ERBAHAN RENCANA SI MEGERMET

Kuan-kuanen 21: 5

21:5 Rancangan orang rajin semata-mata mendatangkan kelimpahan, tetapi setiap orang yang tergesa-gesa hanya akan mengalami kekurangan.

21:5 Rencana si megermet maba keuntungen, perbahanen si merudu-rudu mereken kerugin.

(GBP)

MODEL PJJ: CERAMAH

KATA PERLEBE

Yogi Berra sekalak pemain bisbol i Amerika Serikat Pernah ngataken ”if you don’t know where you are going, you’ll end up someplace else” kata enda banci iertiken : adi la kin ietehndu ku ja sura-surandu lawes, maka dungna seh me kam ku ingan si salah/papak. Kata enda ngataken maka ope berkat ngelakoken sada dahin harus min sieteh ku ja ateta (tujun) ras uga carana gelah banci kita seh ku ingan siarapken kita e (perencanaan). Adi la kin lit tujun ras perencanaan maka nggo banci i pastiken maka usur me perdalanenta papak ras la bagi iarapken. Garis-Garis Besar Pelayanen Gerejanta eme sada tujun ras rencana kerja gerejanta, si mpersada kerina kita (PJJ, Runggun, Klasis, Sinode) gelah erdalan ras-ras ku bas sada tujun alu rencana-rencana si nggo i suratken i bas.

ISI

Kata rencana i bas bahasa Ibrani eme mahsebowt. Kata enda banci iertiken perhitungen, rencana, pertimbangen si matang. Kalak Israel adi si nen bas Pustaka terbiasa kal nge bas erbahan perencanaan. I bas ngerencanaken waktu rani bage pe nuan e kerina lit iaturken. Bage pe bas kerina kebaktin si ilakoken tep-tep wari lit nge perencanaan ras e kerina nggo me iaturken bas sada aturen (Taurat).

I bas ndalanken rencana ibutuhken kalak si megermet. Bahasa Ibrani si ipake bas teks enda eme harus si banci iertiken tekun, rajin ras tajam (cara berpikir). Arah pengertin enda banci si pahami kalak si megermet bas konteks teks enda eme kalak si ngasup rukur alu teneng dingen mbages. Adi bas kamus Karo megermet banci iertiken teliti. Kalak si megermet kerina iidahna alu cara berpikir si positif. I bas erbahan perencanaan kalak si megermet nikapken kerina rencana alu mehuli. I idahna kerina tantangen-tantangen si man alanken guna seh bas tujunna. La ngenca tantangen kalak si megermet pe iidahna kai deba potensi si lit bas ia si banci ipake gelah seh ku bas tujun si niarapkenna. Kalak si megermet bas teks enda i bandingken ras kalak si merudu (tergesa-gesa). Adi si nen teks aslina kata si ipake eme as si banci iertiken berlari cepat, terburu-buru. Bas konteks teks enda kalak si merudu banci iertiken kalak si la rukur alu mbages. Bas erbahan perencanaan la tasak kal carana rukur, la iukurkenna kai tantangen bage pe peluang ras akibat-akibat si banci jadi. Adi kalak si kai pe meter-meter, megati ban terna kai pe tadingen.

Erkiteken si e, maka kalak si bage (erbahan perencanaan alu megermet) melala datna keuntungen. Kai kin keuntungen i bas megermet erbahan perencanaan? Adi pas caranta nikapken perencanaan maka i bas ndalankenca lanai siakap mesera ngelakokenca. Berbeda adi lalit perencanaan, kerina si ilakoken banci jadi dat-dat je. Erkiteken si e banci jadi melala waktu terbuang, melala tenaga keri ras melukah kal jadi dalan turahna perubaten.

PENGKENAINA

GBKP eme gereja si bersifat Presbiterial Sinodal. Salah sada ciri gerejanta eme uga kita erdalan ras-ras guna sada tujun. Tujun gerejanta sicidahken arah visi misi gereja bage pe sasaren pelayanen gerejanta. Rikutken keputusen Sidang Majelis Sinode 2025, maka sasaren pelayanen GBKP 2026-2030 eme ”penguatan fondasi spiritualitas personal berbasis keluarga”. I bas GBP me kerina rencana, strategi dingen langkah-langkah si harus silakoken kerna sasaren pelayanen enda isuratken. Adi si oge GBPnta maka lit piga-piga bagin man ogen-ogenta ras-ras.

