Bahan PJJ 7-13 September 2025

September 8, 2025 Writer-1 Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem 0

MALEM ATE NGIKUTKEN UNDANG-UNDANG TUHAN

Masmur 119:1-7

(Tata Gereja GBKP)

Bahagianya orang yang hidup menurut Taurat TUHAN

119:1 Berbahagialah orang-orang yang hidupnya tidak bercela, yang hidup menurut Taurat TUHAN. 119:2 Berbahagialah orang-orang yang memegang peringatan-peringatan-Nya, yang mencari Dia dengan segenap hati, 119:3 yang juga tidak melakukan kejahatan, tetapi yang hidup menurut jalan-jalan yang ditunjukkan-Nya. 119:4 Engkau sendiri telah menyampaikan titah-titah-Mu, supaya dipegang dengan sungguh-sungguh. 119:5 Sekiranya hidupku tentu untuk berpegang pada ketetapan-Mu! 119:6 Maka aku tidak akan mendapat malu, apabila aku mengamat-amati segala perintah-Mu. 119:7 Aku akan bersyukur kepada-Mu dengan hati jujur, apabila aku belajar hukum-hukum-Mu yang adil.

MODEL PJJ: PARTISIPATIF

 

KATA PERLEBE :

Melala kal jelma bas doni enda ersura-sura gelah geluhna ratur ras mehuli. La sitik kalak si alu ketat ras disiplin encubaken erbahan pengaturen waktu kegeluhenna, netapken waktu-waktu si tertulis ras sidebanna. Tapi megati beda kai si enggo itulisken ras kinatana. Enda dungna banci maba kekecewan nggeluh ras perasaan bersalah. E maka kepeken labo jadwal tertulis si terpenting, tapi kesedaren diri meherga i lebe-lebe Dibata nge si banci mabai kita nggeluh mpergunaken waktu-waktu si lit alu pentar ras bijaksana.

 

ISI :

Kitab Masmur itulis Daud ras piga-piga penulis sideban. Tema kitab Masmur e me “Toto ras Pujin”. Penulisen kitab enda kira-kira abad ke-10 seh ke-5 SM. Tujun Kitab Masmur e me guna nuriken isi pusuh manusia si mbagesna i bas hubungenna ras Dibata. Kata perentah-perentahNa i bas Masmur 119:2, enda nuriken  kerna Dibata si mereken perentah sekaligus si empuna kata e. Kata Mitzvotav (Heber) artina perintah, keadilan/hukum,. I bas kalak Jahudi istilah perentahNa e me sada instruksi i bas Torat ntah Alkitab Heber si arus iikutken kalak Jahudi. Perentah e erkuasa ras erdolat. Adi e idalanken idat me aturen  nggeluh ras ketetapen si mabai nggeluh i bas sura-sura Dibata: “Adi kerina perentahNdu kuperdiateken, e maka la aku ijuruken” (Masmur 119 : 6).

Bahan Perpulungen Jabu-Jabunta minggu enda nuriken kerna uga malemna ate kalak si encidahken kegeluhen si patuh nandangi Undang-Undang Tuhan. Kalak si bage, ugapa pe kegeluhenna:

  1. La erpandangen, sabab sura-sura Tuhan me si icidahkenna
  2. Ndarami Tuhan alu bulat ukur bas geluhna, lalit ingan penalemen sideban
  3. Erdalan ia i bas dalan TUHAN, la pernah ia erbahan kesalahen
  4. Patuh ndalanken Undang-Undang si ibereken Tuhan alu bulat ukurna
  5. Tutus kal i bas ndalanken peraturen-peraturen Tuhan, e maka ratur geluhna
  6. Mperdiateken perentah-perentah Tuhan, e maka la ia njuruken
  7. Muji Tuhan alu ukur si bersih, la lit sitik pe biak la mehuli (dosa) bas ukurna.

Tuhu me kata pemasmur enda. Malem kal ate adi nggeluh ngikutken Undang-Undang Tuhan bagi nina tema PJJnta minggu enda. Undang-undang Tuhan e mabai kita ku bas kiniraturen nggeluh.

Tandana keleng ateta Undang-Undang Tuhan e me alu sisikapken bas kegeluhenta guna ngogesa bagepe ngukuri undang-undang Tuhan suari ras berngi, janah pe ndalankenca. Adi enggo sidalanken Undang-Undang Tuhan, la banci lang, si dat me kepentaren. Ngasup me kita nilahi si jahat sabab enggo si eteh kebenaren, janah ciga me ateta  nandangi kata si la tuhu.

