DONI DEM ALU PASU-PASU DIBATA
Masmur 104:10-15
(Misi GBKP)
104:10 Engkau yang melepas mata-mata air ke dalam lembah-lembah, mengalir di antara gunung-gunung, 104:11 memberi minum segala binatang di padang, memuaskan haus keledai-keledai hutan; 104:12 di dekatnya diam burung-burung di udara, bersiul dari antara daun-daunan. 104:13 Engkau yang memberi minum gunung-gunung dari kamar-kamar loteng-Mu, bumi kenyang dari buah pekerjaan-Mu. 104:14 Engkau yang menumbuhkan rumput bagi hewan dan tumbuh-tumbuhan untuk diusahakan manusia, yang mengeluarkan makanan dari dalam tanah 104:15 dan anggur yang menyukakan hati manusia, yang membuat muka berseri karena minyak, dan makanan yang menyegarkan hati manusia.
MODEL PJJ: KESAKSIAN
KATA PERLEBE :
Dibata nepa kerina si nasa lit alu tujun gelah banci tinepa e nembah dingen mpermuliaken Ia i bas keriahen ukur. Guna si e, Dibata nggo nikapken kerina si nasa lit e i bas hubungen si ratur janah iangkatNa pe manusia jadi wakilNa guna nguasai ras njagai kerina tinepa e. I bas kinatana, manusia la ngasup ndalanken mandat si bereken Dibata e. Manusia si arusna mereken ngaruh si mehuli man lingkungenna, kepeken mereken ngaruh si la mehuli seh ncedai pe. Arah kata Dibata si jadi bahan i bas PJJ enda, ibabai kita mulihi ngidah ras nggejapken uga Dibata nepa kerina si nasa lit i bas kecibalna situhu-tuhu mehuli. Kuasa ras kemulian Dibata icidahken janah uga Ia ngaturken hubungen tinepa si sada ras tinepa si deban, ipetangkas gelah jadi sada penjemba man banta ikut muat bagin makeken pendilonta jadi aron Dibata guna mpekena doni enda. Pengarapenta maka arah kata Dibata enda, reh tangkasna man banta uga kin situhuna posisi ras fungsinta i bas hubungen ras tinepa si deban, janah nggit kita ngelakoken aksi nyata i bas sura-sura njagai keutuhen tinepa Dibata e.
ISI :
Masmur (Mizmor, Psalmos) e me pujin ntah pertoton si ipenangkih kalak Israel man Tuhan i bas kebaktin-kebaktin silakokenna subuk kebaktin pribadi bagepe kebaktin umum. Pujin ras pertoton enda isuratken alu bahasa-bahasa puitis e maka i bas kanon Padan Si Ndekah, Masmur igolongken ku bas kitab Ketuvim ntah pe kitab-kitab sastra hikmat. Puisi keagaman enda melala erbagena e me: pujin ras pertoton kerna Dibata, pertoton mindo penampat, pertoton mindo pengkawali dingen keselamaten, ermengkah ate erkiteken pengalemi dosa, ende-enden pengataken bujur erkiteken pasu-pasu Dibata, ras sidebanna.
Masmur 104 e me pujin man Dibata si nepa kerina si nasa lit. Kuasa ras kemulian Tuhan si isuratken i bas kitab Kejadin tupung Ia nepa si nasa lit, ijadiken jadi sada bentuk himne ntah pe pujin-pujin. Masmur enda situhuna masuk ku bas Masmur individu si biasa iendeken kalak Israel tupung ia ersembah man Tuhan i rumahna sekalak-sekalak. Tapi kedungenna, Masmur enda pe megati iendeken i tengah-tengah kebaktin umum silakoken kalak Israel tupung kalak enda ermeriah ukur i bas pesta Pentakosta ntah pe pesta panen.
