ERBAHAN GELAR
Lukas 2:21
(Liturgi Kasuistik)
MODEL PJJ: BUDAYA
2:21 Dan ketika genap delapan hari dan Ia harus disunatkan, Ia diberi nama Yesus, yaitu nama yang disebut oleh malaikat sebelum Ia dikandung ibu-Nya.
KATA PERLEBE :
I bas Dibata enggo empelimiken anak ku tengah jabu, tentuna orangtua rikutpe sangkep geluh dem i bas keriahen ukur. Lit pe orangtua, sope anak e tubuh enggo isikapkenna gelar man anak e tah pe enggo ipindo man mamana/mamina (adi dilaki anak e) man bibi/bengkilana (adi diberu anak e). Kesemalen enda lit i bas kalak Karo. Erbahan gelar nandangi sekalak anak tuhu-tuhu mbages kal ertina sabab lit kawitenna ras sada-sada kejadin, pengalamen, pengarapen, toto, sura-sura, ngena ate ras si debanna. Arah PJJ sekali enda kita ngorati kerna kuga pentingna ras bagesna erti erbahan gelar subuk i bas kalak Jahudi si teridah arah sinilakoken Jusup ras Maria man anakna Jesus, ras kuga kawitenna i bas kalak Karo seh maka ilitken i bas GBKP “ORAT KEBAKTIN ERBAHAN GELAR” (Liturgi Kasuistik). Alu bage tangkas kal man banta kuga kearusen orat geluh erkiniteken ras erbudaya i bas erbahan gelar nandangi anak-anakta.
ISI :
Jusup ras Maria (orangtua Jesus) teridah kal matuhi undang-undang ras aturen siiaturken i bas agama Jahudi. “Kenca umur waluh wari isunatkenna Anak ndai” enda ilakoken sue ras perentah Dibata man Abraham “Nina Dibata kempak Abraham, “Kam pe arus erpadan, matuhi perpadanen enda, subuk kam, bage pe sinursurndu ersundut-sundut. Kam ras kerina kesusurenndu arus isunatken. Mulai genduari nari, la banci lang isunatkenndu kerina anak dilaki si umurna nggo waluh wari, subuk anak budak si tubuh i bas rumahndu, bage pe anak budak si itukurndu i bas kalak si deban nari. Sunat e me tandana maka lit perpadanenKu ras kam. Teptep kalak arus isunatken, janah enda me tanda si teridah i bas kulandu si ncidahken maka perpadanenKu ras kam tetap rasa lalap. Kerina dilaki si la isunat, la ikira jadi bangsangKu, erkiteken la icikepna perpadanen e” (Kej. 17:9-14). Jadi sunat e me perentah Dibata ras tanda perpadanen bangsa Israel ras Dibata. Isunatken e me tanda selaku bangsa pilihen Dibata.
Rikutken undang-undang agama Jahudi maka raduken ras isunatken “Janah ibahanna GelarNa Jesus, e me gelar si enggo ibereken malekat ope denga IA lit i bas bertin. Tupung Malekat Gabriel isuruh Dibata njumpai sekalak singuda-nguda (Maria) e me nande Jesus nehken berita ketubuhen Jesus nina “Mehuli pagi kulandu janah ipupusndu sada anak dilaki, bahanlah gelarna Jesus” (Luk 1:31). Dibata jine me simereken gelar man Anak e, e me “JESUS”. Erti gelar JESUS “Jahweh sinelamatken” tah pe “Jahweh kap keselamaten.” Terjemahen ras ibaca i bas bahasa Heber ras Aram Yeshua. Kata enda rehna arah ipersada Ya, ipegendek arah Yahweh, gelar Dibata kalak Israel (Kal. 3:14) ras kata kerja yasha, siertina “nelamatken.” Penulisen kata Heber Yeshua e me Yosua. Iterjemahken ku bahasa Yunani Koine, e me bahasa siipake nuratken kitab Padan Si Mbaru, adi Padan Si Ndekah isuratken i Heber/Ibrani ras Aram. Gelar Yeshua jadi Iesous. I bas bahasa Indonesia, Iesous itulis Yesus. Bahasa Karo itulis Jesus. Alu bage maka Yeshua/Yosua ras Jesus ertina “Jahweh sinelamatken” tah pe “TUHAN kap keselamaten.” Jadi erti gelar JESUS tangkas kal rikut pe arah berita si ipeseh malekat Gabriel. Gelar JESUS ibereken labo terjeng penggelaren saja, tapi seh ku bas orat geluh, pengarapen, kuasa ras kai-kai saja pepagin siilakokenNa maka IA igelari JESUS. “Ia pagi jadi kalak si mbelin dingen igelari pe Anak Dibata si Meganjangna kal. Tuhan Dibata pagi njadiken Ia jadi Raja bagi niniNa Daud, janah Ia me pagi raja man kesusuren Jakup seh rasa lalap; KinirajanNa la erkeri-kerin” (Luk. 1:31-33).
Kesemalen kalak Jahudi i bas erbahan gelar nandangi anak tuhu-tuhu mbages kal ertina. Arah gelar e teridah sura-sura, toto ras pengarapen nandangi anak e pepagin. Enda me siteridah pe siisehken man Jesus. I bas bertin nari pe enggo lit gelarNa ras gelar e rehna i bas Dibata nari. Tambah si e pe isunatken tanda perpadanen selaku bagin i bas bangsa pilihen Dibata.
