Nggunaken Kula Alu Pentar

Konsep Etika Nggeluh Kalak Karo 1: Sumbang Perkundul, Perpan, Perdalan, Peridi ras Perpedem

Nas Kuan-kuanen 3: 21 – 26

Amsal 3: 21 – 26

3:21 Hai anakku, janganlah pertimbangan dan kebijaksanaan itu menjauh dari matamu, peliharalah itu,
3:22 maka itu akan menjadi kehidupan bagi jiwamu, dan perhiasan bagi lehermu.
3:23 Maka engkau akan berjalan di jalanmu dengan aman, dan kakimu tidak akan terantuk.
3:24 Jikalau engkau berbaring, engkau tidak akan terkejut, tetapi engkau akan berbaring dan tidur nyenyak.
3:25 Janganlah takut kepada kekejutan yang tiba-tiba, atau kepada kebinasaan orang fasik, bila itu datang.
3:26 Karena Tuhanlah yang akan menjadi sandaranmu, dan akan menghindarkan kakimu dari jerat.

3:21 Erkiteken si e o anakku, ola kal sirangi kepentaren ras pemeteh! Ola pulahi pe.
3:22 E kap si mereken kegeluhen, kegeluhen si senang dingen dame man bandu.
3:23 La kam biar-biaren erdalan janah la terantuk pe.
3:24 Tupung tunduh la kam mbiar janah badeh pertunduhndu gedang-gedang berngi.
3:25 La pada aru atendu kerna kebiaren si rempet rehna, desken galumbang si rempet ngombakken kalak jahat.
3:26 TUHAN si njagai kam, la ipelepasna kam jertuh kena siding.

Tema: Nggunaken Kula Alu Pentar

Gelah PERMATA GBKP
1. Meteh kerna orat nggeluh kalak Karo (sumbang perkundul, perpan, perdalan, peridi ras perpedem)
2. Makeken ras ncidahken orat nggeluh (sumbang perkundul, perpan, perdalan, peridi ras perpedem)

Metode: Inventarisir Kerna Perkundul, Perpan, Perdalan, Peridi ras Perpedem (Tabel Rorat ras La Rorat)

I. BENA KATA

Kula eme bagin sipenting man jagan, sebabna kula e me si natang-natang kerina ring-ring si lit i bas kula. Alu kata sideban, kula banci ka si ertiken e me kap selaku persembahen si nggeluh man Dibata (bnd. Rm. 12: 1b). Nginget kerna pentingna kula e man jagan, emaka i bas bahan PA PERMATA GBKP wari enda mabai PERMATA GBKP gelahna nggunaken kula alu pentar. Rikutken budaya kalak Karo, mehuli kel ibahan nini-nininta si nuria ngaturken kerna ngergaken janah nggunaken kula alu pentar. Teridah arah sumbang si siwah si nggo lit nuria nari seh paksa genduari enda. Mari dage sigar-gari kawiten bahan PA PERMATA GBKP wari enda ras sumbang si lit i bas kalak Karo.

II. ISI

Kitab Kuan-Kuanen enda salah sada bagin kitab si lit i bas Padan Sindekah. Sinuriken kerna kata ajar, pedah dingen kepentaren si itulisken Raja Salomo. Raja Salomo jelas nge si eteh kerina kerna kepentarenna. Emaka tujun kitab Kuan-Kuanen enda nuriken kerna pengajaren ras pedoman si praktis bagepe etika kegeluhen. Alu fokus tetap nggeluh sue ras kepentaren si rehna i bas Dibata nari.

Secara khusus Kuan-Kuanen 3: 21 – 26 enda ngerana kerna kepentaren si seh kel perluna i bas kegeluhen enda. Pentarlah janah cerdiklah, enda dua hal si erkontribusi i bas kegeluhenta manusia bagepe njemba guna sidatken keamanen, ketenengen, pengkawali si rehna i bas Dibata nari. Mari sigar-gari terbagesen kerna bahan ogenta si jadi renungenta i bas PA PERMATA wari enda, e me:

