DIBATA SI TELU SADA

Lukas 3: 21 – 22

Yesus, Anak Allah, dibaptis

3:21 Ketika seluruh orang banyak itu telah dibaptis dan ketika Yesus juga dibaptis dan sedang berdoa, terbukalah langit
3:22 dan turunlah Roh Kudus dalam rupa burung merpati ke atas-Nya. Dan terdengarlah suara dari langit: “Engkaulah Anak-Ku yang Kukasihi, kepada-Mulah Aku berkenan.”

Jesus iperidiken

3:21 Kenca kerina kalak si nterem iperidiken, Jesus pe iperidiken ka. Sanga Jesus ertoto talang me langit, 3:22 janah Kesah Si Badia nusur ku baboNa bagi nderapati. Terbegi pe sora i Surga nari nina, “Kam kap AnakKu si Kukelengi. Kam kap si ngena ateKu.” 

(Trinitas)

MODEL PJJ: CERAMAH

I. KATA PERLEBE

Sekalak Teolog Ordo Jesuit nari si tergelar Erich Przywara pernah nulisken sada buku alu judul “Deus semper maior,” bahasa Latin si ertina “Tuhan yang selalu lebih besar.” I bas buku enda icidahken maka la lit ise pe kita manusia si ngasup ngantusi ise Dibata. E maka lit si ngatakenca Dibata e me misteri. Rasul Paulus i bas Roma 11:33 (Terjemahen Baru – Edisi II) ngatakenca, “O, alangkah dalamnya kekayaan, hikmat, dan pengetahuan Allah! Sungguh tak terselidiki keputusan-keputusanNya dan sungguh tak terselami jalan-jalanNya.” Alu bage adi ngerana kerna Dibata ras karya-karyaNa i tengah-tengah doni enda perlu lebe si sedari keterbatasenta selaku manusia tinepa Dibata. Khususna i bas kesempaten enda radu ras kita erlajar kerna Dibata Si Telu Sada, Allah Tri-Tunggal, entah pe doktrin Trinitas.

II. ISI

Ogenta sendah, alu judul “Jesus iperidiken,” e me penegasen identitas Jesus sebage Anak Dibata. Judul i bas Alkitab TB-LAI akap kami lebih tepat, “Yesus, Anak Allah, dibaptis.” Turi-turin kerna Jesus iperidiken enda lit i bas Injil si deban, Matius 3:13-17; Markus 1:9-11. Lit telu hal si jadi penekanen i bas Injil Lukas nari si ngkuhi turi-turin i bas Injil si deban. Si pemena, ituriken Lukas maka Jesus e me salah sada i bas enterem si iperidiken. Bahken Jesus si perpudina iperidiken. Antusenna, penulis Injil Lukas encidahken keberpihaken Jesus sebage Anak Dibata man kalak enterem, e me kalak perdosa si mindo pengalemi dosa i bas peridin e. Jesus si perpudina iperidiken encidahkenca kiniteruken ukur bage pe solidaritas nandangi kalak enterem si perdosa.

Si peduaken, Jesus ituriken ertoto janah talang me langit. Jesus si ertoto e me ciri khas Injil Lukas si encidahken maka Jesus e me pendoa si tutus. Injil Lukas secara konsisten encidahken maka sope Jesus berkarya lalap ibenaken alu pertoton, banci si oge i bas ayat-ayat enda: Lukas 6:12; Lukas 9:18; Lukas 9:28-29; Lukas 11:1; Lukas 22:42; Lukas 23:34, 46. Jesus pendoa si tutus encidahkenca hubungan si ndeher ras BapaNa, janah amin pe IA Anak Dibata tetap erpengendes man Dibata BapaNa i bas pertoton. Janah secara tersirat, penulis Injil Lukas enda ngajuk kita kerina gelah tutus ertoto, sabab Dibata si la terantusi logikanta banci si antusi arah hubungenta si ndeher ras Dibata entah pe kinitekenta.

Si peteluken, Jesus iperidiken e me tanda ibenakenNa pelayanenNa i tengah doni enda. Enda si mbedaken peridin Jesus ras peridin kalak si enterem. Seterusna ituriken Lukas, kenca langit talang maka Kesah Si Badia nusur ku babo Jesus bagi nderapati, janah terbegi sora i surga nari, “Kam kap AnakKu si Ku kelengi. Kam kap si ngena ateKu.” Antusenna, Lukas seri ras Injil si deban nuratken maka identitas “Anak Dibata” e Dibata jine si merekenca, labo manusia. Janah Kesah Si Badia nusur sebage tanda kuasa si ibereken Dibata man AnakNa sope lenga IA erdahin i tengah doni enda. Dibata Bapa, Jesus Kristus (Anak Dibata), ras Kesah Si Badia tuhu-tuhu berperan i bas penciptaan doni enda, karya penyelamaten arah kematen, kekeken, ras kenangkihen Jesus ku surga, pajekna Gereja arah nusurna Kesah Si Badia, seh ku kedungen doni enda. Arah ogenta sendah teridah lit telu pribadi si berbeda tapi sada ngenca Dibata si isembah kita.