Lit dua tema i bas Masmur 104 enda. Pemena, pujin kerna kuasa ras kemulian Dibata selaku sinepa kerina si nasa lit. Pujin enda isuratken i bas piga-piga gambaren e me: Dibata singkimbangken langit, Ia me sinjadiken angin jadi persuruhenNa, Dibata me sierbahan palas doni, ras sidebanna. Pengakun enda jadi sada penegasen maka Dibata ngenca si ndatken pujin ras kemulian. Uga pe luar biasana tinepa e, kerina ia terjeng tinepa ngenca dingen labo guna isembah dingen ipermuliaken. Peduaken, pujin dingen pengakun maka Dibata tetap erdahin guna njagai ras mpekena-kena tinepa si nggo itepaNa. Dibata la pernah nadingken tinepaNa tapi tetap hadir i bas kerina proses si jadi guna kiniulin tinepa e. Salah sada bentuk penemani ras penjagai Dibata tinepa e e me arah litna lingkaren (siklus) kegeluhen si sifatna saling memberikan manfaat ras saling membutuhkan.
Enda me siidah i bas kata Dibata si jadi bahan PJJ nta enda. Iaturken Dibata maka baluren ras kalang uruk-uruk e me ulu lau sijadi ulu kegeluhen man tinepa si deban e me rubia-rubia i mbalmbal. Lau enda pe jadi ulu kegeluhen nandangi batang-batang kayu seh maka banci reh galangna, jenari batang kayu e ka me sijadi ingan perik-perik rasar. Lau si pesusur Tuhan pe jadi ulu kegeluhen nandangi dukut ras sinuan-sinuan sijadi pangan man rubia-rubia bagepe manusia. Alu kiniraturen enda, Dibata nikapken siniperluken manusia ras tinepa si deban gelah banci ia ermeriah ukur dingen malem atena i bas ndalani kegeluhenna. Arah perikop enda isingetken maka lingkaren kegeluhen si sifatna saling memberikan manfaat ras saling membutuhkan enda, e me ulu keriahen ukur dingen kemalemen ate i bas ndalani kegeluhen. Enggo iaturken Dibata kerina prosesna alu mehuli janah alu tangkas isingetken pemasmur maka doni enda dem alu pasu-pasu Dibata. Pengakun enda mulihi meritaken pengakun si isuratken i bas kitab Kejadin maka si itepa Dibata e “tuhu-tuhu mehuli”. Kata enda nuduhken maka la lit sikurang i bas si nggo itepa Dibata. Kerina tinepa e ngasup ngelakoken keberadan ras fungsina alu payo janah hubungen antar tinepa e pe tuhu-tuhu harmonis. Kerinana teriket ku bas sada hubungen kegeluhen si la terpesirang sada ras si debanna, la lit siganjang teruken dingen la lit tinepa si lebih penting ntah pe meherga ibandingken ras tinepa si deban. Kerina tinepa e lit i bas tatanen ras hubungen si payo guna nehi sada tujun e me mpermuliaken Dibata.
PENGKENAINA :
Dibata mereken kengasupen man manusia ikut muat bagin jadi wakil Dibata guna njagai kiniraturen tinepa enda. Manusia idilo guna ngkuasai ras njagai kerina si nggo itepa Dibata. Tapi erkiteken kinilangasupen manusia guna ndalanken pendilo enda, maka lingkaren kiniraturen e nggo ceda. Biak si la pernah ngasup ncukupken diri ras ngataken bujur i bas pemere Dibata erbahanca manusia ndabuh ku tindaken-tindaken si ncedai tinepa Dibata si deban. Ilakoken me perambahen kerangen si lanai sue ras aturen, ingan-ingan si arusna jadi saluren lau itambusi janah ibangun, sampah-sampah siarusna ibahan inganna iambekken ku ingan-ingan si la patut, eksploitasi nandangi taneh alu make pupuk kimia si berlebihen, ras sidebanna. Kerina siibahan enda ncidahken biak kerangapen i bas diri manusia si alu la isedari, situhuna mpeturah persoalen man manusia. Eksploitasi ras pengerusaken enda erbahanca alam lanai jadi teman man manusia. Pasu-pasu si arusna ialoken manusia nggo salih jadi ulu kebiaren. Enda banci si idah arah banjir, longsor, cuaca ekstrem, turahna erbage-bage pinakit, pemanasen global, ras sidebanna. Situasi enda ncidahken maka keriahen ukur dingen kemalemen ate banci idatken manusia adi ijagana lingkaren ketergantungen e labo arah kerangapen.
