PERDIATEKEN RAS PATUHI UNDANG-UNDANG TUHAN

Josua 1: 7 – 9

1:7 Hanya, kuatkan dan teguhkanlah hatimu dengan sungguh-sungguh, bertindaklah hati-hati sesuai dengan seluruh hukum yang telah diperintahkan kepadamu oleh hamba-Ku Musa; janganlah menyimpang ke kanan atau ke kiri, supaya engkau beruntung, ke manapun engkau pergi.
1:8 Janganlah engkau lupa memperkatakan kitab Taurat ini, tetapi renungkanlah itu siang dan malam, supaya engkau bertindak hati-hati sesuai dengan segala yang tertulis di dalamnya, sebab dengan demikian perjalananmu akan berhasil dan engkau akan beruntung.
1:9 Bukankah telah Kuperintahkan kepadamu: kuatkan dan teguhkanlah hatimu? Janganlah kecut dan tawar hati, sebab TUHAN, Allahmu, menyertai engkau, ke manapun engkau pergi.”

1:7 Tetap lah ukurndu, tek lah. Janah inget! Ikutken kerina undang-undang si ibereken suruh-suruhenKu Musa man bandu. Sada bagin pe ola lupaken, maka ku japa pe kam lawes, jadi bagi sura-surandu.
1:8 Bage pe ola kam lupa maka kitap undang-undang e arus tetap rusur iogeken i bas kebaktianndu. Pelajarilah e suari ras berngi, janah arus iperdiatekenndu maka kerina si tersurat i je ipatuhindu. Alu bage la banci la kam sangap janah seh sura-surandu.
1:9 Inget maka enggo Kuperentahken man bandu gelah tetap ukurndu ras tek! Ola kam mbiar, ola aru atendu, sabap aku TUHAN Dibatandu, tetap ras kam ku japa pe kam lawes.”

(Garis-garis Besar Pelayanan GBKP)

MODEL PJJ: KESAKSIAN

KATA PERLEBE :

Tiap organisasi termasuk gereja pe tentu lit tujun si man ayaken ras-ras. Adi bas gerejenta enda me si gelari kita alu visi. Visi gerejanta seh 2030 e me aron Dibata guna jadi pasu-masu man doni enda. Tentu penungkunenna uga gelah visi e banci tersehi ras uga carana? Gerejanta njabab penungkunen enda alu erbahan Garis-Garis Besar Pelayanen (GBP). GBP GBKP iukurken tiap lima tahun sekali guna ngukurken uga carana GBKP banci erdalan ras-ras guna menuju visi si nggo lit bas kita. GBP jadi alat bantu man kerina wilayah pelayanan guna meteh sasaran pelayanan tiap tahunna, ras kai-kai saja si arus teridah tanda kita seh bas sasaran pelayanenta. Menurut Litbang GBKP maka 8 persen denga kita kerina make GBP jadi palas ras acuan erbahan program. Bahanta wari enda nu ate banci mabai kita kerina gelah njadiken GBP palas ku lebe wari enda i bas erbahan program bagepe meteh arah gerejanta.

ISI :

Bahan Perpulungen Jabu-Jabunta batang belinna e me kerna perentah Dibata man Josua gelah naluken bangsa Kanaan. Bagi si eteh kenca Musa mate maka Josua me si ipilih Dibata guna jadi gancih Musa. Josua iperentahken Dibata guna berkat naluken bangsa Kanaan. Enda me peran Josua sebage pemimpin. Erperang, ndahiken dahin Dibata si deban nggom usur kal idahiken Josua tapi jadi pemimpin enda me si pemena ilakokenna. Situasi si pemena tentu megati kal melala kesuliten. Pengalaman pemena usur kal je lit keragun, kebiaren ras si debanna kerina. Situasi enda tangkas man Dibata maka kenca IA ngerana kerna bangsa Israel, bas bagin enda terdauhen ngerana ka Dibata khusus man Josua.

Si pemena nina Dibata, Josua arus tetap ukurna dingen tek. Kata tetap ukur i bas bahasa Ibrani hazaq si banci pe iertiken megegeh, jadi megegeh. Bas konteks enda gegeh Josua labo dirina tapi Dibata nge situhuna gegeh man bana. Asal Dibata ikut ras Josua pasti ia megegeh. Maka asum Dibata ngataken tetap ukur man Josua situhuna i je imaksudken tetap ukur sabab lit je Dibata. E maka arus tek. Kata enda erkawiten ras tetap ukur. Sabab tetap ukur banci jadi adi lit kiniteken. Adi la kita tek man Dibata maka lalap la tetap ukurta.

Gelah enda kerina banci jadi maka si arus lit bas Josua e me ngikutken kerina undang-undang Dibata. Kunci keberhasilen Musa si arus iterusken Josua e me ngikutken kerina undang-undang (Taurat) si enggo usur ioge Josua. Taurat ngaturken relasi manusia ras manusia, manusia ras Dibata. I bas bahasa Indonesia ikataken ula menyimpang ”kanan dan kiri”. Ertina konsisten, tegak lurus e jadi kunci keberhasilen. Bas perdalanen kegeluhen enda tentu labo hal menukah perlu kesetiaan i je. Megati kepentingen pribadi ntah golongen si erbahnca maka la kita setia matuhi taurat. Situhuna adi rikutken bahan enda ula lebe ngenen hasilna, asal la kita ngikutken pe situhuna enda nggo jadi gambaren kekalahen. Kalak si la patuh man undang undang situhuna nggo jadi kalak si talu. Ekap maka nina Dibata man Josua ula sada bagin pe lupaken gelah ku japape Josua lawes seh sura surana. Megati lit bagin-bagin siakap banci dalanken bas si e setia kita. Tapi adi lit bagin si la bagi sura-suranta, ras lit ka je keperlunta megati alu sedar si lupaken undang-undang e. Adi seh ate sura-sura, kepatuhen man Taurat arus utuh, la lit sada bagin pe si ilupaken.

