BIMBINGAN PA MAMRE 31 AGUSTUS – 06 SEPTEMBER 2025

Nginget Perkuah Ate Dibata

Teks       : 1 Kronika 29: 13-14

1 Tawarikh 29:13-14

29:13 Sekarang, ya Allah kami, kami bersyukur kepada-Mu dan memuji nama-Mu yang agung itu.
29:14 Sebab siapakah aku ini dan siapakah bangsaku, sehingga kami mampu memberikan persembahan sukarela seperti ini? Sebab dari pada-Mulah segala-galanya dan dari tangan-Mu sendirilah persembahan yang kami berikan kepada-Mu

29:13 Genduari O Dibata kami, ikataken kami bujur man baNdu dingen ipuji kami gelarNdu si Mulia!
29:14 Sabap bangsangku ras aku tuhu-tuhu la ngasup

Tema     : Nginget Perkuah Ate Dibata

Tujuan  : Gelah Mamre:

  • Meteh maka nehken persembahen eme tanggung jawab nginget perkuah ate Dibata simereken sinasa lit man manusia.
  • Nggit mereken persembahen sebage pengataken bujurna man Dibata.

I. KATA PENARUH

Mereken persembahen e me kap sada bentuk cara nggeluh selaku kalak Kristen. Tangtangna nari manusia enggo ibereken pengajaren kerna mereken persembahen sebage tanda pengataken bujur bagepe kesetian man Dibata. Tapi arah si e kerina, si jadi penungkunen engkai maka persembahen e seh kal pentingna? Kai nge erti mereken persembahen?

Lit sada cerita kerna sekalak anak si mindo sen man bapana guna nukur kado ulang tahun bapana e. Sen e ipakekenna guna nukur kado bage pe sen e rehna arah bapana nari. Tapi bapa anak e labo ngenen janari rehna sen e, tapi bapana e ngenen kekelengen bagepe sura-sura si mehuli arah anakna. Bage me i bas mere man Tuhan, kita ngulihken si enggo ibereken Tuhan man banta. Tuhan ngenen ukur si tutus labo arah buena ras erga persembahen.

Tema PA Mamre minggu enda, ngajuk kita kerina guna “Nginget Perkuah Ate Dibata” man banta kerina anak-anakNa terkhusus nandangi Mamre. Uga caranta banci nginget Perkuah ate-Na e? mari terbagesen si orati kataNa arah kitab 1 Kronika 29: 13-14.

II. URAIAN TEKS

1 Kronika 29: 13-14, nats enda e mekap bagin toto pengataken bujur Daud paksa ia bage pe bangsa Israel mpepulung persembahen guna majekken rumah pertoton. Ijenda banci si idah maka Daud menaken pertotonna alu ngataken bujur bage pe muji Tuhan. Ia sadar maka kerina si lit i bas ia ras bangsana, bage pe kengasupen guna nehken persembahen rehna i bas Tuhan nari. I bas ayat enda, Daud ngakuken maka Dibata kap si erdolat i bas kerina si nasa lit. Kata enda ngajari kerna persembahen e mekap pengakun kerna kerina si lit i bas manusia Dibata si madasa. Kai saja pe si ibereken man Tuhan si tuhuna kerina rehna arah Dibata nari.

Adi terbagesen si perdiateken, Daud ngelanjutken pertotonna alu kiniteruken ukurna, nina “sabab bangsaku ras aku aku tuhu-tuhu la ngasup mere man banNdu, sabab kerina ialoken kami i bas kam nari nge (ay.14 a,b)”. Daud sedar maka ia ras bangsana ngasup mere labo erkiteken gegeh ntah kinibayakenna, tapi pelin-pelin erkiteken lias ate bas Tuhan nari. Enda mpersingeti kita segelah ula sombong ntah pe “merasa berjasa” paksa mere man Tuhan. Sebalikna, arus mere alu kiniteruken ukur, sedar, maka si lit i bas kita kentisik ngenca tading bas kita.

Seterusnna, paksa Daud mpepulung persembahen guna rumah pertoton, ia kerina ngelakokenca dem keriahen ukur. Daud bage pe bangsa Israel ngidah maka enda jadi kesempaten ngataken bujur bage pe kesetian man Tuhan. Bage me nandangi Mamre, persembahen e arus sibereken arah ukur si bujur, labo bagi terpaksa. Mere e mekap kesempaten ikut muat bagin i bas dahin Tuhan ras nehken keleng ate man baNa.

Pengalamen Rohani Daud ras Dibata, mabai Daud ngasup nggejapken uga belinna keleng ate Dibata nandangi dirina, seh maka Daud ngasup mereken sikerajangen Dibata alu dem keriahen ukur.

