Nginget ras Ngergaken perjuangen

Teks       : Ester 9: 22-26

9:22 karena pada hari-hari itulah orang Yahudi mendapat keamanan terhadap musuhnya dan dalam bulan itulah dukacita mereka berubah menjadi sukacita dan hari perkabungan menjadi hari gembira, dan supaya menjadikan hari-hari itu hari perjamuan dan sukacita dan hari untuk antar-mengantar makanan dan untuk bersedekah kepada orang-orang miskin.
9:23 Maka orang Yahudi menerima sebagai ketetapan apa yang sudah dimulai mereka melakukannya dan apa yang ditulis Mordekhai kepada mereka.
9:24 Sesungguhnya Haman bin Hamedata, orang Agag, seteru semua orang Yahudi itu, telah merancangkan hendak membinasakan orang Yahudi dan diapun telah membuang pur–yakni undi–untuk menghancurkan dan membinasakan mereka,
9:25 akan tetapi ketika hal itu disampaikan ke hadapan raja, maka dititahkannyalah dengan surat, supaya rancangan jahat yang dibuat Haman terhadap orang Yahudi itu dibalikkan ke atas kepalanya. Maka Haman beserta anak-anaknya disulakan pada tiang.
9:26 Oleh sebab itulah hari-hari itu disebut Purim, menurut kata pur. Oleh sebab itu jugalah, yakni karena seluruh isi surat itu dan karena apa yang dilihat mereka mengenai hal itu dan apa yang dialami mereka,

9:22 Sabap i bas wari e me bangsa Jahudi pulah i bas musuh-musuhna nari. I bas bulan e me paksa ceda ate ras aru ate enggo salih jadi keriahen ras kesenangen. Erkiteken si e wari-wari e arus irayaken alu kerja man-man ras pesta-pesta, dingen mereken pangan sada nandangi si debanna ras man kalak musil.
9:23 Dage perentah Mordekai iikutken bangsa Jahudi, e maka perayan e enggo jadi kebiasan tiap tahun.

9:24 Haman anak Hamedata, kesusuren Agag, musuh bangsa Jahudi e, enggo erbahan tikam tanduk si igelari “purim” guna netapken wari lako ngkernepken bangsa Jahudi; isasapken Haman atena bangsa e. 
9:25 Tapi ijumpai Ester raja, e maka ipedarat raja perentah si tersurat; erkiteken si e sura-sura Haman si jahat nandangi bangsa Jahudi ersimulih engkenai ia; ia ras anak-anakna si dilaki igantung i bas tiang gantungen.
9:26 E me sabapna maka wari raya e igelari Purim. Erkiteken surat Mordekai bage pe erkiteken kerina si enggo jadi man bangsa Jahudi,

Tujuan  : Gelah Mamre:

• Meteh kuga Mordekai ras bangsa Israel ngergai perjuangen guna keselamaten Israel ibas sura-sura jahat Haman ngkernepken bangsana.
• Ngasup nginget ras ngergaken perjuangen pahlawan Indonesia.

KATA PENARUH

Kitab Ester nuriken kerna perjuangen sekalak diberu bangsa Jahudi, Ester gelarna. Ia patut igelari sekalak pahlawan erkiteken belinna perbahanen ras keleng atena nandangi bangsana. Alu la meteh mbiar, pang, igagalkenna rencana musuh singerencanakan alu mehuli guna ngkernepken kerina kalak Jahudi. Imbangna e me sekalak pejabat pemerentah si kejam, siersura-sura ngekernepken kerina kalak Jahudi (Est. 3:8-9, 12-14). Turin-turin si lit i bas kitap Ester, jadi i bas istana raja Persia. Kitab enda nuriken latar belakang ras erti wari raya kalak Jahudi si igelari Wari Raya Purim.

Bage pe i bas kitab Ester la lit isuratken kata Tuhan, amin bage gia turi-turinna nuriken kerna pembebasen siibereken Tuhan man bangsaNa. Kenca ipelawes i bas tanehna, kalak Jahudi nggeluh i negeri si la nandai Tuhan. Tapi arah Kemberahen Ester ras turangna sembuyak bapa e me Mordekai, Tuhan mulahi bangsaNa. Kejadin enda tetap iperingeti seh genduari i bas Wari Raya Purim (Est. 9:20-32)

URAIAN TEKS

Wari Raya Purim (Ibrani, פּוּרִים, artinya: undi, keberuntungan). Sue ras tradisi, tanggal 13 Adar eme paksa ija kalak Jahudi ndalanken puasa ibas sada perayaan si igelari “puasa Ester”. Puasa Ester ngingetken kita nandangi peristiwa asum Ester ngajuk kerina kalak Jahudi guna erpuasa (Ester 4:16). Bage pe jadi tanda sengget ibas Wari Raya Purim si ituriken ibas Ester bindu 9, itetapken Mordekai ibas jaman Ahasweros, guna peringet-ingeten nandangi kelepasen (pembebasen) ibas kejahaten Haman. Wari enda eme kerja man-man ras pesta siirayaken ibas tanggal 14-15 bulan Adar.

Mordekai nuratken kejadin e, jenari ngirimkenca man kerina kalak Jahudi si lit i daerah kekuasaan raja Ahasweros, subuk si ndeher bage pe si ndauh. Kerina iwajibken, gelah tep-tep tahun ngerayaken wari si pe-14 ras pe-15 bulan Adar, erkiteken ibas wari e me kalak Jahudi ndatken pembebasen ibas musuhna janah ibas bulan e me ceda ate salih jadi keriahen, wari erceda ate salih jadi Wari keriahen. Bage pe ibas wari e jadi wari kerja dingen meriah ras jadi wari guna erbagi pangan guna kalak musil.

