Bahan PA Mamre18 MEI – 24 MEI 2025

May 19, 2025 Writer-1 Mamre, Uncategorized 0

BIMBINGAN PA MAMRE

TANGGAL, 18 MEI – 24 MEI 2025

 

Teks       : Efesus 2: 6-10

Tema     : Tinepa Dibata Kap Kita Tujuan

Tujuan  : Gelah Mamre:

  • Meteh maka dirina eme tinepa Dibata siterkelin labo arah perbahanna
  • Ngasup tetap nggeluh setia man Dibata dingen ncikep pengajren situhu tuhu

2:6 dan di dalam Kristus Yesus Ia telah membangkitkan kita juga dan memberikan tempat bersama-sama dengan Dia di sorga, 2:7 supaya pada masa yang akan datang Ia menunjukkan kepada kita kekayaan kasih karunia-Nya yang melimpah-limpah sesuai dengan kebaikan-Nya terhadap kita dalam Kristus Yesus. 2:8 Sebab karena kasih karunia kamu diselamatkan oleh iman; itu bukan hasil usahamu, tetapi pemberian Allah, 2:9 itu bukan hasil pekerjaanmu: jangan ada orang yang memegahkan diri. 2:10 Karena kita ini buatan Allah, diciptakan dalam Kristus Yesus untuk melakukan pekerjaan baik, yang dipersiapkan Allah sebelumnya. Ia mau, supaya kita hidup di dalamnya.

1) KATA PENARUH

Paulus nuratken surat man perpulungen Epesus tupung ia ipenjaraken i Roma antara tahun 60-62 M. Tujun Paulus nuratken surat enda eme guna mpeteguhi anak-anak Tuhan si lit i Epesus gelah tetap rurat ras nggeluh ibas sura-sura Dibata si mbelin eme mpersadaken kerina sinasa lit, subuk i Surga bagepe i doni, gelah Kristus jadi kepalana. Enda ilakoken Paulus erkiteken i bas masa si e, enterem denga kalak si tading i Epesus ngelakoken praktek penembahen man Dewi Artemis si ianggap banci masu-masu kegeluhen kalak enda ras praktek penembahen man kaisar si ianggap tuhan. I bas pandangen Paulus, lagu langkah enda banci ncedai kegeluhen kalak si erkiniteken i Epesus sebab la sue ras kebenaren. Erkiteken si e, Paulus mpersingeti kalak si tek i Epesus kerna ise kin ia iadep-adepen Tuhan janah kai si arus ilakokenna i bas statusna e. Kalak enda enggo jadi anak-anak Dibata si ngaloken keterkelinen arah perbahanen Jesus Kristus. Status enda me si njemba guna tetap rurat ras nggeluh i bas sura-sura Dibata eme ndahiken dahin si mehuli. I bas bahan PA enda, mari dage sipebagesi pengangkanta kerna keterkelinen si nggo sialoken, kai hubungenna ras perbahanen si mehuli, dingen kai tanggung jawab i bas kita nggo ngaloken perkuah ate Dibata i bas kegeluhenta tep-tep wari.

 2) URAIAN TEKS

Pengajaren Paulus kerna keterkelinen i bas perikop enda ibenai alu nuriken situasi kegeluhen manusia si male. Enda ilakoken Paulus guna mereken pengertin man kalak Epesus maka situhuna statusna nggo berubah. I bas paksa si lewat, kaiak enda eme manusia si mate dingen sirang ras Dibata erkiteken salah ras dosana (Rm. 3:23, 6:23). Alu tangkas Paulus ningetken kerna biak-biak kegeluhen manusia si ncidahken maka ia nggo mate dingen sirang ras Dibata eme: nggit ngikutken kebiasan doni si jahat, ngusih kegeluhen kalak si la nggit erkemalangen man Dibata, nggeluh rikutken sura-sura kula ras ukur, rsd. Ulih biak-biak kegeluhen e eme ngenanami pernembeh ate Dibata ntah pe kematen janah kerina manusia, subuk kalak Jahudi ras kalak Junani patut ngenanami ukumen ras pernembeh ate Dibata e.

Tapi erkiteken perkuah ate Dibata la ersibar dingen mbelin kel keleng ateNa man manusia, iberekenNa keterkelinen i bas persadan manusia ras Jesus Kristus. Arah persadan ras Jesus Kristus, manusia si biakna mate ras sirang ras Dibata, mulihi nggeluh dingen ngaloken kemulian si nggo isikapken Dibata. Alu kata si deban, statusna nggo iubahken Dibata. Keterkelinen e erkiteken lias ate Dibata dingen erkiteken tek manusia man Kristus labo ulih perbahanen ntahpe pendahin. Adi si pepayo, maksud Paulus i bas perikop enda guna negasken maka keterkelinen e ula sempat erbahan manusia meganjang ukur ntah pe muji bana. Latar belakang kota Epesus banci jadi sada alasen Paulus guna mereken pandangen enda. Efesus eme sada kota si penting i bas wilayah Provinsi Asia. Ibas kota e, enterem jelma si ngidah maka kinibayaken me si pentingna ibas kegeluhen manusia. Alu kinibayaken kai pe banci ibahan janah alu kinibayaken kai pe banci i tukur. Paulus ningetken maka manusia labo terkelin erkiteken usaha ntah perbahanenna apai ka arah ulih kinibayakenna, tapi erkiteken lias ate ras kinitekenna man Jesus nge. Erkiteken si e, labo lit alasen manusia guna peganjang dirina i bas keterkelinen si alokenna seakatan ngataken bujur man Dibata.

