PENGURUS SI TERTEKI

1 Korinti 4:1-5

Rasul-rasul Kristus

4:1 Arus min iakuindu maka kami enda kap suruh-suruhen Kristus dingen pengurus erta-erta Tuhan si ertanggung jawab kerna rahasia Dibata.
4:2 Sekalak pengurus arus teridah maka ia kalak si terteki kap. Enda me si la banci lang i bas sekalak pengurus.
4:3 Soal kitik nge kuakap e adi aku iperiksandu tah iadili kalak si deban. Janah aku jine pe labo kuperiksa bangku.
4:4 Sabap bersih pusuh peratenku; tapi labo e ngatakenca maka aku la ersalah. Tuhan me pagi si meriksa aku.
4:5 E maka ola biasaken ngukum kalak ope denga seh paksana, tapi timailah ngayak reh Tuhan. Iterangina me pagi rahasia-rahasia si gelap denga, janah ipetangkasna isi pusuh peraten manusia si terbuni. Kenca bage maka sekalak-sekalak ngaloken pujin i bas Dibata nari sue ras si patut ialokenna.

(Musyawarah Pelayanan Persekutuan Kategorial)

MODEL PJJ: BUDAYA

KATA PERLEBE :

Runggu, e me sada kebiasan si ilakoken kalak Karo tupung lit sura-sura erkerja subuk e kitik entah mbelin. Runggu e semal i laloken i bas jabu antara bapa, nande ras anak entah ikut i je sangkep nggeluh. Kai pe sura-sura i bas jabu, perlu irungguken. Runggu ertina arih-arih, ercakap-cakap guna sada-sada dahin si ate ilakoken. I bas runggu lit proses nehken pendapat ras ngaloken pendapat. Ulih runggu teraloken kerina si ikut runggu ndai janah radu ras ka ndalankenca alu meriah ukur. I bas kalak Karo kai pe adi irungguken mehuli jadina. Kebiasan runggu enda pe bengket ku bas gerejanta. Kai pe si ateta silakoken i bas gereja perlu irungguken ras perpulungen bage pe ras serayan Tuhan kerina.

I bas piga-piga bulan ku lebe enda unit Persekutuan Kategorial wilayah Sinodal (Moria, Mamre, PERMATA, Saitun, ras KAKR) erbahan runggu. Istilah si ipake gerejanta e me Musyawarah Pelayanan (MUPEL). Amin e igelari musyawarah tapi bentukna e me pertanggungjabapen ras pemilihen. I je ilakoken pemaparen lapuren dahin-dahin si enggo ilakoken sada periode (5 tahun). Kenca teraloken kerina lapuren e, pengurus enggo banci idemisioner, ertina dahinna i bas lima tahun e enggo dung e maka i bahan ka pemilihen pengurus si mbaru. Di kune pengurus si ndekah terpilih denga rikutken ketentun si lit, banci denga ka ia atan i bas kepengurusen si mbaru. Semalna kenca enggo dung pemilihen i je ka me ibahan pelantiken pengurus.

ISI :

Paulus ngerana man perpulungen Korinti kerna pengurus i bas perpulungen. Ia sekalak rasul bali ras Apolos. Ia duana radu-radu persuruhen Tuhan, pengurus erta-erta Tuhan si ertanggungjabab kerna rahasia Dibata. Paulus nuriken kerna si enda erkiteken lit terjadi perpecahen i tengah-tengah perpulungen Korinti erkiteken la seri pengalokenna suruh-suruhen Dibata si erdahin i tengah-tengahna. Paulus ngerana maka kami enda terjeng pengurus ngenca. Kami ngaloken dahin i bas Dibata nari lako nehken kataNa man bandu kerina. I bas kami nehken kataNa e kami pe nggeluh i je. Selaku pengurus, labo kami nggeluh bagi ate-ate kami, tapi bagi si isuraken Tuhan. E maka kai pe nina kalak nandangi kami labo ngkurangi semangat kami nerusken dahin Tuhan. Erkiteken si e ula min lit perpecahen i tengah-tengahndu. Seri min akapndu kami kerina si jadi pengurus erta-erta Tuhan e sabap kerina siidahiken kami e dahin Tuhan.

