Sepengodak Sepengole

Gereja Hidup dalam Satu Pemahaman, Satu Tujuan dan Mempunyai Hubungan Emosional yang Sama

Nas: Kisah Para Rasul 2:43-47

Tema: Sepengodak Sepengole

Gelah PERMATA GBKP

1. Ngangkai ras ngasup nuriken kiniulin kegeluhen perpulungen mula-mula

2. Ngayaki kegeluhen persadanna alu sada pengertin, sada tujun, sada penggejapen guna kemajun kiniersadan PERMATA GBKP

Metode: Mendiskusikan P3RT Bab IV Psl 16:1a-d

I. BENA KATA

Manusia adalah makhluk sosial. Semal kal si begi dingen si oge kerna kalimat enda. Tapi ibas sada sisi, manusia pe makhluk individualis. Amin gia lit ketedehen atena nandangi hubungen sosial, tapi tetap nge erkantingen ku kepentingen pribadi. Ertina dikune la lit datna kai pe ibas hubungen sosiale enggo pasti itadingkenna. Hubungen sosial si ibahan manusia nai-nai nari tetap ibahan erkiteken lit tujun bersama si atena icapai ibas hubungen sosial e, contohna: perlindungen, kebutuhen ekonomi, iketen tradisi, ras sidebanna. Adi si kaitken ku bas kiniersadan ibas persekutuan PERMATA GBKP, kai nge nilai-nilai si banci erbahansa anggota PERMATA GBKP tetap setia ibas persekutuan e? Kai nge si banci erbahansa kujapa pe anggota PERMATA GBKP e tetap ertedeh ate nandangi persekutuanna PERMATA GBKP? Kai nge bedana persekutuan PERMATA GBKP ras sidebanna sierbahansa anggota e nggejapken identitas si khusus ibas dirina selaku anggota PERMATA GBKP? Guna ngantusi penungkunen enda mari si pahami PAnta wari enda.

II. ISI

Kenca Yesus enggo nangkih ku Surga ras kenca enggo nusur Kesah Si Badia, erteremna kalak si tek man Yesus dingen iperidiken. Lit buena kira-kira telu ribu kalak itambahken ku perpulungen e (ayat 41). Alu pengayuken Kesah Si Badia, radu ras ia kerina pulung dingen megiken pengajaren Rasul-Rasul, dingen sikeleng-kelengen bagi si ersenina. Padahal situhuna perpulungen e reh ibas erbage-bage latar belakang: lit kalak Galilea nari, kalak Partia, Media, Elam, Mesopotami, Judea, Kapadokia, Pontus, Asia, Perigia, Pampilia, Mesir, taneh Libia deher Kirene, kalak Jahudi, kalak si enggo i Jahudiken, Kreta, ras Arab nari (Nehen ayat 9-11).

Ibas erbage-bage latar belakang si berbeda enda tentu melala nge rungga-runggana. Tapi perbedaan e la jadi persoalen ibas perpulungen erkiteken kelengna atena nandangi Berita Si Meriah si enggo ialokenna, eme kematen ras kekeken Yesus Kristus guna nebusi dosa manusia (ayat 14-36). Tergejap man bana kerina kekelengen Yesus Kristus e janah ialokenna Berita Si Meriah e desken ngaloken erta si meherga (Bnd. Mat. 13:44-46). Dingen teridah melala terjadi tanda-tanda sengget si encidahken kuasa ras keleng ate Dibata tetap erdahin ibas perpulungen e (ayat 43). Ibas identitasna si pelain-lain e, ipelimbarui Dibata kerina perpulungen e jadi jadi sada identitas si mbaru eme pengikut Kristus, si encidahken kiniersadan selaku kalak si enggo imenangken ibas Kristus (ayat 40).

Kiniersadan perpulungen e teridah ibas ia tetap pulung ras-ras (ayat 44) si encidahken maka ketedehen ate perpulungen e labo nggeluh erbana-bana (individualisme), tapi nggeluh ersada (bersekutu). Kata Dibata e mereken ngaruh si mbelin man perpulungen maka si lit ibas ia pe ipakena ras-ras, janah taneh dingen ertana pe nggit ia ngorbankensa guna ipake ras-ras sue ras keperlun sekalak-sekalak (ayat 45). Ermeriah ukur perpulungen makeken si lit ibas ia guna penahangi baban geluh temanna sada kiniteken. Biak nampati labo sada kewajiben, tapi jadi sada kiniriahen ukur muat bagin guna sikeleng-kelengen.