1. Ayat 21: Si itekanken i bas ayat enda gelahna min kita njagai kepentaren ras pemeteh si lit i bas diri tep-tep manusia. Kepentaren ras pemeteh enda la banci lang jadi bagin i bas integral kegeluhen manusia si tep-tep wari. Sebabna adi erpemeteh ngenca tapi la idemi alu kepentaren, e banci mabai kita ku dalan si la ngena ate Dibata. Misalna, genduari melala si idah kalak si erpemeteh tapi lepak perdalanna (koruptor, teroris, rsd). Emaka gelah ula lepak perdalanenta si ibabai pemeteh arus me kap i imbangi alu kepentaren. Sebab kepentaren me simabai kita nggeluh alu bujur.
2. Ayat 22: Arah kepentaren ras pemeteh si ibereken Dibata enda tentuna mereken dampak si mbelin i bas manusia. Arah kepentaren ras kecerdiken enda me sierbahansa manusia meherga dingen ndatken kehamaten desken perhiasen si lit i bas kerahungndu sue ras bahan ogenta ndai.
3. Ayat 23: Alu makeken kepentaren ras pemeteh si rehna i bas Dibata nari, maka idatkenndu me kap dalan kegeluhen si aman ras si payo. Alu bage kalak si makeken kepentaren ras pemeteh ngasup ngalaken perbeben kegeluhen ras makeken keputusen alu benar.
4. Ayat 24: Kepentaren ngasup mereken ketenengen baik i bas perukuren bagepe perbahanen. Seh maka la ia mbiar i bas erbage-bage situasi, emaka pertunduhna pe badeh ras ipedauh arah kebiaren bagepe ukur gulut.
5. Ayat 25-26: Arah ayat enda ibereken ketetapen ukur nandangi manusia. Aminna pe kita ngalaken erbage perbeben ras percuban kegeluhen tapi la perlu mbiar. Sebabna Dibata me kap sumbul ketenengen ras penampat si tuhu-tuhu. Enda encidahken maka kinitekenta man Dibata si mereken
keamanen ras ketenengen si tuhu-tuhu.

Mari si perdiateken ras sidarami kawitenna nandangi sumbang i bas kalak Karo. Perlu si eteh, nini-ninita si nuria enggo nandai kepentaren ras pemeteh salah sadana e me kerna sumbang si siwah. Tapi, i bas bahan PA PERMATA GBKP wari enda si pebagesi pengangkanta arah lima bagin sumbang i bas kalak Karo. Sumbang enda e me ngerana kerna aturen / larangen nandangi kalak Karo. Aturen / larangen enda njemba kalak Karo banci ratur i bas erbage-bage dampar kegeluhen khususna teridah arah biak si mehamat. Sebab biak si mehamat e tentuna mereken kegeluhen si senang dingen dame (bnd. Ay.22). Secara luas pengertin enda me si ikataken etika kegeluhen i bas kalak Karo. I bas budaya Karo si enggo leben iaturken nini- nininta sinuria, sumbang enda lit 9 buena. Tapi i bas bahasenta PA PERMATA Swari enda, 5 sumbang si ipetandaken man PERMATA GBKP kerina.

Sumbang e me:

1. Sumbang Perkundul (Tata Krama dalam hal Duduk)
Sumbang perkundul enda ngaturken kerna posisi perkundul. I bas budaya Karo, kalak sincidahken dirina mehamat arusna kundul alu “muncayang” (kaki bersila) dan “terdo” (kaki melunjur). Bagi singuda-nguda, adi kundul arus erkampuh/erabit (nuduhken kehamaten nandangi sekelewet). Bagepe adi sekalak si enggo pernanden janahna pepinemken (menyusui) ia la banci kundul deher si mehangkena (bengkila, turangku, turang). Bagepe sekalak perbapan entah pe dilaki si enggo erjabu la banci kundul sidegesen tiwen (lutut yang berdampingan) ras mama bagepe silihna. Bagenda me secara singkat penjelasen kerna sumbang perkundul.

2. Sumbang Perpan (Tata Krama dalam hal Makan)
Tua-tua sinuria entah pe orang tuanta enggo semal kel ngajarken hal si enda nandangi kita kerina anak-anakna. Pengajaren enda ngajarken kita gelahna ncidahken biak mehamat nandangi ise saja pe erkelangken caranta man. Sumbang perpan enda ngajarken gelahna i bas kita man la banci
“kulcipen” (bersuara) bagepe “merimah” (nasi keluaran dari piring). Bagepe adi si nuria ngajarken gelahna ula man pangan si pantang (haram) sue ras merga ni babana. Misalna, Sembiring si labanci man biang ras si banci ma biang, rsd.

3. Sumbang Perdalan (Tata Krama dalam Berjalan)
Sumbang perdalan enda ngajuk gelahna kita erdalan alu mehamat janah la “mejarjar” (sembrono) / “metumbur” (ceroboh). Emaka perdalan pe harus sikap, tan la banci i awin-awinken la turi-turin, perjingkang pe la banci ngempet (hentakan kaki secara halus). Cara erdalan si mehuli ras mehamat nuduhken biak simehuli nandangi kalak si deban. Emaka lit kuan-kuan nina, *…pengodakndu e, perdalanndu e erbahansa aku bene”, artinya cara berjalan yang baik dapat membuat seseorang tertarik atau jatuh hati.