Latar belakang wari kerja-kerja e me Haman anak Hamedata, kalak Agag, erbahan dirina jadi musuh kerina kalak Jahudi. Ibahanna rencana guna ngekernepken kalak Jahudi erkiteken nembeh kal atena man Mordekai. Tapi asum rencana jahat e ipeseh kemberahen Ester ku adep-adepen raja Ahasweros, maka iperentahken raja alu surat, gelah sura-sura jahat si ibahan Haman nandangi kalak Jahudi e ibalikken ku babo takalna. Keputusenna raja Haman rasa nak-anakna itamaken ku datas tiang gantungen. Erkiteken si e me maka wari-wari e igelari Purim (Heber, פּוּרִים, rikutken kata pur (Heber: פּוּר), ertina: ‘undi’)

Erdandanken sie me wari raya PURIM iarusken ras itetapken gelah ilakoken bangsa e ras kesusurenna guna jadi peringet-ingeten. Ilakoken pagin iperingeti ras irayaken ibas tep-tep angkaten, i tep-tep suku, i tep-tep daerah, i tep-tep kota, seh maka wari-wari purim e asa ndigan pe la bene i tengah-tengah kalak Jahudi ras peringet-ingetanna asa ndigan pe la masap (Ester 9:20-28).

Kemberahen Ester, anak Abihail, erbahan surat ras Mordekai, alu tegas guna mpegegehi sebage surat si peduaken kerna Wari Raya Purim. Jenari ikirimken me surat-surat e man kerina kalak Jahudi i bas 127 daerah kerajan Ahasweros, alu kata-kata salam ras setia, gelah wari-wari Purim e irayakenna ras kesusurenna ibas waktu sienggo itentuken rikut ras erpuasa. Bage me perentah Ester netapken Purim (Ester 9:20-32).

I Israel masa si genduari, keterlibaten anak i bas perayan Purim, anak-anak make baju khusus, ras itampilken tokoh-tokoh kitab Ester, tujunna guna njemba anak-anak gelah nandai sejarah penyelamaten si jadi tonggak sejarah bangsana.

Emaka aminna gia ibas kitab Ester la lit isuratken kata TUHAN, ibas minggu peteluken bulan Maret, bangsa Israel ngerayaken wari Raya Purim. Wari Raya Purim nuriken kerna kesetian ras penampat Tuhan man bangsa Israel. 3 hal siilakoken e me:

• Ngoge kitap Ester
• Mbagiken pangan sapih-sapih kalak Israel
• Erdiakonia man kalak musil

Ibas kerina peristiwa enda Tuhan erdahin, sura-sura Haman guna ngkernepken Mordekai ras kerina kalak Israel isalihken Tuhan jadi wari kegeluhen ras kemenangen. Israel tetap nggeluh dingen ermalem ate.

PENGKENAINA

Perbahanen Mordekai ras Ester banci sijadiken umbanen (teladan). Kita perlu kal nginget sejarah, bagi nina “bangsa yang besar adalah bangsa yang menghargai pahlawannya, bangsa yang besar adalah bangsa yang mengingat sejarahnya”. Tanggal 17 Agustus 2025 HUT RI ke-80, mabai bangsa Indonesia guna nginget pahlawan simperjuangken kemerdekaan ras ngataken bujur man Dibata sabab enggo iberekenNa kemerdekaan man bangsa Indonesia. Kemerdekaan enda labo erkiteken gegeh ras kebeluhennta, tapi erdandanken perkuah ate Dibata. Emaka ibas ngaloken perkuah ateNa, kalak si tek la banci ngukurken dirina saja tapi nggit erdiakonia, mpebue kekelengen nandangi sada ras sidebanna bage pe tutus megiken ras ndalanken Kata Dibata. Sirayaken kemerdekaan enda alu la menyombongkan diri, janah ngajuk kalak si deban pe ikut ermeriah ukur ras ngataken bujur erdandanken kemerdekaan enda.

Sipake kemerdekaan enda alu mehuli, erguna kita man teman si lit isekelewetta, kinierbagen suku, agama, bahasa ras sidebanna si ban jadi gegehta guna memajuken bangsanta aminna pe ibas hal sikitik. Umpamana arah jabunta, perpulungennta terlebih Mamre kerina. Adi nai kemerdekaan iperjuangken alu pertumpahen dareh guna sigenduari, arusna sigenduari pe nggit erjuang kiniulin kegeluhen ku lebe. Sabab kai pe siilakoken genduari lit hubungenna ras pagin. Sipesikap inganta tading.

DISKUSI

1. Rikutken pengangkanndu, kai nge sierbahanca maka Ester, Mordekai erjuang guna kalak Jahudi i Persia. Turikenlah!
2. Ibas mengisi kemerdekaanta, kai si ilakokenndu asum nggejapken pembebasen Tuhan man bangsanta bagepe bas persoalen si mbelin dihadapi kita – umpamana: malem pinakit, rasil mentasi mas krisis ekonomi, ndungi situasi sulit alu mehuli, rasil ndungi perbeben keluarga, ras sidebanna?

Usulen Lagu

• KEE GBKP No. 221: 1-2
• KEE GBKP No. 163: 1-2
• KEE GBKP No. 292: 1,3
• KEE GBKP No. 68: 1- (persembahen)

Pdt. Jepta Pelawi S.Th
HP: 0812 6529 3965