KELENG ATE DIBATA JABU SI ERKEMALANGEN MAN BANA

(Perpulungen Jabu-Jabu Intergenerasional)

Mazmur 103:13-14

103:13 Seperti bapa sayang kepada anak-anaknya, demikian TUHAN sayang kepada orang-orang yang takut akan Dia.
103:14 Sebab Dia sendiri tahu apa kita, Dia ingat, bahwa kita ini debu.

MODEL PJJ: PUJI-PUJIAN

KATA PERLEBE :

Lit lirik lagu Karo nina : “Ijakin ate keleng ndai kusayangi, kuidah perbahanenndu rikut pengenen matandu, lanai kepe kena si gel-gel e”. Manusia megati berubah i bas kai pe, termasuk i bas nehken kekelengen. Kekelengenta megati kal tergantung ku bas uga kin perbahanen kalak man banta. Bagepe kekelengen e banci ka erleka sue ras kecibal geluh ras situasinta. Tapi keleng ate Dibata la pernah berubah. Sekali ateNa keleng, rasa lalap ateNa keleng. Nai, gundari seh rasa lalap keleng ateNa la pernah erleka i bas kita. Keleng ateNa pe iberekenNa man kerina jelma. Adi bage kal simparNa Dibata engkelengi kerina manusia, pasti lebih ka pe kekelengenNa e isikapkenNa nandangi jabu si erkemalangen man baNa. Jabu e me sada lembaga si kitik, tapi mbelin kal ngaruhna guna perdalanen kegeluhen sekalak jelma, gereja bagepe bangsa ras negara. Dibata erkeleng ate kal nandangi jabu-jabunta.

ISI :

Masmur 103 e me masmur pujin i bas Daud nari. Masmur pujin e me ungkapan penggejapen si mbages kerna perbahanen Dibata, si mperturah keriahen dingen pujin i bas pusuh kalak singgejapkenca. I bas Masmur 103 enda ibabai pemasmur dirina guna muji Tuhan sabab igejapkenna erbage-bage perbahanen ras biak Dibata si mehuli bas geluhna, subuk secara pribadi bagepe i bas perdalanen bangsana.

I bas Masmur 103:13-14, Daud ngandingken keleng ate Dibata i bas piga-piga gambaren. Secara khusus si jadi bahan PJJnta, Masmur 103:13-14, Daud ngandingken keleng ate Dibata i bas piga-piga poin si banci sipelajari arah kai si ituriken Daud e me :

• Keleng ate Dibata bagi bapa engkelengi anakna nandangi kalak si erkemalangen man baNa.

Uga kin keleng ate bapa man anak-anakna? Adi sikawitken ras perumpamaan si ibahan Jesus i bas Lukas 15:11-32 kerna anak si bene, biak bapa e: melias ras dem perkuah ate. Amin pe anakna nggo nadingken ia, tapi bapa e tetap nimai kemulihenna. Amin pe anak e, la nggejapken kekelengen bapana, tapi bapa labo ngadi engkelengi anakna. Dibata engkelengi kalak si malang man baNa alu keleng ate si la pernah erleka. Tegunta e me erkemalangen man baNa. Erkemalangen man Dibata ertina, nggeluh sue ras kai siipedahkenNa, ngandalken kuasaNa i bas kerina kecibal geluhta.

• Ieteh ras iinget TUHAN i bas kai nari kita itepaNa.

Bas ayat 14, Daud pe nuriken kerna uga kin Tuhan ngidah kecibalta. Si pemena, Ieteh Tuhan i bas kai nari kita itepaNa.  Sipeduaken, ingetNa me maka abu kap kita. Lebih asa kita nandai dirinta, Tuhan lebih nandai ras ngangkai kegeluhenta. Kai kekurangen ras kelebihenta. Kai sura-sura ras perbebenta. Uga masa lalu ras masa depanta. Kerina ieteh Tuhan kerna kita. Bagepe ingetNa nge maka abu kap kita. Ertina lit keterbatasenta. Adi siinget uga Dibata nepa manusia (Bdk. Kej. 2:7), manusia e me abu, nggeluh erkiteken ibere Dibata kesahNa. Ulu geluhta e me kap Dibata. Erkemalangen man Tuhan e perlu kal man banta. Sabab tanpa Tuhan, terjeng abu kal kap kita ngenca. Kita tinepa ras Tuhan si Nepa. Tentu labo seri statusta. Penandai ras penginget Dibata kerna ise kin kita, ras ija nari rehta, erbahanca tetap ukurta. Labo pernah isuruhNa ntah ipindoNa lebih asa gegehta. Adi idiloNa kita lalap gelah rembak ras IA, enda labo guna IA, tapi pelin-pelin guna kita. Em perbahan kelengNa kal ate Dibata kita.

