpulungen teremen ngukurken kerna dirina jine asangken kalak si deban, erpengakap maka ganjangen, ulin ia asangken kalak si deban, bagepe turah biak kerangapen. I bas kinata perpulungen si bage rupa Paulus ningetken maka kegeluhen i bas Kristus me erbahanca maka perpulungen e megegeh. Kegeluhen i bas Kristus ertina persadan, relasi, bagepe kengasupen guna ngikutken biak Jesus Kristus i bas kegeluhen. E maka isingetken Paulus maka keleng ate Kristus kap ngapuli perpulungen e, janah perpulungen e pe rembak ras Kristus janah teridah i bas paksa si enggo lepas perpulungen e sikeleng-kelengen dingen mekuah atena sekalak nandangi si debanna. Adi bage me arusna la turah perpecahen ras perubaten erkiteken kinierbagen ras perbedan si jadi i bas kegeluhen ras perpulungen?
Paulus mabai perpulungen gelah perpulungen e banci ersada arih, ersada geluh, ersada ukur, dingen sikeleng-kelengen. la arus seri, tapi i bas la seri e sada tujunta e me guna sikeleng-kelengen ras mbangun kula ni Kristus, gereja dingen perpulungen reh sikapna.
PENGKENAINA
Sue ras sasaren pelayanen gerejanta si enggo sidalani i bas tahun 2025 enda, “Dewasa menerima Perbedaan” sura-suranta maka kita kerina reh ngasupna ngaloken kinata perpulungen si erbage-bage curak perukuren, biak ras pendapat. Tandana sasaren pelayanen gerejanta enda banci tersehi e me lanai turah persoalen ras konflik i bas kita erkiteken perbedan sektor, ide, pendapat, ntah pe perbedan teman sapih-sapih perpulungen, teman sada pelayanen, bagepe teman i sekelewetta. I bas sie perlu kal kita peteruk ukur nandangi kalak si deban. Biak meteruk ukur enda banci jadi adi kita ngusih Jesus si enggo mpeteruk diriNa seri ras kita janah ipakuken seh mate guna kita kalak perdosa.
Meteruk rukur e me sikap pusuh si teridah i bas kerina dampar kegeluhen, labo sekedar basa basi ntahpe kata-kata. Kalak si meteruk ukur la iakapna ganjangen ia asa kalak si deban sabab isedarina maka ia pe dem alu kekurangen, janah i bas kekurangen e nggit ia erlajar guna reh ulina. I bas kita meteruk ukur sada ras si debanna, kita ngaloken kalak si deban desken senina dingen turangta i bas sada jabu. Amin pe lit perbeben, la siangkan, tapi la e erbahanca urak keleng ate nandangi senina ntah pe turangta i bas jabu. Bage me kita i bas sada perpulungen, kula ni Kristus, keluarga Dibata. Kinierbagen si lit, biak si pelain-lain la arus erbahanca kita erdauhna, lanai meriah, ras la ersada, tapi kerina biak si pelain-lain raduken kinierbagen si lit sipersada jadi gegeh guna jadi pasu-pasu nandangi gerejaNa bagepe doni enda.
DISKUSI
- Erpalasken Pilipi 2:1-4, turiken kai-kai saja nge si arus silakoken maka kita ngasup nggeluh meteruk ukur dingen nggeluh sikeleng-kelengen?
- I bas sasaran tahun pelayanen GBKP tahun 2025 “Dewasa Menerima Perbedaan”, uga pendalankenta enda i bas kegeluhen jabu, perpulungen, ras masyarakat?
USULEN ENDE-ENDEN
- KEE GBKP No. 350:1-2
- KEE GBKP No. 254:1-2
- KEE GBKP No. 201:1
- KEE GBKP No. 209:1
DAFTAR BACAAN
Pdt. Ebenezer Karosekali, S.Si
HP/WA: 081223718778