GUNA DAME KITA IPILIH DIBATA

Kolose 3: 12 – 15

3:12 Karena itu, sebagai orang-orang pilihan Allah yang dikuduskan dan dikasihi-Nya, kenakanlah belas kasihan, kemurahan, kerendahan hati, kelemahlembutan dan kesabaran.
3:13 Sabarlah kamu seorang terhadap yang lain, dan ampunilah seorang akan yang lain apabila yang seorang menaruh dendam terhadap yang lain, sama seperti Tuhan telah mengampuni kamu, kamu perbuat jugalah demikian.
3:14 Dan di atas semuanya itu: kenakanlah kasih, sebagai pengikat yang mempersatukan dan menyempurnakan.
3:15 Hendaklah damai sejahtera Kristus memerintah dalam hatimu, karena untuk itulah kamu telah dipanggil menjadi satu tubuh. Dan bersyukurlah.

(Sasaran Pelayanan GBKP tahun 2025 poin IV: Tidak Ada Perpecahan Jemaat Karena Konflik)

MODEL PJJ: BUDAYA

KATA PERLEBE :

I bas sada kompetisi, kune kita terpilih jadi salah sada pemenang tentu mahanca kita ermeriah ukur, dingen tentu saja lit tanggung jabab si terbelinen guna ipertanggung-jababken kita i bas kai si enggo itetapken man banta. Seh maka lit istilah singatakenca, mempertahankan akan jauh lebih sulit daripada meraih. Bage me pe i bas bahan PJJ enda ipersingeti kita selaku kalak si tek, si enggo ipilih Dibata jadi sikerajangenNa gelah tetap ngasup nggeluh ncidahken biak geluh kalak si enggo ipilihNa e.

ISI :

Surat Kolose enda itulisken Paulus tupung ia i bas penjara tapi tetap iperdiatekenna kiniteken perpulungen Kolose. Ija paksa si e lit guru perguak nehken pengajaren si papak kerna keselamaten. Ikataken maka keselamaten e banci ialoken tep tep kalak adi idalankenna tradisi sunat bagepe aturen aturen adat si deban (Kol. 2: 11; 16).

E maka surat enda e me surat persinget dingen pergegeh gelah perpulungen Kolose tetap nggeluhken geluhna bagi singena ate Tuhan erpalasken kinitekenna.

Bahan ogenta Kolose 3:12-15 alu tangkas Paulus ngingetken kerna statusna selaku anak-anak Dibata. Tentu status sebage anak anak Dibata enda arusna mabai ia ncidahken status selaku anak-anak Dibata arah perbahanen, pengerana bagepe perukuren. Sabab kai si ilakoken kita tentu mpengaruhi penilaian kalak si deban nandangi kita. Bagi lit nina pepatah arah buahna itandai batangna. Arah perbahanenta, tentu tandai kalak ise Bapanta. E maka kin si jadi biak Bapanta, arus min sicidahken e i bas dampar geluhta.

(Karena itu, sebagai orang orang pilihan Allah yang dikuduskan dan dikasihiNya, kenakanlah belas kasihan, kemurahan, kerendahan hati, kalemah lembutan dan kesabaran). I bas sienda lit 3 hal si melekat i bas kalak si tek e me anak anak Dibata (orang pilihan), ipilih jadi sikerajangenNa (dikuduskan) ras ikelengiNa (dikasihi). Selaku kalak si tek, anak anak pilihen Dibata tentu status enda sialoken labo erkiteken kengasupenta tapi erkiteken perkuah ate Dibata man banta. Dage i bas perkuah ate Dibata man banta e me maka ate Dibata pe kita ngasup ncidahkenca nandangi kalak si deban. Seh maka iajuk kita gelah makeken paken ate perkuah (kasih), mehuli (kemurahan), rukur meteruk (kerendahan hati), lemah lembut ras sabar.

