ERGUNA KAP TEMAN MAN BANGKU

Pilemon 1:11-16

1:11 dahulu memang dia tidak berguna bagimu, tetapi sekarang sangat berguna baik bagimu maupun bagiku. 1:12 Dia kusuruh kembali kepadamu dia, yaitu buah hatiku.
1:13 Sebenarnya aku mau menahan dia di sini sebagai gantimu untuk melayani aku selama aku dipenjarakan karena Injil,
1:14 tetapi tanpa persetujuanmu, aku tidak mau berbuat sesuatu, supaya yang baik itu jangan engkau lakukan seolah-olah dengan paksa, melainkan dengan sukarela.
1:15 Sebab mungkin karena itulah dia dipisahkan sejenak dari padamu, supaya engkau dapat menerimanya untuk selama-lamanya,
1:16 bukan lagi sebagai hamba, melainkan lebih dari pada hamba, yaitu sebagai saudara yang kekasih, bagiku sudah demikian, apalagi bagimu, baik secara manusia maupun di dalam Tuhan.

1:11 Nai la ia erguna man bandu, tapi genduari erguna ia labo saja man bandu tapi man bangku pe.

1:12 Buah ateku si kukelengi enda, genduari kusuruh mulihken man bandu.
1:13 Si tuhuna ateku min i jenda nge ia ras aku, kidekah aku i bas penjara erkiteken Berita Si Meriah, gelah banci ia jadi gancihndu nampati aku.
1:14 Tapi la ateku kupaksaken kam nampati aku; ateku min si e ibahanndu alu ukur meriah. Alu bage la aku nggit erbahan kai pe adi la leben isetujuindu.

1:15 Banci jadi si Erguna sirang ras kam kentisik gelah banci ia ras kam rasa lalap.
1:16 Genduari lanai bo ia budak ngenca, tapi ndauh ganjangen asangken sekalak budak. Ia me seninandu si meherga i bas Kristus. Keleng ateku ia, tentu lebihen ka pe kekelengenndu man bana, subuk selaku manusia bage pe i bas Tuhan.

(Kekerabatan)

MODEL PJJ: BUDAYA

I. KATA PERLEBE

Selaku perpulungen Tuhan, kita erlajar mereken kesempaten man temanta si deban guna muat bagin bas ndahiken dahin si mehuli. Sabab situhuna kerina kita lit nge potensinta/kiniliten sekalak-sekalak bas dahin si mehuli e. Erlajar kita bagi Paulus ngenehensa alu payo potensi si lit bas si Erguna aminna ia sekalak budak nge ngenca. Ula mis lit min perukurenta, “kai ka kin banci bahanna, adi ia pe bagah kal ngenca?” Lenga tentu, banci saja lit nge kelebihenna si erguna ka man banta. Si terpenting lebe nggit kita ngaloken temanta e janah mereken kesempaten man bana guna ikut muat bagin bas dahin-dahin si mehuli.

II. ISI

Kai pe statusna, kai pe sekolahna, kai pe pangkatna si tuhuna lit nge gunana man banta. Terlebih ka kita i bas sada perpulungen, si lit hubungen perkade-kadenta, si nggeluh i bas keleng ate Tuhan pastina erguna kal teman e man banta. Mekatep la si sedari si e, seh maka tempa la lit si akap gunana erteman erbahansa kurang siergaken teman e bas kegeluhenta. E maka arah PJJnta sekalenda iajuk me kita guna banci ngergaken temanta, kalak si deban si i sekelewetta si ijinken Tuhan reh bas kegeluhenta.

Teks renungen PJJ nta i bas Minggu enda salah sada surat Rasul Paulus si ituliskenna tupung bas penjara. Surat enda isehken man Pilemon, ia sekalak ngawan perpulungen i Kolose si seh kal atena kelengna perpulungen Tuhan seh maka rumahna pe ijadiken ingan pulung perpulungen (Pilemon 1:2). Lit sekalak budakna si Erguna (Onesimus) gelarna. Kemungkinen si Erguna enda lawes nadingken Kolose erkiteken ia enggo ersalah, entah enggo rutang nandangi tuanna, Pilemon (ay. 18). E maka lawes ia, jumpa ras Paulus I penjara. Sanga jumpa i penjara enda me Paulus mabai ras ngajari si Erguna enda ku bas kegeluhen si mehuli, seh maka Paulus pe enggo ngakuken man Pilemon maka si Erguna e enggo jadi anakna (ay. 10). Ertina enda nuduhken maka si Erguna enggo ncidahken perubahen geluh ku si mehuli. Ijenda Paulus nuriken kerna perubahen si lit bas diri si Erguna, adi nai la ia erguna man Pilemon tapi genduari erguna nge ia, erguna ka pe man Paulus (ay. 11). E maka bas konteks si enda me Paulus nehken pemindon man Pilemon guna ngaloken si Erguna si isuruhna mulihken ku Kolose (ay. 12). I bas pemindon si isehken Paulus enda tersirat ka pengajaren man Pilemon maka si enggo jadi situhuna gelah mpekena hubungenna ras si Erguna, segelah si Erguna e banci jadi temanna ngelai perpulungen i Kolose (ay. 15). Ngarap kal Paulus segelah Pilemon la terjeng ngaloken si Erguna mulihken selaku budak tapi lebihen asangken si e, jadi senina si meherga i bas Kristus. Ija ituriken Paulus maka keleng atena si Erguna janah tek kal ia maka Pilemon pe keleng ka nge atena si Erguna enda subuk selaku teman manusia bagepe selaku perpulungen Tuhan (ay. 16).

