KERINA ARUS METINGGEL
Jakup 1:19-25
(Keluarga I)
MODEL PJJ: KESAKSIAN
Pendengar atau pelaku firman1:19 Hai saudara-saudara yang kukasihi, ingatlah hal ini: setiap orang hendaklah cepat untuk mendengar, tetapi lambat untuk berkata-kata, dan juga lambat untuk marah; 1:20 sebab amarah manusia tidak mengerjakan kebenaran di hadapan Allah. 1:21 Sebab itu buanglah segala sesuatu yang kotor dan kejahatan yang begitu banyak itu dan terimalah dengan lemah lembut firman yang tertanam di dalam hatimu, yang berkuasa menyelamatkan jiwamu. 1:22 Tetapi hendaklah kamu menjadi pelaku firman dan bukan hanya pendengar saja; sebab jika tidak demikian kamu menipu diri sendiri. 1:23 Sebab jika seorang hanya mendengar firman saja dan tidak melakukannya, ia adalah seumpama seorang yang sedang mengamat-amati mukanya yang sebenarnya di depan cermin. 1:24 Baru saja ia memandang dirinya, ia sudah pergi atau ia segera lupa bagaimana rupanya. 1:25 Tetapi barangsiapa meneliti hukum yang sempurna, yaitu hukum yang memerdekakan orang, dan ia bertekun di dalamnya, jadi bukan hanya mendengar untuk melupakannya, tetapi sungguh-sungguh melakukannya, ia akan berbahagia oleh perbuatannya.
KATA PERLEBE :
Kata metinggel sada dahin mesera-mesera menukah ngelakokenca. I bas kata metinggel labo terjeng si ibelaskenna si begiken tapi pe ayona, gang sorana, carana melaskenca ras sidebana. Banci sikataken maka i bas metinggel kerinana arus si perdiateken. I bas kegeluhen jabu pe rusur si begi turah la siangkan erdandanken “komunikasi” si la mehuli. Si ngerana pe asal belaskenna, si megi megi pe la ije ukurna. Si meriahna i bas jaman enda reh beluhna kita erkomunikasi ras “dunia maya”, si rembak ras kita dekahen kita la siangkan.
Bage ka pe i bas erkiniteken, kerina kita arus metinggel sabab enda salah sada faktor pendukung reh bagesna kinitekenta/turah kiniteken e me arah metinggel. Si begiken kita arus metinggel kita ngalokenca gelah ula turah la siangkan. Metinggel bas cakap Indonesia e me “cermat, seksama, sungguh-sungguh mendengar, memperhatikan, mengindahkan”. Alu bage adi metinggel kita, tentuna sinuri-nuri pe la mulih-ulih nuri-nuri, simegi-megi pe ngangkai alu payo. La erndobahen si nguda bagepe si enggo metua, biak si bage perlu i asuhi bas kita sabab kegeluhenta la terlepas ras “kata-kata”, teriket i bas hubungen sada ras sidebanna si ilakoken alu percakapan (komunikasi) segelah tersehi kai sura-suranta.
ISI :
Kitab Jakup i peseh nandangi kalak Jahudi si enggo tek man Tuhan Jesus si marpar merap i bas taneh perantauan. Bangsa si 12 suku si ngenanami kiniseran erdandanken kinitekenna. Surat enda guna ngajuk kalak Jahudi si tek man Kristus gelah tetap semangat amin gia erbage-bage percuban nderpa. Jenari mindo man perpulungen segelah tambah-tambah pengertin ras pengangkanna kerna nggeluh erkiniteken. Geluh erkiniteken teridah arah perbahanen. Dingen kata Dibata si enggo ialoken tuhu-tuhu ipakeken ngalaken kiniseran alu tetap ngataken bujur.
- Arus metinggel, ula minter ngerana, ula sukah merawa.
Kalak si la ngasup metinggel erbahanca pengalokenna pe la payo, la ka payo pemegina meter ka ijababna, kedungenna lanai siangkan. Merawa perbahan la seh kai si ibelaskenna. Kedungenna si ngerana ndai turah emosina, si megi pe reh rawana sabab la iangkana. Enda me persinget Jakub man kerina perpulungenna, kai si terjadi ula menukah kelsehen, megermet ras metinggellah i bas kerina kejadin e.
- Rawa labo ngasup erbahan si mehuli.
