Bahan PJJ 3-9 Agustus 2025

August 4, 2025 Writer-1 PJJ Sektor, Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem 0

IPERIDIKEN GELAH ERSADA RAS

KRISTUS JESUS

Roma 6:3-6

(Sakramen Peridin)

6:3 Atau tidak tahukah kamu, bahwa kita semua yang telah dibaptis dalam Kristus, telah dibaptis dalam kematian-Nya? 6:4 Dengan demikian kita telah dikuburkan bersama-sama dengan Dia oleh baptisan dalam kematian, supaya, sama seperti Kristus telah dibangkitkan dari antara orang mati oleh kemuliaan Bapa, demikian juga kita akan hidup dalam hidup yang baru. 6:5 Sebab jika kita telah menjadi satu dengan apa yang sama dengan kematian-Nya, kita juga akan menjadi satu dengan apa yang sama dengan kebangkitan-Nya. 6:6 Karena kita tahu, bahwa manusia lama kita telah turut disalibkan, supaya tubuh dosa kita hilang kuasanya, agar jangan kita menghambakan diri lagi kepada dosa.

MODEL PJJ: CERAMAH

 KATA PERLEBE :

Salah sada syarat jadi anggota GBKP e me iperidiken. E maka kerina anggota GBKP pasti enggo peridiken, seakatan anak ngawan perpulungen si mbaru tubuh ras si lenga itaruhken orang tua guna iperidiken alu erbage-bage sabab (bdk. Tata Gereja GBKP, Tata Dasar, Pasal 6).

Anem gia enggo ngaloken Lakon Peridin si Badia, banci jadi nterem denga ngawan perpulungen GBKP si lenga ngangkai ras enggeluhken erti peridiken bas kegeluhenna. Arah bahan perpulungen jabu-jabunta sendah, kita erlajar guna mpersingeti si lupa, ntah pe nambahi pengangkanta kerna peridin.

 ISI :

a) Kitab Roma enda isuratken rasul Paulus sekitar tahun 57 M, man perpulungen i kota Roma (1:6), si umumna labo kalak Jahudi (11:13; 15:16). Perpulungen enda pantek, kemungkinen arah kalak si enggo tek erkiteken pelayanen Paulus ras rasul si debanna, ntah pe pelayanen kalak si tek erkiteken naksiken nusurna Kesah Si Badia (Pentakosta, Perb. 2:10). Arah surat enda rasul Paulus nuriken pokok pengajarenna sedekah enda, guna mpepinter kesalahpahamen nandangi pengajarenna kerna Berita si Meriah, ras pe mpekena pengangkaan si salah i bas kalak Jahudi nandangi kalak Kristen si labo kalak Jahudi (misalna, Perb 2:1-29; 3:1).

b) I bas teks perpulungen jabu-jabunta, rasul Paulus mpepinter pengangkan si salah nandangi perkuah ate Dibata si mbelin i bas Jesus Kristus. Sabab, banci jadi lit kesalahpahamen nandangi pengajaren Paulus si ngataken, “… ija reh buena dosa, ije me ndauh reh belinna lias ate Dibata” (Rm. 5:20). Kalak si salah ngertiken pengajaren enda, banci mpeturah sura-sura guna tole erbahan dosa, gelah reh belinna ialokenna lias ate Tuhan. Padahal, arah pengajaren e, rasul Paulus mereken kesedaren uga belinna perkuah ate Tuhan man kalak perdosa, si arusna mpeturah pengataken bujur ras kepatuhen man Dibata. Labo ndabuh ku bas dosa gelah reh buena ka ialokenna lias ate Tuhan. Guna tujun enda, rasul Paulus mereken penjelasen alu nuriken erti peridin.