1. Sipemana isuratken kerna konteks

GBPnta muncul arah sada penelitian. Bas penelitian enda me megermet e ibutuhken. Uga kita ngasup ngidah kai persoalen  dingen  gegeh  bas  GBKP.  Metode  foresight (mempersiapkan masa depan) ipake guna ngidah hal-hal si mempengaruhi kecibal GBKP kidekah enda. Kenca isimpulken maka dua isu si mbelin pengaruhna bas GBKP eme spiritualitas bage pe kekerabaten (perkade-kaden). Si dua enda me siniarapken jadi pengerak perdalanen pelayanen GBKP ku lebe wari enda. Emaka adi erbahan kegiaten ntah program kita dua hal enda harus teridah arah programnta.

2. Si peduaken i bas GBPnta ibahan pe program-program utama runggun.

Progam utama runggun enda adi rikutken teksta eme perencanaan. Kenca alu megermet kita ngidah persoalenta maka harus ibahan perencanaan si megermet. Adi tahun- tahun sebelumna kita erbahan program nimai arahan moderamen nari ntah pe klasis nari. Adi bas GBPnta si sekali enda program utama Runggun nggo ibahan. Iarapken enda me silang-langna jadi program runggun. E maka i bas penyusunen programnta GBP enda harus jadi acuan gelah ieteh kai saja program utama runggun si harus ilakoken. Peran klasis ras moderamen i bas GBP eme memaksimalken potensina gelah banci program utama runggun tersehi.

3. I bas GBPnta ibahan indikator

Sebagai tujun i bas GBP nggo icidahken rencana dingen target target si man capenta tiap tahunna. Capaian sini maksud eme perubahen bas perpulungen. Adi si nen GBP indikator si pake kita eme kerehen dingen keberhasilen program. Adi bas teks Amsal indikator enda me sinimaksud alu keuntungen. Keuntungen Gereja i bas GBP si ipake dingen ilakoken eme erteremna perpulungen si reh dingen erkiniteken. Program-program si irencanaken pe erdalan kerina alu mehuli. Keuntungen pe adi ngawan perpulungen kenca ngelakoken kerina program si lit ngasup jadi sira ras terang alu encidahken etika moral i tengah kegeluhenna.

DISKUSI :

Rikut GBP 2026-2030 sasaran pelayanenta eme penguatan spiritualitas personal berbasis keluarga. Emaka ibas tahun enda fokusta eme nandai Dibata/relasi dengan Tuhan. Rikutken si e nggo i sepakati maka Runggun erbahan 7 program utama Runggun. Si 7 enda eme :

1. Ibadah rumah tangga
2. Retreat spiritualitas
3. Kelompok doa kecil
4. Pelatihan kepemimpinan rohani
5. Pengembangan liturgi tematik
6. PA dan PJJ berkualitas
7. katekisasi yang menjawab tantangan anak

Arah si 7 enda, siapai ngge si nggo terprogram ibas Runggunta. Kai si banci si bahan guna erbahanca lebih mehuli. Program si apai ka si lenga terlaksana ibas Runggunta, kai solusi gelah banci ilakoken.

USULEN ENDE-ENDEN:

1. KEE GBKP 209: 1-3 Perpulungen Ersadalah
2. KEE GBKP 289: 1-2 Lalap sikataken bujur
3. KEE GBKP 322: 1-3 Sipembarken b’rita si meriah

DAFTAR BACAAN :

• Robert Alter : Wisdom Books: Job, Proverbs, and Ecclesiastes: A Translaton with Commentary, WW Norton & Company
• Moderamen GBKP : Garis besar pelayanan GBKP 2026-2030
• biblehub.com

Pdt. Jefri Alexander Keliat, M.Fil
HP/WA: 081360645511