ERLAJAR I BAS KEKURANGEN RAS KELEBIHEN

Pilipi 4:10-13

Filipi 4:10 – 13

Terima kasih atas pemberian jemaat

4:10 Aku sangat bersukacita dalam Tuhan, bahwa akhirnya pikiranmu dan perasaanmu bertumbuh kembali untuk aku. Memang selalu ada perhatianmu, tetapi tidak ada kesempatan bagimu. 4:11 Kukatakan ini bukanlah karena kekurangan, sebab aku telah belajar mencukupkan diri dalam segala keadaan. 4:12 Aku tahu apa itu kekurangan dan aku tahu apa itu kelimpahan. Dalam segala hal dan dalam segala perkara tidak ada sesuatu yang merupakan rahasia bagiku; baik dalam hal kenyang, maupun dalam hal kelaparan, baik dalam hal kelimpahan maupun dalam hal kekurangan. 4:13 Segala perkara dapat kutanggung di dalam Dia yang memberi kekuatan kepadaku.

Pengataken bujur

10Mbelin kal keriahen si kugejapken i bas geluhku erkiteken persadanku ras Tuhan. Kenca bage dekahna, lit ka kesempatenndu sekali nari ncidahken maka iperdiatekenndu kap aku. 11Labo maksudku maka lanai aku iperdiatekenndu, saja lanai kin lit kesempatenndu ncidahkenca. Janah si enda kukataken labo erkiteken kugejap maka aku lanai iperdiatekenndu; sabap aku enggo erlajar encukupken alu kai si lit i bas aku. 12Kueteh nge kai ertina nggeluh i bas kekurangen, janah kai ertina nggeluh i bas kelebihen. Enggo dat aku rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen. 13Ngasup aku ngalaken kerina keadan erkiteken kuasa si ibereken Kristus man bangku.

(Keugaharian)

METODE PJJ: PARTISIPATIF

KATA PERLEBE

Menurut KBBI (Kamus Besar Bahasa Indonesia) keugaharian ertina kesederhanan/kebersahajaan. Ertina melala pe erta kinilitenna tapi ngasup nggeluh alu sederhana. Enda ijembaken man banta nginget gegehna “roh hedonistis” si ngkenai masyarakat seh lanai akapna puas bas dirina erkiteken lanai terpilahsa kerna apai kebutuhen ras apai keinginen, dungna lanai ngasup ngataken bujur man Tuhan. Labo curak kegeluhen si bage si ngena ate Tuhan. I bas Matius 6:11, Tuhan Jesus ngajari kita ertoto: …. bereken min man kami nakan cukup i bas wari si sendah enda… Cukup ertina kita ngasup ngidah dingen mindo kai si penting, si erguna, si kin tuhu-tuhu keperlunta, labo ipalasi perukuren si merangap. Tuhan situhuna mereken kecukupen man banta, tapi perukurenta si “hedonistis, materialistis” nge si erbahanca kita lanai ngasup nggejapken kecukupen siibereken Dibata. E maka bas perpulungen jabu-jabunta enda iajuk kita guna nggeluh i bas keugaharian seh maka ngasup kita tetap ngataken bujur man Tuhan dingen pe kepate man temanta manusia.

ISI

Pilipi e me perpulungen si pemena ipanteki Paulus i Eropah, janah perpulungen enda tetap ncidahken dukungen nandangi dahin pebelangken Berita Si Meriah sinilakoken Paulus. Salah sada tujun Paulus nulisken suratna man perpulungen Pilipi e me guna ngataken bujur man Tuhan erkiteken pengkawaliNa erkelangken perpulungen Pilipi si enggo nehken penampatna. Mbelin kal keriahen si kugejapken i bas kegeluhenku erkiteken persadanku ras Tuhan (ay. 10). Gia bas penjara tapi la aru ate Paulus, la ia kelungunen, la ka ndele ukurna sabab igejapkenna Tuhan nemani ras engkawali geluhna. Salah sada tanda pengkawali Tuhan si erbahanca ukurna meriah e me arah penampat perpulungen Pilipi (ayat 10b). Kata kenca bage dekahna…labo nuriken kendelen ukur sabab Paulus enggo nuriken maka lanai lit kesempaten man perpulungen e guna ncidahkenca (ayat 11a). E maka labo atena morah di kin pe enggo ndekah perpulungen e la nehken penampatna. Kata sekali nari nuriken kerna Paulus meteh maka e nari ngenca kesempaten man perpulungen Pilipi nehken penampatna man Paulus. Paulus ngidah maka lanai ndekahsa ia ipermuliaken Dibata guna Berita Si Meriah.