Allah Tri-Tunggal, Trinitas, entah pe Dibata Si Telu Sada, e me istilah i bas rangka pengajaren kiniteken, entah pe doktrin. Adi sidarami i bas Pustaka Si Badia la lit istilah-istilah ndai, tapi ituriken lit karya Dibata Bapa, Jesus Kristus, ras Kesah Si Badia. Penyataan Dibata si berbeda enda arus iajarken amin pe situhuna la terantusi logika sabab enda erkaiten ras misteri ilahi si kin banci terantusi arah kinitekenta ngenca. Sejarah encidahkenca polemik kerna pengajaren Trinitas enda. Ibenaken alu litna istilah “trinitas” si ibahan Tertullianus sekalak teolog Latin i bas abad pe-3-ken nari, seh asa gundari melala denga pengajaren-pengajaren si papak kerna Trinitas enda. Pengakuan Iman Rasuli ras bage pe Pengakuan Iman Nicea – Konstantinopel bage pe Pengakuan Iman Athanasius, si ipergunaken i bas GBKP, e me bukti sejarah perjuangen Gereja i bas ngelawan ajaren-ajaren si papak kerna Dibata Si Telu Sada.

III. PENGKENAINA

GBKP enggo erbahan rumusen pengajaren kerna Dibata Si Telu Sada i bas Buku Konfesi GBKP, Buku Katekisasi GBKP bage pe vidio Konfesi GBKP kerna Trinitas. Tugasta kerina perpulungen khususna Serayan Tuhan guna mempelajari alu tutus doktrin Trinitas enda gelah banci tuhu-tuhu siangkai alu penampat i bas Kesah Si Badia nari. E maka sibahanlah program-program pengajaren si khusus mpelajari kerna Dibata Si Telu Sada enda, si tujunna labo terjeng gelah nambahi pemetehta saja, tapi guna ngelawan ajaren-ajaren papak si gundari semakin berkembang i bas dunia maya entah pe i bas Medsos. Adi la lit pemetehta si payo kerna ajaren Trinitas, enggo pasti kita terbawa arus pengajaren si sesat si la sue ras Pustaka Si Badia. I bas dampar si deban kita pe enggo ngelaksanaken Misi GBKP poin a, nina, “Menumbuhkembangkan spiritualitas jemaat berbasis Alkitab.”

Si perpudina, mehuli adi sipelajari vidio Konfesi GBKP kerna Trinitas si isehken Pdt. Prof. Risnawati br Sinulingga (Pandita GBKP erdahin i USU) i bas youtube GBKP bagepe penjelasen Pdt. Joas Adiprasetya i bas kanal YouTube-na, alu judul video “9 Prinsip Penuntun Memahami Trinitas.” Penjelasen Pdt. Joas enda tole banci nambahi pemetehta i bas membedaken ajaren si benar ras ajaren si papak kerna doktrin Trinitas. Pdt. Joas enda sekalak dosen i bas STT Jakarta nari, sekalak ahli teologi sistematika, khususna ahli i bas doktrin Trinitas. Rusur idilo GBKP guna mereken ceramah-ceramah secara Sinodal. Dibata si mpengasup kita ngantusi peratenNa.

IV. DISKUSI : (di kune la ilakoken ceramah) D

1. Turiken pengalamenta i bas mereken penjelasen kerna doktrin Trinitas enda.
2. Daftarken kai saja si jadi kendala i bas kita ngangkai doktrin Trinitas. Kenca enggo sidat kai saja si jadi kendala, peseh man Runggun gelah sibahan pengajaren khusus kerna doktrin Trinitas gelah tuhu-tuhu tangkas man banta.

V. USULEN ENDE-ENDEN

1. KEE GBKP No. 99:1-2
2. KEE GBKP No. 213:1-3
3. KEE GBKP No. 185:1-2
4. KEE GBKP No. 196:1, 4

VI. DAFTAR BACAAN

1. Erich Przywara – Wikipedia
2. Identitas Yesus Sebagai Anak Allah Menurut Lukas 3:21-22 – Liberatus Mayabubun & Johanis Luturmas – Media Jurnal Filsafat dan Teologi Vol. 3 No. 1, Februari 2022 – https://jurnal.stfsp.ac.id/index.php/Media
3. Sembilan Prinsip Penuntun Memahami Trinitas – YouTube Channel Joas Adiprasetya

Pdt. Larena Br Sinuhaji, M.Th
HP/WA: 081397088873