Pengikut Kristus Sejati

Teks       : 2 Timotius 2: 1-6

2 Timotius 2: 1 – 6

Panggilan untuk ikut menderita

2:1 Sebab itu, hai anakku, jadilah kuat oleh kasih karunia dalam Kristus Yesus. 2:2 Apa yang telah engkau dengar dari padaku di depan banyak saksi, percayakanlah itu kepada orang-orang yang dapat dipercayai, yang juga cakap mengajar orang lain. 2:3 Ikutlah menderita sebagai seorang prajurit yang baik dari Kristus Yesus. 2:4 Seorang prajurit yang sedang berjuang tidak memusingkan dirinya dengan soal-soal penghidupannya, supaya dengan demikian ia berkenan kepada komandannya. 2:5 Seorang olahragawan hanya dapat memperoleh mahkota sebagai juara, apabila ia bertanding menurut peraturan-peraturan olahraga. 2:6 Seorang petani yang bekerja keras haruslah yang pertama menikmati hasil usahanya.

Laskar Kristus si tutus

2:1 Tapi kam, o anakku, lias ate Dibatalah mpegegehi kam, si enggo jadi sikerajangenta erkiteken persadanta ras Kristus Jesus. 

2:2 Kai si enggo ibegindu i bas aku nari i lebe-lebe nterem saksi, endeskenlah man kalak si ertanggung jabab, si ngasup ngajarkenca ka man kalak si deban.

2:3 Ikutlah kam i bas ngenanami kiniseran jadi laskar Kristus Jesus si tutus. 

4 Sekalak laskar si sangana ertugas la icampurina urusen kegeluhen si deban gelah ngena ate komendanna. 

2:5 Sekalak si ikut i bas perlumban labo banci menang adi la kin patuh nandangi peraturen-peraturen si lit i bas perlumban e. 

2:6 Sekalak perjuma si enggo latih erdahin arus ndat bagin si pemena i bas ulih jumana nari.

Tema     : Pengikut Kristus Sejati

Tujuan  : Gelah Mamre:

• Ngasup jadi pengikut Kristus sejati
• Ngasup tetap setia nggeluh bagi si ngena ate Tuhan.

I. KATA PENARUH

Menurut Kamus besar Bahasa Indonesia (KBBI) kata “sejati” ertina: tulen, asli, murni, tidak pancung, tidak ada campurannya. Ibas Kamus Global, sejati ertina: bersih; tulen; sungguh-sungguh; iklas. Pria sejati adalah istilah untuk pria yang memiliki karakter baik, bertanggung jawab, dan memiliki sikap kuat, mandiri, serta kemampuan untuk memimpin dan mengambil keputusan yang tepat (menurut KBBI). Menurut Alkitab, seorang pria sejati adalah pria yang mampu bertanggung jawab sebagai suami dan ayah dalam keluarganya. Pria sejati juga dianggap memiliki karakter yang baik, sikap yang kuat, mandiri dan mampu memimpin serta mengambil keputusan yang tepat.

Arah definisi i datas banci ikataken maka jadi pengikut Kristus sejati ertina selaku pengikut Kristus ertanggungjawab nandangi siikutkenna, teridah biak simehuli, megegeh, mandiri, ngasup mimpin, ras erbahan keputusen si tepat. Jadi pengikut Kristus sejati tuhu-tuhu meriah ras malem kal ate, ibas sienda tentu alu sedar, enda me sinisuraken kerina Mamre. Emaka guna seh ku je, mari kita erlajar arah kitab 2 Timotius sijadi bahan PA-nta minggu enda.

II. URAIAN TEKS

Surat Rasul Paulus si peduaken man Timotius isuratkenna tupung ia ipenjaraken sipeduakaliken i Roma. Penjara sipeduakaliken enda inganna i teruh taneh. I jenda me Rasul Paulus nimai paksana ndigan ia iukum mate. Tuhu-tuhu mberat kal siniseranna, piga-piga temanna ngelai ndube lawes nundalken ia bagi Pigelus ras Hermogenes (1:15). Rasul Paulus tuhu-tuhu sedar kai sierhanca kerina e jadi, e me kap erdandanken pembarken Berita Si Mehuli, ia igariken. Emaka nina “Kata Dibata labo tergariken” (2:9). Rasul Paulus sedar maka pelayanenna enggo ndeher ku ujungna. Ietehna pe maka kematenna nggo ndeher. Amin bage gia, tetap ilakokenna si mehuli, erguna ras positip. Arah suratna iajarkenna anak pertendinna eme Timotius si ngelai i Efesus (1:18). Iajukna, ijembana Timotius gelah tetap ukur ibas ndahiken dahin pelayanen. Sekalak suruh-suruhen Tuhan ngasup tetap ngelai alu tutus erkiteken lias ate Dibata ibas persadanna ras Kristus Jesus (ayat 1).