Gia kidekah enda Paulus la ngaloken penampat i bas perpulungen nari, tapi e lanai persoalen man bana sabab ia enggo erlajar ncukupken alu kai si lit bas ia. Erlajar ertina lit kininggiten dingen usaha guna ngaturken kai si lit bas ia alu mehuli ibenaken alu menata pusuh ras pikirenna. Kiningasupen ngaturken pusuh ras pikiren enda me sierbahanca Paulus ngasup ncukupi alu kai si lit bas ia. Paulus lanai ngayaki perkara-perkara doni enda, sipenting man bana uga segelah Berita Si Meriah banci tetap ipembarken, e me tujun ras keriahen geluhna. Erkiteken em perayaken ras tujun geluhna maka lanai persoalen man Paulus kekurangen pangan, inemen entah uis, lanai aru pe atena anem ia i bas penjara. Situhuna sierbahanca manusia lalap kekurangen, la akapna puas, dungna ndabuh ia ku bas sikap “materialisme” bagepe “hedonisme” e me kinilangasupen netapken perayakenna nggeluh, la ietehna kai si perlu dingen meherga bas geluhna. Tapi Paulus alu tetap ukur nentuken tujun ras keriahen geluhna e me jadi saksi Berita Si Meriah.

Paulus ngataken maka ietehna kai ertina nggeluh bas kekurangen bage pe nggeluh bas kelebihen, enggo datna rahasiana (ayat 12). Nggeluh bas kekurangen ertina kai siniukurken kita kerna keperlun nggeluh la tersehi, janah nggeluh bas kelebihen e me kecibal ija kai siniukurken kita kerna keperlun geluh kerina terpenuhi. Buen manusia rusaha segelah geluhna banci min lit i bas kelebihen labo kekurangen. Nggeluh bas kelebihen enda me perayaken enterem jelma sabab iakapna e me dalan dat keriahen. Tapi Paulus la bage, ia lanai ngukurken sie erkiteken, enggo datna rahasiana. Kai rahasiana? E me nina bas ayat 13: “Ngasup aku ngalaken kerina keadaan erkiteken kuasa siibereken Kristus man bangku”. Kuasa Kristus si mereken kengasupen ngalaken kerina keadaan e me si pentingna, sabab kengasupen e erbahanca Paulus tetap ermeriah ukur, dingen sabar i bas ndalani geluhna bas penjara. La gulut ukurna, la aru dingen erbera-bere pusuhna sabab tek ia maka Tuhan tetap engkawali geluhna. Jadi Paulus la ernalem ku bas kai si lit bas ia (materi-kiniliten), tapi ernalem man kuasa Kristus. Erkiteken kuasa Kristus me erbahanca malem atena katawari paksa pe subuk ia bas besur entah melihe, subuk bas ia kelebihen entah pe kekurangen. Palas kegeluhen Paulus labo ku bas kebayaken doni, tapi kebayaken kuasa Kristus. Tek Paulus kuasa Kristus e ncukupken kerina siniperlukenna guna ngelakoken si mehuli bagi si enggo iaturken Tuhan nandangi geluhna. Erkiteken enda me maka la ia eraru ate dingen erbera-bera pusuhna.

