Seri Kap Aku ras Kam

Hakim-hakim 4: 8 – 9

4:8 Jawab Barak kepada Debora: “Jika engkau turut maju akupun maju, tetapi jika engkau tidak turut maju akupun tidak maju.”
4:9 Kata Debora: “Baik, aku turut! Hanya, engkau tidak akan mendapat kehormatan dalam perjalanan yang engkau lakukan ini, sebab TUHAN akan menyerahkan Sisera ke dalam tangan seorang perempuan.” Lalu Debora bangun berdiri dan pergi bersama-sama dengan Barak ke Kedesh.

Hakim-hakim 4: 14 – 15

4:14 Lalu berkatalah Debora kepada Barak: “Bersiaplah, sebab inilah harinya TUHAN menyerahkan Sisera ke dalam tanganmu. Bukankah TUHAN telah maju di depan engkau?” Lalu turunlah Barak dari gunung Tabor dan sepuluh ribu orang mengikuti dia,
4:15 dan TUHAN mengacaukan Sisera serta segala keretanya dan seluruh tentaranya oleh mata pedang di depan Barak, sehingga Sisera turun dari keretanya dan melarikan diri dengan berjalan kaki.

Kesetaraan Gender
Nas Hakim-Hakim 4: 8-9, 14-15
Tema: Seri Kap Aku ras Kam

Gelah PERMATA GBKP
1. Ngidah kesetaraan antara Debora dan Barak
2. Ngangkai maka ibas kepemimpinen, dilaki ras diberu ndatken kesempaten si seri

Metode: Debat Publik (Pro Kontra Kepemimpinan dilaki ras diberu)

I. BENA KATA

Bena-benana Dibata nepa doni enda ijadiken-Na manusia dilaki ras diberu eme Adam ras Hawa. Seri idah Dibata manusia e duana, janah mehuli akapna ngidahsa, amin Adam leben itepa asangken Hawa tapi labo nguraki erga Hawa ilebe-lebe Dibata. Kenca ia itepa duana nge maka Dibata ngidah mehuli siitepana ndube. Tuhu maka manusia dilaki ras diberu e beda rupa, baik secara kula (ind, biologis), perukuren bagepe psikisna.

Lit 3 secara kodrat beda diberu ras dilaki eme mupus ntahpe melahirkan, reh bulanen/menstruasi bagepe pepinemken ntahpe menyusui. Enda nuriken maka secara biologis dilaki ras diberu la seri. Karakteristik dilaki ras diberu siibangun itengah-tengah lingkungen masyarakatta rusur sipake istilah GENDER. Gender labo seri ras jenis kelamin, jenis kelamin mbedaken biologis antara dilaki ras diberu. Gender ngerana kerna kecibal sekalak jelma (ind. identitas, pembagian peran & kedudukan) arah pengaruh orat nggeluh ras kebiasaan itengah-tengah masyarakat.

II. ISI

Arah Pustaka Sibadia siidah maka Dibata banci make ise pe ibas nelamatken bangsana. Dibata kreatip make isepe guna mpeseh perentahna man manusia. Tupung bangsa Israel erdosa ka man Tuhan, ibere Dibata Jabin, raja kalak Kanaan nguasai bangsa e. Secara perlengkapen perang bangsa Israel talu sebab lit siwah ratus gereta besina erban mesui kel ate Israel iteruh pimpnen puanglimana, Sisera. Lebih 20 tahun bangsa e erlebuh mindo penampat janah mekuah ate Dibata iutusna me sekalak nabi diberu eme Debora guna mpersingeti bagepe ngerunggui bangsa Israel. Debora enda
sekalak ndehara, perbulangenna tergelar Lapidot. Debora sekalak nabi, hakim si ngerunggui bangsa e. Tuhu bangsa e erdosa, patut ihukum emaka Debora tetap mpersingeti bangsa e amin pe situasi mengancam. Debora la ngadi-ngadi mpersingetisa, janah kedungenna ibanna tindak lanjut uga carana nelamatken bangsa si erdosa enda.

Debora la banci kem ngidah perngandung bangsa e, bas sada wari isuruhna me Barak anak abinom i kuta Kedes i Naptali nari, iperentahkenna Barak guna muat 10.000 kalak ibas suku Naftali ras Sebulon ku deleng Tabor gelah erperang ngelawan Sisera. Ipeseh Debora man Barak kerna kemenangen siibereken Tuhan man bana adi ngelawan Sisera. Tetap kel ukur Barak erperang kune nggit Debora ikut lawes ras ia, adi la nggit Debora ikut maka Barak pe la nggit lawes. Isehken Debora Ketetapen ukur Barak enda pe. Nggit ia lawes ras Barak ku ingan erperang. Ijenda siidah uga posisi Barak ras Debora ipake Tuhan nelamatken bangsana. Debora, sekalak diberu ikut muat bagin ibas keamanen bangsana janah ialokennna resiko kai pe siadepina. Bagepe Barak sierperang tetap kal ukurna ibas keterlibaten sekalak diberu eme Debora. Kerja sama Debora-Barak enda tentu bekas pengaturken Dibata guna ncidahken kemenangen man bangsa Israel.