PENGKENAINA :
Erbahan gelar i bas kalak Karo nai-nai nari enggo iaturken nininta si arah lebe. Erbahan gelar nandangi sekalak anak ipeatanken pe sangkep geluh. Gelar siibereken megati pe ikawitken ku bas turi-turin kecibal tupung anak e tubuh (umpamana, tupung tubuh lit linur maka i ban gelarna Linur Ginting, mbeltuk deleng i ban gelarna Erupsi Perangin-angin, ras sidebanna). Toto dingen pengarapen kenca tubuh anak e segelah reh sikapna min kegeluhen, e maka i ban gelarna Jore Mendaita Br. Tarigan, ras si debanna. Bagepe i bas erbahan gelar ikawitken pe kempak ise kin empuna anak e pepagin. I bas kalak Karo semalna si erbahan gelar adi anak dilaki e me mamana/mamina sabab ia nge si mada, janah adi anak diberu bibi/bengkilana erbahan gelarna erkiteken ia nge si mada. Erbahan gelar ilakoken kenca mulih petelayoken enda sada tradisi, maba anak ku lau kenca umur anak e pitu wari. Banci ka pe i bas paksa sue ras arih ersada sangkep geluh.
Erkiteken bage bagesna ras belinna erti erbahan gelar e i bas kalak Karo maka lit iaturken kesemalen budaya kalak Karo erbahan gelar. Kenca enggo lit gelar maka itenahken me pulung sangkep geluh. Kenca ibelasken gelar anak e, maka sierbahan gelar e (mama/mami tah bibi/bengkila) ijemputna beras padi-padi i bas tumba, jenari ibeligai me bilangen beras siijemputna e, adi kep (genap) bilangenna e tandana serasi me gelar si ibahan man anak e. Semalna, adi ijemput sekali ras peduakaliken la kep maka seh telu kali. Adi e pe lenga kep maka ipindoken me man orangtua (nande/Bapa) anak e si erbahan gelar.
Enda ka me palasna maka i bas gerejanta GBKP enggo litken Liturgi Kasuistik e me kesemalen-kesemalen erpalasken budaya Kalak Karo si tuhu-tuhu mehuli guna nehken pengataken bujur man Dibata, nehken kekelengen ras pengerakut kiniersadan sangkep geluh, si sue ras kata Dibata. Salah sadana e me ORAT KEBAKTIN ERBAHAN GELAR. Enggo ilitken Tata Ibadah/Liturgi kebaktinna. Arah kebaktin e si jadi perayaken e me Teologis : Anak ras gelar e rehna i bas Dibata nari, pengarapen segelah anak e bagi sinisuraken Dibata. Psikologis: Pengarapen nandangi anak e segelah sue ras gelarna ras tuhu-tuhu iergaken kal anak e selaku pemere Dibata. Sosiologis: gelar selaku pengerakut kiniersadan perkade-kaden i bas kalak Karo (kalimbubu/anak beru) sendalanen ras si e lit tanggungjabab si erban gelar man bere-bere/permenna. I bas kebaktin e ilakoken:
- Acara Erbahan Gelar: (adi anak dilaki mamana/mamina sierbahan gelarna, adi anak diberu bibi/bengkilana sierbahan gelarna) rikut perarihen ras orangtua.
- Singesahkenca gelar e gelah kep (sempurna) e me mamana/mamina rikut katana:
Kalimbubu: “Enggo ibahan kami gelarndu anakku si_______________________ (gelar si enggo ibahan mama (anak dilaki)/bibi (anak diberu) pengarapen kami gelah tangkellah gelar enda i bas dirindu, dingen erpengue tendindu ngalokenca, sehat mejuah-juah kam, lampas mbelin, lampas nggedang, lupa mbatuk, lupa mbaranginen ras mejuah-juah bebere mamana ras nande bapana i bas jujuren Tuhan Si mada kegeluhen enda. Kalimbubu njujungi beras man anak ras nande bapana. Kenca si e ilakoken kebaktin i babai serayan Tuhan.
Teridah maka kalak Karo pe nai-nai nari ngergaken teptep jelma, la meros dingen mekarus i bas mereken gelar. Alu bage maka arah ilitken liturgi kasuistik ORAT KEBAKTIN ERBAHAN GELAR tole kita ngataken bujur man Dibata, pulung iteruh keleng ate Dibata. Terlebih keriahen tuhu tergejap i bas Dibata enggo mpelimiken sekalak anak ku tengah-tengah jabu, janah palas kinipulungen sangkep geluh guna erbahan gelar nandangi anak e. Pengarapenta maka arah gelar sinibahan kita enda sue ras pengarapen keluarga, terlebih bagi siniarapken Dibata.
Teridah tuhu maka subuk i bas kalak Jahudi ras kalak Karo, tuhu-tuhu ngergaken i bas erbahan gelar. Anak e pemere Dibata kap, oratna pe sikatakenlah bujur man Dibata arah ngelakoken kebaktin erbahan gelar. Segelah kita la meros dingen mekarus i bas erbahan gelarna. Gelar siibereken kita e me toto, pengarapen ras orat geluhna.
DISKUSI :
- Turiken antusen gelar JESUS erpalasken ogenta!
- Turiken pengalamenndu, kai nge palas ras sababna i bas kam erbahan gelar nandangi anak i tengah jabu tah man bebere/permenndu!
USULEN ENDE-ENDEN: :
- KEE GBKP No. 171:1-5= https://www.youtube.com/watch?v=RE1AwZCIuq8
- KEE GBKP No. 264:1-3= https://www.youtube.com/watch?v=E-H6Qd45974
- KEE GBKP No. 293:1,3= https://www.youtube.com/watch?v=za-1JW9PWU0
- KEE GBKP No. 296:1= https://www.youtube.com/watch?v=VtzUvAqgdYY
Pdt. DR. Kalvinsius Jawak
HP/WA: 081361419249