Cara rukur Paulus enda tentuna arus lit bas diri kerina kalak si erkiniteken, ija geluhta ernalem man Tuhan. Bagi nina Tuhan Jesus i bas Matius 4: 4 “….labo alu roti saja manusia nggeluh, tapi arah teptep kata si ibelasken Dibata”. Manusia labo banci nggeluh bas kecukupen adi labo terpilahsa alu tangkas kerna keperlun ras sura-sura. E maka perayaken nggeluh arus tangkas dingen benar, janah e me jadi tolak ukur man banta guna nentuken apai sura-sura ras keperlun. I bas kita ncakapken kerna nggeluh keugaharian arus maka siutamaken hal-hal sisipatna keperlun, janah ngasup mitah si jadi sura-sura. Labo mesti kerina sura-sura si tulak bas geluhta, saja ula ka min sura-sura lanai tangkas man banta.

PENGKENAINA

Megati manusia erpengakap kerna kesuksesen erpalasken uga buena erta-ertana. Kecibal si bagenda rupa erbahanca pusuh ukurna la akapna puas nandangi kai si enggo lit bas geluhna. Dungna man bana saja ngenca iukurkenna lanai lit ukurna ngukurken kalak si deban bage pe kurang ngataken bujur man Tuhan, sabab si lit bas ia e pe la akapna bias. Deba guna banci ndatken terbuen lanai akapna salah erbahan si la mehuli bas geluhna. Paulus la ngidah geluh enda terjeng nehi sura-sura geluh saja si megati la lit balengna, sipenting i bas Paulus e me nggeluh nehken peraten Dibata. Kegeluhen si mpermuliaken Tuhan e me kegeluhen si sukses i bas pengidah Paulus seh maka gia ia kekurangen dingen bas penjara pe banci meriah dingen melem atena.

Arah kata Dibata enda iajuk kita nggeluh i bas kecukupen, ertina kita nggeluh i bas kai si penting dingen erguna rikutken peraten Tuhan. Kesederhanaan i jenda labo ertina keadaan tapi ertina situasi pusuh ras pikiren. E maka banci nge kalak bayak kal tapi sikap perukurenna sederhana, ija ia meteh kai si penting dingen erguna i bas kinilitenna guna ipakekenna mpermuliaken gelar Tuhan. Bage pe amin pe kurang bas ia (bagi kecibal Paulus) tetap lit ukurna dingen tindakenna guna berbagi ras kalak si deban. Sikap pusuh si ipalasi kesederhanaan (kebersahajaan) erbahanca kita ngasup ngaturken kinilitenta alu mehuli, la lit pemere Dibata bas geluhta sia-sia guna pepuasken biak kedagingenta alu erpoya-poya entah nukur si labo keperlun. Kalak si mpergunaken pemere Dibata ku kerina si labo erguna maka ia ersalah kempak Dibata. E maka i bas kerina pemere Dibata sipergunakenlah guna mpermuliaken gelar Tuhan, selain ncukupken keperlun geluhta siinget ka pe kalak si deban si man sampaten bas geluhta. Sicibalkenlah pengertinta kerna keperlun sue ras perayaken geluhta guna mpermuliaken Tuhan bagi sinilakoken Paulus.

DISKUSI:

1. Turikenlah palas perukuren Paulus si erbahanca bas penjara pe ia tetap ermeriah ukur.

2. Sue ras pemere si enggo ibereken Tuhan kidekah enda man bandu, apai nge buen ipergunakenndu: nehi tuntuten gaya hidup entah ngelakoken perkara-perkara si mehuli dingen si erguna nandangi sekelewetndu?

USULEN ENDE-ENDEN:

1. KEE GBKP No. 317:1-2

2. KEE GBKP No. 288:1-2

3. KEE GBKP No. 249:1-2

4. KEE GBKP No. 215:1-2

DAFTAR BACAAN

Pdt. Juda Diva Sebayang, S.Th

HP/WA: 081374387220