Alu ersada ukur tep-tep wari ia pulung i rumah Pertoton (ayat 46). Buah kiniteken perpulungen teridah ibas ketedehenna nandangi Kata Dibata (Bnd. Msm. 84). Tedeh atena nandangi persadanna ras Dibata rikut pe persadanna ras temanna sada kiniteken. Janah sada tradisi si mehuli ibahan perpulungen eme man ia ras-ras i rumahna masing (memecahkan roti di rumah masing-masing secara bergilir) alu nginget Lakon Persadan Si Badia si jadi peringet-ingeten kempak Yesus. Meriah kal ukurna kerina dingen meteruk ukurna janah muji Dibata ibas persadanna e. Kiniersadan e jadi kebayaken si erbahanca erlumba-lumba perpulungen ngehamati sada ras sidebanna. Cara nggeluh si mehuli dingen mehamat sada ras sidebanna e me buah kiniteken si iperani perpulungen e.

Kiniteken man Yesus si teridah ibas kegeluhen perpulungen jadi sada “gaya hidup” (way of life). Meriah kal ukurna kerina si sampat-sampaten dingen sikeleng-kelengen sada ras sidebanna tanpa memandang status sosial. Si jadi perayakenna eme kai sura-sura Dibata, janah tadingkenna kerina sura-sura doni. Sepengodak sepengole ia kerina guna ngelai sada ras sidebanna. Emaka erbuena me kalak si tek man Yesus erkiteken buah kiniteken perpulungen e (ayat 47). Kerina perpulungen e nggit ipakeken dingen ipimpin Tuhan maka tep-tep wari tambah kalak si iselamatken Tuhan alu cara nggeluh perpulungen e.

III. PENGKENAINA

Kerehen Yesus ku doni enda mbangun sada hubungen si mehuli antara Dibata ras manusia, rikut pe manusia ras sesamana. Emaka kalak si enggo si deban. Emaka komunitas (persekutuan) ibahan Dibata guna kita berbagi ras iselamatken tentu harus memiliki hubungen si mehuli antara Dibata ras kalak bertumbuh ibas Kristus. PERMATA GBKP lit labo erkiteken sura-sura manusia, tapi sura-sura Tuhan guna anak perana ras singuda-nguda ibas GBKP lit inganna guna sepengodak sepengole radu ras bertumbuh ibas Kristus. Emaka PERMATA GBKP labo hanya sebuah organisasi, tapi pe sada keluarga kinirajan Dibata si enggo itebus, si jadi ingan sikeleng-kelengen dingen sisampat-sampaten maba baban geluh (Bnd. Gal. 6:2a).

Perpulungen mula-mula si jadi nas bimbingenta wari enda jadi sada role model si mehuli guna majekken kula ni Kristus ibas persadanta. Ibas Pustaka Si Badia la lit kalak si nggeluh erbana-bana si ngena ate Dibata. Kerina tokoh-tokoh Alkitab harus masuk ibas sada persekutuan inganta ersada, ersaksi dingen ngelai. Tapi kinatana si genduari enda, melala kalak si kecewa nandangi persekutuanna, termasuk pe ibas PERMATA GBKP. La sitik anggota PERMATA GBKP si kisat, ndarat ibas persekutuan, atau lanai nggit berkecimpung erkiteken kecewa nandangi kalak si lit ibas PERMATA GBKP ban la iperdiateken, la ibegiken usulna/cakapna, ras sidebanna. Siangka nge persekutuan PERMATA GBKP e pemere Dibata man banta, khususna anak perana singuda-nguda ibas GBKP? Realitana persekutuan e sikerajangen Tuhan dingen harus tetap siergaken ras sikelengi radu ras kerina.

