Ncidahken Keleng Ate
Teks : 2 Samuel 9: 1-13
2 SAMUEL 9
Daud ras Mepiboset1 I bas sada wari nungkun Daud, “Lit denga nge tading keluarga Saul? Adi lit kucidahken ateku keleng ateku erkiteken Jonatan.”2 Lit sekalak pelayan keluarga Saul gelarna Siba janah idilo ia ndahi Daud. “Kam Siba?” nina raja nungkunsa.“Aku Tuanku,” nina njabapsa.3 Isungkun raja ia nina, “Lit denga kang keluaga Saul tading? Adi lit ateku encidahken kesetianku ras keleng ateku, bagi si kupadanken man Dibata.”Nina Siba njabapsa, “Lit sekalak nari e me anak Jonatan si dilaki. Cempang ia.”4 “I ja ia?” nina raja nungkun.“I rumah Mahir anak Amiel i Lodebar,” nina Siba. 5E maka isuruh Raja Daud gelah ia reh.6 Kenca Mepiboset anak Jonatan kempu Saul enggo seh, erjimpuh ia i lebe-lebe Daud alu mehamat. Iperkuanken Daud ia, “Mepiboset.” Ngaloi ia nina, “Kai Tuanku?”7 “Ola mbiar,” nina Daud. “Kukelengi ateku kam erkiteken bapandu Jonatan. Kuulihken man bandu kerina taneh sikerajangen ninindu Saul, janah kam banci tetap man i istana.”8 Erjimpuh ka Mepiboset janah nina, “La kap aku ulin asa biang mate, Tuan! Engkai maka bage kal ulina kam man bangku?”9 Kenca bage idilo raja suruh-suruhen Saul, Siba gelarna, jenari nina, “Kubereken man Mepiboset, kempu tuanndu kerina sikerajangen Saul ras keluargana.
10Kam, anak-anakndu, ras suruh-suruhenndu arus nuani taneh e guna keluarga tuanndu Saul, janah pepulung ulihna man nakan keluarga tuanndu e. Tapi Mepiboset tetap kami ras man.” (Lit sepuluh lima kalak anak Siba dilaki janah suruh-suruhenna lit dua puluh kalak.)11 Nina Siba njabapsa, “Kerina perentahndu tetap kudalanken raja.”Dage ras raja me si Mepiboset man, bali ras sekalak anak raja.
12 Lit sekalak anak Mepiboset dilaki nguda denga, gelarna Miha. Kerina anggota keluarga Siba jadi suruh-suruhen Mepiboset.
13 Dage Mepiboset si nahena duana cempang, ringan i Jerusalem tetap man i istana raja.
Tema : Ncidahken Keleng Ate
Tujuan : Gelah Mamre:
- Meteh Daud erkeleng ate man Mepiboset
- Tetap setia bas perjabun gia la jumpa tuah
KATA PENARUH
Ncidahken keleng ate e me biak kalak si tek, sabab kalak si tek nggo leben nggejapken ia enggo ikelengi Dibata. Umputen penggejaben ersuruh ukur guna ngkelengi kalak si deban nandangi perbahanen Dibata. Kalak si erkeleng ate tandana Dibata ringan i bas ia, itandaina Dibata sabab Dibata kekelengen kap. Anem ise pe labo ngidah Dibata, tapi adi nggeluh sikeleng kelengen e tandana Dibata lit itengah tengahna.
I bas 1 Korinti 13: 13 tersurat lit telu si tetap e me: kiniteken, pengarapen ras kekelengen. I bas si telu e si mbelinna e me kekelengen. Kiniteken ras pengarapen labo idah, ulih kiniteken ras pengarapen teridah arah kekelengen dingen ernanam ras tergejab man kalak sideban. Kalak si ngaku tek man Dibata tapi segat atena seninana, kalak si bage erguak. Ise singkelengi Dibata ikelengina pe seninana (1 Joh.4: 21). Kalak si ndalanken kekelengen idalankenna kap kerina undang-undang.
URAIAN TEKS
Daud ndarami si man kelengenna, si enda la semal jadi. Bicara lit si begi kalak ngerana man temanna “Kai si banci ku sampati?”. Langa bagi si ilakoken Daud nandangi Mepiboset. Semalna si jadi gatin ituduhken si man kelengen tapi mbuen si erpenulak guna ngkelengi. Daud nungken pelayan keluarga Saul gelarna Siba nina: “Lit denga nge tading keluarga Saul? Adi lit kucidahken ateku keleng ateku”.
Daud ras Saul nai ermusuhen, narus si bunuhen. Saul selaku raja erpengakap Daud e saingenna. Saul ngayak-ngayak Daud dingen ersura-sura munuh Daud, e maka Daud kiam dingen cebuni. Kerna si e Daud la erbalas. Paksa lit kesempaten guna munuh Saul, Daud la munuh Saul.