Guna dame kita ipilih Dibata, tangkas man banta maka sura sura Dibata uga maka kita ngasup saling menerima sada ras si debanna. Persoalenna rusuren denga kita la ngasup ngaloken perbedan si lit itengah tengahta, kita nggeluh i bas kiniganjangen ukurta bagepe maksaken sura suranta si kedungenna mabai ku bas perpecahen. Ola kam pergelut dingen sialem-alemen salah… (ay. 13). Gelah ngasup kita nggeluh i bas dame, la banci lang maka kita arus nggit nggeluh i bas sialem alemen salah. Sabab perdamen e rehna i bas pusuhta nari. Orang yang terluka cenderung akan melukai orang lain. Orang yang hidupnya, hatinya tidak ada kedamaian mustahil akan mampu menciptakan kedamaian. E maka iajuk kita i bas ayat 13 enda ngasup ngalemi (mengampuni), sabab Tuhan enggo leben ngalemi salahta. Ula sipebelin ke’aku’nta, tapi pebelinlah kesedarenta maka kita pe manusia perdosa kap, tapi Dibata ngalemi kita.

Janah ibabo si e kerina, arus kam sikeleng kelengen sabab keleng ate mpersadaken kerinana alu serta (ay 14). Kekelengen siimaksudken i bas bagin enda e me agape (keleng ate Dibata man manusia) uga kita ngasup ncidahken keleng ateta e man kalak si deban amin gia sekali la bagi ukurta. Tentu enda sada perkara si labo mesunah ndalankenca, tapi adi kita nggeluh i bas kerembakenta ras Dibata maka Kesah Si Badia e me si mpengasup kita. Nggeluh sikeleng kelengen e me sada keriahen si mbelin dingen mahanca kita mejuah juah. Maun-maun i bas mbue erbage sapih-sapih kita banci erbahanca turah ate nembeh ntah la siangkan. Tapi adi sipakekenlah keleng ateta e i bas perbedan si lit e, tentu e jadi sada kebayaken man banta.

Dame siibereken Kristus i bas pusuhndu min singajari kam… (hendaklah damai sejahtera Kristus memerintah dalam hatimu) (ay 15), kita ipilih dingen ikelengi Dibata labo guna dirinta saja, tapi guna kemulianNa, guna kiniersadan kulaNa. IberekenNa kepentaren man banta i bas penandaita si payo kerna IA mahanca kita ngasup nggeluhken geluhta bagi singena ateNa. IperdamekenNa kita ras Dibata tentu gelah kita pe ngasup nggeluh i bas perdamen sapih sapih kita. Uga gelah i bas kegeluhenta kalak si tek, si kin enggo Ipilih Dibata jadi anak anakNa ngasup nehken syalom (damai sejahtera) itengah tengah kegeluhenta si dem alu dosa.

PENGKENAINA :

I bas Perpulungen Jabu-Jabunta enda erlajar kita arah Paulus i bas penjara nari, lit i bas kesusahen tapi ngasup tetap ngataken bujur man Tuhan dingen ngasup ngaloken situasi janah tetap jadi pasu pasu. Melala erbage i bas geluhta si mahanca la kita mejuah juah, la nggeluh i bas perdamen seh maka la kita ngasup jadi si maba dame ku sekelewetta. Tapi ibabo kerina kinilangasupenta, pengendesenta man Dibata, penandaita kerna dirinta iadepen Dibata tentu e mabai kita erlajar nggeluh i bas kiniteruken ukur gelah ngasup ngaloken kalak si deban. Sabab guna si e me Dibata milih kita jadi sikerajangeNa, e maka ngataken bujurlah janah lumbakenlah pengataken bujurta e arah kerina dampar geluhta. Kehadirenta selaku anak Dibata banci min mahanca perpulungenta, persadanta reh ulina bagi singena ate Dibata.

DISKUSI :

1. Dibata enggo milih kita jadi anak anakNa, kai nge sierbahanca megati denga kita lenga ngasup nggeluh erdame? Turiken pengalamenndu!
2. Bahanlah komitmen ras kai siarus ilakokenndu gelah ngasup jadi si maba dame subuk i bas jabu, itengah perpulungen bagepe masyarakat!

AKSI:

Bahan video sektorta lit I bas dame dingen nggit maba dame.

USULEN ENDE-ENDEN: :

1. KEE GBKP No. 325:1, 2
2. KEE GBKP No. 59:1, 6
3. KEE GBKP No. 392:1-3
4. KEE GBKP No. 286:1-3

DAFTAR BACAAN:

Pdt. Maria Veronika br Perangin-angin, S.Si

HP/WA:  0811597874