Tole ituriken Paulus maka biak sekalak pengurus e me terteki. Erkiteken ia ndalanken kai si isuruh Tuhan. Katawari paksa pe ia ersikap ndahiken dahin Tuhan e. E maka di kune pe lit kalak si meriksa pendahinna, entah ngadilisa labo ia mbiar. Adi ikutkenlah pengajaren Tuhan, labo lit dahin e idahiken gelah enggo, entah meros. Paulus natap kempak dirina, maka asa pengidahna ras pengingetna labo lit dahikenna dahin e gelah enggo. Kerina idahikenna arah ukur si bersih ras bujur. Paulus pang mpertanggungjabapken kerina pendahinna i lebe-lebe Tuhan, maka nina, ‘Tuhanlah pagi si meriksa aku.’

Sada pengajaren si ibereken Paulus man perpulungen e me ula pedassa nehken ukumen man pengurus perpulungen adi langa seh paksana. Timailah Tuhan simada dahin e, sabab i bas mata Tuhan tangkas nge kerina kai siidahiken pengurus perpulungen e, labo lit sada pe si terligen. Jesus me kari si nuduhken perbahanen manusia si payo ras si la payo. Janah Ia me pagi si netapken ukumen kai si arus ialoken manusia e.

PENGKENAINA :

Pengurus i bas perpulungen e ndahiken dahin si iampeken man bana. Ulih percakapen-percakapen i bas runggu rapat ntah persidangen si enggo i putusken iendesken man bana guna idahiken. Jadi pengurus labo ndahiken dahin si bagi sura-surana tapi ndahiken kerina si enggo iputusken, amin gia keputusen sekali la bagi si isurakenna. Pengurus i bas perpulungen e tetap erkemalangen man Tuhan i bas ndahiken dahin e ras jadi usihen si mehuli man perpulungen. Bujur, tutus, terteki, lit pengorbanen ras bersih pusuh perukuren enda me biak si arus ipebelin i bas diri sekalak pengurus. Tambah sie, kerina ngawan ni perpulungen perlu kal ndukung ras notoken pengurus si lit, gelah ia pe sehat dingen tetap ergiah-giah ukurna ndahiken dahin Tuhan.

Man pengurus si enggo ndahiken dahinna sada periode enda, tetaplah ukur. Pesikap kerina laporen alu mehuli ras ertanggungjabap. Adi kerina dahin e ilakoken bagi siisuraken Tuhan mehuli nge kerina perdalinen Musyawarah Pelayanen e. Perlu pe si inget maka si mereken dahin e Tuhan kap, janah man baNa ka me perlu ipertanggungjabapken kerna dahin e. Ingan nehken pertanggungjabapen e, e me i bas MUPEL teptep Persekutuan Kategorialta. Kerina peserta runggu e me anak-anak Tuhan, perlu ihamati, iergai alu nehken lapuren si tuhu-tuhuna. Kita enda terjeng pengurus kap ngenca, si mada dahin e Tuhan. Adi pengurus tentu pegancihen, tapi kerina e guna kiniulin perpulungen.

Man kerina perpulungen, perlu si inget maka pengurus e pe lit nge kekurangen ras kesalahen siibahnna, em perluna runggu gelah lit evaluasi pendahin pengurus. I bas runggu e labo biakna ndarami kesalahen, tapi uga gelah terulin ku lebe enda. Erkiteken si e pengurus enda tetap perlu itumpak-tumpak i bas pertoton ras bereken masuken masuken si mehuli. Biakna kin kita nggeluh i bas sada perpulungen guna siajar-ajaren. Tuhan tetap jadi penggurunta, ras kerina siidahiken kita e guna kemulian Tuhan. Terpujilah Tuhan si mada dahin e.

DISKUSI :

1. Kira-kira, pelajaren kai si banci sidatken arah kata-kata Paulus enda? Mari sirunggui kai si ituriken Paulus enda, ‘Tuhan me pagi si meriksa aku.’ i bas pengakunna maka ia sekalak pengurus perpulungen.
2. Di kune kam terpilih jadi pengurus si mbaru i bas persekutuan kategorialta (banci pengurus Moria, Mamre, Saitun, PERMATA ras KAKR) biak kai nge si perlu ipebelinndu i bas dirindu?

USULEN ENDE-ENDEN: :

1. KEE GBKP No. 68:1-2
2. KEE GBKP No. 396:2-3
3. KEE GBKP No. 465:1-2
4. KEE GBKP No. 255:1,4

TOPIK PERTOTON SAPAAT : (khusus tuan rumah ibabai kalimbubu)

DAFTAR BACAAN:

1. Surat-surat Paulus 2, Lembaga biblika Indonesia, 1991
2. Tata Gereja GBKP 2015-2025,
3. P2P PRT Moria GBKP 2015-2025

Pdt. Nurbety Br Ginting, M.Th

HP/WA: 082168696383