Tole kemenangen enda pe idatken sebab Barak nggit megiken suruhen Dibata arah Debora. Si pemena, Debora nuruh Barak ngelawan Sisera; sipeduaken, kehamaten kerna kemenangen e labo pagi idatken Barak tapi arah tan sekalak diberu eme Jael, ndehara Heber. Biakna erdahin pasti ndatken kehamaten, tapi Barak la meganjang ukurna arah perjuangenna tapi meteruk ukurna mereken kehamaten nandangi sekalak diberu si lenga ijumpaina e. Sipeteluken, Barak nggit megiken Debora ibas perdalanenna ku Kedes-Lau Kison-Deleng Tabor raduken 10.000 kalak dilaki guna erperang. Bekas ia megiken suruhen Dibata, Debora maka terjadi kemenangen man bangsa e.

Sekalak Diberu tergelar Jael, ndehara Heber bangsa Keni ngalo-ngalo Sisera kenca ia talu erperang ras Barak. Iberena minem Sisera janah ibuniken Jael me ia bagi pemindonna. La iarap Sisera maka Jael enda me si munuh ia, Jael tuhu-tuhu perempuan si cerdik ikutkenna kata Sisera muniken ia bas rumahna, la iarapna maka Jael enda nidingi ia. Erkiteken latih iakap Sisera minter entabeh pertunduhna emaka ije me ibunuh Jael ia alu martil ras pantuk pantuk kemah. Kenca ia mate, ituduhken Jael me mait Sisera ku Barak tupung ia reh ku rumahna.

III. PENGKENAINA

Ngerana kerna GENDER lit diskriminasi gender sirusur sibegi alu istilah bias gender. Bias GENDER enda megati kel fokus ku sada gender saja janah mpeteruk gender sideban, misalna diberu teruken asa dilaki janah dilaki iakap gegehen asangken diberu. Bias gender enda pe megati kel me-gender-kan dahin-dahin i tengah-tengah masyarakat. Dahin nuci, ngepel, erdakan, njemur, nujung, mbubut rsd eme dahin diberu. Dahin ku juma bagi mompa, nutung, ngembak, ngkawil, njetor eme dahin dilaki. Tentu labo diberu saja si jadi korban ibas bias gender enda, dilaki pe irugiken sebab ideal dilaki siiban masyarakat pe membatasi ruang gerak dilaki, misalna sekalak dilaki si erdahin jadi tukang salon ianggap aneh “tidak normal” sebab tata rias ibas masyarakat identik idahiken sekalak diberu. Tuhu penting lit pembagian dahin ntahpe tugas ibas masing-masing jelma, tapi pendahin labo lit genderna. Mekatep cara pandangta salah ngidah pendahin e, siakap arus tetap ilakoken sue ras bias gender maka kedungenna kurang kita siergan bagepe sisampaten.

Erlajar kita arah Debora si la banci sinik asum bangsa Israel perlu penampat, mekuah atena megi penderkuh bangsa e janah cidahkenna keleng atena alu ketegasen ngerunggui bangsa e ibas kerja sama simehuli ras Barak. Tegas semalna biak dilaki tapi siidah maka Debora sekalak diberu pe ngasup bertindak tegas bas mekuah atena ngenen situasi bangsa e. Biak kepate ras la banci sinik mperjuangken kebebasen kalak si tertindas jadi bagin si penting bas kegeluhen manusia paksa enda. Ngidah persoalen si gulut, kejahaten, la adil, la banci sihindari. Biak Jael si pang munuh Sisera jadi persinget man diberu maka kita pe arus cerdik ras pang naluken kejahaten i babo doni enda. Diberu e labo kaum si lemah tapi megegeh mperjuangken kebenaren bagepe kebebasen itengah-tengah doni enda.

Adi erperang pasti beluhen ras gegehen si Barak tapi kesempaten munuh Sisera iserahken man Jael sekalak diberu, ertina Dibata mempercayaken Jael guna nelamatken bangsa e ku kemenangen arah kepentaren siibere Dibata. Dilaki ras diberu ipercayaken Dibata guna jadi aron ibas nelamatken doni enda. Aron eme sada system kerja siipercayaken megegeh erdahin. Amin pe Debora sekalak diberu teridah je biak kepemimpinenna arah ngerunggui ntah pengatur strategi perang man Barak. Sistem patriaki ibas kalak Karo labo nguraki pendahin diberu jadi pemimpin. Diberu pe ngasup nge ndahiken dahin selaku pemimpin, sekalak pernanden si ngaturken jabuna; genduari pe nterem nge serayanta diberu baik Pandita ntahpe Pertua/Diaken; ras pe diberu banci mimpin i tengah-tengah masyarakat misalna, Kepala Desa, Bupati, Polwan, rsd. Kebeluhen diberu jadi sekalak pemimpin labo ngertikensa maka diberu e lanai perlu dilaki. Dilaki-diberu e kuh i adepen Dibata emaka kai si banci lakoken dilaki banci nge ilakoken diberu kecuali kodrati.