I bas kita merawa perukurenta pe lanai bo payo, lanai terkuasai kita dirinta. Rawa mpeturah ukur mbiar man kalak si megisa. Rawa erbahanca kai “pesan” si peseh la tersehi. Kedungenna turah perlawanen i bas kalak si megi. Si megi ras si ngerana la siangkan, turah me la sitabehen, turah perubaten. Kata-kata Jakup enda mereken orat nggeluh man kalak Jahudi Kristen i bas erkomunikasi ras bangsa si deban. E maka iteruskenna gelah i bas ngerana lit min kiniteruken ukur.
- Metinggel, ngangkai, ndalankenca.
Biak si bagenda turah min i bas perpulungen. I bas megiken pengajaren perlu kal metinggel, ula siakap kita si payona. Bagi kalak Jahudi si la tek nandangi Jesus Kristus erdandanken la metinggel nandangi kata Dibata si lit i bas Jesus Kristus. E maka metinggellah (mperdiateken Kata Dibata), kenca e turah me pengangkan kerna kai si begiken kita e. Ngangkai kai tujun kata Dibata si ibegina e guna kiniulin kegeluhenna. Metinggel e la kuh adi la icidahken arah perbahanen. Payo mbue percuban kegeluhen, perlu kal kita megermet kerna percuban e (perlu kita ercurmin) gelah si eteh ija si man pesikapen. Si pepayo kegeluhenta gelah alu bage komunikasinta pe nandangi jelma si deban pe reh ulina.
PENGKENAINA :
Komunikasi i bas jabu syarat utama njaga keluarga si sempabu. Lit si begi, bapa si merawa rusur, nande si jungut-jungut, anak si mbenceng. Enda me tanda-tanda komunikasi lenga mehuli. La metinggel kerna kai si jadi. Metinggel erbahanca kita ercurmin i bas kai si belasken ras kai si begi. Ula meter merawa sabab rawa labo ndungi persoalen tapi erbanca turah persoalen sideban.
Kalak si mperdiateken kata Dibata teridah i bas sikap geluhna e me arah pengerana ras perbahanenna sue si ibegikenna ras si ilakokenna. Tupung ndalani paksa meriah entahpe kiniseran, perpulungen nggo lit jemakenna arah kata Dibata si ibegina jenari i pakekenna bas geluhna segelah ula ndabuh ku bas dosa. Pedah Dibata e i bas sibegiken arah pinggelta bengket ku bas pusuhta jenari siayuken teridah arah perbahanenta, masu-masu Dibata man banta sabab ngena kal ate-Na kalak si suari berngi ngukuri kata-Na bagepe ngelakokenca.
Metinggel i bas Kata Dibata teridah arah perbahanen i bas kegeluhenta. Jabunta me si pemenana ngenanamisa. Pengerananta maba ngaruh ku bas perkembangen anak-anakta. Ranan si ipeseh subuk tupung man, ngadi-ngadi, entah i bas paksa kai pe arus beluh kita encibalken ranan e segelah iantusi kerina isi jabu. Keterbukan i bas nehken pedah-pedah ajar i bas jabu mabai anakta guna ngidah potensi si lit i bas ia, jenari i kembangkenna. E maka perlu kal kita erlajar metinggel gelah reh tambahna kedewasaan ras pengangkanta. Sibenaken i bas dirinta gelah banci pe ernanam man kalak si deban.
DISKUSI :
- Sue ras pengalamenta bagepe pengidahta, adi lit biak metinggel, kai nge keuntungenna?
- Turikenlah tekadndu kenca ogendu perikop PJJ-ta enda i bas ayat 19!
USULEN ENDE-ENDEN: :
- KEE GBKP No. 192:1, 2= https://www.youtube.com/watch?v=AgERET__xH4&pp=ygUGa2VlMTky
- KEE GBKP No. 468= https://www.youtube.com/watch?v=kt_mbVRvb3g&pp=ygUHa2VlIDQ2OA%3D%3D
- KEE GBKP No. 414:1, 2= https://www.youtube.com/watch?v=wPbMyB-QymA&pp=ygUHa2VlIDQxNA%3D%3D
- KEE GBKP No. 13:1, 2= https://www.youtube.com/watch?v=GmeGCN-s49s&pp=ygUGa2VlIDEz
DAFTAR BACAAN :
- Alkitab penuntun hidup berkelimpahan seri ; the full life study bible, gandum Mas Jawa Timur
- Menjadi orangtua bijak, H Norman wright, yayasan Andi tahun1996
Pdt. Neltiana br Sembiring, S. Th
HP/WA: 081396841046