Gelah undang undang e lalap nggeluh ras idalanken, undang-undang e arus lalap iogeken, adi i bas bahasa Indonesia nina diperkatakan. Megati kesalahen si mbelinna nandangi undang-undang e, e me la nggo i oge. Melala kalak la  mediate nandangi aturen seh maka dungna terjebak ras kena hukum pe erkiteken la mediate. Salah sada tanda kalak mediate nggit ia ngoge undang-undang. Bas teks enda la ngenca arus i oge tapi terdauhen pe i pelajari. Kata i  pelajari lit bas bahasa Ibrani hagah membaca dan merenungken. Ertina undang-undang la terjeng i oge tapi jadi bahan perenungen. Undang undang e maba sada kesedaren min bas kegeluhen kalak si ngogesa. Kalak si ngoge seh ku bas titik perenungen berarti idahna nilai nilai kiniulin arah kai si ogena e. Terdauhen la ka ngenca irenungken tapi pe idalanken. Enda tahap si peteluken. Bicara idat pe nilai kiniulin bas undang-undang situhuna tetap e lenga lit gunana adi la idalanken. Kalak si patuh arus i dalankenna kata Dibata e. Asal idalanken rikutken ogenta datna me kesangapen. Kesangapen nggeluh lit bas undang-undang Tuhan.

Bas ayat 9 sekali nari ipetetap Tuhan ukur Josua. Bas ipetetapNa ukur Josua, ingetken Dibata maka ia me Tuhan Dibata. Tuhan Dibata e me gambaren kuasa. Kekuasaan Dibata situhuna mereken ketetapen ukur man Josua. Josua pasti berhasil i bas dahin si iperentahken Dibata sabab Dibata situhuna ikut ras Josua kujapape Josua lawes. Pengkawali Dibata lit man kerina kalak si tek dingen ndalanken undang-undangNa suari ras berngi.

PENGKENAINA :

Garis Besar Pelayanan (GBP) GBKP ilitken guna mereken panduan man kerina ngawan perpulungen GBKP.  Bagi si enggo ijelasken maka GBP enda nampati gelah kerina banci seh ku bas visi si atenta si tuju e me jadi aron Dibata si maba pasu-pasu. Guna tahun 2026-2030, tim GBP enggo erdahin ngelakoken penelitian maka dua hal si terus arus silumbaken ku lebe wari enda e me peningkaten spiritualitas si teridah arah kengasupenta geluh ras komunitas si maba pasu-pasu. E maka  GBP ibahan gelah radu seh min kita ku bas tujun enda.

Gelah enda banci tersehi rikutken bahanta i datas si pemena si arus silakoken e me ngoge, ngerenungken bagepe ndalankenca. Bagin si pemena ngoge iarapken kal maka GBP arusna jadi salah sada buku si igelem kerina ngawan perpulungen GBKP. Tersadalah gia min tiap jabu lit GBP nta gelah si eteh ku ja kin sura sura gerejanta arah kegeluhen pelayanenta. Adi kerina ngoge GBP maka kerina meteh ku ja gereja nu ate ibaba ras sada kal langkahta kerina nuju tujunta e. Tahap dua la terjeng i oge tapi kin pe iukurken. Ertina radu ras min kita kerina ndatken isi jiwa GBPnta. Ras si sipeteluken e me ndalankenca. Enda si perluna. Megati GBP lenga jadi acuan penyusunen program. E maka megati nge si idah kai pe sasaren pelayanen si ibahan tapi programna la berganti. Arah bahan PJJ sekalenda siarapken kal maka i bas kita ersikap nyusun program 2026 GBP GBKP arus jadi jemakenta ndalanken dahin-dahinta.

Garis besar pelayanen e me ulih keputusen persidangen. Adi keputusen persidangen gerejanta tek kita labo e terjeng keputusen si pulung tapi ikut je Dibata pe erdahin sabab persidangen gereja e me persidangen suruh-suruhen Dibata. Keputusen persidangen e me sura-sura Dibata. Maka adi bagelah pengangkanta maka kerina nggo merga siakap GBP sabab tek kita enda me sura-sura Dibata guna idalanken bas gerejaNa. Adi nulih ku Josua, kalak si la ndalanken GBP (oge undang-undang) labo terjeng keputusen gereja la idalankenna tapi pe situhuna ikut la patuh man Dibata.

Si terakhir tentu sedar kita maka gerejanta lit i bas wilayah si berbeda konteks ras situasi. Maka GBP arus i baca ras iterjemahken bas konteks pelayanenta masing masing. Rikutken si e maka si idah me banci jadi berbeda-beda responta bas GBP siteridah arah program. Hal enda tentu si banci kal ialoken, sipenting acuan program e turah arah konsistensinta ngikutken GBPnta.

DISKUSI :

1. Rikutken teks PJJnta kai nge si idah kawiten kepatuhen ras undang-undang bagepe kesangapen? Turiken pengangkan ras pengalamenta.
2. Rikutken pengalamen bas Runggunta, nggo nge GBP GBKP ipakeken jadi panduan penyusunen program? Kai keuntungen si idah adi GBP i jadiken acuan perdalanen penyusunen program? 

USULEN ENDE-ENDEN:

1. KEE GBKP No. 209:1, 3
2. KEE GBKP No. 293:1,4
3. KEE GBKP No. 465:1-2
4. KEE GBKP No. 204:1, 3

DAFTAR BACAAN:

 

Pdt. Jepri Alexander Keliat, M.Fil

HP/WA: 081360645511