Bagi si eteh kerna persembahen i tengah-tengah GBKP, Gereja idilo i bas gelap ku bas terang kemuliaan Kristus guna ndalanken Tri Tugas Gereja. Gereja idilo guna pembarken Berita Si Meriah gelah kata Dibata arah dahin si mbelin enda banci ilakoken Gereja. Persadaan bage pe pelayanen e mekap gegeh gereja guna ngelitken Kinirajan Dibata si tangkas i bas kegeluhen perpulungen. GBKP mereken pengajaren man perpulungen guna mereken persembahen arah kebaktin-kebaktin perpulungen jabu-jabu, PA Kategorial, KAKR, Kebaktin Minggu, Katekisasi, ras sidebanna. Tema-tema persembahen jadi topik si terus tetap iajarken GBKP arah serayan Tuhan man perpulungen segelah banci “berkomitmen” ngaturken pemere Dibata. Seh maka la ijadiken milik pribadi tapi turah arah kiniteken maka erta bage pe kegeluhen pemere Dibata kap. Sistem guna menata kelola keuangen bas GBKP enggo iatur i bas Tata Gereja Bab XLII bagepe ilakoken bas wilayah pelayanen masing-masing. Aturan si tetap arus i lakoken guna ipatuhi secara serentak bas kerina wilayah pelayanen amin pe bas kinatana melala denga kal Majelis Runggun si memikirken kebutuhen internalna tanpa mperdiateken secara utuh terdauhen kerna kebutuhen bas GBKP enda. Gereja la ianjurken rukur secara sektoral saja, tapi arus ngukuri “menyeluruh” gelah si megegeh nampati si kurang megegeh, bage pe si kurang megegeh arus keke jadi megegeh. Penggunan sen si ipersembahken guna pelayanen, Kesaksin, Persadan ras penunjang pelayanen Gereja guna kemulian gelar Tuhan. Enda pe jadi salah sada tugas tanggung jabab Mamre GBKP “Mamre Erdiate, Mamre Erpemere”.

III. PENGKENAINA

Persembahen i bas konteks Kristen labo terjeng mere secara materi, tapi jadi bagin integral hubungen manusia ras Dibata, ngkenai aspek kebaktin, pengataken bujur, pengorbanen ras kiniteken. Cuba sibayangken, lit sekalak anak si kitik denga alu dem keleng atena menggambar sada gambar si sederhana man orangtuana. Gambarna mungkin saja la sempurna, warnana banci saja ndarat arah garis gambar e nari, tapi gambar e idahiken alu meriah ukur si tutus ras kiniriahen ukur. Sanga anak e ncidahken gambar e man orangtuana, si gejapken orangtuana labo kualitas gambar e, tapi uga kerna kekelengen si tuhu-tuhu arah anakna e.

Bage ka pe kerna persembahen man Dibata, bali bagi gambar anak kitik ndai. Kai si ibereken mungkin labo sempurna, labo mbelin jumlah/nilaina adi ibandingken arah kinibayaken Dibata si la terbatas, tapi si pentingna kal ilebe-lebe Dibata e mekap ukur si tutus, keriahen ukur i bas nehken persembahen e. Uga carana segelah banci kita nehken persembahen alu tutus bagepe ukur si meriah? Emekap alu “NGINGET PERKUAH ATE DIBATA” bas kegeluhenta seh paksa enda.

Man banta ituriken pe maka persembahen e mekap tanggungjababta kerna uga Dibata mereken kengasupen, kepentaren bage pe pasu-pasuNa banta. Gereja selaku si ngaloken persembahen arus makekenca alu pentar ras ertanggungjabab. Ipakeken guna mpembarken Berita Si Meriah, majekken Kinirajan Dibata bas doni enda bage pe mereken kemalemen ate man sekelewetna. Persembahen labo kewajiben, tapi salah sada bentuk kinihamaten.

Kalak si nggejapken perkuah ate Dibata ngataken bujur man Dibata, alu cara ikut muat bagin i bas mereken persembahen si jadi si kerajangen Dibata. Mere alu ukur meriah, mere sue ras pasu-pasu si ialoken idur Dibata nari.

“Banyak orang yang meningkatkan standart of living (standar hidupnya), akan tetapi dengan cara menurunkan standart of givingnya (standar memberinya). Ingat, Allah yang menentukan standart of living dan anda yang menentukan standart of giving. Mari kita lakukan bagian kita dan biarlah Allah melakukan bagianNya”. -Winston Churchill-

DISKUSI

  1. Mari si bentuk 2-3 kelompok guna niksiki uga kin sedekah enda kesadaren Mamre i bas mereken persembahen man Tuhan? Turiken hasil diskusi kelompok.
  2. Bahanlah aksi bas kelompok masing-masing i bas mereken Persembahen pengataken bujur Tuhan guna erdiakonia, ermarturia, bagepe erkoinonia. Pilih salah sada ibas Tri Tugas Gereja enda janah dahikenlah dahin e.

Usulen Lagu

  • KEE GBKP No. 372
  • KEE GBKP No. 215
  • KEE GBKP No. 333
  • KEE GBKP No. 203

Pdt. Soni Petrus Sembiring, M.Div.
HP: 0812 7477 4110