PATUH NGIKUTKEN TUHAN

Masmur 50: 19 – 23

19 Si jahat usur ibelaskenndu, la pernah kam alang-alangen erbahan taki pacik.

20 Katawari pe icekurakindu seninandu, dingen idaram-daramindu kesalahen.

21 Ilakokenndu e kerina tapi sinik saja Aku; e maka isangkandu seri biakta. Tapi genduari Kurawai kam, dingen ateKu erpekara ras kam.

22 Dengkehkenlah, o kam si enggo lupa man Dibata. Jaga maka ola sempat kam ikernepken, jenari ise pe la lit sinampati kam.

23 Ngataken bujur e me persembahen si pehagaken Aku janah si patuh ngikutken Aku tentu Kukelini.

MODEL PJJ: PUJI-PUJIAN

KATA PERLEBE
Ikut muat bagin i bas kebaktin-kebaktin gereja tentuna seh pentingna, tapi kai sidatken kita arah kata Dibata i bas kebaktin e arus teridah arah perbahanenta wari-wari kegeluhenta, ertina ketutusen ndalanken aktivitas i bas gereja arus sendalanen ras perbahanen si mehuli i bas kegeluhen. Sura-sura Tuhan milih kita jadi anak-anakNa, gelah patuh kita ngikutken kerina perentah-perentahNa. Tuhan enggo encidahken kiniulin-kiniulinNa i bas kegeluhenta, janah e me mabai kita guna encidahken kiniulin Tuhan e arah perbahanen si bujur. Kebujuren e, ula terjeng i bas wari Minggu, PJJ ras PA ngenca, tapi teridah min arah kerina kecibal kegeluhenta sebage tanda kita kalak sierkiniteken ras sipatuh ngikutken Tuhan.

ISI
Masmur 50 enda e mekap Masmur Asap (Asap e ahli musik keturunen suku Lewi, zaman Daud bagepe Salomo). Si enda ngatakenca maka geluh Asap teriket ku bas dahin i bas rumah Pertoton. Masmur 50 enda ngataken man banta kerna pengajaren uga kin penembahen si payo man Tuhan. Penembahen si payo arus ilakoken bangsa Dibata erkiteken Ia me si mada doni ras kerina isina dingen Tuhan Dibata ulu kegeluhen doni enda. Ia labo mindo tapi mere. I bas Masmur 50:7 ituriken uga Tuhan Dibata ningetken man bangsa Isarel: “O Israel ngerana ateKu man bandu, o kam bangsaKu kerina dengkehkenlah, Ku saksiken ateKu man bandu, Aku kap Dibata, Dibatandu”. Enda ningetken maka mulihi Tuhan Dibata si enggo melala ncidahken diriNa kempak bangsa Israel alu kuasaNa si mbelin, mulihi mpetandaken diriNa i bas kesalahen bangsa Israel la nembah alu payo man Dibata ija megati bangsa Israel lupa nandangi Dibata ras kuasaNa. Segelah bangsa Israel tuhu-tuhu min jadi abdi Dibata i bas kegeluhenna si tep-tep wari.
Arah nats renungenta sekali enda isingetken uga bangsa Israel ipersingeti i bas kinilapatuhenna ndalanken perentah Tuhan. Ibenaken i bas ayat 16 nari, Tuhan ngerana man kalak jahat i bas lagu langkahna si erban nembeh ate Tuhan. Si jahat rusur i belasken bagepe erbahan taki pacik guna nehi sura-surana dingen encekuraki kalak si deban (memfitnah) gelah teridah ulin asangken kalak si deban, erpengakap Dibata e bali bagi biakna si jahat e. E maka isehken Dibata kataNa man bangsa e gelah ola sempat ikernepken i bas kerina lagu langkah si dem taki pacik e. Sabab labo nari ise pe banci nampati adi enggo reh paksa si isingetken Tuhan e. Tapi si ngena ate Tuhan e me tetap ngataken bujur man Tuhan arah persembahen sabab e me si sipehagaken Ia dingen kempak kalak si patuh ngikutken Ia i bereken Tuhan keterkelinen i bas kegeluhen.
Alu teks Perpulungen Jabu-jabunta paksa enda ngerana kerna perentah ras padan. Nuriken maka perentah Tuhan Dibata tetap sendalanen ras padanNa, Ise si patuh ndalanken perentahNa maka lit padan Dibata e me pemereNa isehkenNa.

PENGKENAINA
1. Kejujuren/kebujuren e karakter si penting, janah e leket i bas diri/biak kegeluhen manusia. Sabab kalak si bujur labo lit sura-surana guna erbahan sila bujur. Kalak si bujur e perdalinna pe lurus labo ndempar kujah-kuje guna ndatken sura-surana.
2. Kalak bujur/jujur itambahi Dibata gegeh kepentaren guna naluken kinilabujuren. I bas pendungi Masmur 50 enda isingetken keuntungen si mbelin man kalak bujur e me i sehken keselamaten man bana. Kata Dibata enda ningetken man banta maka Tuhan erngena ate nandangi anak-anakNa si nggeluh alu patuh ngikutken Tuhan.
3. Penembahen si payo labo terjeng i bas inganta erkebaktin tapi i bas kerina dampar kegeluhenta si cidahken kebujuren Tuhan e. Kerina ingan kegeluhenta e me inganta erkebaktin, ngelai Dibata, jadi abdi Dibata. Labo ngasup kita nebu-nebu Dibata alu ninta pulung i bas kebaktin-kebaktin si iaturken gerejanta tapi lagu langkahta dem alu taki pacik ras kejahaten.
4. Kita anak-anak Dibata arus nuduhken kepatuhenta alu encidahken biak-biak Dibata e i bas kegeluhenta arah kebujuren. Tergejap min ulih perjumpanta ras Tuhan e ernanam man sekelewetta, kehadirenta erbahan teneng dingen malem ate sekelewetta e, sabab si cidahken biak si mehuli e me: La erbelas kerna sijahat, la erbahan taki pacik nandangi teman-temanta, la cekurak, la ndaram-ndarami kesalahen kalak gelah teridah ia la mehuli ras gelah kita teridah mehuli. Tetap erkemalangen man Tuhan alu ngataken bujur man baNa dingen ngelakoken kebujuren, aminna pe megati reh godan man banta guna ngelakoken kinilabujuren. Dingen megati ka pe turah nembeh ate kalak sideban i bas kita ngelakoken kebujuren. Gegeh Dibata lah tetap si nampati kita i bas geluhta.
DISKUSI :
1. Erpalasken teks oratenta biak si kuga nge si perlu si tadingken i bas ngikutken Tuhan?
2. Kai nge tantangen i bas kita ndalanken kebujuren i bas kita ngikutken Tuhan?

USULEN ENDE-ENDEN:
1. KEE GBKP No. 372:1-2
2. KEE GBKP No. 299:1
3. KEE GBKP No. 184:1-3
4. KEE GBKP No. 202:1-2

DAFTAR BACAAN:
Visi misi dan tata nilai GBKP

Pdt. Elys Siska br Tarigan, S.Th
HP/WA: 081375236555