Tek Nandangi Pengkawali Dibata

Teks       : Mazmur 62: 1-8

Mazmur 62: 1 – 8

Perasaan tenang dekat Allah

62:1 Untuk pemimpin biduan. Menurut: Yedutun. Mazmur Daud. (62-2) Hanya dekat Allah saja aku tenang, dari pada-Nyalah keselamatanku.
62:2 (62-3) Hanya Dialah gunung batuku dan keselamatanku, kota bentengku, aku tidak akan goyah.
62:3 (62-4) Berapa lamakah kamu hendak menyerbu seseorang, hendak meremukkan dia, hai kamu sekalian, seperti terhadap dinding yang miring, terhadap tembok yang hendak roboh?
62:4 (62-5) Mereka hanya bermaksud menghempaskan dia dari kedudukannya yang tinggi; mereka suka kepada dusta; dengan mulutnya mereka memberkati, tetapi dalam hatinya mereka mengutuki. Sela
62:5 (62-6) Hanya pada Allah saja kiranya aku tenang, sebab dari pada-Nyalah harapanku.
62:6 (62-7) Hanya Dialah gunung batuku dan keselamatanku, kota bentengku, aku tidak akan goyah.
62:7 (62-8) Pada Allah ada keselamatanku dan kemuliaanku; gunung batu kekuatanku, tempat perlindunganku ialah Allah.
62:8 (62-9) Percayalah kepada-Nya setiap waktu, hai umat, curahkanlah isi hatimu di hadapan-Nya; Allah ialah tempat perlindungan kita. Sela

Tek man pengkawali Dibata

62:1 Masmur Daud. 

62:2 Alu sinik kutimai Dibata ngkelini aku, sabap man baNa saja ngenca aku ernalem.

62:3 IA ngenca si ngkawali dingen si ngkelini aku, IA penampatku, la ndigan pe aku talu.

62:4 Aku enda enggo buruk desken bide si runtuh; asa kai nari dekahna atendu ngayak-ngayak aku?

62:5 Atendu ndabuhken aku saja ngenca i bas inganku si meganjang nari. Ngena atendu kata la tuhu, i bas biber ngenca kam masu-masu, tapi i bas ukur kam numpahi.

62:6 Alu teneng kutimai Dibata, pengarapenku man baNa saja ngenca.

62:7 IA ngenca si ngkawali aku dingen engkelini aku, IA penampatku, la ndigan pe aku talu.

62:8 IA kap Dibata si ngkelini dingen mereken kemulian bangku, Dibata kap gegehku dingen kecionku.

Tema     : Tek Nandangi Pengkawali Dibata

Tujuan  : Gelah Mamre:

• Nggejapken Dibata tetap erdahin ibas kerina situasi ras kondisi
• Megenggeng i bas nimai perkuah ate Dibata

I. KATA PENARUH

Kegeluhennta i doni enda labo banci erdalan nagi ukurta saja. Lit Rusur reh perbeben dingen persoalan sierbanca mberat dingen gulut ukurta janah banci pe turah kebiaren. Maun-maun turah pengakap maka lanai bo lit singasup nampati kita. Sabab kerina usaha enggo idalanken bage pe kerina gegeh kengasupen enggo ipekeri tapi tetap la teridah serpang pulah. Situasil alap bage-bage saja, reh gulutna, tambah-tambah kearun ate ras bene kedamen ibas pusuh, lanai ngasup tedis, maun-maun ertoto pe lanai ngasup. Erdandanken iderpa erbage persoalen ras kiniseran. Ibas ndalanken kerina enda ula babai geluhta kote ras petetap ukur, tetap bahan simehuli bagepe alaken kerina alu kiniteken man Dibata.

II. URAIAN TEKS

Mazmur 62 banci i sejajarken ras Mazmur 3, sinuriken kerna penggejapen Daud siseh kal belinna tupung ia ibas ngalaken perbeben si mberat. Daud nuriken penggejapen si menam seri, tupung ia kiam sabab iayak-ayak Absalom (anakna) si mberontak man bana. Pemasmur nggejabken maka dirina sangana ngalaken persoalen si seh beratna. La i perimbang ras iserang imbang-imbangna si megegeh ras merawa. Daud nggejabken dirina kote ras lanai ergegeh. Kekotenna e i gambarkenna bali ras bide si enggo buruk, nandangi runtuh (ayat 4)