I bas tradisi ntah pe kesemalen agama Jahudi, kalak si labo Jahudi bengket ku agama Jahudi, lit ritus si arus ikutina: ngkeret (memotong) silu-silu (kuku) ras bukna, nangtangi pakenna, masuk ku kolam peridin si launa sekitar 200 liter lau. Kerina bagin kulana arus kena lau. Tupung i bas lau e iakukenna pengakun kinitekenna ilebe-lebe telu kalak bapa baptisna, si pegancih mereken pedah ras pertoton ngataken bujur man Tuhan. Adi enggo ilewatina ritus enda, kalak enda enggo ipetubuh mulihi (lahir baru). Kerina dosana enggo ialemi. Sabab kalak si mbaru tubuh lenga bo erbahan dosa. Tradisi enda, enggo ieteh jelma si ngaloken surat rasul Paulus enda, amin pe perpulungen e umumna labo Jahudi. Alu pengangkan si bage, rasul Paulus ngataken, maka kalak si enggo  tek man Tuhan Jesus alu iperidiken i bas gelarNa, si enggo ngaloken lias ate Dibata si mbelin, kalak si bage enggo ersada ras Kristus i bas kematenNa (bagi kalak igedapken ku lau, itanemken ku taneh) ras keke (mulgap lau nari) alu kula si bersih ras geluh si mbaru. Si male enggo lepus, si mbaru enggo reh (2 Kor. 5:17). Alu bage, kalak si enggo iperidiken lanai patut erkubang-kubang i bas dosa, tapi arus njaga kebadian geluhna (Im. 19:2; 1 Ptr. 1:16). Perukurenna arus min bagi perukuren Kristus (Pil. 2:5). Standart geluhna menuju standart Dibata (Mat. 5:48). Tandana kalak si enggo ras iperidiken e: Ipelawesna setan-setan i bas gelar Tuhan, adi cikepna nipe ntah nginem racun la kaden pe, itamana tanna ku kalak sakit, malem si sakit e (Mrk. 16:17-18; Mat.5:13-16; Jak. 4:7). Kalak si enggo iperidiken e ipimpin Kesah Si Badia. E maka lit buah Kesah Si Badia ibassa (Gal. 5:22-23). Kedungenna, kalak si enggo ersada ras Kristus arah peridin e, nggeluh me amin gia enggo mate e me i bas Surga rumah Bapa (Joh. 11:25-26; 14:1-3). Alu bage, subuk gundari ras pagin, kegeluhen kalak si enggo iperidiken i bas gelar Tuhan Jesus maba kiniulin man bana, kalak sideban, alam ras terpuji gelar Tuhan!

 

PENGKENAINA :