PENGKENAINA :

Keleng ate Dibata jabu si erkemalangen man baNa, enda si jadi tema PJJnta. Si jadi penungkunen, uga kin siikataken jabu si erkemalangen man Dibata? Arah Masmur 128 :1, jabu/ kalak si malang man Tuhan, e me si nggeluh ngikutken kerina perentahNa. Kai kin perentah Tuhan nandangi jabu? Banci siidah arah kai siikataken Paulus man perpulungen Kolose kerna erbage-bage pedah man keluarga Kristen (Kol. 3:18-21):

1. Ndehara : Patuhlah man perbulangen
2. Perbulangen : Kelengilah ndehara
3. Anak-anak : Patuh man orang tua
4. Orang tua : Ula rusursa junguti anak

Keleng ate Dibata man banta ras jabunta. Ieteh ras itandaiNa ise kin kita ras kai siiperluken kita. E maka Ia simereken teman geluh man banta, bagepe si namaken kita jadi sada keluarga. Ise anakta, ise orang tuanta, e kerina bekas pengaturen Dibata. Labo mungkin Tuhan salah namaken kita i bas jabunta. E maka marilah, si pake jabunta jadi ingan nggejapken kekelengen Dibata. Bagepe si babai jabunta nggeluh erkemalangen man Dibata. Sabab adi lakin ras Tuhan labo kita ngasup erbahan kai pe bas geluhta. Si pakeken ka dirinta guna ncidahken keleng ate Dibata man anak jabunta.

Bagi Dibata si ituriken pemasmur i bas bahan renungenta, kita pe perlu ka nge mpebagesi kekelengen, penandai ras pengangkanta kerna anak jabunta. Seh maka reh dekahna kita nggeluh bas jabunta, reh tangkasna keleng ate Dibata sigejapken, bagepe reh bagesna kekelengenta sada ras si debanna.

SHARING/GAMES :

Sharing :

• I bagi kelompok-kelompok i jabu. Adi lit si la reh anak jabuna, banci ka sada kelompok 2-3 kalak ras si la ka reh anggota jabuna (Si reh anggota jabuna, arus ia sada kalompok).
• I bas kelompok e: sharingken/turiken : Kai kekelengen Dibata sienggo gejapkenndu arah jabundu (masing-masing nuriken hal-hal si mehuli/siisyukurina i bas jabuna)

Games :

• Moderator nikapken 1 kertas HVS ras pulpen/spidol i bas setiap kelompok. Ibereken waktu 5 menit man tiap kelompok guna menggambar kai saja atena i bas kertas e alu tema Jabu. Tehnik menggambar :

1. Setiap peserta bas kelompok, la banci ngerana ntah arih gambar kai atena ibanna.
2. Masing-masing peserta bas kelompok pegancih/ bergiliren i bas menggambar.
3. Waktu menggambar 5 menit ngenca

Perwakilen kelompok (adi lit reh anak, iutamaken anak simewakili, adi lalit ise pe banci) nuriken kai erti gambar si enggo dung igambarken kelompokna e adi ikawitken ras tema wari enda.

USULEN ENDE-ENDEN: :

1. Meriah Kal Ukurku Adi Kam Cirem
2. Senang Ukurku Jumpa Ras Jesus
3. Kucinta Keluarga Tuhan
4. Kai Dahinndu Kujenda
5. KEE GBKP No. 414
6. KEE GBKP No. 374

DAFTAR BACAAN:

Pdt. Ribka Mayasari br Tarigan, S.Th, MM

Hp/WA: 085297149714