III. PENGKENAINA

Arus sisedari maka kalak sideban e pe lit nge kelebihenna, bas bidang-bidang tertentu banci saja liten bas ia kengasupen e. Ijenda me perlu biak si la mecimberu entah pe erbanding-banding kita i bas kelebihen-kelebihen temanta ndai. Ia pe lit kelebihenna, kita pe lit nge kelebihenta sekalak-sekalak. I bas si e ngasup min kita ngalokenca terlebih ngakukenca kelebihen-kelebihen kalak si deban seh maka la turah persaingen si la sehat sapih-sapih kita.

Paulus i bas ndahiken dahin pebelangken Berita Si Meriah labo si sada. Tuhu igejapkenna maka labo ngasup adi si sada ia ndahiken dahin e, e maka iikutkenna me Silas, Timotius, Titus seh Pilemon jine pe jadi temanna guna ngelai perpulungen Tuhan si enggo mbue ras reh teremna bas erbage-bage ingan. Kinatana kita pe bage nge, labo kita ngasup ndahiken dahin e si sada. Selain terbatas gegehta, terbatas waktunta, banci jadi bas dahin tertentu terbatas ka nge kebeluhen ras kinilitenta. Akukenlah maka ije kita me perlu nandangi kalak s deban guna jadi temanta ndahiken dahin si mehuli e, bagi dahin pelayanen bas perpulungenta. Bagi sada batang purih, adi sada ngenca labo terdungi dahin napui kesain rumah, tapi adi reh buena batang purih ndai seh maka iiket meteguh jadi sada banci lebih menukah ndungisa dahin napui kesain ndai.

Kedungenna si ingetlah maka selaku perpulungen GBKP lit visi si perlu tersehi e me: “Menjadi Kawan Sekerja Allah untuk Menyatakan Rahmat Allah kepada Dunia”. Guna tersehi visi enda ndai maka iaturken tata nilai e me prinsip-prinsip geluh si erpalasken Kata Dibata sijadiken jadi sinumpak-numpak, simaba ngaruh ras sinuriken kai si perlu ilakoken ras uga ngelakokenca selaku gereja. Tata nilai enda me si erguna mabai kita selaku warga gereja i bas ndalani ras muat keputusen-keputusen bas kegeluhenta. Bas gerejanta enggo ipilih lima tata nilai Kristiani si niarapken cocok ras masa sigundari guna terus idalanken jadi sada kebiasaan nggeluh, salah sadana e me kekerabatan/perkade-kaden. Iarapken maka selaku warga gereja, kita pe terbuka entah ngasup guna ngaloken kalak si deban i bas kerjasama segelah jadi sada pendahin si erguna bas tengah-tengah kegeluhenta. Sikap terbuka entah nggit ngaloken kalak sideban guna ras-ras kita erdahin e teridah min arah kita sisampat-sampaten, saling ngergaken pendahin sapih-sapih kita aminna pelain-lain gia bidang keahlianta. Tentuna segelah kerina e njadiken kegeluhenta jadi mehuli.

IV. DISKUSI

1. Erpalasken teks Pilemon 1:11-16, kai nge sierbahanca maka Rasul Paulus nuruh Pilemon gelah ialokenna Onesimus (Erguna) jadi seninana i bas Kristus?
2. Kai nge si erbahanca maka megati denga mesera menjalin kerja sama subuk i perpulungen, gereja ras masyarakat? Turiken!

V. USULEN ENDE-ENDEN

1. KEE GBKP No. 278:1,3
2. KEE GBKP No. 209:1,5
3. KEE GBKP No. 315:1,4
4. KEE GBKP No. 381:1-2

DAFTAR BACAAN :

Pdt. Andinata Ginting, S.Si (Teol)
HP/WA: 081391459999