Ipasu Pasu Guna Jadi Pasu Pasu

Kejadian 12: 1 – 4

Abram dipanggil Allah

12:1 Berfirmanlah TUHAN kepada Abram: “Pergilah dari negerimu dan dari sanak saudaramu dan dari rumah bapamu ini ke negeri yang akan Kutunjukkan kepadamu;
12:2 Aku akan membuat engkau menjadi bangsa yang besar, dan memberkati engkau serta membuat namamu masyhur; dan engkau akan menjadi berkat.
12:3 Aku akan memberkati orang-orang yang memberkati engkau, dan mengutuk orang-orang yang mengutuk engkau, dan olehmu semua kaum di muka bumi akan mendapat berkat.”
12:4 Lalu pergilah Abram seperti yang difirmankan TUHAN kepadanya, dan Lotpun ikut bersama-sama dengan dia; Abram berumur tujuh puluh lima tahun, ketika ia berangkat dari Haran.

Dibata ndilo Abram

12:1 Nina TUHAN man Abram, “Tadingkenlah kutandu, kade-kadendu, ras rumah bapandu, jenari laweslah ku negeri si Kutuduhken man bandu pagi. 

12:2 Nterem Kubahan sinursurndu, janah e me pagi jadi sada bangsa si mbelin. Kupasu-pasu kam, janah Kubahan terberita gelarndu gelah arah kam nterem kalak dat pasu-pasu.

12:3 Kupasu-pasu kalak si masu-masu kam, tapi Kusumpahi kalak si numpahi kam. Janah erkiteken kam Kupasu-pasu kerina bangsa-bangsa.” 

12:4 Kenca umur Abram 75 tahun, berkat me ia i Haran nari bagi si isuruh TUHAN. Si Lut pe berkat ras ia.

 

Tujuan  : Gelah Mamre:

• Meteh maka Abram i pasu pasu Tuhan guna jadi pasu pasu man kerina jelma
• Nggit ras ngasup jadi pasu pasu guna kerina jelma

I. KATA PENARUH

Pasu pasu (barakah) merupakan hal siiarapken manusia arah Dibata nari. Sabab pasu-pasu e identik ras kesangapen ntah pe keriahen ibas geluh manusia. Kisah kegeluhen Abram patut jadi contoh konkrit guna ndatken pasu pasu si luar biasa ibas Dibata nari. Bahkan lebih asa sie, turin-turin Pustaka Si Badia ngataken maka Abram ndatken pasu pasu janah pe jadi pasu pasu man kerina jelma. Ertina labo terjeng ndatken pasu-pasu guna inanami bas dirinna saja tapi pe dirinna jadi pasu man kalak si deban. Terkhusus dalam rangka MUPEL Mamre GBKP baik tingkat Pusat, Klasis bagepe Runggun, perlu iakap mulihi ipertegas kerna tokoh simbol Mamre GBKP eme Abraham (Abram), gelah semangat ke-tokoh-en Abram jadi semangat ibas menyuksesken MUPEL Mamre GBKP dingen tetap setia ibas ndahiken dahin pelayanen Mamre. Mari si siksiki bahan renungenta.

II. URAIAN TEKS

Abram dikenal sebage bapa leluhur kalak Israel. Arah bahan ogenta ituriken maka Dibata ndilo Abram bagepe ikut pe ras Sara. Secara sederhana bahan ogenta banci ibagi kubas 3 (telu) bagin eme:

1. Perentah Dibata (ay 1)

Pendilo Dibata ibenaken alu perentahNa: tadingken kuta, kade kadendu ras rumah bapandu. Perentah Dibata enda merupaken hal si mberat man Abram, terlebih lebih man Masyarakat ibas zaman si e. Nadingken kuta, keluarga ras rumah bapa seri ertina nadingken benteng pertahanen nggeluh (seri ras kematen) sabab keberlangsungen nggeluh paksa si e itentuken persadaan kelompok ntah pe suku bangsa si saling menjaga/melindungi.

Janah perentah Dibata iterusken aku kata: jenari laweslah ku negeri si Kutuduhken man bandu pagi. Negeri siimaksudken Dibata pe lenga terang ntah samar-samar dengan man Abram sabab Abram pe lenga pernah ku je. Jadi perentah Dibata hal si la mungkin terukuri secara logika manusia. Perentah enda arus tuhu tuhu ipahami alu kiniteken simbages ras kepatuhen si luar biasa man Dibata, maka banci teraloken. Bas bagin enda me hal si sangat penting ibas ndatken pasu pasu Tuhan.

2. Pasu-pasu Dibata (ay2,3)

Ibas teks selanjutna Dibata ncidahken pasu pasuNa si luar biasa man Abram. Adi si urutken kerna pasu pasu siipadanken Dibata man Abram, maka tangkas si idah bahwa pasu pasu Dibata e tuhu-tuhu menjawab kerina aspek kegeluhen manusia (Abram) bagepe keberlangsungen geluhna tetap jadi kebanggan ras panuten simehuli man enterem jelma. Padan Dibata man Abram eme:

• Nterem Kubahan sinusurndu ras jadi bangsa si mbelin (jaminen sinursur). Sekaligus jababen si jadi bas jabu Abram, sabab langa lit pupusna.
• Kupasu pasu kam, terberita gelarndu (sukses ras berhasil bas kegeluhen)
• Arah kam, enterem kalak dat pasu pasu (jadi inspirasi, idola, pasu pasu man kalak)
• Kupasu pasu kalak si masu masu kam, Kusumpahi kalak si numpahi kam (Jaminen perlindungen bas Dibata)
• Erkiteken kam Ku pasu pasu kerina bangsa-bangsa (Jadi perkakas Dibata ibas nelamatken/nebus tinepaNa)

Arah gambaren enda teridah maka pasu-pasu si isikapken Dibata la terukuri ras la terantusi secara logika manusia. Jadi adi bas bagin pemena ituriken perentah Dibata alu tantangen si mberat janah bagin sipeduaken icidahken Dibata pasu pasu si luar biasa man Abram. Selanjuta gelah hal enda jadi kenyataan maka ibutuhken tindakan konkrit alu dem kiniteken ras kepatuhen man Dibata ibas ndalankenca. Bagin enda ituriken ibas ayat selanjutna.