Kenca Daud jadi raja janah Saul enggo mate, idaramina keluarga Saul guna ikelengina. Ikataken Siba man Daud lit kempu Saul anak Jonatan gelarna Mepiboset ia cempang. Itenahken Daud ia ku istana, sengget kel Mepiboset dingen gentar tapi ipetetap Daud ukurna dinegn ngerana alu melias bana nina: ola kam mbiar, ku kelengi ateku kam erkiteken bapandu Jonatan.
Ngaloken kai si ikataken Daud man bana, Mepiboset ermeteruk ukur alu erjimpuh dingen ersumekah nina: O Tuan, la kap aku lebih asa biang mate, ngkai maka bage ulina kam man bangku? arah si enda si idah maka Mepiboset pe itandaina bana dingen igejapkenna maka labo ia metunggung ndatken kekelengen arah Daud nari. Tapi Daud erpadan mpekena-kena Mepiboset. Juma ninina Saul iulihken man Mepiboset ras anak-anakna guna iperjumai. Mepiboset tading ibas istana, man ras minem i bas istana kai si ipan raja e ka ipan Mepiboset.
Luar biasa kekelengen Daud nandangi Mepiboset, tentu enda labo erkiteken Jonatan saja tapi pe erkiteken Tuhan lit nggeluh i bas pusuh Daud. Erkiteken Daud mbiar man Dibata idaramina si man kelengenna. Kai si ibahanna e bali akap Daud bagi ngkelengi Dibata. Daud nggejapken ia jadi raja erkiteken perbahanen Dibata, Dibata si ngangkatkenca i juma nari ku istana. E maka Daud ngelakoken kai si ngena ate Dibata alu ngkelengi kalak si labo iperhitungken ngkelengi Mepiboset si cempang duana nahena. I bas kecibal Mepiboset si meteruk dingen kelungunen bandi tading i istana si mewah bagi si inanami Daud juma nari ku istana.
Kalak si nggeluhken geluhna i bas Tuhan ndarami ise si man kelengenna Daud maba Mepiboset ku istana, bali akapna bagi ngelai Tuhan i istana. Kekelengen Daud la terjeng biber tapi teridah arah perbahanen si ernanam man Mepiboset, ernanam man keluarga Saul. Kerina enda jadi tanda kesetiaan Daud man Tuhan.
PENGKENAINA
Itengah-tengah kegeluhenta selaku kalak si erkiniteken, kita la pulah i bas perbeben. Lit perbeben i bas jabu langa jumpa tuah. I bas kecibal si bage arus positip caranta rukur. Labo arah anak ipupus ngenca seh pasu-pasu Tuhan man banta. Langa gia lit anak ipupus tetap ernalem ate, sempabu, setia selaku perbulangen ras ndehara. Nggeluh sikeleng-kelengen e pe pasu-pasu Tuhan.
Lit ka nge jadi i bas jabu lengkap mupus anak dilaki ras diberu, tapi anak ka rusur mpeturah masalah si erbahanca picet ukur, getem pusuh ngukuri pengkebet anak e. E maka Tuhan Jesus pernah nge ngatakenca nina: “Sangap kal diberu si la ertuah, si la pernah mupus dingen si la pernah pepinemken (Luk. 23:29).
Lit ka perbeben erkiteken anak diberu ngenca lit i bas jabu, si bage pe tetap arus rukur positip. Ia nge akap Dibata ntahsa kita ngasup ndidik anak dilaki. Tah pe anak dilaki ngenca lit e ka nge si mehulina akap Dibata. Dibata mereken si mehuli man banta. Langa gia si akap lengkap pemere Dibata ula kita celus ku bas kiniteken si ndekah e me bagi “nengget”.
Arah tendi isengget lit ka akap banci jadi perubahen i bas si dilaki tah diberu si la mupus. Secara medis langa si e terbuktiken ras langa terpastiken. Perlu metenget ibas nengget e banci jadi lit muaten kiniteken si ndekah, banci campur tan iblis i bas nehi sura sura e.
Tendi labo man senggeten, tapi man petenengen. Adi lit si kurang i bas kita arus sabar tetap mindo man Dibata, adi payo iakap Dibata pasti ibereNa. Adi lenga ibereNa em si mehulina man banta. RIkutken kinitekenta Ngekelengi/”Mengadopsi” anak bagi ibahan Daud man Mepiboset e me perbahanen si mehuli. Kai pe jadi katakenlah bujur man Dibata i bas si kugapana pe. Sabab Dbata tetap erdahin guna kiniulinta e maka tetap i bas Dibata dingen si riahken uga litna. Dibata simasu-masu kita.
DISKUSI
- Kai nge si ilakoken Daud i bas ncidahken kekelengen arah bahan PA Mamre wari enda?
- Kai nge arus si ilakoken Mamre gelah hubungen perbulangen ras ndehara tetap harmonis, tetap nggeluh sikeleng-kelengen, anem gia labo kerina bagi ukurta?
Usulen Lagu
- KEE GBKP No. 296:1,3
- KEE GBKP No. 254:1,2,3
- KEE GBKP No. 334:1,2
- KEE GBKP No. 272: 1- (persembahen)
Pdt. Diman Ginting, S.Th, MA.
HP: 0812 6350 496