Nyatana siidah genduari melala terjadi konflik ibas tubuh PERMATA GBKP. Konflik e banci saja si pandang punjuten, turah kelompok-kelompok (gap), atau lanai reh PA, atau jemaat suam-suam kuku” (bagi belo la ertangke). Memang konflikna banci la teridah arah darat, tapi ibas pusuh terjadi konflik batin si erbahansa lanai siangkan pekepar. Wari enda persingeti kita gelah ula sura-suranta jadi penggurunta; ula sura-suranta jadi dibatanta. Sipersada arihta dingen sepenggejapen kita sada ras sidebanna Labo siarapken kalak si deban lebe ngangkai dirinta, tapi berusahalah kita guna erpengangkan nandangi kalak si deban. Sebab Kristus pe leben ngelakoken si mehuli nandangi kita.

Rencana Dibata ibas kiniersadanta eme gelah ula kita nggeluh erbana-bana (mementingkan diri sendiri) tapi erlajar guna nampati, menopang membimbing, engkelengi ras ngelai. Si jadi kepentingenta eme kepentingen Dibata. Si jadi agenda eme agenda Dibata. Si termulia tetap gelar Dibata. Adi enggo menyimpang arah si e, kita enggo “mencuri kemuliaan Tuhan”. Perlu si siksiki pusuh ukur PERMATA GBKP alu mbages kerna motivasi ras ulih perbahanenta ibas persekutuan si enggo ibereken Dibata man banta.

Si jadi perayaken ibas kiniersadan ibas PERMATA GBKP eme ngelumbaken sura-sura Dibata si mehuli man kerina anggota. Emaka ibas persekutuan PERMATA GBKP lit visi ras misi guna mabai kerina anggota PERMATA GBKP bertumbuh bersama ku tujun si enggo itentuken. Perban si e maka kerina kepengurusen PERMATA GBKP mulai dari wilayah pusat,  klasis, runggun, terus ku perpulungen ras sektor banci radu ras sepengodak sepengole ndahiken dahin pelayanen alu tutus. Kerina kepengurusen labo nggeluh erbana-bana atau mementingken kelompok atau kepengurusenna saja, tapi harus sejalan ras visi misi ras pokok-pokok peraturan rumah tangga (P3RT) PERMATA GBKP. Kerina pengurus harus nggit ipelimbarui Kesah Si Badia guna ndahiken dahinna alu tutus guna Tuhan, labo guna manusia.

IV. METODE: Diskusi + Mereken Usulen

1. Kai-kai saja nge sierbahansa maka perpulungen mula-mula ibas ogenta ndai tetap nggeluh ersada dingen sepengodak sepengole ibas kegeluhenna? Janah pelajaren kai si banci silakoken segelah PERMATA GBKP ibas inganta e reh ersadana?

2. Ibas P3RT PERMATA GBKP bab IV Pasal 16:1a-d iturikenna maka periodesasi pengurus PERMATA GBKP i wilayah Runggun + Perpulungen + sektor eme 2 tahun; i wilayah Klasis 3 tahun; janah i wilayah Pusat eme 4 tahun. Coba sidiskusiken uga nge pendapatta kerna periodesasi enda, apakah sedekah enda enggo cukup mehuli entah langa? Janah kai alasenna? Sibereken pandangenta janah hasil diskusinta nomer 2 enda si baba jadi sada usulenta ku MUPEL PERMATA GBKP 2026.

V. USULAN LAGU

Jadikan Kami Satu

 

Kekecewaan terhadap gereja lokal kita memang baik karena itu menghancurkan pengharapan palsu tentang kesempurnaan. Semakin cepat kita melepaskan ilusi bahwa sebuah gereja (persekutuan) harus sempurna untuk dapat dikasihi, semakin cepat kita berhenti berpura-pura dan mulai mengakui bahwa kita semua tidaklah sempurna dan membutuhkan anugerah. Inilah awal dari komunitas yang nyata.

Dietrich Bonhoeffer

Pdt. Demar B. Ginting, S.Th

Ingat! Minggu Depan diharapkan agar PA dibawakan oleh Pendeta, Vicaris atau Detaser

BIMBINGAN PA PERMATA GBKP TAHUN 2025