Lias ate Dibata icidahkenNa arah Jesus Kristus si mate man manusia tupung manusia nggeluh ibas kubang dosa. Kita si nggo mate erkiteken dosa ras kesalahenta, mulihi ipekeke raduken ras Jesus Kristus i bas kekekenNa. I bas persadanta ras Jesus Kristus, kita si nai imbang Dibata nggo iubahken jadi anak-anak kekelengen Dibata. Kerina enda ilakoken Dibata labo erkiteken manusia mehuli tapi erkiteken keleng ate Dibata menusia dingen la ateNa manusia bene i bas kesalahen ras dosana. Lias ate Dibata eme pemere si ibereken Dibata man manusia si labo patut guna ngalokensa. I bas dampar si deban, keterkelinen ialoken i bas kiniteken. Kiniteken si ni maksudken Paulus ibas perikop enda la terjeng pengakun maka Jesus eme Tuhan tapi seh ku bas perbahanen si turah erkiteken pusuh si ersuruh selaku tanda pengataken bujur ibas perbahanen Dibata si nggo ialoken arah Jesus Kristus. Lit empat unsur si penting ibas konsep kiniteken e eme: kiniteken maka Jesus Kristus si nggo mate ras si nggo keke tuhu-tuhu Tuhan ras Juru Selamat pribadi man banta si icidahken arah pengendesen diri bagepe sura-suranta man baNa, kiniteken si teridah arah pertobaten eme sada upaya gelah kegeluhen banci reh ulina bagi sura-sura Dibata, kiniteken si teridah arah penyucian ntah pengudusen diri eme sada upaya gelah lanai seri ras doni enda, ras kiniteken si tetap njemba guna setia dingen ngasup ngataken bujur man Dibata.

Arah kai si isingetken Paulus i bas perikop enda, banci siantusi maka status selaku tinepa Dibata sialoken i bas persadanta ras Jesus erkiteken keleng kel ate Dibata kita. Labo erkiteken kita metunggung tapi Dibata si petunggungken kita. Status e arusna mabai kita kubas semangat guna tetap ngataken bujur dingen mpermuliaken Ia arah kerina dahin-dahin si mehuli si ilakoken kita. Dahin-dahin e labo silakoken gelah kita terkelin tapi silakoken dahin-dahin e erkiteken Dibata nggo leben mereken keterkelinen man banta. Dahin-dahin e silakoken jadi sada bukti maka kita nggo terkelin dingen pengataken bujurta i bas kita nggo iselamatken Dibata.

 3) PENGKENAINA

Piga-piga bulan enda lit sada geraken si i gelari Kristen Progresif sicukup menarik perhatin dingen viral erkiteken melala ipublikasiken arah media sosial. I Indonsia, geraken enda ipopulerken sekalak tiktoker si tergelar Brian Siawarta. Lit piga-piga pengajaren Kristen Progresif enda si ianggap la sue ras pemahamen kinitekenta. Pemena, Alkitab labo kata Dibata erkiteken Alkitab itulis manusia janah banci salah. Alkitab bali ras buku sejarah si banci ipelajari alu akal ras metodologi sejarah. Peduaken, manusia terkelin labo perban lias ate Dibata arah Jesus Kristus tapi erkiteken perbahanen si ilakokenna. Erkiteken si e, manusia arus ngelakoken perbahanen si mehuli segedang geluhna gelah banci ia selamat. Peteluken, manusia lit erkiteken proses evolusi janah sipentingna eme geraken-geraken sosial sabab e sierbahanca manusia reh majuna dingen reh ulina. Peempatken, palas guna ngelakoken geraken sosial enda eme pengajaren Jesus kerna kekelengen janah enda ianggap jadi pusat pengajarenNa (Joh. 15:17). Pelimaken, manusia labo perlu mbiar nandangi rawa Dibata sebab i bas paksana labo lit manusia si bengket ku bas Neraka sebab Dibata e perkeleng kap.

Adi siperdiateken pengajaren Kristen Progresif enda, tuhu-tuhu la sue ras si isuratken i bas Pustaka Si Badia. Erkiteken si e, pengajaren enda la perlu sialoken amin gia tempa-tempa menarik dingen lit hal-hal baru si tawarkenna si la seri ras pengajaren si sedekah enda sialoken. Pustaka Si Badia arus jadi palas pengajaren man banta janah erlajar kita guna tetap nggeluh alu setia i bas pengajaren si nggo sialoken. Ula sempat mis siakap pas sada-sada pengajaren adi nterem kalak si ngatakensa pengajaren e menarik ntah viral i bas media sosial. Pengajaren-pengajaren si reh perlu lebe isiksiki erpalasken kai nina Pustaka Si Badia. Kalak si tek man Tuhan la nukah i jolah-joleken angin pengajaren kai pe sebab lit palas kinitekenna si paguh si mabai ia guna erdalan i bas si ngena ate Tuhan.

 

4) DISKUSI

  1. Erpalasken ogenta wari enda, kai si erbahanca manusia terkelin?
  2. Kai guna perbahanen si mehuli i bas keterkelinen si nggo sialoken?

 

5) Usulen Lagu

Pdt. Wisli Pinem, M.Th.

HP: 0821 7403 2986

Post Views: 1,957