Doni enda dem alu pasu-pasu Dibata; sumbul lau i bas baluren maler guna ngelitapi taneh. Enda erbahanca melala turah sinuan-sinuan bagepe dukut jadi nakan man rubia-rubia bagepe manusia. Tambah sie ipeturah Dibata ka sinuan-sinuan si mereken ulih (menghasilken) guna keriahen manusia. Tuhu-tuhu mbue kal pasu-pasu Tuhan man doni enda. Pujin ras pengakun enda searusna jadi pendilo man banta guna ikut muat bagin guna njagai kinulin tinepa Dibata e. I bas visi GBKP isingetken maka kita me aron Dibata si nggo ipilihNa jadi pasu-pasu man doni enda. Perayaken enda banci tersehi salah sada arah kininggitenta njagai keutuhen tinepa Dibata sideban. Enda banci sibenaken alu kesedaren kerna posisi ras fungsinta i bas hubungenna ras tinepa Dibata si deban. Pemikiren maka manusie e me “The Crown Of God’s Creations” perlu ipekena. Kerina tinepa si deban itentuken posisi ras fungsina erpalasken kepentingen manusia janah tempa-tempa lit guna kepentingen manusia saja. Ceda tinepa Dibata e erkiteken pengangkan si salah maka manusia me tinepa Dibata si termulia. Terdauhen, arusna min si sedari maka kita me siperpudina itepa Dibata, kita enda anak singuda i bas hubungen ras tinepa-tinepa si deban. Enda nuduhken maka kita nge si perlu man tinepa e labo tinepa e si perlu man banta. E maka sipekena lah adi malem kin ateta ndalani geluhta. Sipeduaken, sikembangken cara berpikir nggeluh ncukupken diri arah pasu-pasu si bereken Dibata. Membudayaken sikap hidup ugahari e me sikap hidup ngasup mengendaliken diri ras nggeluh sederhana. Kita nge kuncina i bas ndalani geluh enda. Ula min sempat biak la erbias-bias engkuasai kita sabab enda jadi sada ulu masalah i bas hubungenta ras tinepa Dibata si deban. Kalak si la ngasup ngataken bujur man Dibata ras ncukupken diri arah kai si bere Tuhan pasti ndabuh ku biak kegeluhen si ncedai. Sipeteluken, ngelakoken tindaken-tindaken si banci mpekena lingkungen umpamana: la ngambekken sampah ku parik, erbahan taman hidup i pekarangen, mpedomani aturen pemaken pupuk ras pestisida, la sembarangen nutungi sampah, erbahan aksi penghijauan raduken ras gereja si deban bagepe pe merintah, ras sidebanna.
DISKUSI :
- Erpalasken Kata Dibata si orati kita, menurutndu kai nge antusen tema singataken “Doni Dem Alu Pasu-Pasu Dibata”?
- Kai banci silakokenndu subuk i bas jabu, gereja ras pe masyarakat ingandu tading gelah tuhu-tuhu doni enda dem alu pasu-pasu Dibata?
USULEN ENDE-ENDEN: :
- KEE GBKP No. 372:1-3= https://www.youtube.com/watch?v=wNdYJ1PjVSA
- KEE GBKP No. 385:1,3= https://www.youtube.com/watch?v=90JL9tyelzE
- KEE GBKP No. 263: 1-3= https://www.youtube.com/watch?v=tBm6NJhSdJs
Pdt. Wisely Pinem, M.Th
HP/ WA: 082365311780