I bas GBKP lit Tata Gereja si jadi Undang-Undang guna kiniraturen perdalinen  pelayanen gereja. Tata Gereja enda perlu kal isosialisasiken ku kerina ngawan perpulungen, perlu rusur ioge, ipekusur-kusur i bas pusuh, idalanken itengah-tengah runggun, gelah teridah kiniteken si dewasa. Tata Gereja GBKP isina e me pengangkanta selaku ngawan perpulungen GBKP kerna identitasta ras pe kerna pendilo Dibata man banta si teridah arah kesaksin nggeluh si nyata i bas ergereja (penatakelolaan gereja). Tata Gereja e me norma hidup ntah pe standard etika si mabai kita nggeluh alu nandai kerna dirinta ras arah e pe kita itandai kalak si deban (biak nggeluh kalak si enggo ngaloken keselamaten i bas Tuhan Jesus Kristus). Ulih ndalanken Tata Gereja ugapa pe sinanami si entebu erkiteken ratur kegeluhenta kerina selaku ngawan perpulungen. Ersada perarih kerina pandita, pertua, diaken, pandita pensiun/emeritus, pertua ras diaken emeritus, pengurus persekutuan kategorial, pengurus PJJ, panitia-panitia, tim-tim ras seksi, bagepe kerina ngawan perpulungen. Alu bage teridah kal kita kerina aron Dibata, la sitik pe ateta nilah arah sura-sura Dibata si mada kegeluhen ras dahin si man dahinkenta. IperlengkapiNa pe kita kerina la erndobahen alu gegeh ras kengasupen guna erdahin bagi sura-suraNa.

Subuk Pustaka Si Badia, Tata Gereja ntah pe peraturen-peraturen si debanna si enggo jadi kesepakaten ntah pe jadwal-jadwal si enggo sibahan mabai kita nggeluh ratur, labo lit gunana adi labo teridah bas kebiasan geluhta. Esekiel 36: 27 ngataken “KesahKu Kutamaken i bas pusuhndu, janah tetap Kuperdiateken maka ikutkenndu undang-undangKu, janah patuh man perentah si Kubereken man bandu. Kesah Si Badia jine enggo ibereken Tuhan man banta mabai perukuren ras sura-suranta ngasup ngikutken Undang-UndangNa. E maka kita perlu mpesikap waktu si khusus ope denga ndahiken dahinta i bas tiap erpagi-pagi ntah berngi, guna megiken sura-sura Tuhan i bas geluhta.

 

PENGKENAINA :

Jabu-jabunta perlu metenget nandangi situasi si gundari. Kesibuken si lanai kal lang-lang buena, bagepe perubahen-perubahen zaman enda si seh kal meterna ngajuk kita guna tetap ernalem nandangi undang-undang Tuhan. Perlu kita kerina metenget. Ula kal kita la erpalas rukur ras erdahin bagepe ngerana. Mesukah kal kita ibabai kalak papak adi kita pe la erpemeteh, termasuk anak-anakta kerina. E maka sipastikenlah gelah seisi jabunta:

  1. Ngangkai sura-sura Dibata arah tutus ngoge Pustaka Si Badia. Arah kita ngoge Pustaka Si Badia terbuka perukurenta sabab Kesah Si Badia erdahin arah kita megiken Kata Dibata. E maka banci turah pengangkan-pengangkaan si erbahanca kita megegeh ngalaken erbage-bage tantangen geluh bas zaman enda. Sisikapkenlah waktu pribadi ras keluarga guna si e, ula sura-sura ngenca lit.
  2. Ertotolah tetap man Dibata alu tutus, sabab i bas paksa ertoto melala kal banci si begi sura-sura Tuhan nandangi kegeluhenta. Arah ertoto pe Kesah Si Badia nampati kita nuriken kerna kecibal kegeluhenta (Roma 8:26-27).

Tata Gereja e me pedoman kegeluhen perpulungenta si enggo sicakapken dingen siputusken ras-ras. Siogelah Tata Gereja GBKP, i je si eteh uga kin kita arusna selaku ngawan perpulungen ras serayan Tuhan. Alu bage maka pengangkanta mabai kita kerina nggeluh alu ratur ras ndauh min kita i bas ukur serap-serap. Tata Gereja labo buku hukum tapi Undang-Undang si mabai kita nggeluh mehuli ras encidahken kesaksin selaku kalak si enggo iselamatken i bas Tuhan Jesus Kristus.

 

DISKUSI :

  1. Kidekah enda enggo nge sisikapken waktu khusus secara pribadi ras keluarga guna ngoge ras ngukuri Kata Dibata? Adi enggo turiken uga nanam ulihna ras adi lenga kai nge si jadi rongketna.
  2. Adi ngerana kita kerna Tata Gereja, uga nge kidekah enda pengangkanta? Kai nge siakap gunana ibahan Tata Gereja i bas GBKP enda? Turikenlah isi pusuhta.

 

USULEN ENDE-ENDEN: :

  1. KEE GBKP No. 249:1-5= https://www.youtube.com/watch?v=wUt9KEfB6h0
  2. KEE GBKP No. 209:1,2,4= https://www.youtube.com/watch?v=CW_YNHCWKR0
  3. KEE GBKP No. 354:1-3= https://www.youtube.com/watch?v=Gcu8h_8HH3s
  4. KEE GBKP No. 381:1-3= https://www.youtube.com/watch?v=PXegIPBQnCU

 

DAFTAR BACAAN:

  • Pustaka Si Badia terbiten LAI, Jakarta: 2008.
  • Alkitab Penutun Hidup Berkalimpahan seri The Full Life: Study Bible, terbiten Gandum Mas, Malang: 2015.
  • Hasil-Hasil Seminar dan Diskusi Pembaharuan Tata Gereja GBKP
  • Kamus online Ibrani – Indonesia

                                  Pdt. Yusuf Tarigan, S.Si (Teol), MM.

                                    HP/WA: 081370979737

Post Views: 1,852