Pemasmur erpengakap lanai kai pe lit ibas ia, lanai lit inganna tertande (pelindung). Lanai lit arapen ijapa nari pe si jadi pergegeh ras penampatna, lanai lit ise pe si ngasup nampati ia seh maka iakapna si lit ibas dirina pe lanai lit si banci iandalken ras siibanggakenna. Absalom erbahanca Raja Daud arus cebuni ras kiam. Tambah sie reh gulutna ukurna erkiteken si Ahitofel (penasehat milterna) enggo erteman ras Absalom. Ija Ahitofel eme sekalak si penting ibas kemenangen Raja Daud ibas peperangen kidekah enda. Tapi Daud eme sekalak si Istimewa, kinitekenna man Dibata la pernah mugur, kai pe persoalen ras keguluten sinialakenna ia ngasup tetap teneng (ayat 20). Daud pe banci tetap tertunduh alu badeh (Mazmur 3:6). Daud tetap ndatken ketenengen, ija gulut ukurna, aru atena terkendalikenna pusuhna sabab pengarapen ras kinitekenna man Dibata enteguh cikepna. Tek ia maka pasti Dibata mereken penampat man bana ibas paksana (ayat 6-7). Teridah Raja Daud tuhu-tuhu erpengendes alu 100% (bulat kal ukurna) man Dibata janah tek Raja Daud maka Dibata tetap mehuli ras ngkelini ia. La ia erpengendes man kai pe si lit ibas ia, man teman sikidekah enda ras ia. Ieteh Daud maka ndeher dingen ernalem man Dibata erbahanca kerina perbebenna pasti terdungi alu mehuli sabab Dibata ngakawali ras ngekelini kalak si ernalem baNa (ayat3,7). Dibata erdahin alu caraNa guna mereken keterkelinen man kalak si ernalem man gegeh Dibata dingen erbahan Dibata jadi kecion ibas geluhna.

III. PENGKENAINA

Pemazmur ndilo kita gelah njadiken Dibata inganta cicio (bersandar), sabab kalak si rembak ras Dibata ngasup ngalaken perbeben si uga pe beratna.  Man kalak si erpengarapen man Dibata ibas ngalaken perbeben, iberekenNa ketengen ibas pusuhna (ikuasai Dibata pusuhna). PemereNa e la terantusi alu akal, tapi banci tergejab ibas kiniteruken ukur man Dibata. Bagi Pemasmur ndatken kepastin keselamaten sibereken Dibata man bana, bage me arusna kita tetap ernalem ras erpengendes man Dibata saja. Tupung kita erpengarapen man Dibata ras njadiken IA inganta cicio, teklah maka Dibata nampati ras njagai kita segedang geluhta. Adi kita rembak ras Dibata maka labo lit persoalen dingen perbeben si la terdungi. Bagi Raja Daud labo lit kai pe, ntah ise pe si erbahanca bene ketenengenna.

Megati selaku Mamre adi lit perbebenta erkiten keluarga, pendahin ras persoalen kegeluhen, mekatep gegehta ras pemetehta sipake seh maka aru ateta. Bene ketenengen ras kedamen geluh. Bicara melala pe kiniulin Dibata ibas geluhta, tempa-tempa lanai ernanam. Raja Daud jadi usihenta selaku Mamre ibas ngalaken erbage situasi ras kondisi si la bagi ukurta. Gelah ngasup kita ngalakenca, la kita mbiar, la aru ateta, tetaplah megenggeng, ibas paksana si tepat si dat me ketenengen geluh bagepe keriahen dingen kemalemen ate ibas geluhta. Ingetlah perkuah ate Dibata enggo lit, enggo isikapkenNa guna kita. Perkuah ateNa e ngelebihi as akita ngasup ngukurkenca.

DISKUSI

1. Kai nge sierbahanca maka Raja Daud ndatken ketenengen ibas ngalaken perbeben simberat?
2. Kai nge sikurang ntah salah ibas kita maka mekatep la kita teneng adi reh kenca perbeben simberat. Turikenlah rikutken pengalamenndu.

Usulen Lagu

• KEE GBKP No. 202: 1, 5
• KEE GBKP No. 200: 1,2
• KEE GBKP No. 320: 1,2
• KEE GBKP No. 305: 1- (persembahen)

Pdt. F. Makarios Sinupayung
HP: 0821 6324 2051