  1. Lakon Peridin si Badia e me salah sada sakramen i bas gerejenta GBKP. Kata sakramen asalna i bas bahasa Latin ‘Sacramentum” si iterjemahenna “benda suci,” “perbuatan kudus,” “rahasia suci.” Sakramen enda jadi istilah teologis (ipake gereja) si ibuat i bas istilah hukum ras pengadilen. Misalna, adi lit dua kalak si rubati, perkarana ibaba ku pengadilen. Duana ia arus mereken sen (uang) jaminen. Ise si talu, senna isita. Ertina, sen e me jadi jaminen ngesahken perkarana. E maka sen jaminen e me ikataken ‘sacramentum.’ Alu kata si deban sakramen e me jaminen si ibereken Tuhan man kalak si tek (Mrk.16:16). Peridin si Badia e me salah sada jaminen Tuhan man kalak si tek.
  2. Peridin asalna i bas kata Junani “baptize” si ertina ‘menyelamkan’, ‘menyucikan’, ‘membersihkan.’ Guna ngangkai peridin enda, arus sikawitken ras peridin si ialoken Jesus i bas Matius 3:13-17, Markus 1:9-11, Lukas 3:21-22. Peridin Jesus i bas kiniseran enggo ilakoken Jesus i Golgota si maba keselamaten man doni enda. E maka arah kematen Jesus i kayu persilang keselamaten itawarken man kerina jelma. Janah, kalak si tek ngenca si ngaloken keterkelinen. Kalak si iperidiken e me kalak si tek man Tuhan Jesus, alu bage berlaku pembersihen dosana arah kematen Jesus, sekaligus keke ukurna guna setia man Jesus segedang geluhna. Alu bage, Lakon Peridin si Badia e seh kal pentingna i bas kegeluhen kalak Kristen. “Ise si tek dingen iperidiken terkalin kap pagi. Tapi ise si la tek, ia pagi iukum” (Mrk.16:16). Peridin e me sada bukti kalak tek. Janah enda sada ketetapen si enggo iperentahken Tuhan man kerina kalak si tek guna ilakoken. Arah perentah e kita ibaba ku dua pilihen (opsi): Tek ras peridiken, maka terkelin. Si la tek pasti iukum.
  3. Kalak si ngangkai erti peridin bas geluhna, pasti ia ngataken bujur man Tuhan si enggo mbersihken ia i bas kutuk dosa nari tupung ia iperidiken. Biak si ndekah enggo terkubur i bas peridin e. Jenari, turah biak geluh si mbaru, alu ngusih Tuhan Jesus selaku usihen (teladan) bas geluhna. Kegeluhen kalak si enggo iperidiken “bertumbuh” ku kesempurnaan Kristus.
  4. Adi bage pentingna erti peridin, arusna kerina kalak si tek arus erdiate man anak, jabu ras teman-teman perpulungen gelah iperidiken. I bas Tata Gereja 2005-2015, Tata Laksana Bab I, pasal 3, ayat 2a, ikataken “Jika ada orang tua tidak lagi menaruh minat mengantar anaknya sampai umur lima (5) tahun untuk dibaptiskan, maka yang bersangkutan diingatkan dan didorong oleh Majelis Jemaat. Dan jika tidak berubah (bertobat), maka si suami-istri dapat dikenakan penggembalaan khusus.” Antusenna, si abai nandangi peridin, situhuna labo atena tutus erkiniteken. E maka, perlu kal ipersingetti ras iajarken erti peridin man bana, gelah iangkaina ras idahikenna alu mehuli.
  5. Erkawiten ras persoalen peridin percik (ipirpirken) ntah selam, Johanes Calvin ngataken, “… tidak penting apakah yang dibaptiskan itu sama sekali dimasukkan ke dalam air atau tidak, apakah itu dilakukan tiga kali atau sekali saja, apakah air yang dengannya ia diperciki mengalir atau tidak. Tetapi mengenai hal ini gereja-gereja harus diberi kebebasan sesuai dengan kebhinekaan daerah, meskipun kata “membaptis” itu berarti “menyelamkan ke dalam air”, dan meskipun sudah pasti bahwa  gereja lama dahulu memelihara kebiasaan menyelamkan itu” (Johanes Calvin, Istitutio, BPK Gunung Mulis, Jakarta, hal. 290). Menurut Calvin, labo soal cara si penting, tetapi gelah siiperidiken e meteh kai arti peridin e, kuga kegeluhen si arus idalankenna ras padan Tuhan si denggo ialokenna.
  6. Erkiteken lit persoalen beda pendapat kerna peridin anak kitik, mari sinen pengangkan GBKP rikut buku katekisasinta (hal. 124), si sue ras pandangen Calvinis, “Baptisan kudus juga berlaku bagi anak-anak Kristen, karena iman orang tuanya menjamin serta seturut dengan janji Allah kepada Abraham dan keturunannya (Kej. 17:7). Alkitab menyatakan bahwa dalam beberapa kejadian, seseorang menerima Rahmat Allah karena iman orang lain (Mat.8:5-13; Mrk.9:24-27; Mat.25:21-28). Jadi, orang mendapat anugrah Tuhan bukan atas imannya sendiri, tetapi atas permintaan orang yang beriman.” Alu alasen enda me maka anak-anak pe iperidiken, amin pe lenga bo iangkana kerna erti peridin e.
  7. Inti utama i bas kalak iperidiken si badia e me, bukti tek man Tuhan Jesus, ersada ras IA, ras naksiken man doni enda maka ia enggo nggeluh si mbaru alu cara si ngusih Tuhan Jesus i bas perukuren, pengerana ras perbahanenna.

DISKUSI : (di kune la ilakoken ceramah)   

  1. Kai nge pengangkanta kerna erti ras makna peridiken sedekah enda?
  2. Erpalasken oratenta Roma 6:3-6, kai nge erti ras makna iperidiken gelah ersada ras Kristus?

 

USULEN ENDE-ENDEN: :

  1. KEE GBKP No. 205:1-2= https://www.youtube.com/watch?v=8bzr3hnJdrU
  2. KEE GBKP No. 209:1,3= https://www.youtube.com/watch?v=CW_YNHCWKR0
  3. KEE GBKP No. 218:4-5= https://www.youtube.com/watch?v=1X46YRfmW_0
  4. KEE GBKP No. 296:1,3= https://www.youtube.com/watch?v=VtzUvAqgdYY

 

DAFTAR BACAAN:

  1. Johanes Calvin, Institutio, BPK Gunung Milia, Jakarta, 2005
  2. G C.van Niftrik/B.J.Boland, Dogmatika Masa Kini, BPK Gunung Mulia, Jakarta, 1995
  3. William Barclay, Pemahaman Alkitab sehari-hari, BPK Gunung Mulia, Jakarta1986
  4. Tata Gereja GBKP 2005-2015
  5. Tata Gereja GBKP 2015-2025

Pdt. Arapen Perangin-angin, M.Th

HP/WA: 082185345585

Post Views: 1,960