KUBEREKEN SEPERSEPULUH ASA SI SIBEREKEN TUHAN
Kejadin 28:16-22
(Persepuluhen)
MODEL PJJ: KESAKSIAN
KATA PERLEBE
Nehken persembahen perpuluhen situhuna enggo imulai i bas Abram nari, ija kenca ia menang naluken Raja Kedorlaomer ndarat raja Sodom ngalo-ngalo ia ku berneh Sawe. Bage pe Melkisedek raja Salem, Imam Dibata si Meganjangna, mbaba roti ras anggur man Abram. Ipasu-pasuna Abram, e maka ibereken Abram sepersepuluh I bas kerina barang rampasen si idatsa ndai man Melkisedek (Kej.14.16-20)
Bagem pe si idah maka persembahen persepuluhen e me salah sada sumber harta milik GBKP (Tata Gereja GBKP BAB XLII; Pasal 178 poin 2)
ISI
- Isuruh Isak me Jakup lawes ku Mesopotami ndahi Laban, Anak Betuil, kalak Aram, turang Ribka. Si enda ilakokenna sabab enggo ietehna nembeh ate Esau man Jakup erkiteken pasu-pasu si ibereken Isak man anak Jakup si arusna kin man Esau, gelah ula jadi si la mehuli e me banci jadi sibunuhen kari anakna enda.
Itadingken Jakup Berseba, jenari berkat ia kempak Haran. Nandangi sundut matawari seh me ia i bas sada ingan, e maka ije ia erberngi. Medem ia janah ibantalkenna sada batu. Ernipi me ia i bas nipina idahna sada redan pajek i babo doni, ujungna seh ku langit, ku teruh ku das ije malekat. Tedis Tuhan i deherna nina, “Aku kap TUHAN Dibata Abraham ras Isak. Man bandu ras kesusurenndu Kubereken taneh inganndu medem enda.
Ingetlah Aku ras kam dingen ngkawali kam ku japape kam lawes, janah Aku ka pagi maba kam mulih ku taneh enda. La Kutadingken kam seh enggo dung Kulakoken kerina si Kukataken bandu e.” (ay. 10-15)
- Medak me Jakup, jenari nina, “I jenda kepe TUHAN; ndai la kuteh maka Ia i jenda!” Mbiar ia nina, “Kebiaren kap ingan enda! Ugapa pe rumah Dibata nge enda; ugapa pe ingan enda pintun si talang kempak surga.” Jakup nggejapken maka ia enggo jumpa ras Tuhan janah enda tentu sada perkara si mbelin.
Lampas erpagi-pagi keke Jakup, ibuatna batu si ibantalkenna ndai, ipajekkenna jadi sada tanda peringet-ingeten. Iamburkenna minak saitun ku batu e tandana nggo ipersembahkenna man Dibata. Ibahanna gelar ingan e Betel (Ope si e kota enda igelari kalak, Lus).
- Kenca bage ersumpah Jakup man TUHAN, “Adi itemani Dibata aku janah adi IkawaliNa aku i bas perdalanenku, janah adi IberekenNa bangku uis ras pangan, adi selamat aku mulih ku rumah bapangku, e maka TUHAN me jadi Dibatangku. Batu peringet-ingeten si nggo kupajekken enda pagi jadi ingan ersembah man Dibata, janah kubereken pagi sepersepuluh i bas kasa kai si IberekenNdu bangku.”
Jadi siidah ijenda maka Jakup nge si erpadan lako mereken persembahen persepuluhen man Tuhan, adi padan Tuhan lako ngkawali ia tuhu-tuhu inanamina. Janah ipersembahkenna sepersepuluh i bas kasa kai si ibereken Tuhan man bana. Kedungenna sieteh maka nehken persepuluhen sada perentah Tuhan man kalak Israel janah kerna nehken persembahen persepuluhen enda arus ipatuhi kalak Israel.
PENGKENAINA
Si banci jadi perenungen man banta arah kata Dibata enda:
- Kubereken Sepersepuluh Asa Si Ibereken Tuhan (tema)
Bagi enggo ndai siidah arah nats PJJ-nta, maka situhuna nehken persepuluhen e me jadi sada bentuk pengataken bujur man Tuhan i bas enggo ialokenna padan Tuhan lako ngkawali ras mereken pasu-pasuNa man Jakup.