3. Tindaken Abram (ay 4)

Ibas teks ituriken maka kenca umur Abram 75 tahun berkat me ia i Haran nari bagi si isuruh Tuhan. Enda nuduhken maka Abram ras jabuna memutusken guna ndalani perentah Tuhan. Mberat tantangen si bakal terjadi, tapi ukurna nggo bulat guna ndalani bagi si isuruh Tuhan.

Janah bas bagin ayat enda pe perlu jadi perhatian, sabab lit itulisken Si Lut pe berkat ras ia. Ertina ibas ndalani perentah Dibata lit 2 jabu, eme jabu Abram ras jabu Lut. Radu ras berkat i Haran nari, tapi ibas kedungenna jabu si tetap mengandalken Tuhan ngenca banci ngaloken pasu pasu siluar biasa. Janah jabu siikut-ikuten labo ndatken hal siluar biasa.

III. PENGKENAINA

Ibas bulan Agustus 2025 enda, lit sada dahin si mbelin ibas MAMRE GBKP eme Musyawarah Pelayanen (MUPEL MAMRE) sipe VII ken i RC Sukamakmur. Dahin enda ilakoken setiap 5 tahun sekali, rikutken P2P Mamre GBKP pasal 29 ayat 3-5 isingetken maka tugas dari Musyawarah Pelayanan Mamre GBKP Pusat adalah mengevaluasi pelaksanaan kegiatan yang telah dilakukan, menyusun program 5 (lima) tahun berikutnya serta pemilihan Pengurus Periode berikutnya. Janah kenca dung MUPEL Mamre tingkat pusat maka ilanjutken ku MUPEL Mamre tingkat Klasis bagepe MUPEL Mamre tingkat Runggun.

Rikutken bahan oraten bas PA Mamreta sendah, perlu si gargari mulihi kerna tokoh si jadi panuten ibas Mamrenta eme Abram (Abraham). Arah kupasen bahan oratenta, siidah maka Pendilo Dibata man Abram eme: Perentah-Pasu pasu ras Tindaken. Arah pendilo enda, sura sura Dibata gelah Abram ndatken pasu pasu ras jadi pasu pasu man kalak sideban. Bagelah tentuna kehadiren Mamre bas tengah tengah GBKP iarapken ndatken pasu pasu ras jadi pasu pasu man kalak sideban. Erkiteken si enda maka ibas dahin MUPEL enda lit 3 (telu) dahin sinilakoken Mamre GBKP eme:

1. Evaluasi dahin pelayanen

Mari sipergermetken program-pelayanen si nggo ilakoken. Ibas kekurangen si lit, e jadi dahinta guna pesikapsa bagepe ibas dahin si nggo mehuli tetap pertahanken.

2. Menyusun Program 5 (lima) tahunan

Ibas menyusun program 5 (lima) tahun berikutna, perlu siperdiateken hal si langa terlayani bagepe perkembangen si mbaru sijadi kebutuhen itengah tengah mamrenta. Perlu si pertajam visi ras misi Mamrenta guna menjawab pergumulen si semakin komplek bas tengah tengah kegeluhenta.

3. Pemilihen Pengurus periode simbaru

Bagepe ibas Pemilihen Pengurus Mamre baik tingkat Pusat, Klasis bagepe Runggun, mari sipilih pengurus si mampu dingen ertanggungjabab ibas ndahiken tugas pelayanen, terteki dingen mediate nandangi kemajun Mamre. Janah di kune enggo sipilih maka dukunglah Pengurus si mbaru e ibas ndahiken dahinna. Perlu siinget Kategorial Mamre labo terjeng organisasi tapi Kategorial Mamre wadah pelayanen guna mpermuliaken Dibata.

Ibas kerina dahin enda, mari erpengendes kita man Dibata, bagi bahan orantenta: lit tantangen tapi pasu pasu Tuhan serta isikapkenna man banta. Hal si ibutuhken guna mewujudnyatakenca kerina sura sura si mehuli e me tindaken konkrit bas kita Mamre nari. Mari suksesken MUPEL Mamre GBKP alu tindaken konkrit bagi ngena ate Tuhan. Ras ilanjutken alu tindaken konkrit ndalani program pelayanen bagi sin gena ate Tuhan.

DISKUSI

1. Oge ayat 4, menurut pendapatndu kai sebabna Abram nggit ngikutken kai siisuruh Tuhan?
2. Sehubungan pelaksanaan MUPEL Mamre, cidahken slogan ntah pe yel-yel si mereken semangat man peserta MUPEL MAMRE sipe VII alu video ntah youtube gelah pelaksanaan MUPEL erdalan alu mehuli bagi sura sura Dibata.

Usulen Lagu

• KEE GBKP No. 92: 1-2
• KEE GBKP No. 181: 1-3
• KEE GBKP No. 307: 1-3
• KEE GBKP No. 282: 1- (persembahen)

Pdt. Darius R. Sembiring, M.Th.
HP: 0812 193 1648