4. Sumbang Peridi (Tata Krama dalam hal Mandi)
I bas kuta seh ngasa genduari budaya ridi e me lawes ku tapin. Tapin megati i andingken jelma sinterem e me kamar mandi umum. Janah i bas tapin enda rata-rata ridi la erbasahen, emaka ibahan me turi-turin kerna sumbang peridi. Emaka i bas sumbang peridi enda, budaya Karo ngajarken gelahna ridi
pe harus mehamat janah la banci ridi ras si mehangke sekalak jelma (mis. Bebere/kela ras mamana, silih, bagepe ras edana). Emaka guna metehise si bas tapin sangana ridi, ibahan me kode sope denga sekalak masuk ku tapin.

Kodena e me,
Adi dilaki:
A: Mboah…
B: Dilaki…
A: Ise…?
B: Aku e… Bp. Ndaram…

Alu bage i eteh me ise si sangana ridi i tapin. Bage ka pe sidiberu sope denga masuk ku tapi, tentuna i sungkun me darat tapin nari guna meteh ise si bas tapin sangana ridi.

5. Sumbang Perpedem (Tata Krama dalam hal Tidur)
Sinuria tading i bas sada rumah tergelar rumah si waluh jabu. Rumah si waluh jabu enda lit 8 jabu si tading i bas rumah e. Emaka i aturken me kerna sumbang perpedem gelahna arah medem pe teridah biak si mehamat. Terlebih-lebih rumah e la lit kamarna, emaka i aturken adi sekalak anak dilakí si enggo pancaroba (pubertas) lanai banci tunduh i rumah tapi tunduh i los kuta entah pe bas lumbung page. Bagepe anak si diberu inganna tunduh i rumah janah biasana posisi singuda-nguda tunduh deherken jabu ture, gelahna kune reh anak perana naki-naki ku rumah banci mis jumpa ras. Emaka
sumbang perpedem enda iaturken guna kiniraturen medem i bas sinuria. Tapi, zaman genduari enda pe tetap ipakeken kerna sumbang perpedem enda.
Semalna adi lit pulung-pulung i bas jabu, janah keluarga ras kerina medem i jabu tengah. Emaka adi si biak ersilih la banci ndeher medem, janah si biak ermama pe mehangke adi medem ndeher ras, apaika si biak erturangku sama sekali la banci ndeher medem.

III. PENGKENAINA

Kitab kuan-kuanen ndai ngajuk PERMATA GBKP gelahna banci nggeluh alu pentar janah meteh mehuli i bas ndalani kegeluhen enda. Emaka sijadi kawiten nandangi bahan PA PERMATA GBKP ras orat nggeluh kalak Karo erkelangken sumbang sue penjelasen sidatas e me, kalak pentar nggeluh alu meteh mehuli janah mehamat. Sebap arah kepentaren me teridah biak kehamaten. Biak kehamaten eme si mereken kegeluhen si senang dingen dame. Terkhusus PERMATA GBKP ija pe ringan paksa enda, sope denga kin nini-nininta sinuria nandai Dibata enggo iajarkenna man kesusurenna gelahna nggeluh mehamat ras meteh mehuli. Biak si mehamat e icidahken arah perbahanen si tep-tep wari, emaka arah pengajaren enda me isuanken tata krama nandangi anak anakna.
Genduari kita kerina si enggo nandai Dibata, tentuna min biak mehamat enda enggo banci si cidahken arah kiningudan anak PERMATA GBKP. Gelahna ula lit sada kalak pe mapas man PERMATA GBKP aminna pe ia nguda denga. Sebab arah kinihamatenna me si erbahansa ia meherga nandangisekelewetna. Erkelangken sumbang si lit i bas kalak Karo epe jadi pengajaren man anak PERMATA GBKP. Gelahna anak PERMATA GBKP enda nuduhken biak si mehuli, si mehamat e teridah arah buah kepentaren sue ras isi Pustaka Si Badia.

Lau Renun bentasina kuta Pamah Simalem
Melala ije nurung bagepe sulung-sulungna
PERMATA GBKP arus nuduhken biak si merim
Teridah arah ndalanken kepentaren sue ras isi Pustaka Si Badia

Kekelengen kap benana kita ndalanken pedah Dibata
Nina kuan-kuan kalak Karo, dalankenlah simehuli janah tetap megermet
Sumbang si siwah enggo iajarken nini-nininta sinuria
E gelah palas anak PERMATA GBKP guna banci ncidahken biak simehamat

IV. METODE:
Menginventarisir biak si gel-gel i bas perkundul, perpan, perdalan, peridi ras perpedem jenari kawitken ras sumbang si lima (5)!!!

No.	Si La Rorat	Si Rorat
1	Man Kulcipen	Man ula kulcipen
2
3
4
5
6
7	Terusken..

V. USULAN LAGU
KEE GBKP No. 249:1,5 “Ajar Aku O Tuhanku”

Vic. Brema Ekin R. Surbakti S.Si (Teol)
BIMBINGAN PA PERMATA GBKP TAHUN 2025