Timotius nguda denga tapi arus ia ngadapi pengajar papak si melala erbahan permusuhen nandangi ia, tapi lit nge lalap ijumpai Timotius kalak si mehuli dingen ertanggungjabab man bana. Kalak si bage me siidarami Timotius guna mpeseh Berita Si Mehuli si tuhu-tuhu, jenari kalak enda ka me ngajarkenca ka ku kalak si deban (ayat 2). Rasul Paulus ndilo Timotius gelah ikut i bas ngenanami kiniseran jadi Laskar Kristus Jesus si tutus. Sarat jadi laskar (pengikut kristus) eme mersan kayu pesilang. Mersan kayu persilang ertina maba, ngenanami kiniseran (ayat 3). Laskar Kristus si tutus nggeluh megenggeng. Kerna si enda Rasul Paulus mereken 3 ilustrasi:

1. Laskar Jine. Ibas jamanna Rasul Paulus ngidah sekalak laskar erperang alu mesangat. Laskar nggit ras mereken diri guna berkorban. Laskar tahan ngalaken kiniseran si mberat. Bage me Timotius selaku laskar Kristus pe arus erjuang alu keras dingen tahan ngalaken kiniseran.
2. Ibas jamanna, sekalak si ikut erlumba arus matuhi peraturen si lit maka banci ikut tanding. Umpamana, sope reh pertandingen, arus ngikuti pemusatan latihen piga-piga paksa dekahna. Ise si la ikut bas pemusaten latihen enda, la banci ikut erlumba. Adi la ikut erlumba nggo pasti labo banci menang. Emaka sekalak si ikut erlumba arus disiplin ras komitmen.
3. Perjuma eme sekalak si erbintuas. Erbintuas e arus, la tergantiken. Erjuma dahin si mberat dingen pe disiplin. Adi la panasen la lit peranin. La lit peranin nggo pasti la lit keriahen bagepe si man pangan, si man bagiken. Ija curcur panas, ije pasti lit peranin si mereken keriahen. Emaka perjuma si nggo erbintuas me sipemena ndat bagin ibas ulih jumana nari (ayat 4-6). Teluna ilustrasi enda ngataken maka pengikut Kristus sejati eme si nggit berkorban, disiplin dingen erdahin alu tutus ras erbintuas.

III. PENGKENAINA

Temanta “Pengikut Kristus Sejati”. Pengikut Kristus sejati la tergejeng kata belas-belas, yel-yel ras slogan ngenca man Mamre. Pengikut Kristus sejati teridah arah perbahanen. Mamre setia ngikutken Tuhan Jesus. Kesetian Mamre man Tuhan teridah arah kesetian man ndehara, man anak-anak ras setia ibas dahin pelayanen, mehuli ibas ncari. Selaku pengikut Kristus sejati teridah arah nggit berkorban. La nggit ndarami korban ras ngorbanken kalak. Pengikut Kristus sejati teridah arah nggelem tekat, komitmen guna ndatken tekat, komitmen guna ndatken kiniulin. Setia nandangi padan siibelasken.

Mamre sejati eme Mamre si terteki dingen nggeluh ertanggungjabab. Mamre sejati la saluarna ngenca kundulina tapi terlebih kata ras padanna. Pengikut Kristus sejati teridah arah nggit erdahin alu erbintuas. Dahikenna dahin, usahana alu tutus. Mela ia adi jabuna nggeluh kekurangen dingen jadi beban dingen surindam man kalak si deban, Erdahin ia alu erbintuas gelah lit tahan turuna dingen arah kinilitenna banci ia nampati man kalak si perlu penampat. Kerina kalak si tek man Tuhan dingen nggeluh ibas kinitekenna ema Laskar Kristus. Pindo man Tuhan gelah iberekenNa lias ateNa gelah lit ras megegeh dingen paguh jiwa militansita. (militan artinya bersemangat tinggi, penuh gairah, berhaluan keras, dan penuh pengabdian, tangguhan dalam berjuang, menghadapi kesulitan dan berperang).

Lias ate Tuhan jadi gegeh ras si mpengasup kita nggeluh militant ngadapi kerina kecibal si lit. Ola si manjaken dirinta, ola bere kesempaten kiniseran naluken kita. Latih, ajari babai dirinta ras pertendinta gelah daya juangta (fighting spirit) la medate ras merampek bagi kerupuk (bdk. 1 Timotius 4:8). Tetap rukur kerna asil, la gelah enggo saja. Bagi sekalak laskar katawari pe “siap” nina man atasenna, bagelah min ninta pe man Tuhan Jesus Kristus selaku Kepalanta, Tuhanta. Sekalak laskar rusaha gelah kepalana senang dingen ndatken pujin. Bage me pe selaku Mamre Laskar Kristus si sejati. Usahakenlah, gelah terpuji ras ermulia Kristus arah geluhta. Lawanlah sura-sura kedagingen ras keakunta.

DISKUSI

1. Kai-kai saja rungga si ngolangi kita jadi pengikut Kristus sejati erpalasken ogenta?
2. Ban cara, tahapen-tahapen, guna ngasup jadi pengikut Kristus sejati?

Usulen Lagu

• KEE GBKP No. 102: 1,3
• KEE GBKP No. 299: 1,3
• KEE GBKP No. 202: 1,4
• KEE GBKP No. 302: 1- (persembahen)

Pdt. Juris Tarigan, M.Th.

HP: 0813 1687 9945