NGASUP NGKUASAI DIRI
Kuan-kuanen 25:25-28
25:25 Seperti air sejuk bagi jiwa yang dahaga, demikianlah kabar baik dari negeri yang jauh.
25:26 Seperti mata air yang keruh dan sumber yang kotor, demikianlah orang benar yang kuatir di hadapan orang fasik.
25:27 Tidaklah baik makan banyak madu; sebab itu biarlah jarang kata-kata pujianmu.
25:28 Orang yang tak dapat mengendalikan diri adalah seperti kota yang roboh temboknya.
(Keluarga II)
MODEL PJJ: PUJI-PUJIAN
KATA PERLEBE :
Jaga diri, tutus erkiniteken, metenget ndarami erteman, pangan e labo ate keleng-kesehatenta lah jaga, siksik lebe maka tindes ras si debanna. Kalimat enda megati si begi entah pe si belasken, janah makna i balik kalimat enda e me gelah ngasup kita njagai diri (ngkuasai diri).
Kai perluna kita ngkuasai diri? Gelah arah kengasupenta ngkuasai dirinta (sura-sura dagingta), ermulia gelar Dibata dingen tambah kiniteken kalak er-Dibata arah kegeluhenta.
ISI :
Engkuasai diri e me sada dampar si penting kal i bas kita ndalani kegeluhen; erkiteken penguasan diri banci nentuken sekalak jelma maju berkembang entah pe mundur/mesukah guna italuken. Bagi sada tembok/benteng bas sada kota; tembok/benteng si kokoh-paguh erbahanca aman sekelewet erkiteken lit pertahanen tapi dikune tembok/benteng la kokoh (mesukah iruntuhken) tentuna keamanen la terjamin “Kalak si la ngasup engkuasai dirina, bali ras kota si nggo tombang bentengna” (Kuan-kuanen 25:28). Kalak si ngasup engkuasai dirina banci pulah arah hal-hal si la mehuli si lit i sekelewatna, bage pe ngasup ia mbangun kegeluhen alu sikap dingen mehuli. Di kune la ngasup ia engkuasai dirina, hal-hal la mehuli banci ngkenai dirina jenari kegeluhenna mesukah ibeneken. Bage me pentingna maka kerina kita perlu lit kengasupen lako engkuasai diri.
Ayat 25: Ndatken berita si mehuli i bas ingan si ndauh nari, bali kap ras minem lau malem tupung paksa muas. Kegeluhen perlu rikutken pasna/lit keseimbangen seh maka man si ndalankenca ndatken keriahen.
Ayat 26: Kalak bujur si aru atena ngelawan kalak jahat, bali kap ia ras ulu lau si megembur tah sumur si melket. Sura-sura si mabai kalak lanai ndatken kemalemen ate erkiteken sura-surana la terlakoken si erbahanca meneken ia.
Ayat 27: Mbuesa man tengguli, la mehuli, ndarami pujin man diri jine la mehuli. Nggeluhlah alu kiniraturen, iangka kerna keperlun si iperluken, njagai diri guna ndatken kemalemen ate bage pe ketenengen.
Ayat 28: Kalak si la ngasup engkuasai dirina, bali ras kota si nggo tombang bentengna. Kinilangasupen engkuasai diri bali bagi kalak motu si pentar akapna man bana, seh maka kinimotunna e meneken dirina.
Mike Tyson salah sada contoh kalak si la ngasup engkuasai diri. Reputasi Mike Tyson selaku petinju si i bas jamanna tupung umurna dua puluh tahun meraih gelar juara kalas berat versi WBC. Popularitasna melejit erkiteken melala ia menang tupung ikut pertandingen tinju, erta kebayakenna meningkat drastis, tapi erkiteken kinilangasupenna lako engkuasai dirina (ikutkenna sura-sura dagingna – kecanduan seks) erbahansa maka karierna selaku petinju hancur janah popularitas bene. Mike Tyson selaku petinju hancur erkiteken sura-sura dagingna, erta si melala kernep erkiteken ngikutken sura-sura daging.
I bas Pustaka Si Badia pe melala contoh kerna kinilangasupen guna engkuasai diri; Simson ndabuh ku bas dosa (erngena ate ia nandangi sekalak diberu si labo bangsana) erkiteken la ia ngasup lako njaga dirina (Hak. 13-16); Daud selaku raja erngena ate ia man ndehara panglimana Uria, janah guna nehi sura-surana e alu sedar ia nuruh panglimana erperang (2 Sam. 11); Akhan la ngasup ngikutken pedah Tuhan guna la muat kai pe i Jeriho nari si arus ihancurken, tapi Akhan la megiken perentah Tuhan erkiteken ngidah erta si melala (Josua 7); Judas Iskariot, erkiteken kinilangasupenna, ndatken duit si melala alu cara si la payo, idayakenna guruna e me Jesus Kristus.
PENGKENAINA :
Melala jelma paksa gundari enda kurang ngasup lako engkuasai diri, megati tergoda erkiteken tawaren-tawaren doni, umpamana: tergoda kita muat bagin si la arus jadi baginta erkiteken keperlun dana si mbue, tergoda kita lako ikut permainen judi online seh maka perubaten jadi i tengah-tengah jabu erkiteken terdaya me erta si terpepulung; pendahin pe lanai erturi-turin erkiteken keri waktu erjudi; tergoda kita alu tawaren-tawaren/diskon menarik seh maka si tukur me si labo jadi kebutuhen.
Penguasaan diri mbelin kawitenna ras keutuhen tengah-tengah jabu. Peran perbulangen-ndehara; orangtua-anak-anak iperluken. Peran sekalak ndehara iperluken guna mpersingeti perbulangen di kune perbulangen terlibat ku bas judi online; peran sekalak perbulangen iperluken guna mpersinget ndehara si megati belanja online; dingen peran selaku orangtua lako tetap mpersingeti anak-anak gelah ngasup make kesempaten/waktu si lit.
Jaga diri, jaga pusuh, jaga mata gelah ula mesunah kita tergoda nandangi si la perlu bage pe jaga dilah gelah si ukuri lebe ope denga sibelasken ranan e, sabab megati alu la sisedari erkiteken kurangna penguasaan diri i bas melasken ranan, turah perjengilen nandangi sada ras si debanna.
DISKUSI :
- Rikutken pengalamenta sekalak-sekalak, kai-kai saja nge si erbahanca maka megati kita la ngasup ngkuasai dirinta? Turikenlah
- Pernah nge kita ndabuh ku bas kinilangasupen guna engkuasai diri? Adina pernah, ise si nampatisa seh maka banci pulah arah kinilangasupen e? Ras uga carana (tahapen-tahapenna)? Turiken pengalamenta.
USULEN ENDE-ENDEN: :
- KEE GBKP No. 323:1,3= https://www.youtube.com/watch?v=nMI_V-MQbjk
- KEE GBKP No. 425:1,3= https://www.youtube.com/watch?v=lUFJGRcnHvE
- KEE GBKP No. 350:1-2= https://www.youtube.com/watch?v=xDd_DvTknAU
- KEE GBKP No. 381:1,3 = https://www.youtube.com/watch?v=PXegIPBQnCU
Pdt. Martha Jadiate br Ginting, M.Th
HP/WA: 082160729042