Barak eme tokoh sipenting bas rencana keselamaten bangsa e, iidahna nge kebeluhen Debora janah ipakekenna kebeluhen e nampati dahinna nelamatken bangsa e. Jon F. Kennedy pernah ngataken, “Jika anda ingin berjalan lebih cepat, berjalanlah sendirian; jika anda ingin berjalan lebih jauh, berjalanlah bersama orang lain”. Dahin e reh nahangna adi lit sinampati ndahikensa. Tetap kel ukur Barak adi ikut Debora. Iakukenna me kebeluhen e amin pe Debora sekalak diberu, janah labo ia merangap ibas dahin. Labo ia si munuh raja e tapi lit diberu si deban eme Jael. Ialokenna keputusen arah Debora nari, labo ia jungut-jungut ibas pembagin tanggung jawab. Barak mere kesempaten man sideban nerusi dahin siakapna banci idahiken Debora ras Jael. Barak mereken kehamaten man diberu si dua e. Zaman genduari penting kel mere peluang ras kesempaten sebesar-besarnya nandangi kalak sirusur tertutup kesempatenna guna berkarya ras erguna. Diberu labo terjeng erdahin i rumah janah dilaki pe labo salah jadi MUA (make-up artist).

Ibas stuktur kepemimpinen pe bage nge, kesempaten jadi pemimpin terbuka man dilaki ras diberu. Semal kel ibas struktural pengurus PERMATA GBKP buen denga tonggak/jabaten ketua iendesken man dilaki. Banci saja dilaki mendominasi ibas kepemimpinen, ras banci ka diberu kin si la nggit ngaloken dahin sebagai ketua. Jabaten e labo ibatasi man dilaki tapi seri nge kesempaten e iendesken man banta. Lanai bo lit alasenta menolak dahin ntahpe tanggung jawab alu alasen GENDER, sebab dahin dilaki ras diberu radu ras nge banci sidahiken. Debora-Barak ersada arihna janah tetap ukurna adi erdahin ras-ras guna arah pemere si pelain-lain. Debora ngerunggui ras notoken Barak, Barak si erperang guna bangsa Israel, ras Jael si maba kemenangen e. Pembagian tugas iendesken sue ras kebeluhen masing-masing, la mbatasi kesempaten erguna arah peranta selaku dilaki-ntahpe diberu. Mari PERMATA GBKP radu ras kita jadi aron Dibata subuk kita dilaki ntahpe diberu.

IV. METODE: Debat Publik (Ketua PERMATA GBKP ulin dilaki ntah diberu?)

1. PERMATA GBKP ibagi alu dua kelompok, sada kelompok pro ras sada nari kelompok kontra. Masing-masing kelompok mempertahankan pendapat rikutken alasen logis dan fakta di lapangan menyangkut kepemimpinan, kira-kira ulin nge si menjabat ketua eme dilaki ntah diberu? kelompok PRO ndukung pernyataan ulin dilaki si menjabat jadi Ketua PERMATA GBKP, sedangken kelompok KONTRA ndukung ulin diberu si menjabat jadi ketua PERMATA GBKP.
2. Kelompok menentukan jubir (juru bicara), ibas debat banci tetap isampati teman-teman sada kelompok ibas debat pro-kontra
3. Kelompok PRO: niksiki kelebihen dilaki sebagai ketua ras nikapken kai kekurangen si diberu ibas lapangen (ketegasen, perukuren, leadership, ide, pengendalian diri, attitude, rsd) banci isikapken penungkunen guna
pemimpin/ketua mengkritik pendapat KONTRA erkawiten ras kekurangen diberu jadi
4. Kelompok KONTRA: niksiki kelebihen diberu sebagai ketua, janah kai kekurangen dilaki sebagai ketua PERMATA GBKP di lapangan/fakta (ketegasen, perukuren, leadership, ide, pengendalian diri, attitude, rsd) banci isikapken penungkunen guna mengkritik pendapat PRO erkawiten ras kekurangen dilaki jadi pemimpin/ketua
5. Pendeta/vicaris/detaser ntahpe Pt/Dk nimpulken ras ngelayasi kerna debat “ketua PERMATA GBKP arus dilaki ntah diberu”? Itutup alu kesimpulen maka ibas kepemimpinen ras hal sideban, dilaku ras diberu ndatken kesempatan si seri.

V. USULAN LAGU

Aku dan Kamu Sama Di Mata Tuhan

Pdt. Natasya Br Tarigan, S.Si. (Teol)
(Komisi Teologia PERMATA GBKP)

BIMBINGAN PA PERMATA GBKP TAHUN 2025 ♦♦♦