Persembahen persepuluhen e me pengataken bujur i bas kasa kai si ibereken Tuhan. Jadi enggo leben sialoken pasu-pasu i bas Tuhan nari arah ulih pendahin ntah usaha si lakoken kita. Arah kasa kai siibereken Tuhan man banta si bahanlah jadi persembahken sepersepuluh man Tuhan.
Sepersepuluh bas Padan Si Ndekah tuhu-tuhu sepersepuluh, tapi si enda labo soal angka-angka penekanenna, tapi uga kita tuhu-tuhu ngakui arah kinitekenta maka kerina ulih pendahinta e sialoken erkiteken pasu-pasu Tuhan. Jadi kedungenna sepersepuluh labo mberat merekenca janah kedungenna jadi angka si kitikna i bas kita nehken persembahen persepuluhen man Tuhan. Janah persepuluhen labo nari bagin persepuluhen tapi tuhu-tuhu persepuluhen si ibereken alu ukur meriah ras ukur ersuruh.
- Adi nulih kita ku Padan Si Ndekah, maka perpuluhen e gunana man Kalak Lewi si erdahin i bas Rumah Tuhan. Kalak Lewi la dat bagin i bas pembagin Taneh Warisen bas tengah-tengah kalak Israel. Kalak Lewi idilo ka nehken persepuluhenna man Imam (bdk. Bilangen 28:21-32). Janah bas gerejanta GBKP maka persembahen persepuluhen e ipergunaken guna ndahinken dahin Kesaksin, Persadan ras Pelayanen (Tri Tugas Gereja).
Jadi kerina perpulungen idilo gelah nehken persembahen persepuluhen enda ku Rumah Tuhan, sabab labo lit perpulungen si la ngaloken pasu-pasu bas Tuhan nari. Janah patut kal kita ngataken bujur erkiteken kasa kai pasu-pasu si enggo si aloken bas Tuhan nari.
Bage pe arah Bilangen 28 ndai si idah maka labo perpulungen saja si nehken persepuluhen tapi pe serayan-serayan Tuhan Pendeta, Pertua ras Diaken ikut nehken persepuluhen. Mereken usihen man perpulungen i bas ncidahken kehamaten man Dibata.
Kai padan Tuhan man kalak si setia nehken persembahen persepuluhen man baNa? I bas Ulangen 14:22-29, jelas kal i je ituriken maka adi perpulungen Tuhan si setia ndalankenca la banci lang ipasu-pasu Tuhan i bas kasa kai si dahiken na. Jadi situhuna adi setia kita ndalankenca banci si idah uga pasu-pasu ras perkuah ate Tuhan e si nanami bas kegeluhenta. Mari dage kerina kita ngawan perpulungen ras serayan-serayan Tuhan si sehken persepuluhenta alu setia man Tuhan.
DISKUSI :
- Kuga pengertinndu kerna persembahen persepuluhen ras pendalankenndu sedekah enda?
- Ipindo sekalak ntah dua kalak naksiken man perpulungen i bas ia enggo ndalanken alu setia nehken persembahen persepuluhenna!
USULEN ENDE-ENDEN: :
- KEE GBKP No. 433:1-3 https://www.youtube.com/watch?v=pSHqGT0JBF8
- KEE GBKP No. 385:1-3 https://www.youtube.com/watch?v=90JL9tyelzE
- KEE GBKP No. 316:1-3 https://www.youtube.com/watch?v=U4qvrrlmMAw
- KEE GBKP No. 451:1-3 https://www.youtube.com/watch?v=cYlzjh64EBk
DAFTAR BACAAN:
- Akitab Penuntun Hidup Berkelimpahan: Penerbit Gandum Mas Malang: Hal.1486-1487
- Tata Gereja GBKP 2015-2025
- Ensiklopedi Alkitab Masa Kini: Yayasan Komunikasi Bina Kasih; Hal.252
- Perpuluhan Bibleinfo.com
Pdt. Sahabat Perangin-angin, M.Th
HP/WA: 082125262771